LESSON 6 OCT. 31 – NOV. 6
LIMCIINNA NEI GAMTATNATE
SABBATH NITAK: TU KAAL SUNG SIM DING: Pian. 4: 3 – 7; Gam. 21: 1-9; Isa. 29: 16; Rom. 9: 18 – 21; Jer. 19; 13: 1- 11; Heb. 5: 14.
KAMNGAH: “ Belsekpa in tungman lomkhat panin a thupi-a zat ding beel le zattaang
ding beel, bawl theihna thu nei hi lo ahi hiam? (Rom 9: 21).
Lai Siangtho sungah limciinna nam tuamtuam om hi. Gentehna-in ganhing tawh biakpiakna le biakbuk in Khrih’ hong tatkhiatna limcing hi. Thu tampi huam kha dingin limciinna kizang hi a, i telzawh loh limciinna zong a om lua hi. Limciinna tuamtuamte le biakpiaknate in a huamkhak thuman zaailua mahmah hi. Hotkhiatna thu in thuthuk tampi tak kilangkhiasak hi. Hotkhiatna thu in thutheihtelna hong guan hi. Pa Pasian in thuman thutak a hong hilh nadingin, leitung biakbuk sung a kizang nate le Daniel, Mangmuhna cihte sungah limciinna limzat mahmah hi.
Khrih mahmah in zong limciinna le thugentehna tawh thu hilh hi. Jeremiah sungah limciinnate tu kaal sungin i en ding hi.
SUNDAY NOV. 1
LIMCIINATE SUNG A THUMAN THUTAK
Lai Siangtho sungah limciinna tampi om hi. Tua limciinate’ pulaak thu in zaai mahmah hi.
Pian. 4: 3 – 7 sim in. Biakpiakna namnihte in bang limcing uh hiam?
_________________________________________________________________
__________________________________________________________________
A kipatcil a kipan mihing’ sepna siksanin hotkhiat ngah sawm biakpiakna (Cain’ biakpiakna) le hehpihna bek siksanin biakpiakna (Abel’ biakpiakna) kipanpah hi.
Gam. 21: 4 – 9 sim in. Gamlakah kikhai sumngo gul lim in bang kawk hiam? Jn. 12: 32 zong sim in.
_____________________________________________________________________
_____________________________________________________________________
Israel mite in sumngo gul kikhai a et manun damna ngah uh hi. Tua in upna siksan hi. Sihna tawh kipelh uh hi. Bang hang hiam cihleh amaute in Pasian’ thupiak (Pasian’ kamal) um uh hi. Damna ngah theih nading kipia lampi muangngam uh hi. Ellen G. White, Patriachs and Prophets, 431.
Moses biakbuk le biakpiakna khempeuh hotkhiatna limcing vive hi. Israel mite in tua limciinna tungtawnin, amaute' tangin a si ding Honpa kawk hi, cih a telzawh loh thu ahi hi (1Kor. 5:7). Biakbuk limciinna in eite' tangin Khrih’ hong sihna limcing banah, Nihvei a hong pai kikma, mawh sittel thukhen hun laitakin, vantung biakbuk ah eite Siampi hi, cih pulaak hi.
Tatkhiatna tawh kisai limciinna dangte na phawk khak a om hiam? Pasian’ hehpihna le lametna hong musak limciinna bang na muhkhak a om hiam?
MONDAY NOV. 2
BEELSEKPA’ TUNGMAN Anuai-a sim inla, bang limciinnate na mu hiam?
Pian. 2:7 _____________________________________________
Jer. 18: 1-1 ____________________________________________
Isa. 29: 16_____________________________________________
Isa. 45: 9_____________________________________________
Isa. 64: 8______________________________________________
Rom. 9: 18 – 21 _______________________________________
Bawlsiatna, langpannate hangin Jeremiah in thuman lampi pan lampial ding ngaihsun kha thei hi. Judah gam aa ding bawlsiat thuaktak huai mah hiam? A gim a tawlna in mannei takpi diam? Khat veivei ciang a thuak gimnate a mawkna hi, cikha thei ding hi. Beelsekpa’ khut sunga om beel bangin Topa’ deihna khat om hi, ci-in a tel nadingin limciinna kipia hi. Pasian in na khempeuh tungah ukna nei hi, cih hih limciinna in pulaak hi. Beelseekpa in tungman tungah ukna na neih bang mahin, na khempeuh Pasian’ khut sungah om hi, cih pulaak hi. Pasian in ukna khempeuh a nei Pasian hi. Tu-in bang bang piang taleh, a tawpkhakna ah Amah bek mah vanglianin gualzo ding hi.
Kum zalom tampi khit ciangin, Paul in hih limciinna mah zangkikin mihing in deihtelna nei-in a ut bangin a gamtat hangin, a tawpkhakna ah a vanglian Pasian, Singlamteh tung pan kilang itna nei Pasian tung bekah lametna om hi, ci-in hong hilh hi (Rom. 9: 21). Siatna, gitlohna beimang ding hi. Pasian’ hong itna ahih leh, kip tawntung ding hi.
Tu laitak bang dinmunah na om zongin beelseekpa le tungman limciinna tungtawnin bang thumanpha na ngah hiam? Koi bangin Lai Siangtho in Pasian’ vangliatna pulaak hiam?
TUESDAY NOV. 3
MINAMTE KISIATNA
“Bang hang hiam cihleh hih mite in kei hong taisan khinzo uh a, amaute a kipanin a pu a pate uhleh Judah kumpite’ theih ngei loh pasian dangte’ kiangah paknamtui halin, hih mun a ninsak uh hi. Hih mun pen mawhna nei lo mite thahna sisan tawh dimsak uh hi”( Jer. 19: 4) Topa a nial uh hawmthawhin pasian dang bia, thuman mite that uh hi. “ Hih mun” (mun siangtho) in Jerusalem khuapi, ahih kei leh biakinnpi maw, cih kipulaak lo hi. Bang bang hi taleh, namdangte le mun dang tawh kibang lo-in, Pasian in Judah mite Ama mi siangtho dingin a teel, Jerusalem khuapi in a siangtho dingin kisehkhitsa hi (Pai. 19: 5, 6). Ahi zongin Pasian’ sawl bangin amaute nungta lo uh hi. Pasian’ teeltuam mi ahihna uh mangthangsak uh hi. A kisawlna mang lo uh hi. Namdangte tawh kilamdanna nei lo uh hi.
“Amaute in ka thupiak ahi lo ka gen ngei loh, ka ngaihsut khak ngei beek loh Baal biakna-in a tapate uh hal nading Baal aa dingin munsang a bawl uh hi” (Jer. 19:5). Namdangte in mihing tawh biakpiakna a neih uh hangin, a nungta Pasian in tua bang biakpiakna phal lo hi. Ama mai-ah tua bang biakna in kihhuai hi (Thkna. 18:10).
I sungah mawh in munla-in zungkha leh, Pasian’ muhna-ah bangzahin kihhuai hiam? Namdangte’ biakna le siatna in tuamcip ahih manin Judah mite in Pasian’ deihloh mihing tawh biakna pia uh hi. Eite zong kiim le paam pan siatna in hong zawh ding bangzahin lauhuai hiam? Topa’ hong deihsakna bangin Amah tawh nungta khawm lo, Ama Thu nungta tawh kivak lo-in khuamial gamtatna in hong tuam leh, bangzahin lauhuai hiam? (Heb. 5: 14).
WEDNESDAY NOV. 4
A KISUNEEN BEEL
Topa Pasian in limciinna tuamtuam zangin a lungkhauh Judah mite thuhilh hi. Ahi zongin amaute in Pasian’ thuhilhna telthei lo uh hi. Amau tuah ding gimna a theih nadingun tuibeel kisuneen khat tawh kithuhilh hi.
Jer. 19: 1- 15 sim in. Bang sem dingin Jeremiah kisawl hiam? Tua in bang ngimna nei hiam?
_____________________________________________________
________________________________________________________________________
Beelsekpa’ innah a pai dingin Jeremiah kisawl hi. A sepzia ding a theihpih ding mi khat tonpih dingin kisawl hi. Tua a theihpih ding mite in Judahte' sung pan siampite le upa-te hi ding hi (Jer. 19:1). Jeremiah tunga kisawl limciinna tungtawnin gam sung siatnate upa-te kingawh ding lamtak a theih nading uh ahi hi. Kongpi gei-a Ben Hinnom Belthem Kuam, niin bulom kipaihna gei-ah beel suzan dingin kisawl hi. Na khat peuh koih nadingin beel khaang kizang thei lai sam buang hi. Ahi zongin a kisuzan beel bangin kizang thei nawn ding hiam? Hih limciinna in Judah mite a kithuhilhna hi-a, amaute in Topa’ hilhnop thu theithei lo uh hi.
Topa in a kitamkham beel limciinna le Judah mite tuah ding vauhilh kimu thei hi. A kisutam beel a hoihin kua in bawlpha thei kik ding? Topa in Judah mite’ mailam lametna tawh kidim mah taleh, siatna pan kihei-in Topa a belh kei uh leh, amau dinmun in lamet nei lo uh hi. Mun khempeuh kihhuai-na bekbek tawh kidim hi. A thuak ding uh gimna in amau gamtatna tawh kituak mahmah ding hi.
Kibawl pha thei nawn lo a kisia van kisia khat ngaihsun in. Tua van bang dinga kibawl a, tu-in a kizang thei nawn lo dingin bangin susia hiam? Koi bangin hih bang hong pian loh nadingin kidop thei ding na hiam?
THURSDAY NOV. 5
Jer. 13: 1 – 11 sim in. Bang limciinna nei dingin Jeremiah kisawl hiam? Bang a thupi thuhilh na mu hiam?
_______________________________________________________________________
_______________________________________________________________________
Jeremiah sunga limciinna kizangte telhak gige hi. Euphrate gunpi pen Jerusalem panin tai tampi gamla hi. Ezra bang Jerusalem le Euphrate kikal kha 4 sung bang pai hi (Ezra 7:9). Pasian in Judah mite a hilh nop thu a tel nadingun Jerusalem le Euphrate kikal vial li pai dingin Jeremiah kisawl hi. Mi kim khat in Euphrate cih in khiatna dang khat nei hi ding hi, ci-in pulaak uh hi. Kim khat leuleu in, Israel mite tun nading mun a gamlatzia a lahnop man hi ding hi, ci uh hi.
Kum 70 val saltangin a omna mun uh pan a gam uhah hong ciah kik uh ciangin, Jeremiah lungdam mahmah hi. Kawnggak in siatna tawh a kidimma Jerusalem le biakinnpi limcing hi. Kawnggak tawh mipa in Topa Pasian mah limcing hi. Pasian in a mite tawh nungta khawm hi, cih pulaak hi. Tua kawnggak in saihadial tawh kibawl hi-a, siampi puan zong saihadial tawh kibawl hi (Siam. 16:4). Judah in Pasian’ teltuam siampi nam hi, cih kilangsak hi (Pai. 19:6). Kawnggak in i kawng tungah kikoih ahih mah bangin hun khat lai-in Judah mite in Topa tawh kizopna kip nei-in Ama min phatin, a vangliatna kilangsak mite hi ngei uh hi, cih limcing hi. Tu-in ahih leh kiim le paam nate tawh amaute kisia tawmsak uh a, Topa’ mi zat theih hi nawn lo uh hi.
Jer.13: 11 sim inla Thuhilhkikna 4: 5 – 8 tawh enkak in. Koi bangin Judahte' tungah thupiang pulaak uh hiam? Nang le kei ee leh! Bang hong hilh hiam?
FRIDAY NOV. 6
SIMBEH DING: Beelseekpa le beelseekpa’ khut sunga tungman in Topa Pasian’ deihna bangin i nunzia ding hong hilh limciinna kician mahmah hi (Rom. 9). Ahih hang Topa nang’ deihna bang i ci zo tawntung kei hi. Lamdang ngaihsut tuan khang! Isa. 55: 8 sim in. I theihna in ciangtan nei hi. Pasian’ ngaihsutnate i thei zo peuhmah kei ding hi. Nate’ pianzia tel lo ihih leh, Pasian’ nasepzia tel zo peuhmah ding i hiam? Pasian’ langpanna hangin i nunna a mangthang ding hi napi, Singlamteh hangin mihing in mannei hi. “ Mi tampi in mawhna kipatkhiatna le mawhna hong omna a hangin lungmang uh hi. Na khempeuh thei-in, pilna khempeuh tawh kidim, itna tawh kidim a vanglian Pasian’ ukna sungah bang hangin Gilopa’ nasepnate le leitung siatnate om thei veve hiam, cih mi tampi' telzawh loh thuthuk hi. Bang hang hiam cih leh mihing’ ngaihsutna in ban zo lo hi. Hih a kitelzo lo thu hang mahin mi tampi in Pasian’kammal hong lak thuman thutak mu thei lo-in hotkhiatna lampi nial uh hi.” Ellen G. White, The Great Controversy, 492.
KIKUP DING DOTNATE:
1. Siatna tawh kisai-in Pasian’ vangliatna koi bangin na telthei hiam? Koi bangin Satan in Khrih a langpanna tungtawnin siatna a bei dingzia na mu thei hiam?
2. Lai Siangtho sungah limciinna tuamtuam bangteng na phawk hiam? Bang hangin Pasian in limciinna tawh hong hilh hi ding hiam? Limciinna zat manin bang phattuamna om hi ding hiam?
