Vicarius Filii Dei Kipatna

Donation of Constantine--Vicarius Filii Dei Kipatna

“ It et cuncto Romanae gloriae imperij subiacenti, ut sicurt in terries uicarius filii Dei esse cidetur constitutes etiam et ponifices

Thupatna:

Hih atunga Latin laitawh kigelh laigual pen Donation of Constatine ki ci laisunga “Vicarius Filii Dei” cih kammal omna laiguah ahi hi. Hih laipen Donation of Constantine (Lt. Donatio Constantini)kici hi. Tua lai pen kumpi Constantine 1 in Pope Silvester 1 tungah Roman Empire a apna dan dinga kigelh hi. Ahizongin tua lai pen, ZUAU LAI ahihna anunglam ciangin kitheikhia kik veve hi.

Constantine 1 in Rome khuapi le Roman Empire Nitumna lamteng Pope tungah ap hi cihna lai ahi hi. Hih lai pen AD zalom 8 sunga ki gelh tawm dan dingin om hi. Tua lai pen AD zalom 13 hunin gam uk thuneihna zong nei ung cih lah nadingin papacy in zang uh hi. Tua lai pen a kiphuak tawm ahihna a pholhkhia masa pen, Loawno Valla ahi hi. Amah pen Italian Catholic Siampi le Renaisasance humanist khat ahi hi. Tua lai atakpi ahiloh ding upmawhna hangin AD 1001 pek aki pan a kigen zel hangin, 1439-1440 ciangin a pulaak masa pen amah ahi hi.

Donation of Constantine lai sunga om thute atom:

Tua lai in: Constantine phak natna vei-a, dam nading a zon ciangin Christian ah kikheel hi, ci hi. Pope Sylvester 1 in baptism na pia hi. A lungdam thuhna-in, Rome-a pope in Alexandria, Antioch, Jerusalem, le Constantinople pawlpi-te le leitungbup Pasian pawlpi tungah ukna a neihnadingin, Constantine in Peter vangliatna le zumpi pen Pope tungah pia hi, cih thu kigelhna lai ahi hi.

Tua lai sungah, St. Peter le St. Paul pawlpi akip tohsuak nadingin Judea, Greece, Asia, Thrace, Africa, Italy le tuikulhte dong uk ding hi. Tua mah bangin Silvester le ama zoma khempeuh tungah “Rome khuapi le khawk khempeuh, banah Italy sunga mun khempeuh le khuapite  thamlo-in Nitumna lam gambup le kumpi thuneihna sealpi(imperial insignia) le lukhu ka ap hi, cih lai kigelh hi.

Pawlpi in Authority nei ung cih lah nadingin ZUAU LAI  azatna:

Amasa pen in tua lai AD 778 in Pope Hadrian 1 in Charlemange a hanthotna ah , apa Pepin the Short in Papal State bupah amau le amau ukna za nei dingin, Constantine dan zui-in Roman Pawlpi tungah ap khin hi, ci ngei hi.

Tua lai siksan-a thuneihna a zangkhia masa pen Pope Leo IX  hia-a, 1154 kumin Constantinople pawlpi makai Michael I Cerularius a laikhakna ah zang hi. Tua lai pen a man takpi mah sa ahihmanin, tua sung pan kammal tampi la hi. Tua in Nisuahna-le Nitumna Kitapna(East-West Schism) piang sak zawsop hi.

AD zalom 11 le 12 sungin Donation laipen uknaza vai-a Papacy le Nitumna lam kumpite kikaal buaina(Investiture Conflicts) khempeuh ah paulap bel-in papacy in zang uh hi.

Catholic sungah tua ZUAU LAI a um takpi om:

Emperor Otto III in tua lai azuaupi hi, cin a pulak hangin, Middle Ages sung bup-ah Donation lai pen atakpi mahin pom teitei uh hi.

ZUAU LAI AHIHNA Kipholhkhia:

Zalom 15 kim ciangin lailam pilna ong khanglo-a, textual criticism (laite man/lo cih tel nadingin alai kigelh hun dinga ki ummawh hun-a laigelh kammal zatziate le tua hun lai-a laite enkak, tangthu tawh saikak-a sittelna) le pawlpi sunga ngentelna(bureaucracy of the Church) ong khan ciangin tua lai pen atakpi hilo ding hi, cih ong phawk ta uh hi.

Cusa khuami Cardinal Nichlas in tua lai pen apocrypha bute mah bangin a ki phuaktawm hi, cih pulaak hi. Tua zawh lamin Catholic siampi Lorenzo Valla in Defalso credita et ementita Constantini donation declamation ci-in tua lai amanlohna teltakin lakkhia hi. Scientific dan ong khan ciangin, Cusa, Valla, Reginal Pecocle(Chischeste Bishop AD 1450-57)te in tua lai amanloh lamtak ong muciat uh hi.

Thukhupna:

1.       Hih atunga Donation of Constantine pen Catholic Pawlpi in hun khat lai-a thuneihna adeih luat manun, a phuahtawm uh ZUAU LAIPI  ahi hi. Tua sungah Lai Siangtho tawh kilehbulhin “Vicarius Filii Dei” hi ung cihna dong atun ding kammal koih uh hi. Hih pen ZUAU LAI tawh thumanlopi in thuneihna deihna ahi hi.

2.       Tua mah bangin ih MYUM in asawt nailo khatin ZUAU LAI honkhat bawlin Thukhen zum ah evidences in phah uh hi. Iza nuam kei ta zongin, Pasian thukham No 9 na palsatna ahi hi(Exo 20:16).

3.       Hih bang gamtatna in ni danglai Catholic sul zuihkikna suak-a, lampial kipatna hi-a, Pasian tawh direct in kisukha hi. Thamlo-in  “Jesus tecipanna len-in Pasian thukham a zui “( Mang 12:17) Remnamt pawlpi akici depte in hi banga isep pen dahhuai mahmah ahi hi. I tangko le igamtat kilehbulh hi. I pawlpi-ii vang(dignity) kiam sak hi.

4.       Tua ahih manin, M le C cilo-in, SDA thuman a it mi khempeuh in hih I zumpi-te THUKHAMPALSATNA tungah zaksakna, le kipuah nading,I sep thei bang semin, thungetsakna I neih ding kisam hi. Tua ahihmanin bang ci namtawh na pang ding hiam?