ZU DAWN, GUTAKNA LE PASIAN
ZAMBIA
| September 6
Bethel
Bethel in Zambia gam a om Rusangu University ah sangkah dingin a min pia khin khangno khat hi. Bang hnagin hih sangah kah nuam hiam cihleh a zu dawn khawl nuam hi. Hih sangpi in SDA pawlpi sang hi-in, SDA biakna in ka nunzia hong khel ding hi, cih lametna lianpi khat a nei hi. Bethel in SDA innkuan sung pan a khangkhia khangno khat hi. Ahi zongin kum 15 a phakin a nu in sihsan hi. Tua khit a kipan zu dawn kipan hi.A nu nusiatna hangin dah lua mahmah a, a lawm le gualte in na lunglenna, na lungkhamna na mangngilh nopleh zu dawn in ci-in zu dawn dingin sawl uh hi. Nisimin zu dawn den a, kum nih sung bang tua bangin a hun beisak hi. Tan 10 a zawh khit ciangin a TV etna panin Rusangu University thu kigen khat a mu kha hi. Hih sanginn ah sangkah sangnaupang peuhmah in zu dawn lo, za tep thei lo hi, cih a theih a kipan hih university ah sangkah nopna lungsim a nei hi. Hih sangah va kah thei hi leng ka nunzia kikhel ding hi, ci-in lametna lianpi a nei hi.
Sangkah
dingin hih university ah tun hangin a zongsatna hoih lo, zu dawn a kikhel zo
tuan kei hi. Mi muh lohna mun simtham khat peuh zong kawikawi-in tua bangin zu
dawn zel, zatep zelin a om hi.Ni khat
tua bangin a om laitakin sangsia khat in vamu hi. Amah bek hi lo-in a lawmte
khat le nih tawh tua bangin zu dawmin a om uh hi. Tua bangin om niloh a lamet
bei dinmun hong tung hi. Nitak khat a lawmte thum tawh zu lei nading sum nei
lo-in om uh hi. Tua hi-in van guk ding hong ngaihsun uh a, hallpi sungah vante
gu dingin hong kithawi uh hi. Zan puante le puanza tuamtuamte gu uh hi. Ahi
zongin a vekpi-un mat le hen a thuak uh hi. Thongkia-in a om sungin Bethel in a
nunziate ngaihsun kikkik a, tua bangin a gamtatnate hoih lo ahihlam zong thei hi. Mawh, khial zong kisa hi. Tawlpi khat
sung mah thongkia-in kikoih hi. Suahtak nading lamet om lo mawk hi ta hi.
Pasian tungah khitui luangin a mawhnate a thuum hi. “Topa aw, ka mawhnate hong
maisak in. Tu a kipan ka kikhel ding hi. Nangma deihloh na peuhmah ka sem ka
bawl nawn kei ding hi, ci-in Topa tungah kamciam zong a pia hi. Ni 15 khit
ciangin Bethel in thongkiatna panin a suakta thei hi. A lawmteng tawh kikum uh
a, bangci bangin suakta thei cih thu a thei zo kei uh hi. Hih pen a lamdang
mahmah thu hi. Pasian nasepna lianpi khat hi, ci-in Topa tungah lungdam a ko
ciat uh hi. A taktakin sangnaupang khat
in tua bangin sang thukhun a palsatte sang panin kihawl khia hi. Bethel in ama
gamtatnate le a thongkiatna thute a
ngaihsut kikkik ciangin Pasian in sangkah theih nading hun hoih khat hong pia
kik hi, ci-in a um hi. Thonginn sungah a om lai- a Topa tungah a kamciamte a
phawkkik hi. A nunzia khempeuh kikhel dingin Topa tungah a thungetnate zong a
phawkkik thei hi. Zu dawn nawn lo hi. Lai Siangtho sim a kipan thei hi. Thong
pan a suahtak zawh kha khat khit ciangin
a nuntakna Topa tungah kipia-in tui kiphum hi. Sangnaupangte le sangsiate in
Bethel amuh uh ciangin lamdangsa mahmah uh hi. Ni dang tawh kibang nawn lo-in a
kikhel mahmah khangno khat hi, cih a mu
thei ciat uh hi.Sangkhak kuan ciangin sangnaupangte pahtawi-na lakah zong
Bethel in pahtawi-na ngah dingte lakah kihelkha hi. Gamtat zia le tong hoih lo
panin zia le tong hoih ah kikhel sangnaupang ci-in pahtawi-na kipia hi.
Tu-in
Bethel in a sangkahna-ah sangnaupangte makai lianpi khatin a om hi. A sawt lo-in lukhu neelkai khu ta ding hi.
Sangman khin leh pastor sem dingin kipia khin hi. Bethel in “Pasian in ka nunna
hong khel hi. Topa tungah thungenin Ama hong khel ding ngen lehang, Topa in
hong khel takpi hi,” ci-in a pulaak thei kawikawi hi. Kham theih zu tawh a
kidiah khangno khat tu-in Pasian nasemin a kizang thei khat ka suah theihna in
Pasian hong hehpihna taktak hi” a ci hi.
Tu
quarter Sabbath School 13na sumpi in Bethel sangkahna university puah nadingin
kipuak ding hi.
