David kumpipa in Biakinnpi lamsawm hi. Gambupi thuzasak hi. Piakzawh zahzah tawh huhna ngen hi. A sawt ciangin tamlua ahihmanin, hong puaknawn kei un, kicingkhinzo hi, acih hangin khamzo lo uh hi. A piate in, amaupiakte a kisanloh ding dahmahmah uh hi. Piaknopna lungsim nasia mahmah hi. Sumpi icih ciangin Pasian aading a kizang piakkhiatna khat peuhpeuh Sumpi kici ahi hi. Pasian Lungdamnathu pen mipite piakkhiat sumpi siangtho bektawh taangko ding ahi hi. Sumpi cih ciangin zawhthawhthu tawh kingah ngeilo hi. Pasian ki-aapna tawh a kipia ahi hi.
Tithes kici Sawmah-khat. Psalms 50:10-12. Haggai 2:8. Psalms 24:1. Isaiah 43:1.
Sehsuah sumpi thu-um khempeuh azawng-ahau cih deidan omlo-in Pasian kakumpi ka Topa hi ci-a siah pia ahi hi. Tua siah nangawn aana tawh kidonglo hi. Ka Topa, kakumpipa ci a, a pianuamte bek in, utthu tawh piakna tungtawnin teeltheihna nei uh hi. Tua sumpite pen Pasian kiang kipuak hilo hi. Lungdamnathu tawh kisai kipawlna in tua sumpi tawphah uh hi. Leitung a omlai misiangthote kipawlna sum ahi hi. Tua pen Pasian khunkholhsa ahi hi.
Nidangin Jerusalem khua leh Siampite omna munmunah kipuak ahihmanin siampi Levi minamte in naseemlo-in tua tawh nungta uh hi. Nuamsa mahmah uh hi. Tuhunin, Levi minam a tuam omnawnlo hi. Eimau mah in mawhmaina ding thu kingen thei hi. Mikhempeuh Lungdamnathu hilh thei hi. Pawlpimite in Church Treasurer tungah kipuak a, Pawlpi & Companies tuamtuamte in, Mission leh Conferences ah a bitin puaksawn uh hi. Local Conferences leh Local Mission te in a tunglam kizoppih aneihleh 10% 19% cihbangin tunglam sehna zui-in piasawn uh hi. Tua pen Pasian seh hinawnlo-in kipawlna Administration te geelna ahi hi. Percentage zong amau ututin seh thei hi. Kizoppih ineih laiteng piakding ahi hi. Mal3:8-10.
Hih sehsuah sumpi tawh kisai pen, Pasian in thu-um mite azawng-ahau deidan selo-in hong sehsak hi. Ahaute aadingin tamlua cihna ding omlo hi. Azawngte aadingin zong haksa lua cih ding omtuanlo hi. A ngahna zui -a kingen ahihmanin pauban om kikeuhlo hi. Amaute thupha saanna ding zong ahi hi. Lev 27:30-32. Ih piakna tung tawnin ahizongin, sepkhiatna khatpeuh tungtawnin Topa in nong encik a, nalungdam tawntung ahi hi. Leitung thupha sannopna bektawh piak pen Pasian aadingin santham cinglo hi. 2Corinthian9: 6-7.
Tithes sumpi pen Pasian ciangtan hi a, kiciangtan hi. Tua sanga tamzaw piak ciangin ciangtan om nawnlo hi. USA gam thu-um memberte kipiakdan pawlkhat pen nasia kasa hi. Zong piazo limlim, nei limlim hiding hi. Lo , inn cih bang zuak uh a, a lang bang Conference ah piamai lel uh hi. Eipen ih tuacih ding cih genloh nektawm zong hiphot ihihmanin en ngamloh hiphot hi. Nidang ciangin tua dinmun tungzo dingin Topan Conference leh Mission sunga a tate hong laamto ta hen.
sumpi tuamtuam.
Tua banah SDA Pawlpi in sumpi tuamtuam kipia hi. (Thanksgiving ) Lungdamkohna sumpi, (Birth-day Offering)suahni sumpi, ( Investment & First Fruit) Gahmasa cih bangin ki piakhiatna sumpi namkim kinei hi. Tuate pen Conference & Mission zum kipuak a, pawlpi omlohna khuate phutnain kinei hi.
Biakinn aa kidong sumpite leuleu ciangin Sabbath School sumpi pen Mission leh Conference zumpi kipuak hi. Tua te pen Sabbath School Expense kisapna khempeuhah kizang hi. Ih tungah Union, Div, GC a omleh amau sehzah bangin kipuaktoto hi. Tua ineih keileh Conference in Quartery sumngah tawh gawmin Sabbath School Department in a kisapna khempeuhah zat ding ahi hi.
Church Service sumpi, AY sumpi, Church Building Fund sumpi(a omleh), Dorcas Society sumpi, Lay Activity sumpi, tua khempeuh Local Church Board in zeek thei hi.
Bangsum bangsum hitaleh, Treasurer te in amathu-in zeek theilo hi. Committe bektawh kizeek thei hi. Church Pastor ten ama thu tawh zong zeek theilo hi. Advance la a hong pai khuankhuan lehzong pia kei in. Buaina a omlohna dingin, Auditor kiguang thei hi. Ahih hangin tuhun ciangin Corruption nasia lua ahihmanin Auditor te pen a lauhuai penpente ahi uh hi. Sumkeemte leh Auditor te kigullukin sumne khawm thei uh hi. Letsong pia-in sumai thei hi. Committee teekmah tawh sittel ding kisam hi.
Sumpi napiak ciangin Voucher Receipt ngahlo-in nasum ap kei in. A muanhuailo khatguak sumpi puak dingin sawl kei in. Damiah tuak ing, a ci zong tampi om ngei hi.
Church Building Fund tawh kisai pen, nidangin Pawlpi zawngkhalte 30% Conference in panpih thei hi. Tualo local Church thatawh kiseem ding ahi hi. Misagih khawngin biakinn golpipi deih mawk uh hi. Ahihzawh leh phamawhlo hi. Amau tawh kituak biakinn hanciam leh vangik tampi hong dawn ahi hi.
Pasian tawh tonkhawmin Lungdamnathu ah, sehsuah tungtawnin ahi zongin, sumpi tuamtuam tungtawnin ahi zongin, thagui thatang leh siamna namkimte zangin Pasian gam zaina dingin hanciam ciat ni.
