LESSON 3 January 11 – 17 | Pasian Lungkimsak Nading

 

LESSON 3   January 11 – 17

Pasian Lungkimsak Nading

SABBATH NITAAK

Tu Kaalsung Simding: Luke 15:11–32; Zeph. 3:17; Eph. 5:25–28; Isa. 43:4; Rom. 8:1; Rom. 5:8; Mark 9:17–29.

Kamngah: “Note lakah TOPA na Pasian om a, hong honkhia ding galhangpa ahi hi. Amah in note hangin lungdam in kipak ding hi. Amah in itna tawh note daitakin hong omsak ding a, Note tungah lungnuam in la a sa ding hi.” (Zephaniah 3:17, ZSV)

 

Atunga thupiang lungngai inla: Pa ni khatin kum nga bek apha tano khat in a pa aa ding letsong gina khollo a pa pia dingin ngaihsun in. A pa lungdam ding lunggulh mahmahna tawh tua bangin a pa pia hi.

A pa in, “Ka ta aw, na letsong thupisa ke’ng. Kei lungdam theihna ding nang hong piaktheih bangmah omkei. Nang nong piak banglel te ke’n zong leithei lel, keimah’n kong piaksa sum teng mah tawh nalei hi peuh lomaw! Nangmah’n tangkik zaw inla, bangbang hitaleh hong it veve ing maw”.

Mawk aw! A pa’ dawnna na koici ngaihsut na hiam? Lunglut mello, om ngeungau, nuamna mel theilo. Pasian in hong tuacih hiam? Pasian i lungdam sakthei takpi diam? Mi puksa, mawhna kidim, gilo lailai ihih manin, ngaihsut haksa – aihhang, Pasian ki lungdam sakthei takpi hi! Thukhat panin Pasian in, naupangpa’ pa bangin, eimah hong en selo, eima’ letsong ken en selo hi. Pasian ki lungdam sakthei i cita zong in, Khazih tungtawn bekmah ahi hi.

*January 18, Sabbath a ding kiginkholhna in tukaal lesson sim in.

 

SUNDAY  January 12

Na Ngaihsutzah Sangin Manphazaw

I thu sinna sa om bangin, mawhnei penpen a gilo pente nangawn Pasian in a it’loh kuamah omlo hi. Pasian in eite’ ngaihsutzah sangin mihing na manpha sakzaw a, mawhna in ei’ tungah bangteng gen’ theih na hong cih thei ahih manin mawhna hangin lungdam theilo hi.

Simin, Luke 15:11–32. Tapa taimang thugentehna ah Pasian hong lainatna le itna koici hong lah hiam? Inn a om tapa u zaw i bat khak loh nadingin bang thu in hong vau hilhkhol hiam?

Hih tangthu sungah, tapa taimangpa in a gamh ngah dingteng a pa tungpan ngen in, apa le apa’ neihsa khempeuh nial hi. Tua ciangin inn panin khual gamla munkhat ah a neihsa khempeuh zangh bei hi. Zawn’na le gilkial dangtakin a om ciangin vokte annek duhgawhta hi. Tuabang laitak in a pa inn sunga nasemte nopsakzia a phawkkik hi. A pa in neek le dawn kicing takin nei ahih manin a nasem mi khatin ka om ding hi, ci-in a pa kiang ciahkik ding hong ngaihsun hi.

A zom a honghilh thu in vanglian hi. Pa pawlkhat khawng hileh, “Na gamh na la khinzo a, ka inn panin na taikhia zo hi. Hitak ah nang’ ading om nawnlo hi” ciding uhhi. I ngeina bang hileh cihhuai lel nasa uh hia? Pate zong mihing hiphot lel ahih manin, tua tapa phengtatpa zong inn tawh kigamla luata lel ding hi.

Tua thugentehna sungah, a Pa in Pasian’ limpua hi a, tuabang dan in dawng hetlo hi. Tua sangsik in “a Pa in tapa taimangpa hong ciah gamlapi panin amuh ciangin lainatmahmah ahih manin, delhphei in, a ngawng ah kawi in nam hi” (Luke 15:20). Mikhat tawh kimu dingin innkuan lutangpi khat tai panpan liang cih khawng vangneu huai phial taleh, a Pa inbel, lainatna lianpi tawh, a tapa dawn dingin vatai liang, bek thamlo, innkuan-lai sungah khum kik, banah, pawikham sak lailai: tuateng in, Pasian hong itna in mi vakthap lel khat hong lainat na lianpi le inn hong ciahkik mimal khatsim a ding lungdam ahihna hong lak hi. Pasian’ lim’puakna lianpi hi.

Inn ah a pa tawh aom a upa lungsimpuak khel’ mahmah hi. Bang hangin tua bang lungsim puak nei hiding hiam? A mangthang a sanggampa inn hong ciahkik lungdamlo hi ding hiam? Hih thugentehna in Pasian hong hotkhiatna lungdamna thu mihing muhzia a kilanghsak hi; lamkhat panin Pasian hong itna lungdam ding sangin a nial mi tampi ki om hilo hiam?

 

MONDAY  January 13

Lungdamna Tawh Nuamtak-a Om

Pasian in leitung mihingte mimal khat ciatin hong it hi, cih thu a tel hak thu khat hi. Tua hangin hotkhiatna a sang mi khat tungah vantung lungdamna lianpi a om hi.

Simin, Zephaniah 3:17. Koi bangin hih in tapa taimang thu pulaak hiam?

Zephaniah 3:17 in Pasian in a tatsa mite tungah lungkim mahmah ahihlam a pulaak hi.Lungdamna, nuamna Hebrew tawh kigelhnate-ah a hong tatkhiat mite tungah a lungkimna a pulaak kammal hi. Hebrew in nuam cihleh lungdam cih kammalte a kammal zat khat bek zang hi. Tua kammal mah in a tatkhiat a mite hong cin, hong kepna a pulaak kammal mah hi.

Pasian in a tatkhiat mite tungah a lungkimna kilangsak ding hi. A mite lakah hong kilang Ama vangliatna a pulaak kammal hi, ci-in zong kiciamteh hi. Pasian hong itna le Topa hong ompihna in kizopna nei hi. Pa in tapa taimang galmuhin inn hong ciah amuh ciangin a ta muak dingin amah zong tapa lamzuanin hong tai hi. Topa Pasian in a mite lakah hong om hi.

Isaiah 62:4 pulaak bangin nupa suahna tawh na genteh hi. Isaiah 62:4 pulaakna-ah Pasian mite “Hephzibah” ci-in kisam ding hi. A khiatna in “Ka mite sungah ka lungkimna a om hi,” cihna ahi hi. Amaute teenna leitang “Beulah” kici ding hi. A khiatna in “amaute ka teenpih ding hi.” cihna hi. Bang hang hiam cihleh Topa Pasian in na sungah lungdamin na teenna leitangah kong teenpih ding hi,” ci hi. A mite tawh kizopna a ngah ciangin amaute sungah Topa lungkimna a om hi. A mi dingin amaute a lak ciangin nuamna in hong tuam ding hi. Tapa taimang in a pa kiang zuanin hong ciah ciangin a pa in lungdamin pawi a bawlsak bangmah hi ding hi.

Simin, Ephesuss 5:25–28. I nuntakna-ah a kilang ding itna bang pulaak hiam?

A honghilhna-ah “Khazih in a pawlpi a it bangin, a pawlpi aa ding in Amahmah a hong kipiak bangmahin, pasalte in zong amau pumpi a ki-it bangun a zite uh zong a it ding uh hi, ci-n hanthotna kimu thei hi. (Eph. 5:25, 28). Tua bangin itna a pulaakna-ah angsung khualna om lo-in nuntakna kipiakna tawh itna hi ding hi, ci-in Paul in hong hilh hi. Khazih mahmah in zong a pawlpi itin a nuntakna hong pia hi.

 

TUESDAY  January 14

Pasian Lungdamsak

Vankhuanuai khempeuh tungah ukna nei Topa Pasian in mihingte sungah a lungdamna, Ama phawk tham dingin mihing in bangmah man lo, cihtham het lo hi mah taleh Topa in hong lunghimawhna in lamdang mahmah hi lo hiam? Ama vangliatna kigen zolo Topa Pasian in ciangtan nei mihing tawh bangci bangin kizopna hong nei hiam, cih thu ngaihsun lehang, i tel zawh loh thu khat hi. Amah in kitangsapna bangmah nei lo hi. Na khempeuh Ama sungah kicing khin hi.Hih thu i ngaihsut ciangin thu nih kimu thei hi. Amasa-in koi bangin Topa mahmah in lungdam hiam? Nihna-ah mawhna tawh kidim mihing in Topa a lungdamsak thei hi lo hiam?Tuni-a i pulaak thu in koi bangin Topa in lungdam hiam? cih thu hi. Zingciangin mihing in Topa a lungkim sak thei ahihna thu i pulaak ding hi.

Simin, Isaiah 43:4; Late 149:4; le Paunak 15:8, 9. Hihte in a mite tungah a lungdam Topa Pasian thu bang pulaak uh hiam?

Zanni thusinna bangmahin mihing in Topa a lungdamsak thei hi. Pasian in a mite nunzia, a mite kalsuanna-ah a lungkim hi. Bang hang hiam cihleh Topa in mihingte hong itin, i nunna hong lunghimawh mahmah hi. Hong don, hong kem tawntung Topa hi.

A lehlam ah, Pasian in gitlohna bawlte tungah lungdam lo hi. Paunak 15:8, 9 in zong, Topa in migilote “biakpiakna, gamtatna” kihhuai sa a; “thumaan mite’ thungetna thukim in it hi” cihi. Hihmun ah Pasian in gitlohna ah lungdam lo a, hoihna sungah lungdam cihi. Pasian lungdamna leh itna in ki tuiton mahmah a, Pasian’ itna leh lungdamna in thuktak in kizopna nei cih hong lak hi.

Late 146:8 ah “Topa in dikna a it hi” ci hi. 2 Kor. 9:7 in genna-ah “Pasian in piaknopna tawh a pia mibek a it hi.” A pulaak loh thu ngaihsun masa in. Lai Siangtho in dikna tawh a pia mi bek Topa in it hi, cilo hi; a pia nuam mi piakna bek it hi, kici zaw hi. “Piaknopna tawh a pia mi a it hi.” Pau. 15:8, 9 ah Pasian in “piaknopna tawh a pia mi a it bangin midangte zong a it veve hi,” ci-in i thei hi.

Khuavannuai leitung buppi a bawlpa Pasian in hong kinai khawlhpih mahmah manin vantung le leitung in naitak mahin kihenkop thei cih ngaihsun in. Hihthu na lungngaih ciangin, haksat hun na kantan laitak nangawn in bang lam-et theihna khawng hong neisak thei naci hiam?

 

WEDNESDAY  January 15

A Nungta Suangte

Eite a puk khinsa mawhnei mi lellel in, koi bangin a siangtho Pasian lungdamsak zo ding i hiam?

Simin, Rome 8:1 le Rome 5:8. Hihte in Pasian mai-ah i dinmun bang pulaak hiam?

Mihing in Pasian i itma-in hehpihna hong pia hi. I paukhiatma, na khatpeuh i sepkhiatma-in Topa in itna hong pia-a sang nuam peuh in sang thei ahih bangmahin a nial nuam peuh in zong nial theihna kinei hi. Romans 5:8 pulaak bangin “Mimawh ihih laitak nangawnin Pasian in a hong itna hong lak hi.Khazih in eite aa dingin sihna hong thuak hi.” (Jer. 31:3 tawh enkak in). Pasian kiang zuanin i om ciangin, upna tawh Ama sungah i nuntak ciangin Ama mai-ah etlawm a, Topa lungkimna ngah ihi hi.

Simin, 1 Peter 2:4–6 le Heb. 11:6. Hihte in koi bangin Pasian lungkimna piangsak thei hiam, cih hong hilh hiam?

Pasian ompihna lo-in mawhnei mihing in Topa mai-ah manphatna bangmah neilo hi. Khazih nasepna hangin Pasian in hong hehpihin, hong lainat ahih manin Ama mai-ah nuntakna khempeuh kipiakna in a hing biakpiakna-in hong sang hi” (1 Pet. 2:5).”Upna lo-in Pasian kilungkimsak theilo hi” (Heb. 11:6); Khazih palaai sepna tawh Pasian in Ama deihna i cin zawh nadingin hong huh hi; Ama sungah hong kicingsak hi; Ama deihna bangin hong tangtunpih hi. Zeisu Khazih tungtawnin Topa lungkimna hong ngahsak hi. Atawntungin Ama min kiphat tawntung ding hi” (Heb. 13:21).

Upna tawh Topa kiang a zuan mite in Ama dikna a ngah ding uh hi. Khazih palaai sepna, Ama dikna hang bek tawh Topa mai-ah midikin a hong ciamteh hi.Tua ciang bekin Ama mai-ah santhamcing hong suaksak hi. Khazih dikna tungtawnin Topa Pasian itna a nei mite tungah Ama zia le tong a hong guan hi. Ama lim le meel suun dingin hong khel hi. (Luke 20:35), tua ciangin Amah a suun thei ihi ding hi (1 Kor. 15:51–57, 1 John 3:2). Pasian hong hotkhiatna bek mah in hong khel hi.

Bang hangin Khazih in nang le kei aa dingin vantung ah palaai sem hi, cih thu in i upna khauhsak hiam?

 

THURSDAY  January 16

A Ngahtaak Mungtup

Pasian hehpihna le lainatna nuai-ah Pasian in itna tawh dawn kikna aneu penpen zong Ama lungkimna i ngahna hong suak hi. Amah bek mah biaktaakcing hi; Amah bek mah phat thamcing hi. Ama dikna bek mah in eite aa dingin a kicing dikna hi. Ama dikna bek mah tawh Pa mai-ah midik i tang thei hi. Tua ciangin Topa tawh tawntungin a mangkhawm thei ihi hi. Hih in i lametna lian bel hi; bang hang hiam cihleh Khazih in vantungah eite aa dingin nasem hi.

Nang na kihel ding hiam? Topa mai-ah dikna ngah nadingin hoih na ka nei hiam? Upna kicing ka neih keileh Topa mai-ah dikna ka ngah kei ding hi.

Simin, Mark 9:17–29. Koi bangin Pasian in mihingte tawh hong kizom hiam? Upna bang ciangin kicing hi ding hiam?

Nungzuite in dawihawlkhia zo lo uh ahih manin lamet bei tawh kibang uh hi. Ahi zongin Zeisu hong pai-in dawivei mipa tungah “Na upleh na khempeuh a piang thei hi,” ci-in a pulaak hi (Mark 9:23). Tua pa zong khitui luangin “Topa aw, ka um mah hi. Ka uplahna hong huh in” ci-in a ngen hi (Mark 9:24).

Zeisu in tua mipa tungah “Upna na neih ciangin hong pai kik in,” cilo hi. Ama kiko-na in “Ka uplahna hong huh in” ci-in a ngen hi.

Upna lo tawh Pasian kilungkimsak zolo hi (Heb.11:6), Zeisu in a neu penpen upna zong a sang hi. Khazih palaai sepna hangin upna tawh Topa kilungkimsak thei hi. Upna le eite aa dingin Khazih sepna tawh Pasian lungkimna kingah thei hi. Tate in man nei ta keileh letsong khat peuh pate kiang hong pai uh ciangin pate lungkim uh hi. Tua ahih ciangin Paul hong lamlahna bangin i nungta ding hi.

Tua in Pasian lungkim i ngahna hong suak thei hi (2Kor. 5:9, 10; Kol. 1:10,1Thess. 4:1, Heb. 11:5 cihte enkak in). I lunggulh nate hong khelsak dingin Topa tungah i ngen thei hi. “Note khat le khat unau ki-itna kiptawh na ki-it thuk un. No sangin midangte a sangzaw-in na pahtawi un. Hahkat lo ngei kei unla, khalam hanciamna ah lenkipin Topa nasem un. Lamet na-ah lungnuam unla, thuaksiatna ah lungduaiin thungetna-ah muan huai un. Pasian mi a kitasamte na hawmun. Zindo na siam un” (Rom. 12:10–13).

Pasian in Khazih hangin eite hong san’ mah bangin, eite’n mite bangzah saanhuai hiam? Nangma pumpi na it bangin veengte it ding cihthuleh (Siam. 19:18; Matt. 22:39), nang tungah hong kibawl ding nadeih bangin mi’ tungah zong bawl in cih thukhun tungtawn in bang khuavak na muthei hiam?

 

FRIDAY  January 17

Ngaihsutbeh Ding: Ellen G. White, The Desire of Ages lai. 662–680, “Let Not Your Heart Be Troubled” simin.

“Ei le ei man’ neilo kisakna-ah Topa lungkimlo hi. Ama’ hong teel mite tungah man kiseh zolo amanpha mahmah hong kikoih hi, cih i phawk ding Topa in deih hi. Tapa in sihna hong thuak keileh tua manphatna i nei kei ding hi; Ama hong sawlna bang a zui dingin hong deih hi. Ama’ na sem dingin hong deih hi. Amah bek mah a manpha penin i koih ding hong deih hi. Ama kamciamte sungah upna i neih ciangin na lian pipi a sem zo dingin hong lamen hi.

“Khazih min tawh thungen cih thu in tangzai mahmah hi. Tua in Ama zia le tong nei-a, Ama na sepna hi. Honpa hong kamciam a tangtun nadingin Ama hong sawl bangin a nuntakna kisam hi. “Kei nong it uhleh ka thupiakte na zui ding hi” ci-in honghilh hi. Amah in mawhna sung pan hong honkhia ahih manin Amah i it ding hongdeih hi. Amah itna in a thupiakte bangin nuntakna hi.

“Thumanna diktak pen lungsim sungpan ahi hi. Khazih tawh kop in lungsim nasep khopna hi. Eimah lungkim hipeuh leng, eima ngaihsutna le ngiimna sungah Amah kilangh sak ding a, eima’ lungsim pen Ama’ lungsim tawh luang khawm sak in; Ama’ thu manna sungah eima’ sepnopna hong omsak ding hi. A kisiansuah eima deihna in, Ama’ na sepna sungah lungkimna sangpen ngah ding hi. Pasian i theihkhak hampha i kisak ciangin, eima’ nuntakna in thuman tawntungna nuntak hiding hi. Khazih’ gamtatna manphat sakna le Pasian tawh kikhawlhna hangin mawhna pen hong huathuai mahmah ta ding hi.”—Ellen G. White, The Desire of Ages, p. 668.

 

Kikupding Dotnate:

 “Angsung khuallo takin ngahna” i cihin bang hiding hiam? Ngahna le piakna kizopna in koi bang hiding hiam? Vanthak le leithak ah nunzia in bangci bang nunzia hi ding hiam?

 A gamla mahmah leitung —James Webb Space Telescope in abat zawh lohna mun— panin vansawltakpa in Daniel tungah chamudot “Deihhuai, it ngah, manpha” ci-in thum vei naci hi. Daniel 9:23 ah Gabriel in chamudot attah “Pasian in itna lian tawh nang hong it hi” ci-in Daniel tungah pulaak hi. Daniel 10:11 ah vantungmi khat in (Gabriel hiding hi) ish chamudot “It mah mah mipa” ci-in sam hi. Hihbang mahin anung ciangin Daniel tungah kipulaak kik hi (Dan. 10:19). Pasian thu bang hilh a, koi bangin ei tawh hong kinai hiam? Bang lametna hongguan hiam?