LESSON 1. SEP. 26 – Oct. 2
NASEM DING SAPNA NGAH JEREMIAH
Sabbath Nitak: Tu Kaal Sung Sim Ding: Isa. 1:19; 6:5; Jer. 1: 1-5; 7: 5 - 7; 1Kum. 2:26; Matt. 28: 20.
Kamngah: "Gil sungah kong bawl ma-in nang kong thei khinzo hi. Na suah ma-in nang kong teelkhia khinzo a, minam dangte tungah kamsang dingin kong koih khinzo hi," hong ci hi (Jeremiah 1:5).
Lai Siangtho in kamsang dangte sangin Jeremiah’ thu tam hong hilh zaw hi. Ama laigelhte tungtawnin Jeremiah in kamsang hi, ci-in kimu thei hi. Pasian’ mizat kamsang khat ahih bang mahin, Khrih’ hun a mite in nungzui hoih suah nadingin Jeremiah’ thu sin tangtang uh hi. Tua hi mah taleh, mihing’ muhna panin Jeremiah in nasep lawhcing zo taktak lo hi. Jeremiah in Pasian kiang pan a ngah thute kum tampi sungah tangko-in, hilh mah taleh, mite in a thuhilh ngai lo uh hi. Mite’ langpanna thuak mah taleh, Jeremiah in thuman thutak a’ dingin nungta hi. Mite langkhatah a pang dingin Pasian in Ama vangliatna tawh Jeremiah pen khuapi muanhuai khat, sikkhuampi khat bangin, sumngo kulhpi khat bangin bawl hi (Jer. 1:18).
Jeremiah in hamsatna vive tawh kidim hi. Pasian’ telna a ngah manin, gimna, langpanna, nawlkhinna a kipan thongkiatna cihte thuak hi. Hih bang gimnate midangte tung pan hi lo-in, ama thugen a za mite in bawlsia hi. Tua hi-in, Jeremiah in kum tampi khit ciangin Jesuh mahmah in a thuak ding gimnate pulaak khol hi.
SUNDAY SEP. 27
PASIAN' KAMSANGTE
Pasian sapna ngah kamsangte in Pasian Thukham Sawm kemcing uh hi (Jer. 11: 2-6). A tomin kamsangte’ nasep in (Micah 3: 8) “ Israel mite' tungah a mawhna uh a genkhia ding,” ci-in hilh hi. Thukham lo-in mawhna om lo hi (Rom. 7:7).
Kamsangte in mite tungah bang thu gen uh hiam? Tu hunin zong bang hong gen lai uh hiam? Isa. 1:19; Jer. 7: 5 – 7; Eze. 18: 22; Matt. 3:7- 11.
_____________________________________________________
____________________________________________________________________
Mawhna kisik lo, mawhna a taisan lo mi in Pasian’ thukhenna tuak hamtang ding hi. Kamsangte in siatna sungah a nungta den mi khat in siatna nusia-in kikhel nuam lote in mawhna a siatzia thei-in, tua bang siatna hangin a thuak ding gimnate hilh den hi. Kamsangte’ gen thute in mihing' kiang pan hong pai hi lo-in, Pasian' kiang pan hong pai thu ahi hi. Koi bangin Pasian kiang panin thu ngah uh a, koi bangin Pasian’aw za uh cih pen kamsangte in pulaak lo uh hi. Khat veivei Pasian in kamsangte hopih hi. Khat veivei, Kha Siangtho in zanin mangmansak, mangmusak, khat veivei Pasian in ‘aw ging’ tawh hopih hi (1Kum. 19: 12).
Kamsangte in mi nautang a kipan kumpi, uliante' tungah Pasian’ deihna a pulaak ding uh masuan lianpi nei uh hi. Tua bangin kamsangte in kumpi uliante' kiangah a pulaak uh ciangun thahna tuak om hi. A masuan pelh le-uh, Pasian’ thukhenna thuak ding uh hi zel hi. Tua hi-in thuman tangko ding, kamsang dingin sapna ngah mi thuneu hi lo hi; sapna a ngahte in limtak ngaihsut kul hi. Kamsangte a ngah uh sapna limtakin lenkip uh ahih manun tu-in eite zat ding Lai Siangtho nei thei ihih manin i hampha hi. A sihkhit uh hangin, tu ni dong amau’ thupuakte nungta lai hi. Tua ahih leh, Jeremiah’ hong hilhna aw na za hiam?
Tu ni dongin kamsangte’ thupuak bang thu na phawk hiam? Nang le kei aa dingin bang thulaigil om hiam?
MONDAY SEP. 28
JEREMIAH KHANKHIATNA INNKUAN
1Kum. 1; 2: 26 sim in. Bang thute hangin Abiathar in a khankhiatna leitang Anathoh ah pemta bangin nungta hiam?
__________________________________________________________________
__________________________________________________________________
Solomon in Adonijah zo-in a kumpi tokhom a kipsak khit ciang siampi Abiathar in Anathoth khua-ah ciah dingin thupia hi. Anathoth in Jerusalem’ saklam nisuahna tai thumna ah om khua khat hi. Jeremiah’ pa Hilkiah in siampi innkuan pan a khangkhia-in Anathoth ah teeng uh hi. Mi kim khat in Abiathar’ bawng sung panin Jeremiahte’ innkuan khangkhia hi ding hi, ci-in ngaihsun uh hi.
Jer. 1:1 sunga kigelh bang mahin Jeremiah pen siampi khanggui panin a khangkhia kamsang khat hi. Pasian in Ama nasem kamsang dingin tuucingte, laitheite, ngabengte, siampite sam hi. Jeremiah pen Levi suan le khak sung pan khangkhia ahih mah bangin, biakbuk nasem dingin a neutung a kipanin a kipantah mi khat hi. Tua bangin kipantah hi mah taleh, minam khempeuhte’ kamsang dingin sapna ngah ahihlam kiphawk lo hi. Pasian in Ama kamsang dingin Jeremiah a sap tak ciang, amah le amah kilawm kituak kisa peuhmah lo hi. “ Ah Topa aw, pausiam keng; naupang lua lai ing” ci-in Jeremiah in nial hi (Jer. 1: 5, 6). Ellen G. White, Prophets and Kings, 407.
Siampite in leitung kikhuasak zia ding, gamtat zia le tong hoih dingin mite a makaih ding uh ahi hi. Mi khempeuh in a nungta Pasian a theih nading un, siampite in vaipuak lianpi nei uh hi. Siampi pawl khat citak uh hi napi, pawl khat in mulkimhuai zah dongin gamta khial uh hi. Jeremiah in tua bang siampi gina lote thuhilh hi.
Na inn sung hi ta leh, pawlpi sung hi taleh, na vaipuak bang hiam? Na vaipuak tawh kisai kamsang khat in hong hilh ding hi leh, bang hong gen diam?
TUESDAY SEP. 29
PASIAN IN JEREMIAH A SAPNA
Jer. 1: 1-5 sim in. Pasian sapna tawh kisai bang thu na mu hiam?
_____________________________________________________
____________________________________________________________________
Jeremiah in kua in kei hong sam hi ding hiam, ci-in lunghem lo hi. "Topa in hong cih kammal in" ci-in a pulaakkhiat tungtawnin Jeremiah in amah a samkhia Pa theitel hi, cih kimu thei hi. Lungmuang takin Topa' kammal kiptakin a let manin, langpanna, gimna, bawlsiatnate khempeuh nawktan zo hi.
Josiah in kumpi a sepzawh kum 13 cing khit, BC 627, 626 kimpawlin Topa in Jeremiah sam hi. Jeremiah suah kum, bang kumin kamsang sem cihte i thei kei zongin, Pasian in kamsang dingin a sapin, Jeremiah in amah le amah naupang lualai kisa hi.
Jer. 1: 4, 5 sim in. Khamuanna, lungnopna bangci ngah hiam?
_____________________________________________________
______________________________________________________________________
A suahma pek, a nu gin sung panin Jeremiah in Pasian' kamsang dingin sapna ngah khin hi. Pasian aa dingin kituamkoih, Pasian in a sianthosak, Pasian in a tuam vilvel a telkhiat hi (Aneu 5). Biakbuk le a sunga kisem nate a siangtho-in kituamkoih mah bangin a siangtho nate sem dingin sawlna ngah hi. Biakbuk cih kammal in ‘tuamkoih’ ‘siangthosak’ cih khiatna nei hi. Jeremiah zong a suahma-in tua dingin Pasian in a telkhiat ahi hi. Hih thu in a piang ding thute Pasian in mukhol hi, cih thu hong laak hi bek a, Pasian in mukhol ahih manin piang ding hi, cih hi lo hi. Pasian’ muhkholhna in mihing’ deihtelna khaktan hi, ci-in a um mite in Pasian’ muhkholh bangbangin piang hi, ci-in um uh hi. Lai Siangtho in tua bangin hong hilh lo hi.
Gimna, zia-etna na tuah ciang, Pasian in a theihkholh loh, a muhkholh loh khat beek om lo hi, cih thu in koi bangin hong khamuangsak hiam? Koi bangin na mainawt hiam?
WEDNESDAY SEP. 30
A UT MASA LO KAMSANGTE
“Topa Pasian in kong ompih ding hi,” ci-in kamciam napi, Jeremiah pen khangno ahih manin, Topa' nasem ding ut lo hi. Lau hi. Tua hun lai-a mite’ omzia thei ahih manin, Topa’ sawlna nial hi kha thei ding hi.
Jer. 1: 6; Isa. 6:5; Pai. 4: 10 – 15 cihte enkak in. Topa’ sapna bangci bangin dawng ciat uh hiam?
_____________________________________________________________________
_____________________________________________________________________
Jeremiah, Isaiah, Moses cihte in Topa’ nasem dingin amau le amau picing kisa lo uh hi. Kamsang khat suah nading a kisam tampi om ahi kha phial tam! A thupi, na lianpipi sem dingin ngap lo uh hi; kicing kisa lo uh hi. Na khempeuh a Piangsak Pa ii aitangin thugen ding hi mawk! Kilawm kituak kisa het lo uh hi ding hi. Jeremiah in Topa’ sapna bangci dawnkik: “pausiam keng,” cipah hi. Moses, Isaiah cihte in zong tua bang mahin Topa’ sapna nial uh hi. Topa’ nasepna ah mi tawh kizopna, kampau, mukpau kisam mahmah hi, cih kamsangte in phawk uh hi. Topa' kiang pan thu ngahin, tua thute midangte' kiangah gensawn ding kisam hi, cih pen amau nasep ahihlam mukhol uh hi. Tu hun bang lo-in, amau hun lai-in internet, TV, phone, cihte kizang lo-in, maitang kimu ngiatngiatin thugen uh hi. Migilo, mi ngongtatte kiangah amau gamtat hoihlohnate vahilh dingin kingaihsun dih in. Bang hangin amaute in Topa’ sawlna mangpahpah lo uh hi, cih na theitel ding hi.
Jer. 1: 7- 10 sim in. Pasian in Jeremiah tungah bang gen hiam? Bang hangin Topa’ sapna bangin nasemte aa dingin lametna le kamciam om ding hiam?
THURSDAY OCT. 1
ALMOND SINGHIANG
Kamsang Jeremiah in Pasian’ teci hi. Ama aa ding nasem hi lo-in Pasian aa ding nasem hi. Gam sung ki-ukna puahpha-in makai minthang hi dingin Pasian’ sapna ngah hi lo hi. Pasian' kiang pan hong pai thute, mite' tungah a zasak sawn dingin sapna ngah ahi hi. Mihing bulphuhin sapna ngah hi lo-in, vanglian Pasian bulphuhin sapna ngah ahi hi. Jeremiah in Pasian' kiang zuan lampi hilh dingin sawlna ngah hi. Mawhneite honkhia ding Topa bek mah om hi. Tu-in zong eite hong honkhia ding Topa bek mah hi lo hiam?
Jeremiah in bang mu masa pen hiam? Jer. 1: 11 – 19.
___________________________________________________________________
___________________________________________________________________
Jeremiah in almond singkhiang khat mu masa pen hi. Lai Siangtho letkhia a tamzawte in almond ci uh a, taktakin Hebrew laimalah ‘ vil gige’ cih kammal hi zaw hi. Topa in a kamciamte vilin tangtungsak hamtang ding hi. Jeremiah sunga kigen khempeuh ii mungtup, Jer. 11: 11, 12 sungah kimu thei hi. Tua thu in Pasian in a hehpih Pasian, mawhmaisak Pasian ahi hi.
Siatna nusia-in Topa a zuan khempeuhte Topa in a kamciam om bangin amaute bawlpha-in, mawhmaisak hi. A kisik lo mi ahih leh, Topa' gensa mah bangin, siatna le thukhenna thuak ding hi. Bang bang a piang zongin “Topa in nang kong ompih ding hi” cih kamciam Jeremiah in muangngam hi. Jeremiah in Topa’ ompihna a kitangsap bang mahin nang le kei in zong kisam hi lo i hiam?
Matt. 28:20 sim in. Lungmuan nading bang pulaak hiam?
FRIDAY OCT. 2
SIMBEH DING: Martin Luther in Jeremiah tawh kisai hilhcianna hih bangin gelh hi: “Jeremiah pen dahna tawh kidim den kamsang hi. Bang hang hiam cih leh, hun haksa, thuman thutak kinawlkhin hun, lungkhauh mite laka a nungta kamsang khat hi. Tua hang mahin a nasep lawhcing zo tak lo hi. Mite thahsawmna tam veipi tuak khin hi. Bawlsiatna, satna tam veipi thuak hi. A nuntak sung mahin a mipihte tawh saltaan dinglam mukhol hi.
“Jeremiah in kum 40 sung a lungkhauh mite' tungah thuman tangko hi. A nungta Pasian a langpan mite lakah Jeremiah nunzia le tong in “a maan Pasian khat bek om a, Amah bek mah biak ding hi,” ci-in pulaak hi. Jeremiah pen galte in Jerusalem khuapi a umcih laitakun Jehovah’ sawl bangbang a pulaak khia kamsang ahi hi. Jeremiah in David’ kumpi tokhom a bei nading, Solomon in a lamh biakinnpi kisiat ding genkhol hi. Thuman a tangko ngam manin thongkia hi. Siampite le makaite’ mawhna pulaak ngam hi. Tua hang mahin mite' langpan le nawlkhin thuak hi. Jeremiah in a genkholh thute a tangtunna ama mit tawh mu hi. Jerusalem khuapi kisiatna hangin Jeremiah in mipihte tawh dahkhawm kapkhawm hi.” Ellen G. White, Prophets and Kings, 408.
KIKUP DING DOTNATE:
Dahhuai mahmah khatah, Jeremiah mah bangin ei SDA te in zong thuman thutak hangin i mipihte’ langpan bawlsiatna i thuak ding hi. Jer. 1: 17 – 19 sim kik in. Jeremiah langah kuate pang hiam? Nuntakpih ding bang thu kipulaak hiam? Genkholhna tawh kisai-in, i deih phat loh thute tungah na lungsim puak in koi bang hiam? Koi bangin Ellen G. White’ laigelhte in tha hong guan hiam?
