Pasian in nate bawlin a bawl bangbang hoih mahmah hi. Hoihna tawh kidim leitungah siatna a hong piantheihna thu i telloh hangin a kitel mahmah khat om a, tua in: mawhna hangin zuau ( Satan) le thuman (Pasian) kilangneihna kipan pah hi. Hih kido-na tawh kipelh thei kuamah a om kei hi. Pasian in nate a piansakin tua bangin a piang dinga a bawl hi lo hi. Pasian in nate a piansakin hoihna tawh kidimin, nate in Pasian’ thupha piaksa ahi hi. Nate a khuatuah Pasian hi-in, piansak nate a kem dingin Adam le Eve kisawl hi.
Satan in zuau tawh Eve phat hi. Pasian a muang kimlai lampialin Satan tungah a kingak zawk nadingun, Satan in Adam le Eve tungah a zuau a kipan a sia le a pha kilangneihna hong kipan hi. Nupate in Pasian tungah na citakin, ‘ne kei un’ cih hamsa het lo Pasian’ thupiak a zui hi le-uh, tu-a i thuak gimna, siatna khempeuh om lo ding hi.
Satan’ ngimna bulpi pen in: mihing in Pasian’ zia le tong mukhialin, Pasian pen itna nei lo, hehpihna nei lo, itna tawh a thuzuih ding sangin lau-na, huatna tawh Pasian kiang a pai dingin hong deih hi. Satan in mihing lungsimah Pasian’ thupiak nawlkhinin, a kul lo pi khat va zuih kul lo hi, cih lungsim guan a, ama zuaukhemna a langpan peuh mah bawlsia tawntung hi. Hih thu pen siampite, kamsangte, sawltakte, thahna thuak Pasian’ mite le pawlpi’ puahphate in tangko uh hi. Ellen G. White, The Great Controvery, 12, 13.
Satan’ nasep ding mukhol ahih manin Pasian in leitung a bawl mapek nangawnin tatkhiatna geelkhol khin hi (Eph. 1:4). Abram tungah ganhing tawh thuciamna tawh tua tatkhiatna thu kipulaak hi (Pian. 15). Mawhna hangin tatkhiatna om takpi ding hi, cih biakpiakna tuamtuamte in pulaak khol hi. Pasian in mihingte bek hi lo a bawlsa na khempeuh tawh kizop nading, mihing khat le khat kizop theih nadingin, mihing’ langpanna
“Jesuh in mihingin hong piangin, eite tawh hong omkhawm Pasian” (Immanuel) Adam le Eve tung pan kilakhia Eden huan hong ngahsak kik hi. Adam’ puklawh ze-etna, Khrih in zozo hi. Van a kah madeuhin Ama gam zaai nadingin a Nungzuite in vangliatna tawh kidim ding kamciam a, Pentecost ni-in, tua kamciam tangtung hi.
Jesuh in singlamteh tungah a vanglian gualzawhna ngah hi. Eite teel ding lampi in: gualzawhna lampi maw, guallelhna lampi? Gualzawhna lampi teel ding cih pen kuama ciat ii theih hi napi, zuau le thuman kido-na bei nai lo ahih manin, hih kido-na-ah i panmun ding nisimin i khensat det kul hi. Khrih a teel hi bek lo-in, Ama sungah kip tawntung ding kisam hi. A hong kamciam bangin, “A bei dongin a kip mi in hotkhiatna ngah ding hi” (Matt. 24:13).
LESSON 1 DECEMBER 26 – JAN. 1 VANTUNGA BUAI-NA
SABBATH NITAK: TU KAAL SUNG SIM DING: Isa. 14:4, 12 – 15; Ezek. 28: 2, 12 – 19; Jn. 12: 31; Mang. 12: 7 – 13; Luke 10: 1- 21.
KAMNGAH: “Hotkhiatna in kumpi tokhom tunga a tu, eite Pasian le Tuuno aa ahi hi” (Mangmuhna 7: 10).
Itna thukham bulphuhin Pasian in na khempeuh uk hi. Vantung Pasian Kumpi’ gam in itna bulphuh hi. Lungdamna khempeuh tua itna le Pasian’ dikna tungah kinga hi. Pasian in Ama nasem ding, itna tawh a thupiakte nuntakpih ding le Ama thu mang ding hong deih hi. Pasian in sawl zawh thu a thuman’ deih lo hi. A thupiak nuntakpih ding maw, langdo ding, khat zawzaw deihteelna hong guan hi. Pasian in utna lungsim tawh amah it ding hong deih hi.” Ellen G. White, Patriarchs and Prophets, 34.
Piansak na khempeuh in Pasian a it laisiah na khempeuh in hoihna tawh kidim hi. Lehdona hangin na khempeuh kikhel hi. Lucifer in Pasian’ bawl nate sangin a hoih zaw-in bawl thei dingin kingaihsun hi. Luficer in Pasian’ dinmunah om nuam hi. Pasian’ vangliatna deihgawh hi. Pasian’ thuneihna a deihgawhna panin vantungah siatna hong kipanpah hi (Mang. 12:7). Lucifer in Adam le Eve a khemzawh manin leitungah mawhna hong kipan hi. Tu ni ciang dong tua mawhna’ thaman i thuak hi. Satan’ suksiat nate a kipan mihing le Pasian kizopna Pasian in hong bawlphatsak hi. Hih pen tatkhiat nasep kici hi.
SUNDAY DEC. 27 VANTUNG PAN MAWHNA
Isa. 14: 4, 12 – 15 sim in. Babylon kumpipa’ zia le tong bek pulaak bek tham lo-in kua ii zia le tong pulaak hiam?
_____________________________________________
_____________________________________________
Van pan hong tuak sukin kumpi hong sem om lo hi. Isa. 14: 12 – 15 sung a kigen thu in Babylon kumpipa banah a dang vangliatna nei khat ii zia le tong hong lak hi. Namdang tuamtuamte’ biak pasiante’ zia le tong kipulaakna munte-ah vantung a sanna munah vakahto, vantungmite omna sangin a sangzaw-ah om ci-in pulaak uh hi. Satan ii ngimna khempeuh hih lai-ah kidawk hi.
Jesuh in Jerusalem kisiat ding a genkholh banah Ama hong pai kik madeuh a thupiang dingte tawh pulaak khawm hi (Matt. 24). Nungzuite in Jerusalem kisiat ding ngaihsun uh hi. Ahi zongin Jesuh in AD 70 ciangin Romante susiat ding banah leitung bei ding thute zong hong hilhkhol hi. Tua mah tawh kibangin Isaiah in zong Babylon kumpipa’ thu bek a gen hi lo-in, mihing sangin a vanglian zaw khat ii thu hong hilh hi.
Eze. 28: 2, 12 – 19 sim in. Koi bangin Satan’ nunzia pulaak hiam?
____________________________________________
____________________________________________
Ngimna hoihlo in hoihna tawh kidim leitung susia hi. Ezekiel in Eden huan’ omzia a pulaakna-ah, suang hoih tuamtuam tawh kizem siampipa awmdal mah bangin Eden huan in zong suang hoih namkim tawh kizemin, Pasian’ tokhom a kem a cing dingin cherub vantungmi kisawl hi, ci hi. Lucifer in ama hoihna kisa thei-a, tua in siatna piangsak hi. Leitung kumpite’ vangliatna in vantung liatna bangzahin lian ding cih hong ngaihsun theisak hi. Vantungah thupiangte i thei khin kei hi. Hi mah taleh, van tungpan leitungah siatna hong tung hi, ci-in i thei hi.
Kiliatsakna lungsim in kicinna tawh kidim Pasian’ bawl na khempeuh siatna hong tunpih ahih leh, Satan a kipan mihingte’ siatna in bangzahin kilang hiam?
MONDAY DEC. 28 HIH LEITUNG’ KUMPI
John 12: 31; 14:30; 16: 11 sim in. Bang hangin Jesuh in Satan pen leitung’ ukpa ci hiam?
________________________________________________
________________________________________________
Pasian in muanna tawh Adam le Eve in Eden huan, ganhing, vasa, na khempeuh a kem dingin kisawl hi (Pian. 1: 26, 28; 2:8, 15). Adam in ganhingte a min vawhin ganhingte kemcing ding kisawl ahih lam pulaak hi pah hi. Nate tungah thuneihna kipia ahih manin minvawh thei hi pan hi. Na khempeuh tungah ukna nei ahih lam nate a minvawh in pulaak hi. Adam in nate tungah ukzawhna a neih nawn loh ciangin, Satan in Adam’ dinmun luah hi. Mi khempeuh in (Mang. 1: 6; 5:10) Pasian tawh nungta khawmin Adam’ dinmun ngah kik nadingin Khrih in singlamteh tungah Amah le Amah hong kipia hi. Job in Pasian’ vantung thukhenna tokhom omzia, Adam’ sup vangliatna pulaak hi. Mihing in a mawh a kipan mawhna tawh nungta i hihlam hong phawksak hi.
Job 1: 6, 7; 2: 1, 2 sim in. Bang hangin Satan in leitung mun khempeuhah a vaksuk a vaktoh khit ciang Pasian’ tokhomah amah le amah va kipulaak hi ding hiam?
_____________________________________________
_____________________________________________
“Mun khempeuh ah vaksuk vakto” cih kammal in mun khat pan mun khatah gamvelin khualzin mi cihna hi lo hi. Bang pulaak hiam cih leh ‘neihsa pulaak kammal,” “leitung pen kei aa hi,” cih pulaak hi. Pasian in Abraham’ luah ding leitang a gen ciangin tua leitang ii a dung a vai pulaak hi (Pian. 13: 17). Tua mah bangin Moses le Joshua-te tungah zong gen hi (Thkna. 11: 24; Joshua 1:3). Satan in amah le amahin hih leitung’ pasian ka hi hi, a ci hi gige hi (2Kor. 4:4).
Satan in amah le amah a kigenna (Job 2 le Piancil 3 )le mawhna kipatzia a thu kibang hi. Leitungah Satan’ nasep na mu hiam? Koi bangin, Topa’ hong kamciamte in ni khat ni ciang siatna khempeuh beimang ding hi, ci-in lametna na nei hiam?
TUESDAYDEC. 29 VANTUNGA KIDO-NA
Vantung panin Satan le a pawlte kihawlkhia hi, cih loh a dang vantunga kido-na, thatang tawh kido-na maw, bangci bang kido-na hi ding hiam, cih i thei kei hi. Lai Siangtho in zong gen lo hi. Vantunga kido-na hangin hih leitung ii thuak a kimu thei lo kido hong hilh hi.
Mang. 12: 7 – 16 sim in. Khrih le Satan’ Kidona Lianpi hangin vantung le leitung in bang thuakpih hiam?
____________________________________________
____________________________________________
“I sanggamte ngawhin a mawhsakpa le a gualzo mite, cih thu in Kido-na om hi, cih pulaak hi. Sihna pan tatkhiatna le a hong tung ding Pasian’ gam kizopzia zong kilang hi (Mang. 12: 10, 11). Mang. 12 in a pulaak thute: Khrih le Satan kidona, lauhuai thu thum, suahtakna. Tua thute limciinna tuamtuam tawh pulaak hi. A lian mahmah Gulpi san (tanglai Gulpi) in Satan limcing hi (Mang. 12:9). Tua Gulpi san a hong suak ding naungek (Jesuh) ne dingin kiging hi. Kua naungek suakta zo ding? Ahi zongin naungek Jesuh suakta in, vantung Pasian’ tokhomah om hi. Tua ciangin Gulpi in tapa nei numei (Pasian’ mite limcing) bawlsia dingin kithawi hi (Mang. 12: 13). Gulpi’ khut sung numei in lamdangtakin suakta hi (Mang. 12: 14). Pasian’ telsa mite bawlsiat ding a limcing a hi numei susia dingin Gulpi in a kam sung pan tuihual lianpi luangkhiasak hi (Mang. 12: 15) Kua numei in tuihualpi nang zo ding? Ahi zongin Pasian in a mite honkhia hi (Mang. 12: 16).
Tu-in tua Gulpi in numei’ suan a beibangte mudahin hehna tawh dodo hi. A khang a khanga om Pasian’ mite in bawlsiatna, nenniamna, thahna thuak uh hi. Pasian tungah a citak mite’ thuak bawlsiatna bek ngaihsun kha hi lehang, amaute’ suahtakna lampi nawn lo ding tawh kibang phial hi. Ahi zongin amaute in kihonkhia ahih manin Pasian’ tokhom mai-ah nungta tawntung ding uh hi (Mang. 14)
Khat veivei ciang nang sangin a lianzaw gimna tuamtuamte in hong netcip ciang, na khempeuhte’ sangin a lian zaw Topa sungah koi bangin thakhauh ding na hiam?
WEDNESDAY DEC. 30 SATAN KIHAWLKHIA
Kidona Lianpi in vantung le leitungah siatna hong tun hi. Satan in Pasian’ tokhom mai-ah kilaak dingin hun tawm khat sung kipia hi. Tua munah Pasian’ mite hong mawhsak hi (Mang. 12: 10) Tua a mawhsak mite lakah Job zong kihel hi.
Lk. 10: 1- 21 sim in. Khrih’ kammal Satan’ zia le tong bang pulaak hiam?
___________________________________________
Ngia-hon lakah kikhah tuuno bangin Jesuh in sawltak sawm sagihte a sawl teh sum, puansilh bang mah kengthuah lo-in, a tuntunna uah Pasian’ thupha ngetsak dingin thupia hi (Lk. 10:4 – 5; 10: 3). Gulpi in Pasian’ mite do-in bawlsia hi (Mang. 12). Sawm sagihte in dawite zo-in lungdamin Jesuh kiang hong cih kik uh hi (Lk. 10: 17, 21). Tua leh Jesuh in Satan in vantung panin hong kiasuk ka mu hi, ci-in pulaak hi. Amaute lungdamna in dawite zawhna hangin lungdamna sangin vantungah a min uh kigelh na hangin a lungdam hi zaw dingin Jesuh in hilh hi ( Lk. 10: 20). Hotkhiatna in Topa’ kiang pan hi, cih hong phawksak hi. Dawite a zo mihing hi lo-in Jesuh hi zaw hi. Ahi zongin Jesuh’ gualzawhna, a hong hotkhiatna teci pang, a pulaak dingin sawlna ngah ihi hi. Sawlna ngah mite mi hampha hi. Topa a’ding teci hihna le dawite tungah Khrih’ piak vangliatna in kizopna nei hi. Topa a’ding teci hoih mi in hih leitung a uk Satan’ vangliat zo-in, Topa kiangah mite paipih, Pasian’ gam zaisak ahi hi.
I galpa Satan a zo thei ding thu-um mite ihi hi. Bang hang hiam cihleh Jesuh in singlamteh tungah Satan’ thuneihna, vangliatna khempeuh zo khin hi. Tua bek mah eite zawh nading lampi hi (Kol. 2: 15). Jesuh sunga a om mite in a gualzo Pasian’tate ahi uh hi. Hih leitung’ukpa kihemkhia taktak ding a, Pasian’ mite susia thei nawn lo ding hi (Jn. 12: 31). Bang zahin lungdam huai hiam! Topa in eite zawhna ahi hi.
Lungdam un. Bang hang hiam cihleh vantungah na min uh kigelh hi. Hih thu ngaihsun pha in. Bang pulaak hiam? Bang hangin lungdam kul hiam?
THURSDAY DEC. 31 TUCIANG DONG KIDO-NA
Gu nei gulte a sihkhit tungin hong tu zo lai veve thei hi. Gul bangin Satan in zong hong tu thei hi. Calvary ah Satan kizo khin taleh, a’ vangliatna gu bei nai lo hi.
Jn. 16: 33 sim in. Koi bangin Jesuh in Satan i dotawntung ding hong hilh hiam?
____________________________________________
Jesuh’ nungzuite’ tot lampi nuam tawntung lo hi. Lampi haksa mitsuan lo-in a hong kipia ding gualzawhnate mitsuan zawk ding ahi hi. Paul in zong hih thu siksanin “ Thu-um mite’ khe nuai-ah Satan kisusia ding hi,” ci-in hong hilh hi (Rom 16:20). “Hun nunung a Pasian’ pawlpi in Tuuno’ sisan vangliatna tawh Satan zo zo ding uh hi,” ci-in John in zong pulaak hi (Mang. 12: 11).
Heb. 12: 1, 2 sim in. “Teci-te” cih in kuate hi ding hiam? Koi bangin amaute in tha hong pia uh hiam? Heb. 11 zong sim in.
____________________________________________
Upna kip nei mite: Abel in a kicing biakna pia hi. Tu dong mah ama thu kimangngilh lo hi. Enoch in Pasian tawh nungta khawmin silo-in vanah kila to hi. Noah in mawhna sungah a nungta mite kiangah a lauhuai tuiciin tun’ ding le tuiciin pan suahtak nading lampi tangko hi. Abraham in kamciam leitang luah dingin a pianna gam nusia hi. Sarah in ta nei thei dingin tek khin taleh, ta nei dingin kamciam ngah hi. Moses in Pharaoh’ tapa-in om ding sangin a’ mipihte tawh bawlsiat thuak zaw hi. Rahab in Pasian’ vangliatna pulaak hi (Joshua 2: 9 – 11). Hih bangin upna nei mite Heb. 12: 1 in “hih zahtaka a tam teci meiipite” ci-in pulaak hi. Amaute in lawpna tawh nungta uh hi. Bang bang thuak mah ta leh a nawktan zo mite hi. Kimawl nuam lo-in a kimawl mite a en mite bang hi lo-in, amau mahmah a va kimawl mite tawh kigenteh thei hi. Hih Kidona-Lianpi sungah ei kia bekin a do i hi kei hi.
Hebrew 11 sunga etteh huai mite ngaihsun in. Amaute in kua bangte hiam? Bang nunzia nei uh hiam? Eite mah bangin amaute zong kicing lo, khialhna nei, thanempi mah, lau-na nei uh hi ta leh, amaute tungtawnin tha na la ding hiam?
FRIDAY JAN. 1
SIMBEH DING: “A kitheitham khol lo khatin Lucifer in amah le amah kiliatsak nopna lungsim nei hi.” Patriarchs and Prophets, 35. Pasian in a Kumpi gamah deihtel theihna koih hi. Lucifer in amah a piangsak Pasian langpang dingin tel zaw hi. Pasian in nate a bawlin siatna tawh bawlkhawm lo hi. Na khempeuh in kicinna tawh kidim hi. Tua hi napi, koi bangin Lucifer sung pan siatna hong kipan hiam? Hih thu i thei kei hi. Paulap ding om lo hi. Om kha phial mah taleh Pasian in tua mawhna vaipuak hong la hi. Mihingte in na khat peuhpeuh ngawh nei nuam pha diak hi. Ahi zongin mawhna pen a hang khat om a hong piangkhia tawm hi lo-in amah le amahin hong piang ahi hi. A hi mah ding hiam, cihnop huai hi. Pasian’ maipha ngah Lucifer in a gamtatnate khial kisa lo hi. Pasian’ piak deihtelna zangin amah le amah kisiasak tawm a, “khuavak puapa” pen ‘galpa’ (Satan) suak hi. Lucifer’ thu i theih a tam het loh hang, i theih ding a thupi mahmah khat in Pasian’ hong piak deihtel theihna zatsiam ding kisam hi.
KIKUP DING DOTNATE:
1. Satan in hazatna a neih manin Pasian langpan hi. Na nuntakna-ah hazatna in bang siatna hong tun hiam? Bangci bangin hazatna hemkhia ding i hiam?
2. A khawnkhongin i ngah deihtel theihna le khensat theihna manphatzia ngaihsun in. Hih letsong a kizatkhialh manin siatnate ngaihsun in. Koi bangin tua letsong zangsiam thei ding i hiam?
3. Deihtel theihna le khensat theihna tawh kisai-in thukham ii nasep, dimmun ngaihsun in. Mihing in deihtel theihna le khensat theihna nei takpi ahihlam a pulaak dingin Pasian in thukham hong pia hi. Mihing in deihtel theihna le khentatsiamna nei kei leh, thukham ii ngimna bang hi ding hiam? Thukham in deihtel theihna tawh kisai bang hong hilh a, nunzia ding bang hong hilh hiam?
4. Mi kim khat in mawhna, siatna om lo hi, ci uh hi. Bang hangin hih bang thu in Lai Siangtho’ hong hilh thu tawh kituak lo hiam?
