LESSON 2 OCT. 3 – 9
A SUNG A PUA PAN BUAINA
SABBATH NITAK: TU KAAL SUNG SIM DING. Thk. 2: 1 – 15; 1Kum. 12: 26 – 31; 2Khang. 33: 9, 10; Jer. 2: 1 – 28; 5: 2, 3.
KAMNGAH: "Topa' tungah Israel siangtho a, Ama anlakna ah a anpalte ahi uh hi. Amaute a ne peuhpeuh a mawh suak uh a, gimna a thuak uh hi. Topa in hong ci hi, ci-in va gen in,” hong ci hi (Jeremiah 2: 3).
Mawhna om khit mihingte nunzia kammal khatin pulaak ding hileng, “buai-na” cih kammal hi kha ding hi. Bangzahin tua buai-na nasia hiam cih leh, singlamteh tungah Jesuh hong sihna in tua buaina pan hong suakta sak thei bek hi.
Lai Siangtho thute in hih buaina tawh kisai thu vive hong hilh hi. Jeremiah in hih thu mah tangko hi. Pasian' mite in lampi tuamtuam panin langpanna thuak uh hi. Namdangte’ langdona a thuak laitak mahun, amaute sung pan langpanna kipan hi. Siampite le makaite langpanna banah, mipite lungtang in suang bangin sakkhin a, thuman za thei nawn lo uh hi. Pasian’ hilhna ngai nawn lo uh hi; vauhilhnate thudon nawn lo uh hi. Mawhna a nusia lo peuhmah buaina tawh kipelh lo hi.
SUNDAY OCT. 4
A NUNGKIK MITE
Sehnel gamah kum tampi khual a zin kawikawi khit uh ciang, Israel mite in Canaan gamnuam luah khinpan, siatna (buaina) manawh pah uh hi. A nungta Pasian a theih loh sung uh khang khat bang sawt a, a kipuahphat kik nadingun khang khat mah sawtto hi (Thk. 2: 10). A nungta Pasian a biak loh manun Israel’ tangthu ah buaina lianpi tuak uh hi. Tuhun Khristian biakna, pawlpi sungah zong tua bang buaina in hong sukha hi.
Thukhente 2: 1 – 15 sim in. Bang in buaina piangsak a, koi bangin tua buaina kizel hiam?
____________________________________________________________
____________________________________________________________________
Israel mite in Topa muhna-ah a sia-in gamta uh hi (Thk. 2:11). Milim tuamtuam bia uh ahih manun, namdangte' thuak ding gimnate amaute in thuak uh hi. A nungta Pasian nungzui lo, siatna khat khit khat behlap uh hi. Ahi zongin Topa in amaute nusia lo hi. Amaute a makaih ding le a honkhia dingin Thukhente sawl hi. Thukhente khit, Saul, David le Solomon cihte uk sung, kum 100 val bang, Topa’ mite in nopna tawh nungta zaw uh hi. David, Solomon cihte uk sungin kumpi gam lian khatin ding kik uh hi. Tawlkhat sung galveng hi. Solomon in a mite makaih khial ahih manin, ama khit ciang, (BC 931 kim pawl) Khanglam Israel le Saklam Judah gam khennih kisuah hi. Solomon in ama khan sungin siahpiak ding le nengniamna nasia tak zang ahih manin, ama khit ah langpanna kipan pah ahih manin Israel gam kip zo lo hi. Ellen G. White, Prophets and Kings, 88, 89.
Pasian' teltuam Israelte in Pasian in a phal loh na khempeuh sem uh hi. Amau sepna bangin a gah at kha pah uh hi. Pasian' thupiak bangin a nungta lo mite nunzia ngaihsun in. Koi bangin pawlpi in tua bang mite tawh kizopna nei ding hiam? Bangci bangin khangsawnte thu hoih nusiat ding na hiam?
MONDAY OCT. 5
KUMPI GAM NIHTE
Israel gam khennih kisuah khit nungah Topa a langpanna uh khang semsem hi. Kumpi Jeroboam in pasian tuamtuamte biakna nasia takin vaihawm hi.
1Kum. 12: 26 – 31 sim in. Bang danin tu le tu-a thupiang le nate in thuman mu lo-sak hiam?
_____________________________________________________
___________________________________________________________________________
Jeroboam in milim biakna tawh a mite a makaih manin a gam in buaina tawh kilawi ngei lo hi. Pasian a langpanna, milim a biaknate uh hat semsemin a tawpkhakna ah Israel gam mangthang hi. Ellen G. White, Prophets and Kings, 107.
BC 722 kumin Assyria kumpi Shalmanser in Israel gam do-in ama ukna nuai-ah koihin mi honpi khat salin kai hi (2Kum. 17: 1- 7). Saltang Israel mi tampi in a gam uah ciah kik nawn lo uh hi. Kum tampi sung mi mangthang suak uh hi. Saklam gam ahih leh phadawm zaw deuh hi napi, kumpi khat khit khat in Pasian langpangin a mite makaih uh ahih manin Babylon gamah salin kikai hi.
2Khang. 33:9, 10, 21 – 23; 2Kum. 24: 8, 9 sim in. Judah’ kumpite’ nunzia bang pulaak hiam?
_____________________________________________________
______________________________________________________________________
Kumpite in mite makaih khial mah taleh, Jeremiah a kipan kamsangte in langpanna, milim biaknate kisik a, tuate nusia-in Pasian a biak ding uh hilh den uh hi. Topa Pasian’ mite in Amah langpan uh hi mah taleh, Topa in amaute kisik hun ding ngak keikai a, siatna tawh kipelh nading hilh tawntung hi.
Ngeina hoih lo khat peuh nusia-in kipuahphat ding a baih hi lo hi. A taktakin Vanglian Pasian lo-in kikhelna om thei lo hi. Bang hangin Lai Siangtho siksanin kisittel tawntung ding kisam hiam? Tua lo bang tawh kisittel ding i hiam?
TUESDAY OCT. 6
SIATNA NIHTE
Topa Pasian in a thupiak mite tungah zasakin, a za mite a kikhel uh leh, siatna tawh kipelh ding uh hi. Hih thu siksanin Jeremiah in nasem hi. Jer. 2: 1 – 28 sim inla, a nuai-a dotnate dawng in.
1. Amaute in Topa tungah citak hi le-uh, bang kamciam ngah ding uh hiam? (aneu 2, 3).
____________________________________________________
_________________________________________________________________________
2. Siampite, kamsangte le biakna nasemte (pastors) in bang mawhna bawl uh hiam? (Aneu 8)
_____________________________________________________
_________________________________________________________________
3. A sung a pua ah bang buai-na tawh kidimin, amau le amau nunzia bangci bangin kikhem uh hiam? ( Aneu 23, 24).
_______________________________________________________
__________________________________________________________________________
Judahte in Hezekiah le Josiah hun lai-in kipuahpha uh hi. Ahi zongin Pasian langpang semsem hi. Tua thu hangin Jeremiah in amaute thuak ding gimnate pulaak hi (Jer. 2: 13). Mite in nuntakna tuinak, Topa Pasian taisan uh hi. Tuikhuk to tawm uh a, tui mu zo tuan lo uh hi. Topa taisan ahih manun siatna khempeuh thuak uh hi. Hih bang thute mah Jesuh in zong gen hong hilh hi (John 4: 10)
Mite in manphatna nei lo nate’ nung delh uh hi. Amaute zong mannei lo mi suak pah uh hi (Jer. 2:5). Hebrew laimalin ‘mannei lo’ cih kammal in Solomon in na khempeuh a mawkna hi, a cih kammal tawh kibang hi. “ A mawkna” cih kammal in ‘tuikhu’ ‘huih’ cih na zong hi.
Koi bangin mannei lo nate zuihna in mannei lo nunna hong tun thei hiam? Hih in bang hilh hiam? Koi bangin hih thu in ‘ka nunna in mannei kei’ a ci mi khat huh thei diam? Bangci bangin tua bang mite na huh diam?
WEDNESDAY OCT. 7
BABYLONTE' GALPHAWNNA
Jeremiah hun lai thupiang tampi i thei kei zongin Jeremiah ii nasepzia i tel nadingin tua hun lai-a thupiang Lai Siangtho hong hilh thute kicing hi. Gam uk makaite a makaih om lo-in, amau hoihsak bangin gamtang uh hi leh kilawm hi. Ahi zongin Lai Siangtho in tua bangin hong hilh lo-in, amaute a makaih khat om hi, cih hong hilh hi.
Jer. 27:6 sim in. Ngaihsut ding bang thu na mukhia hiam?
_____________________________________________________
_______________________________________________________________
Jeremiah in a nasep masak lai-in Babylon, Egypt le Assyria kido uh ahih manin Judah gamin zong gimthuak lawh hi. BC 700 kim ciangin Assyria vangliatna kiam a, Egypt in amaute uk hi. BC 605 ciangin Babylon in Egypt do-in galzo hi. Babylon kumpi hong khan ciangin, Judah kumpi Jehoiakim in Babylon tawh thuciam vabawl hi. Makai tampi in, Babylon mite ukna nuai-ah om nuam lo-in do nuam uh hi. Tua dingin Pasian in phal lo hi. Amaute ngaihsut bang lo-in, a langpanna uh a thuhilh nadingin Pasian in Babylon kumpite zo gawpsak hi.
Jer. 25: 8 – 12 sim in. Jeremiah in Judahte' tungah bang thu puak hiam?
_____________________________________________________
___________________________________________________________
Jeremiah in Judah mite nunzia tungtawnin a thuak ding uh gimnate gen thithe hi. Tua bang hilhkholhnate biakna makaite le gamuk makaite in thudon lo uh hi. Topa thupiak up ding sangin zuau kamsangte thu um zaw uh hi. Bang bang hi taleh, Judahte in Pasian in a saptuam mite mah hi veve lo hiam?
Thu khat um tintenin ahi zongin thuman lo a hi kha ngei hiam? A hih khak ngei leh, koi bangin mailam ah tua bang na tuah loh nading kikem ding na hiam?
THURSDAY OCT.8
A MANLO PI-A KICIAMNA
“Jerusalem kongzingte ah vaksuk vakto-in, en kawikawi-in ngaihsun kawm unla mun-awng teng zong un. Thumaanna gamta, thutak a zong mi khat bek na muh uh leh hih khuapi mawhna ka maisak ding hi” (Jer. 5: 1) Hih in a piang ngei thunih pulaak hi. Amasa-in BC. 400 kimin Diogenes minnei Greek mipil khat in mi thuman zong dingin Jerusalem khua sungah pai kawikawi hi. A nihna ah: Sodom le Gomorrah khuapi kisiatma-in hih khuapi sungah mi thuman 50 tawh kipan, a tawpkhakna ah mi thuman 10 a om leh, khuapi kisia lo ding hi, cih thu hi. Pasian a kilangpanzia, mite kisiatzia kilang hi. Thuman le thutak zong mi khat beek om buang lo hiam?
Jer. 5: 2, 3 sim in. Koi bangin mite kisiatzia pulaak hiam? Siam. 19: 12 zong sim in.
_______________________________________________________
_______________________________________________________________
Mi tampi in Pasian langpan ta leh Topa' tungah a citak, a thuman mi om veve hi. Pasian bia kici napi uh, Topa' min daisak uh hi. Topa' min zangkhai ngaihsut uh hi. Thuman thutak, Topa dikna nialin, a man lo nate sem uh hi (Jer. 4: 2). Pasian in a vauhilhnate kizakmawh bawl uh hi. Pasian bia mahin amau le amau kingaihsun uh a, a ngeina bangun nungta den uh hi. Thuman lopi, a thumanin kingaihsun uh hi. Amaute’ thuman lohzia Jer. 7: 4 ah kimu thei hi. Zuau genin pasian tuamtuam kibiakna munte “Hih in Topa biakinpi ahi hi” cikhem uh hi. Topa bia takpi hi le-uh gimna thuak lo ding uh hi. Topa a langpanna uh hangin gimna a thuak lam uh kiphawk lo uh hi. Amau dinmun takpi nangawn kitel lo uh hi.
Seventh-day Adventist thu-um mi khat na hihna tawh kizui-in khuavak na ngah khin hi. Pasian in a hong sapna phawk lo-in SDA minpua-in thuman donlo-in na om kha hiam?
FRIDAY OCT. 9
SIMBEH DING: “Tua hun ciangin mi khempeuh in ama hoihsak bangin a gamtat ngei ciat bangin na gamta nawn kei ding uh hi. Topa na Pasian uh’ aw na ngaih uhleh, na pu na pate uh tungah ka ciamsa bangin ka tangtungsak ding hi. “Tua hunin Israel in kumpi nei lo a, amau hoihsak ciatin gamta uh hi”( Thkna. 12: 8; 13:18; Thkn. 17:6; 21: 25).
Tua hun lai mah bang tuhunin zong mite ngaihsutna ah, Pasian’ thupiak nialin amau hoihsak khat a zuiziau mi kim khat om hi. Mi kim khat leuleu pen Topa’deihna bangin gamta zaw uh hi. Mihing in thuman hi, ci-in a zuih thu khat, Pasian’ muhna ah a man het lo hi thei hi. Tua hi-in Pasian in bang hong hilh hiam, Lai Siangtho in bangci gen hiam cih siksan ki-ap ding thupi mahmah hi.
KIKUP DING DOTNATE:
1. Mi hoih hi, ci-in na muh mi khat, siat gamtat napi, amah le mah thuman mah kisa veve t mi na tuak ngei hiam? Hun khat lai-in hoih hi, ci-in i ngaihsut pawl khat tu-in hoih i sak nawn loh om hi. Tua hi-in Lai Siangtho mah siksan kip a i neih ding bangzahin thupi hiam? Tua banah Lai Siangtho i khiatzia zong kidop huai hi lo hiam? Bang hang hiam cih leh, Lai Siangtho siksanin thuman lo nasem veve mi om hi. Tua hi-in, upna thuguilet khempeuh Thukham Sawm mah siksan ding a thupitna na phawk hiam?
2. Jeremiah hun lai-a mite tungah Pasian in Jeremiah tungtawnin vauhilhna pia pia taleh, awlmawh lo-in Pasian tawh kizopna nei mah a kisa mite nunzia ngaihsun in. Bang in zuau
thu um sak hi ding hiam? Tuhun aa dingin bang thupuak na za hiam?
