LESSON 5 OCT. 24 – 30
KAMSANG PA THUAK HAMSATNA PAWL KHAT
SABBATH NITAK: TU KAAL SUNG SIM DING: Jer. 23: 14, 15; 20; 18: 1-10, 18 – 23; Sawl. 2: 37; Job 3.
KAM NGAH: “Topa aw, kei nong khem a, kei hong kikhem ahi hi; kei sangin nang na hatzaw a, kei nong zo hi. Sun nilohin ciamnuihna-in hong kinei a, a kuamapeuh in hong selnoh uh hi” ( Jeremiah 20: 7).
Topa a zui mi khat in Topa’deih banga a nungta dingin kiging ahih nak leh, a nuntakna in nopna vive tawh kidim ding hi, cih kamciam om lo hi. Khrih Jesuh tawh kipawlin Pasian’ deihna bangin a nungta nuam khempeuh in bawlsiatna a thuak ding uh hi ( 2Tim. 3: 12). Jeremiah mahmah in zong hih thu theitel hi. Hamsat hun ciangin upna in mit tawh kimu thei lo nate hong musak a, hamsat gimna khempeuh hong kantanpih hi. Thuman lopi-in mawhsakna, gimna i thuak khak ciang Topa a thei ngei lo mite bang lo-in, lametna le a mannei nuntakna tawh a nungta ihihlam hong kitelsak hi. Gimnate mitsuan lo-in, Topa’ hong kamciamte hangin lametna tawh kidim mite ihi hi. Tua in gimna zawhzawhna tha hong guan hi. Khat veivei Jeremiah in tua bang lametna nei ahihlam mangngilhin Topa mitsuan ding sangin a thuak gimnate mitsuan kha zel mah taleh, a tawpkhakna ah Topa ama lametna lian pen ahi hi.
SUNDAY OCT. 25
PASIAN A THEILO SIAMPITE LE KAMSANGTE
Jeremiah hun lai-a Judah mite’ nunzia, kum 2000 val bang hi khin ahih manin i tel ding hamsa hi. Topa Pasian in Judahte' tungah a thuhilhzia le a makaihziate ngaihsun lehang, Pasian pen a ngongtat, guhgamh Pasian hi, ci-in a ngaihsun om kha thei hi. Tua bang ngaihsutna Lai Siangtho theihna kicing lo panin hong piang khia ngaihsutna man hi lo hi. A taktakin Thuciam Thak in itna Pasian a hong lah mah bangin Thuciam Lui in zong tua mah hong lak hi. Pasian in mi khempeuh itin, honkhia nuam a, ahi zongin thatang hatna tawh kuamah bantangkaih lo hi. Siatna bawl ding hong phal loh hangin mihing in a bawl nop teitei leh, Pasian in hong khaam lo hi. I ut bangbangin hong zuisak hi; hong gamta sak hi. Pasian in i gamtatna tungtawnin i tuak ding, i ngah ding thute hong theikholsak hi.
Topa in bangci bangin Judah mite’ siatna mu hiam? Jeremiah in bang siatnate langpan hiam? Jer. 23: 14, 15; 5: 26 – 31.
______________________________________________________
____________________________________________________________________
Pasian ai-awhna-in nasem Pasian’ sawltakte siampite in Pasian nusia-in siatna tawh kidim uh hi. Jeremiah in Judah mite’ siatna tampi lak pan tawmno khat bek a pulaak hi pan hi. Amaute siat gamtat banah midangte zong siatna bawl dingin pantah uh hi. Topa a langpan ban uhah, kuamah kisik lo dingin midangte zong makaih uh hi (Jer. 23: 14) Topa in a thukhen ding pulaak ta leh, kamsangte in Topa thukhenna om lo ding hi, ci-in thuhilh uh hi. Topa tawh kigamla khin uh ahih manin, genthei cimawh mite hehpih lo uh hi (Jer. 5: 28). Gambupin Topa nungngat khin uh hi. Amau' mawhna bangzahin tamta leh, Topa in ahih leh, Ama kiang zuan kik dingin sam tawntung hi. Pasian in amaute mawhna maisak dingin kiging den hi. Amaute cidamsak, puahpha nuam hi. Ahi zongin amaute in Topa nial veve uh ahih manin, Topa in bangmah sem thei lo hi.
MONDAY OCT. 26
KOLBULH THUAK JEREMIAH
Kamsangte’ nasep in Pasian kiang pan hong pai thute mite theisawnsak uh hi. Mi bangzahin Pasian umin, mi bangzah in nial cih pen amau nasep hi lo hi. Kamsangte’ gen thu a um mi sangin a um lo mi tam zaw den hi. Gentehna-in Noah hun lai-in mimal bangzah in ama’ tangko thu um hiam cih i thei kei hi. Ahi zongin mi a tamzaw in Noah’ thu gen um lo uh hi. A um mi, tembaw sungah a lut mi ahih leh tawmno khat bek hi. A khang a khangah zong thuman zui mi tam het lo hi.
Jer. 20: 1- 6 sim in. Mite in Jeremiah’ thugen a zak uh ciangin, bangci bang upna nei uh hiam?
____________________________________________________________
___________________________________________________________________
Pasian in Jerusalem khuapi ah gim ka tungsak ding hi” ci-in genkhol hi (Jer. 19: 3). Galte’ thahna thuak ding uh a, vasate in amau’ sa ne ding uh hi (Jer.19:7). Kialpi tungin amau le amau kigo-in a sa uh kine ding uh hi (Jer. 19:9). Hih bang genkholhnate hangin kuamah lungdam het lo mah ding hi. Makai Pashur bang heh phadiak hi. Judah mite in hih genkholhnate um lo-in langpang uh hi. Kua in hih bang thute um nuam mah ding hiam?
Pashur in zadah ahih manin hih bang thu a gen khol Jeremiah bawlsia pah hi. Moses’ gen bang mahin kolbulh, khumcip in mun khatah Jeremiah kikoih hi (Thkna. 25: 1- 3). A zingciangin Pashur in khahkhia kik a, tua bangin bawlsiatna a thuak hangin Jeremiah in a gen ding thu khiam tuan lo-in gen veve hi. Judah mite’ thuak ding bek gen nawn lo-in Pashur le a innkuante’ thuak ding gimnate pulaak khia hi. Pashur le a innkuante’ thuak bangin Judah mite in zong thuak ding uh hi, ci-in pulaak hi.
Judah mite saltan nading mun Babylon a pulaak masa penpen Jeremiah hi. Jeremiah sunga kigelh thute a kum tawh kizui-a kigelh suksuk hi lo hi. Mailamah na thuak ding gimna khat hong kigen hi leh, na om zia ding ngaihsun in. Koi bangin na om diam? Koi bangin om lecin a kilawm kituak hi ding hiam?
TUESDAY OCT. 27
GUHTE PAN MEIKUANG
Jeremiah’ thugenna hangin Pashur le Judahte a heh uh hangin, Jeremiah in ama deih a gen hi lo hi. Pashur’ bawlsiatnate hangin thukkikna tawh thugen zong hi lo hi. Topa kiang pan a ngah thute bek mah gen hi. Jeremiah in a lungsim sunga a suakhia thute Kha Siangtho in makaihin a gelhkhiat ahi hi. Judah gam le Jerusalem in siatna tawh kidim ahih manin mawhna kisikin, Topa kiang zuan ding deihna tawh amaute’ mawhna pulaak hi.
Jer. 20: 7 – 14 sim in. Jeremiah in bang gen hiam? Bang thu in eite mah bangin Jeremiah mihing ahihna kilangsak hiam?
_____________________________________________________
_______________________________________________________________________
Jeremiah in Pasian’ dinmunah a om tawh kibangin kampau pawl khat kimu hi. Jeremiah a kilangpan ding Pasian in genkhol khin hi. Tua hi mah leh, Jeremiah in “ka gen khempeuh langpanna, siatna vive suak hi” ci-in Topa' tungah a lungkimlohna pulaak hi. Tua bang kawmkalte lakah, bang thumanpha kimu thei hiam? Jer. 20: 9 sim in.
_____________________________________________________
________________________________________________________________________
Lungkia-in, a piangnate hangin a phun den Jeremiah in a nasep khawl leh, kilawm napi khawl lo-in, Topa’ sawl bangin nuntak ding lawpzaw semsem hi. “ Lungtang tungah meikuang in guh sung nangawng ban hi,” cih thu in limciinna hi a, bang bang thuak taleh, a lungsim khempeuh tawh lawptakin Topa’ na a sepnopzia pulaak kammal ahi hi. Hih bang kammalte Amos 3:8; 1Kor. 9: 16 ah zong kimu thei hi. Jeremiah’ kammalte tungtawnin ama thuakzia kimu thei hi. A sungah a sia le a pha kido hi, cih kilang hi. Gitlohna le siatna pan a suahtak manin Topa' tungah a lungdam napi, khat vei cianglah, gim kisa lua-in, “ka suah ni in samsiatna ngah ta hen,” cikha zel hi.
Bang hangin lungzin, hingimna i tuah ciangin Topa’ hong itna phawk ding thupi mahmah hiam?
WEDNESDAY OCT. 28
“SUAHNI KISAMSIA TA HEN”
Lai Siangtho sunga kigelh mihing’ kicinlohna tuamtuamte' hangin mi tampi in Lai Siangtho pen Pasian’ kammal hi, ci-in um zo lo uh hi. Lai Siangtho in Topa’ misiangtho-te’ kicinlohna pulaak mah hi. Pasian’ kamsangte in eite mah bangin mawhmai-na le upna tawh Khrih sihna hang a dikna kisam mite ahi uh hi (Rom. 3:22). Noah a kipan Peter cihte dongin mawhna suksiat vive hi-in amaute lametna in Topa sung bek mah hi. “A hong kihotkhiat zawh nadingin kei le kei-in dikna ka nei kei hi. Ahi zongin mawhmai-in dikna ngah theih nading lampi khat bek ahi leitung mawhna a pua, mawhna nei lo Tuuno’sisan bek mah mitsuanin Pa Pasian kiang a zuan ka hi hi. Jesuh’ min bekin Pa tawh kizopna hong nei theisak hi. Ka thumna khempeuh Amah in hong za-in, kitangsap khempeuh hong sikpa ahi hi.” Ellen G. White, Faith and Works, 106.
Jer. 20: 14 – 18 sim in. Koi bangin Jeremiah in ama tuakkhak thute pulaak hiam?
_____________________________________________________
__________________________________________________________________
Jeremiah’ pulaak thute le Job’ pulaak thute kibang hi. Topa’ lungtup bangin Jeremiah in a seplam kitel hi napi, a tuah thute hangin lamet bei kisa hi. A thuak gimnate in a theih thuman thutakte pulaak zo lo hi. Khat veivei ciang, tua bang a thuak kha zong i om ding hi. Ei mah bangin Jeremiah in zong na thuak kha-a lamet bei kisa kha hi.
Jeremiah’ thuak bangin na thuak ngei hiam? Na tuah ngei leh, mailamah na phutkhak ding gimnate na zawh nadingin bang hong hilh hiam?
THURSDAY OCT. 29
KAMSANGPA KILANGDO DING KIGEELKHOL
Jer. 18: 1- 10 sim in. Kamsangte’ gen thute i tel nadingin bang thuguipi hong hilh hiam?
__________________________________________________________________
__________________________________________________________________
Siatna tawh kidim uh hi mah taleh, Topa in hehpihin kisik ding ngak lai hi. Pasian’ hehpihna a sang mite kihehpih ding hi. Bang bang siatna a bawl khin phial zongun kisik le-uh mawhmai thei lai veve ding hi. Topa’ genkholh thute mite' tungah kinga hi. Mawh kisik peuh le-uh gimna tawh kipelh ding uh a, kisik kei le-uh gim thuak takpi ding hi. Pasian’ thukhenna om takpi hi. Ahi zongin mawh kisik mite in tua thukhenna tawh kipelh ding uh hi. Mite’ nunzia tungtawnin a genkholh thute tangtungsak ding hi. Pasian in lampi dang nei lo ahi tam? Hilhkhol lopi-in Pasian in gimpia lo hi. Siatna lampi pan kilehkik peuh le-uh, siatna tawh kipelh ding uh hi.
Jer. 18: 18 – 23 sim in. Mite in bang siksanin Jeremiah langpan uh hiam? Koi bangin mihing hihna tawh kizui-in Jeremiah in amaute dawnkik hiam?
____________________________________________________________________
____________________________________________________________________
Mite’ mawhsakna hangin Jeremiah lungkia mahmah hi. Topa’ thupiak le pilna tawh a nungta ka hi uh kici napi uh, amau le amau kikhemlam kiphawk lo uh hi.
Judah mite' tungtawnin na khat peuhpeuh Topa’ min suangin i septe ki-ettel phat ding hong hilh hi lo hiam?
FRIDAY OCT. 30
SIMBEH DING: Topa in a mite' tungah a nuntakzia uh kikhelin siatna lampi panin kihei un, ci-in hilh hi (Jer. 18: 11 – 17). Topa’ vauhilhnate manglo-in amau ut bangin mainawt veve ding uh, cih Topa in mukhol mah taleh, Topa in siatna pan kikhel ding gen tawntung hi. Thumanglo teitei uh ahih manun Topa in amau' tungah a bawlzia ding pulaak hi. Pasian in a piang ding khempeuh mukhol hi. Hih muhkholhna in mihing’ deihtel theihna khaktan lo hi. Tua bangin Topa langpan veve ding uh ahih leh, bang hangin Pasianin kisik ding kun tawntung hiam? Deihtelna nei lopi-in Topa langpang hi leh ee? Bang hangin Pasian in daan pia veve ding hiam? Amau khensatma nangawnin Topa in amau khensat ding theikhol khin hi (Thkna. 31: 20). Israel mite Canaan gam a lutma-un Israel mite in pasian tuamtuam bia ding uh hi, ci-in Pasian in Moses tungah pulaak khia hi. Tua hi-in, Pasian in a theihkholh hangin mihing’ deihtelna le khensatna suksiatsak lo hi.
KIKUP DING DOTNATE:
1. Thursday ni-a dotna enkik in. Mi kim khat in “ Topa' kiang pan thusuak” ci-in na khat peuh sem uh hi. Tua bang thusuakte koi bangin na mu hiam? Topa in hong makaih ding hi, ci-in a um lo i hi kei a, ahi zongin, koi bangin Topa’ makaihna taktak na theitel diam?
2. Jeremiah’ gen bangin i sungah Topa’ thu mei bangin kuang thei ding hiam?
3. Tu kaal sung thusinnate' tungtawnin Topa' lamet kipuahphatna le thaksuakna na ngah hiam? Thaksuak nadingin bang hangin mawh kisikna kisam hiam?Hih thu siksankawmin, bang hangin thaksuak nadingin Singlamteh le a’ hong piak lametna in a kisam phamawh thu hiam?
