LESSON 2 JAN. 2 – 8 EDEN HUAN PANIN BUAI-NA
SABBATH NITAK: TU KAAL SUNG SIM DING: Pian. 1: 28; 2: 15 – 17; 3: 1 – 7, 10 – 19; Rom 8: 17; Matt. 6: 26. KAMNGAH: “ Nang le numei kikal le nang suan le khak le
ama suan-le-khakte kikalah kihuatna ka omsak ding hi; amah in na lutang suzan dinga, nang ama khetul na tu
ding hi,” a ci hi (Piancilna 3: 15).
Pasian in na khempeuh a bawl khit ciangin hoih mahmah hi, ci-in pulaak hi (Pian. 1:31). Tu-in ahih leh na khempeuh hoih lo hi. Mihing in leitung hoih nading geelin hanciam taleh lau-na, kisiatna, kido-na, kinengniamna, kithahna cihte khang semsem hi. Leitung in a hoihlam manawh dingin i lamet hangin siatnate hangin mihing in lamet bei hi. Koi bangin hih dinmun kitung hiam? A hang pen “Kido-na Lianpi” vantung pan hong kipan ahih hangin leitung hong bansuk hi.
Tu kaal sung i sin ding thu in: Satan in mihing’ deihtel theihna le khensatsiamna susia dingin nasemin susia takpi ahih manin, tua ii gah tu dongin i nene lai hi. Eden huan sung pan hong piang mawhna hangin leitungah i thuak thute in bang hong hilh hiam cih leh, eite bukna ding munhuai bel in Pasian’ hong gen thute um ding banah, a hong piak thute nuntakpih ding ahi hi.
SUNDAY JAN. 3 THUPHA THUMTE
Pasian in a bawlsa nate enin hoih hi, ci-in sagih vei pulaak hi. khuavak (1:4); leitung le tuipi (aneu 10); ni, kha le aksite (aneu 16); tui sung ganhingte le huihlak ganhingte (aneu 21); gamsa le innsa khempeuh (aneu 25). Pasian in nate le ganhing khempeuh a piansak khit ciangin, Pasian in a bawlsa na khempeuh en , hoihsa mahmah hi (Pian. 1:31). Pasian in a bawlsa tuisung ganhing khempeuh, huihlak ganhing khempeuh cipung dingin thupha pia hi (Pian. 1: 22). Thupha nihna: Adam le Eve nupa zong cipung dingin thupha pia hi (Pian. 1: 28).
Pian. 1: 22, 28 sim in. Pasian in Adam le Eve thupha a piak banah a dang bang piathuah lai hiam?
____________________________________________
____________________________________________
Pasian in ganhing cipung dingin thupha pia hi. Ahi zongin ganhing’ tungah kipia thupha le mihing’ tunga kipia thupha a kibat lohna om hi. Adam le Eve in ganhing khempeuh le singkung lopate a kem dingin tavuan kipia hi. Hih in mihing pen Pasian’ lim le meel suunin kibawl hi, cih kilatna khat ahi hi. Ganhing, singkung lopate a kemkhawm dingin PIANGSAK pa in Adam le Eve sam hi (Rom 8:17; Heb. 1: 2, 3).
Sabbath, piansak ni sagih, kipiansak: (Pian. 2: 3). Sabbath kipiansak thu in mihing in ganhingte bangin nuntakna nei khat hi bek lo hi; Piangsakpa tawh kikhawl thei, kizopna nei thei dingin mihing kibawl hi. Ganhingte in tua bang nei lo hi. Hih in ganhing le mihing kibat lohna hi pah hi. Jesuh in, “vana leng vasate en dih un. Amaute in khaici tuh lo, an zong la lo-in bem le salah zong an a khol kei uh hi. Ahi zongin, vana om na Pa un amaute an a vak hi. Vasate sangin manpha zaw hilo na hi uh hiam?” (Matt. 6: 26),ci-in mihing manphatna hong hilh hi.
Koi bangin Lai Siangtho in mihing’ manneihzia pulaak hiam? Hih thu siksanin midangte na it ding zahin na it hiam?
MONDAY JAN. 4
SINGKUNG TUNGA SITTELNA
Khuavak le khuamial, tuipi le leitang, sun le zan, numei le pasal cih bangin Pasian in a tuamin khen dimdiamin a bawl ahi hi.
Pian. 1: 4, 6, 7, 14, 18, 21, 24, 25 sim in. Mihing a hong kipiansak ma-in bang hangin Pasian in nate khen hi ding hiam?
_____________________________________________
_____________________________________________
Pasian in leivui tawh mihing a hong bawl mah bangin gamlak ganhingte, vasate zong leivui mahtawh bawl hi (Pian. 2: 7, 19). Leitang in singkung nam tuamtuam le gah tuamtuam a piang dingin kibawl hi. Mundang tawh kibang lo huan tuam vilvel khat om a, bang zahin tua huan in hoih ding hiam, cih pen i ngaihsut thei kei hi. Tua huan sung singkung lak pan nungtakna singkung le a sia a pha khenteltheihna singkung nih kikoih hi. Adam le Eve in a sia le a pha khentheihna singkung pan a gahte nek loh ding ahih manin a nek uh leh nek thaman thuak ding uh hi (Pian. 2: 17).
Pian. 2: 15 – 17 sim in. Hih bangin khentuamna in koi bangin Pasian’ thupiak zui le zui lo kilang thei hiam?
_____________________________________________
_____________________________________________
Nek ding le nek loh ding singgah kiciantakin kihilh hi. Pasian’ thupiakte telhkhialh ding om lo hi. Adam le Eve tungah a sia le a pha a khen theihna kipia hi. Amau’ deihteel theihna a zat ding uh ahi hi. Pasian’ thu piak zui maw, zui lo, Pasian it maw it lo sittel nadingin a sia a pha theihna singkung kikoih hi. Huan sung singgah khempeuh ne thei ding a, a sia a pha theihna singgah nek ding kiphal lo hi. Tua thupiak a awlmawh kei uh leh, thupiak palsatna hangin gimna thuak pelmawh kul hi. Ellen G. White, Patriarchs and Prophets, 53.
Na nuntakna ah bang nate taisan ding na hiam?
TUESDAY JAN. 5
MAWHNA: Khen Masa
Ganhing dangte sangin gulpi pil zaw hi. Gulpi in limcinna tuamtuam nei hi (Pian. 3:1). Singkhuam tunga Moses’ sumngo gulpi a en khempeuh in gultukna pan damna ngah uh hi (Gam. 21: 5 – 9) Tua khit kum 700 val khit ciang, Hezekiah in sumngo gulpi pasianin a kibiak manin susia hi (2Kum. 18: 4). Hun nunung ciangin gulpi in Satan limcing hi, ci-in John in pulaak hi (Mang. 12:9).
Pian. 3: 1 – 5 sim in. Satan in Eve a khem zawh nadingin bang khemna zang hiam?
____________________________________________
____________________________________________
Gulpi’ pulaak masak “Pasian in gentakpi mah hiam” cih kammal in muanmawhna, thusimlohna pulaak hi (Pian. 3: 1). Bang dingin gulpi in hong hopih hiam cih Eve in ngaihsun lo hi. Pasian in huan sung singgahte ne kei un, ci lo hi. Ahi zongin Satan in “Pasian in gen takpi mah hiam” “huan sung a singgahte ne kei un, hong ci hiam” cih Satan’ kammal in Pasian’ thupiak langpanna, Pasian’ zia le tong muanlahna, Pasian langpanna pulaak kammal hi. Pasian in a pulaak loh thu Eve in behlap hi. Tua tungtawnin Eve buaisak pah hi (Pian. 3: 2, 3 le 2: 17 enkak in).
Eve in a behlap “lawng ken” cih kammal ama pukna hong suak hi. Behlap kammal mah siksanin Satan zong maingal zawkan hi. “ Na si takpi kei ding uh hi” cih thupiak langpan ngam pah hi (Pian. 3:4). Singkung lawngin a sih loh manun behlap thu upna khauh semsem hi. Singgah nek ni a kipan mitte kihongin sia le pha khentel thei-in Pasian tawh na kibang ding uh hi, cih thu upna kipsak hi. Satan in Pasian pen a thuman lo Pasian, na hoih a pia nuam lo Pasian hi, ci-in khaici vawh hi.
Satan in thuman le thuman lo helhzau hi. Tua bangin a kihelhzau thu na phawk kha ngei hiam? Bang hangin tua bangin thuman le zuau thu kihelhzau hi ding hiam?
WED. JAN. 6
MAWHNA: Khen Nihna
Pasian in Ama mel le limin Adam le Eve piangsak hi (Pian. 1: 26). Zuau Genpa in nek loh ding singgah ne le-uh cin “Pasian tawh na kibang ding uh hi” ci-in holhthawh hi. A taktakin Adam le Eve pen Pasian tawh kibang khin uh hi. Bang hang hiam cih leh Pasian in Ama lim le meel suunin a piansaksa ahi hi. Zuau thu hangin Adam le Eve in hih thuman mu kha lo uh hi. Pasian in amaute nek ding a pia Pa hi. Ahi zongin Pasian’ thupiak a zuih ding uh le zuih loh ding khensatna kiguan hi. Bang tawh kibang hiam cih leh, mi khat in ama innah an ne dingin hong sam hi. Nang zong va pai-in innteekte’ hong luui sabuai tunga an tuamtuamte ne lo-in , tua lo bizu sung, mun danga a koih uh an na dawh zawk manin na nek tawh kibang hi. Tua in an ne dingin hong samte na thupisim lohna banah amaute na kizopna susia hi.
Pian. 3: 4 – 7 sim in. Satan in tua singgah ne takpi leh mitte kihong ding hi, ci-in Eve zia-et hi. A mit uh kihong takpi a, bang mu pah uh hiam? Tua muhthak in bang limcing hiam?
________________________________________________________________________
________________________________________________________________________
Eve in a tuah khak thute hangin a ngaihsutna tampi kilamdang hi (Pian. 3:6). A mitah tua singgah deihhuai-in, a nek tak ciangin a pumpi tungah kilamdanna khat phawk khia pah hi. A tuah thute a pasal hawmsawnin, a mit uh kihong takpi mahin maizum uh hi. Pasian a muan ding sangun amau le amau kimuang zaw uh hi. Pasian in amaute nek ding kisam khempeuh pia khin hi. Pasian muang zo lo-in, a kipia lo pi khat nek ding khensat zaw uh hi.
Tuhunin zong deih huai mahmah taleh, i pelh ding (a limci, a deih huai singgah nek loh ding kikhaam mah bangin) bang om hiam? Koi bangin a lauhuai mahmah zuaukhemnate pelh thei ding i hiam?
THURSDAY JAN. 7
MAWHNA’ GAH
Satan’ zuaukhemna hangin gimna i thuak hi. Ni guk sunga a piansak na khempeuh in siatna lam manawh hi. Adam le Eve in Pasian muh ding zumin bucip uh hi. Adam in Eve ngawh hi (Mihing khat le khat kizopna kisia pah hi). Lingkungte hong po pah hi. Piansak nate tawh kizopna, Pasian tawh kizopna kisia hi. Gimin khua-ul kai-in nasep kul hi. Ahi zongin nuntak tawntungna sungah a nungta thei dingin hong kikoihzo hi. Hih thu bangci bangin hong piang cih i thei khin zo kei hi.
Pian. 3: 10 – 19 sim in. Adam le Eve in leitung in a thuak gimna, siatnate kua ngawh uh hiam?
________________________________________________________________________
Pasian in Adam le Eve-te’ paulap a dawn kikzia ngaihsun in. Pasian in a gamtat thaman uh khat le khat hilh hi. Gulpi in hamsiat thuak a, leivui ne ding hi. Numei in gulpi’ lutang suzan ding hi ( Pian. 3: 14, 15). Eve in gimna lianpi thuakin nausuak ding hi (Pian. 3: 16). Adam in gimin nasem ding hi (Pian. 3: 17 – 19). Adam le Eve in Pasian langpan tawntung ding maw, ahih kei leh, Pasian kiang zuan ding maw, cih a khensat kul hi. Pasian a mai-ngat kik nadingun kisikna kisam masa pen hi. Ahi zongin kisikna in mawhna hang a siatna khempeuh veengsak lo hi. Nuam takin a nuntak kik theih nading lampi kisam Pasian in hong sialsak khin hi.
Pasian in ganhing tawh biakpiakna pia dingin thupia hi (Pian. 3: 21). Gulpi in siatna le gimna hong tun a, tuuno in a hih leh Honpa limcing hi. Adam le Eve in piansak nate tungah ukna nei nawnlo uh hi. Adam le Eve in Pasian tungah a citak laisiah nate tungah ukna nei uh a, ahi zongin Pasian’ thupiak a langpan uh a kipan tua ukzawhna bei hi. Ellen G. White, Education, 26.
Mihing a mawhin hotkhiatna ding lametna kiguan pah hi( Pian. 3: 15). Koi bangin tua lametna na nei hiam? Bang bangin a nungta na hih hang, koi bangin hotkhiat lametna tawh nungta-in, nuamsa ding na hiam?
FRIDAY JAN. 8
SIMBEH DING: Eden’ hoihna i mukha kei zongin, piancilna bang nawn lo hi mah taleh, piansak nate tungtawnin Pasian’ hoihna kilangkhia veve hi. Khuadak dih! Nate’ hoihna, nate’ in Pasian’ hong itna a pulaak uh lamdang hi lo hiam? Apple, lingmaw a kipan singgah nam tuamtuamte’ pianzia lamdangsa lo na hiam? Amau le amau thuthu-in a lim hi ziau lo hi. Mun khempeuha gah thei lo uh hi. Mun khatah a gah theih hangin, a gah theihlohna mun zong om hi. Mun khatah nektheih tampi a piang hangin mun khat khatte ah nek ding bangmah hing zo lo hi. Piansakcil hunte tawh a kilam danna hong musak hi. Nate in Pasian’ hong itna a pulaak uh lamdangsi! I phawk ding thu in: nate tungah lametna nei i hi kei a, nate a Piangsak Pa tungah lametna nei i hi hi.
KIKUP DING DOTNATE:
1. A hong kipiansakcilin a si ngei lo dingin hong kibawl hi. A si dinga hong kipiangsak hi lo hi. Sihna pen mundang pan hong pai i tuahkhak thu hi. Sihna in Eden huan sunga khensatna’ gah ahi hi. Sih nawnloh nading Pasian’ hong kamciamte ngaihsun in. Koi bangin tua kamciamte in i phut khak dahna sihnate hong zozosak thei hiam?
2. Piansak nate tungtawnin koi tawntungin Pasian’ hong itna, Pasian om takpi mah hi, ci-in hong musak hiam?
3. Pian. 3 sim pha in. Koi bangin Adam le Eve in a mawhnate pulaak hiam? Bang hangin paulap zon hamsa sa se lo uh hi ding hiam? Amaute bang mahin koi bangin nang le kei in zong paulap nei pahpah i hiam? I khialhna khat, kicinlohna khat i pianpih lungsim, kim le paam, midangte ngawh nuam pha diak hi lo i hiam? Koi bangin hih bang ngaihsutna hemkhia-in, ei le ei kipuahpha thei ding i hiam?
