LESSON 4 *January 18–24 | Lai-natna le Hehpihna Tawh Kidim Pasian

 

LESSON 4 *January 18–24

Lai-natna le Hehpihna Tawh Kidim Pasian

SABBATH NITAAK

Tu Kaalsung Simding: Late 103:13; Isaiah 49:15; Hosea 11:1–9; Matt. 23:37; 2Cor. 11:2; 1 Cor. 13:4–8.

Kamngah: “Nupi khat in ama nawi a tep a tangek mangngilh thei ding ahi hiam? Ama gil sung pana a piang tapa tungah lainatna neilo thei ding ahi hiam? A taktakin amaute in mangngilh kha thei ding uh a, Ahi zongin ken ka hihleh nang kong mangngilh kei ding hi.” (Isaiah 49:15, ZSV)

 

Nopsak theihna (Emotions) pen deihhuai hi; pelh ding zong om veve hi. Mi kimkhatte ngaihsutna-ah tuabang nopsaknate pelh ding hi; deih huailo hi, ci-in ngaihsun uh hi. Greekte ngaihsut na-ah “mi picing hihna in lungsim ngaihsutna ki-uk zawhna hi, ci-in a ciamteh uh hi. A hehna, a dahna a ki-uk zote mi picing khatin ciamteh uh hi. Tua bangin ki zolo mi in buai-na tuamtuam a phukha hi.

Pasian in mihing hongbawl lai-in nuam thei, dah thei, heh thei dingin hong bawl hi. Tua bangin Pasian in zong nuamna, hehna, dah na nei hi, ci-in Lai Siangtho in zong honghilh hi. Lai Siangtho hong hilh bangin i lungsim ngaihsutna khempeuh in Pasian tawh kizopna a nei hi lehang, i khua phawk theihna in siatna hong tunpih loding hi. Nuam theihna, dah theihnate in asia hipahlo in; ahoih zong hipahlo hi.

Lai Siangtho in Topa pen hoihna le kicinna tawh a kidim ci hi. A taktakin Pasian hong itna theihtelna in a deihhuai thuman thutak hi. Pasian hong itna zong khuaphawk theihna tawh kidim itna mah hi. Pasian hong itna in khuaphawkna tawh kidim itna hi-in, a kicing itna ahi hi. Tua itna in mihing khat le khat ki itna tawh kibang lo hi.

* January 25, Sabbath a ding kiginkholhna in tukaal lesson sim in.

 

SUNDAY  January 19

Nu’ Hong Itna Sang’ Thuuk Zaw

Mihingte khat le khat ki-itna a lian penpen in nu le pate in tate a itna uh hikha ngel ding hi.Lai Siangtho in zong hih mah siksanin Pasian hong itna hong hilh hi. Nulepate le tate kikaal kizopna limciingin Pasian in a mite tawh hong kizopna honghilh hi. Lainatna lianpi tawh mihingte a hong itna honglak hi.

Simin, Late 103:13; Isaiah 49:15 le Jeremiah 31:20. Hih thute in Pasian hong itna le hong lainatna thu bang hong hilh uh hiam?

Lai Siangtho hong hilhna-ah Pasian in leitung nu le pate in tate a itna sangin thuk zaw hi. Pa hoih in tate a it bangin, nu hoih in tate a itna sangin i Topa Pasian hong itna lian zaw tham hi. Isaiah 49:15 hong hilhna-ah nu le pa in tate mangngilh theilai hi. Nau nawi ne a ta nusia nupi zong om hi. Ama sung suak tate a phawk nawnlo, a it nawn lo nu le pa tampi om hi. Ahi zongin Topa Pasian in a tate hong mangngilh ngei lo hi. Hong it tawntung hi. Ama hong lainatna in bei ngei lo hi (Kahla. 3:22).

Hebrew kammal raham pen hehpihna ci in kizang a, mun dang tampi ah Pasian hong hehpihna kicing mahmah cihna in kizang hi. Tua kammal pen Hebrew pau in naubu raham panin hongpai hiding in ki um hi. Pasian hong hehpihna pen “a suaktuung naungek nu in a itna” ci in laisiamte in tehkak liang uhhi. A taktak in cileng, mihing lel khatpeuh hong hehpihna leh nu’ khat in a tangeek a hehpihna sangin a lianzaw thampek ahi hi.

Jeremiah 31:20 ah zong, Pasian in a kamciam mite in Amah langdo den a lungkham sakden hinapi “ka it Ka tapa, Ka ngaihno” ciliang hi. Bek thamlo Pasian in “amah ka lunggulh mahmah a, amah ka hehpih taktak ding hi” cihi. Hiteng ah “hehpih” a cihna pen Pasian hong hehpihna in a kizang raham ahi hi. Tua banah, “Ka lunggulh” a cihzong pen “Ka sungtawng’ awngkhia gawp” zong kici hi. Hih kammal tepen Pasian’ sungkua sungtawng pan in phawktheihna a cihna hi a, Ama’ mite tungah a thuk mahmah Pasian hong hehpihna a pulakna ahi hi. Amau’ cihtak lohna enlo in, amau’ lam-etna khengval in Pasian in Ama’ hong hehpihna lianpi hong luangsuk sakden hi.

Mi kim’khatte in, Pasian hong hehpihna pen, nulepa’ itna tawh kinai sak uhhi. Ahih tei’hang, mi pawlkhatte, nulepa’ itna le hehpihna a ngah ngei khalo zong om uhhi. Pasian hong hehpihna pen bang thudang tawh a kitehkak theilai ding hiam?

 

MONDAY January 20

Thangpaihna Piangsak Itna

Pasian in mihingte hong itna le hong lainatna zia kamsang Hosea in honghilh hi. Pasian in Hosea tungah “Pai inla numei kizuak khat na zi dingin la inla, paktat tate nei in. Banghang hiam cihleh leitang in milim biakna tawh kidim khin a, Pasian a taisan mangkhin hi, (Hosea 1:2). Hosea 11 sung a nunung lamah Pasian in a mite tawh hong kizopzia kipulaak hi. Pa le tapa kizopna tungtawnin hong hilh hi.

Simin, Hosea 11:1–9. Koi bangin hih limciinna in Pasian hong itna le hong kepna pulaak hiam?

Pasian in a tate tungah itna a neihzia in pa le tate kizopna tawh kigenteh thei hi. Lai Siangtho in tua bangin gentehna tungtawnin lampai kisincil naupang in a pa khut limtakin len a, lampai-in a tuk dek ciangin a pa in len ahih manin tuklo-a a sawt ciangin lampai thei khat hongsuak hi. Pasian in zong a tate kitangsapna khempeuh hong sik in; a itna honglak tawntung hi. Lai Siangtho ah pa in ta a tawi bang mahin Pasian in a mite hong “tawi” ci-in hi” (Thlkna. 1:31). Ama hong itna le hong lainatna tawh mawhna sung panin a beisa hunin hong domto-in, hong pua hi (Isa. 63:3).

Pasian cihtakna tawh kilehngatin mihing in citak zolo hi. A tawp khakna-ah mihing in Pasian a nusia uh ahih manin amaute tungah Pasian thukhenna hong tung hi. Hih in Pasian dahna a piangsak hi. Pasian hong lainatna in a bei ngei kei hi. Ahi zongin Pasian in thuman tawh kidim ahih manin mawhna, siatna a koih khong ngei kei hi (Itna le thumanna cih thu mail amah i pulaak ding hi).

Gilna-in na om ngei hiam? Tua bangin Pasian in zong a tate in gimna i thuak ciangin nuamsalo hi. Pasian hong lainatna le itna thukpi in mihingte tungah a lungsim puak hong hilh hi. Hih limciinna in lainatna le itna (kamar) in kumpi Solomon mai-ah hong pai nupi nihte thu a pulaak kammalin zong kizang hi. Hih nupite gel in a ta tuak uh Solomon mai-ah hong paipih uh hi. Solomon in tua naungekte gel at kham dingin thu a piak ciangin a hinglai naungek nei nu in lainatna le itna tawh kidim ahih manin a tano tungah bangmah bawl lo dingin a thuum hi (1 Kum.3:26 le Pian. 43:30 enkak in).

Tanei nulepate in i gen thu in i lungsim hong sukha ding hi. Itna dangte tawh kigenteh theilo hi. Hih thu in Pasian in a tate tungah hongkoih itna thu in bangzahin lungmuanna hongguan thei hiam?

 

TUESDAY  January 21

Zeisu Hong Hehpihna

Pasian hong hehpihna limpua dingin Lai Siangtholui in a zat tengmah Lai Siangtho thak in zangpha kik hi. Paul in, Pa pen “hehpihna a neipa le kisapna khempeuh hong huhpa” (2 Kor. 1:3) naci hi. Paul mahin Ephesus 2:4 sungah “hehpihna lian mahmah” ahih manin, “hong itna lianpi tawh Ama’ it mite tankhia” cihi.

Gentehna dangah zong, Khazih in awm sungpan, gilpi gilzang natlawh liang in itna tawh Pa Pasian hong hehpihna lim honglak hi (Matt. 18:27; Luke 10:33; Luke 15:20). Haksatna thuakte Zeisu in veii in a hehpihna pen, Lai Siangtho Lui le Thak in a zat kammal teng mah Lungdamna thububu teng in zong zangkik uhhi.

Simin, Matt. 9:36; Matt. 14:14; Mark 1:41; Mark 6:34 le Luke 7:13. Matt. 23:37. Koi bangin hihte in mihingte siatna in Khazih hong itna hong hilh hiam?

Lungdamna thubute sungah Khazih in lainatna tawh kidimin a lunggim mite, kitangsapna neite tungah hehpihna nei hi, ci thu kipulaak phapha hi. Amah in hehpihna nei bek thamlo-in midangte kitangsapnate in a lungsim sukha mahmah hi.

Zeisu in a mite tungah itna, hehpihna nei ahih manin amaute kitangsap nate huhlo-in nusia ngeilo hi. Zeisu in Jerusalem khuapi aa dingin a khitui luang hi, — “Akpi in a note a huai nop bangin nang Jerusalem khuapi zong ka hong huai nuam hi. Ahi zongin nang na ut kei hi,” ci hi (Matt. 23:37). Hih munah Khazih in Thukhun Lui kamsangte tawh kibangin vauhilhkholhna thu pulaak tawntung ahihna kimu thei hi. A taktakin Lai Siangtho thu thuk kantel mi tampi in vasapi in a note a cin, a kep bangin Topa in a mite zong hong cing hong kem tawntung ahihna a pulaak uh hi. Thuhilhkikna 32:11 pulaak bangin Topa in a kha nuai-ah hong tuam hi.

Pasian hong hehpihna lian pen, itna lianpi hong lahkhiatna Zeisu lo peuhmah bangmah dang tawh tehpih theih ding omlo hi. Ahih hang, Khazih in Pasian’ limpua picingpa bek hilo, mihing’ limpua picingpa zong ahi hi. Eite’n zong midangte kisapna don in, Pasian hong itna tangko bek hilo kician takin hong itna lim ciing zaw in Khazih nung zui dingin eima nuntakna koibang in puahpha thei ding ihi hiam?

 

WEDNESDAY  January 22

A Haza Thei Pasian Hiam?

Lai Siangtho honghilh Pasian in itna le lainatna tawh a kidim hi. Hebrew in el rahum tawh kigelh in “Pasian” cihna hi (Thlkna. 4:31). El cih kammal in “Pasian” cihna hi. Rahum ciangin “Lainatna” cihna hi. Tua hi-in Pasian pen lainatna tawh kidim Pasian hibek thamlo-in hazatna nei Pasian zong hi. El qana a khiatna in “a haza Pasian” cihna hi. Milim khawng i biak ciangin Topa lungkimlo hi. Thuhilhkikna 4:24 in hih bangin a pulaak hi. “TOPA na Pasian in a kangtum mei tawh kibang hi; a haza Pasian hi,” [El qana] (Thlkna. 4:24; Thlkna. 6:15; Josh. 24:19; Nah. 1:2).

1 Kor. 13:4 in zong “itna in hazalo” cihi. Hithei ding maw, Pasian lah “a haza Pasian” cizel? 2 Kor. 11:2 sim inla, Lai Siangtho sung tawntung ah Pasian’ mite cihtak lohna teng ngaihsun pha in (Late 78:58 enin). Hihteng panin Pasian “hazatna” tawh kisai bang khuavak namu hiam?

A “haza” Pasian i cih ciangin mi tampi in telkhial uh hi. Zi le pasal kikaal kihazatna bangin ngaihsun le cin, kizahtak tuahna in mu thei ding hi. Hazatna cih limlim a hoihlo lamta in ki ngaihsun zawtek hi. Lai Siangtho leuleu in, hazatna peuhmah a hoihlo lamin zang hetlo hi. A thumaan itna nei pasal khat in a zi tawh a kizopna ah thudang bangmah a lutsak loh bang ahi hi.

Itna le hazatna in a tonkhawm thei hilo hi (1 Kor. 13:4). 2 Korin 11:2 ah a hoih hazatna le a sia hazatna kimu thei hi. Paul in zong Pasian deihna tawh kituak hazatna nei ahihna zong kimu thei hi (2 Kor. 11:2). Pasian hazatna in diktatna tawh tonkhawm a, a mite in pasian dang a zuih khak uh ciangin Pasian hazatna a piangsak suak hi.

Pasian’ hazatna (qana) pen Amite a lunggulh luatna ahi hi. Pasian in midang kihello in Amite tawh kizom nuam hi; amaute’ Pasian Amah bek hinuam hi. Pasian pen a ngaihnu a taai pahpah pa hi a, Ama’ itna pen Hosea bangin sum tawh liau a kul hetlo itna siangtho ahi hi (Hosea 1–3; Jer. 2:2; Jer. 3:1–12). Tua hi a, Pasian hong “hazatna” le “lunggulhna” in hehna beisiang hi deklo a, mi ginalote peuh mah amau tawh kituak thukkikna om ngiat hi. Pasian hong hazatna pen lunggulh hazatna hi a mihing’ hazatna bangin a sialam khat beek zong kihel kilkel lo hi. Deihgawhna om hetlo a, Amite’ mailam leh a hoihna dingin zawl kikal ah sial thawl sak nuamlo hi.

Koi bangin a pha a bawl hazatna nei thei-in Pasian le mite tungah kilanghsak thei ding i hiam?

 

THURSDAY  January 23

Lainatna le Hehpihna

Lai Siangtho Pasian in itna, lainatna tawh kidim hi. Hihte in Zeisu Khazih nunzia tungtawnin hong kilangh khia hi. Pasian in lainatna Pasian hi (Isa. 63:9 le Heb. 4:15 enkak in). A mite khialhna hangin dah mahmah a (Thukhente 10:16; Luke 19:41), amau’ thumna za nuam, dawng in hehnem nuam hi (Isa. 49:10, 15; Matt. 9:36; 14:14).

Simin, 1 Cor. 13:4–8. Pasian hong lainatna hong phawksak bang kimu thei hiam? A lamdang Ama itna bang hong hilh hiam?

1 Korin 13: 4-8 sunga kipulaak bangin itna nei mite tawh kizop nuam i sa ciat hi. Tua bangin itna koici neithei ding i hiam? Eima thu-in lungduaina le hehpihna kineitheilo hi. Banghang hiam cihleh mi hing in angsung khualna, huaihamna cihte i pianpih hi. Mihing sung panin tua bangin na khempeuh thuakzawh hatna, lung duaina, lametna cihte hong piangkhia tawm thei hilo hi. Lungduai-na, itna, lametna i neih zawh nadingin Kha Siangtho i sungah hong teen ding kisam hi (1 Kor.13:7, 8). Itna, lungduaina in Kha Siangtho gah ahi hi. Zeisu Khazih sungah upna tawh a nungta mi sungah Kha Siangtho in na hongsem ding a, Kha Siangtho gah hong gah thei ding hi (Rom. 5:5).

Pasian’ hehpihna le Kha Siangtho vangliatna tha tawh lungduaina, itna, lametna a neithei ihi hi. Tua bangin nungta hilehang, Pasian deih nunzia, gamtat zia le tong a neithei ihi hi. Pasian tawh kizopna-ah itna siksan kizopna ahi thei hilo hiam? Amasa-in itna tawh kidim Pasian i biak ding kisam hi. Nihna-ah Pasian hong it bangin midangte tungah zong itna a neithei ding ihi hi. I thu upna sungah lungkim in, bangmah kisam nawnlo bangin a nungta ding ihi kei hi. I upna in midangte tungah itna hong neisak keileh tua upna in kimanna neilo suak hi.

A tawpna-ah Pasian bekin i lungsim, i nuntakna hongkhel thei hi. Pasian tung panin lungsim thak i ngen ding hi; tua in Pasian itna hong neisak bek thamlo-in midangte tungah zong itna hong neisak hi. Hih itna in siangtho-in deihhuai hi. Buhvaite a kihepkhiat bangmahin a sianglo na khempeuh kihemkhia ding hi. Thu i nget ciangin “Topa aw midangte a itzaw semsem dingin honghuh in. Zeisu Khazih Nihvei-na hongpai ciangin na mi siangthote lakah a kihel thei ding le na maipha a mu dingin hong bawlpha in” ci-in i ngen ding hi (1 Thess. 3:12, 13).

Banghangin angsung itna le duhhop huaihamna a sih ding kisam hiam? Tua in i lungsim siatna kilanghsak hilo hiam? Tua bangin “kei” cih lungsim a sihnading bang deihtel theihna neiciat i hiam?

 

FRIDAY  January 24

Ngaihsutbeh Ding: Ellen G. White, Thoughts from the Mount of Blessing laimai. 6–44 ah “The Beatitudes” simin.

“Pasian mai-ah zawngkhal a kisa mi khempeuh in amau sungah hoihna khat zong neilo ahihna uh a kitel uh hi. Amaute in Zeisu mitsuan uh a, dikna le siantho’na ngah uh hi. Zeisu in “Van gik pua gim mi khempeuh hongpai un” (Matt. 11:28) cihi. Ama hehpihna ngah dingin kilawmlo ihihlam zong a phawk ding uh hi. Ahi zongin Khazih in eite aa dingin hong kikhaam khin ahih manin Ama kiang a zuan mi khempeuh a honkhia hi. Bang bangin na nungta zongin tu laitakin bang dinmun tawh na nungta zongin Zeisu kiangah na thaneemna, na hihna khempeuh tawh na pai ciangin Topa in hong sang ding a, Ama dikna puan tawh hong tuam ding hi. Tua puan na silh kawm mahin Zeisu in Pa mai-ah hong paipihin Ama dikna siksanin Pa tung panin mawh thuumna hong neihsak hi. Amah in “Mawhnei mite thuak ding khempeuh ka thuak khin hi; ka tapa taimang mawhna na en nawn kei ding a, ka dikna na en ding hi, a ci hi. Satan in tua bangin Zeisu mawh thuumsakna a lungkimlo hi. Satan in ama mi dingin hong kaikai hi. Ahi zongin Zeisu in Ama sisan siksanin “Amaute in keima sisan tawh ka tatsa mite ahi uh hi,” ci-in Satan hong mawhsakna khempeuh a beisak hi.”—Ellen G. White, Thoughts from the Mount of Blessing, pp. 8, 9.

 

Kikupding Dotnate:

 Eite pen a Pa kiangah hong ki-aap ding cih lungngai pha in. “Ama’ gamtatna hoihna puanpak tawh hong tuam in Pa kiangah hong pulaak ding hi”. Eima mawhna khialhna teng hangin, lungkiathuai mahmah phial taleh, Pasian in eite hong luansuk Ama’ itna bang itna mi tungah lengkik sak zo kei zongin; Zeisu in “Ama’ gamtatna hoihna puanpak tawh hong tuam in Pa kiangah hong pulaak” ahih manin, Pasian ing hong sang cih lungdamthu kiang banghang in zuankik zelzel ding hiam?

 Solomon mai-ah hongpai nupi nihte thu ngaihsun in. Ta hinglai nupi dingin kibulh in. Ama thuakzia 1 Kum. 3:26 ah kimu thei hi. Tua lungsim in Pasian in a mite tungah a lungsim puak kilangsak hi lo hiam? Hosea 11:8?

 Lungdamnathu sungah Zeisu in Amite kitang’sapna teng veei mahmah hi. Aman’ bang hih hiam? Amite kitang’sapna teng vai hawmsak hi. Nangma mimal ahi a, Lesson khan bup nahi uh zong in tangsapna neite le hehnep kisamte na koici huhthei ding hiam?