Sabbath-Lungnop Kipaak Ni
Friday Ni Kigin Ni Hisak In-Sabbath ni adingin kiginkholhna kheempeuh Friday ni zawhsiang ding ahi hi.Sabbath ni silh ding puante kigingkholsa-in koih a,anhuan ding khempeuh zawhsa a neih ding kisam hi.Khedap bulh dingte siangsak sitset-in,kisilsa a om ding ahi hi.Sabbath ni pen puan khui-in a sia puahtawm sansan ding hilo-a,an huan tawh buaicip loin,leitung nopsakna leh nasepte tawh zatkhop ding hi lo hi.Friday ni a tumma-in leitung nasepte koihkhia a,leitung thu tawh kisai laite muhna ah koih khak ding zong hi lo hi.PASIAN thukham tawh kituakin tate in Sabbath a zat theih nadingun kiginkholhzia,a thu leh a deihna nu leh pa in a hilh kul hi.
Hih kigin ni-in ih sanggam meeltheih,innkuan leh pawlpi sung buaina kitelkhialhna ih neih kheempeuh koihkhiat ding thupi mahmah hi.
Innkuan Kikhopna Tawh Sabbath Muak Ding-Friday ni a tumma-in innkuan kheempeuh kikaikhawm a PASIAN kammalte simkhawm-in,thungetna leh lasaknate neih ding kisam hi.Mi tampi takin thupi ngaihsut nawn lo ahih manin hi mun ah kipuahphat ding ahi hi.PASIAN leh eite khat leh khat tungah mawhmaisakna nget ding zong thupi mahmah hi.Innkuan mimal kheempeuh in PASIAN’ thupha piak a sianthosak Sabbath ni a pahtawi theih nadingun thupi takin geelna,vaihawmna neih ding kisam hi.
Sabbath Hunnuam Eite’-a Hilo-in PASIAN Ong Piak Hi-PASIAN in ni guk sung eima’ na sep dingin ong koihsak a,a ni sagih ni Sabbath pen Ama adingin tuamkoih hi.Sabbath ni pen eite’ thupha ngah ni–leitung nasepte koihkhiaphot a ih lungsim ngaihsutna kheempeuh PASIAN leh vantung bekah ih ngak ding ni ahi hi.Sabbath ni ong tun ciangin ih kampaute,ih sepnate kidop mahmah ding kisam hi tuahikeileh a tuamdiak TOPA’ Ni pen eima hoihsak thu tawh ih nin sak kha ding hi.Sabbath ni eima’ na sem loin ih tate’ gim nadingin bangmah sem sak lo ding hihang,ni guk sung nasep ding hun ong kipiakhin ahih manin Sabbath ni-in nuntak zonna nasep peuhmah sep loh ding ahi hi.Vantung PASIAN muhna ah a siangtho Sabbath a ninsakte ih hih loh nadingin Sabbath ni-in pau loh dingte pau lo pah a,sep loh dingte sep loh ding hi pah hi.PASIAN in Sabbath ni-in na sep loh ding bek ong sawl tuanlo-a ih lungsim mahmah zong a siangtho takin kep ding deih hi.
*Ellen G. White,Child Guidance(Naupang Makaihzia),Khenpi 79,pp.528-529.
TOPA THUPHA!
Kai Lun Mang
