LESSON 3 * January 10-16 NUNNA LEH SIHNA

 

LESSON 3 * January 10-16

NUNNA LEH SIHNA

 

SABBATH NITAK

 

Tu kaal sung sim ding: Phil. 1:19–30, 1 Kor. 4:14 16, 2 Kor. 10:3–6, John 17:17–19, Micah 6:8,Sawl. 14:22.

 

Kamngah : Bang hang hiam cihleh nungta hi leng, Khrih aa ding hi ,a si hi leng a met zaw ka hi hi” (Philippians 1:21, ZSV).

 

Mi tampi ngaihsutna-ah “sihna in i nuntakpih khat hong suak hi,” ci uh hi. Hih in theih khialhna khat hi.Sihna in nuntakna gal lian pen khat hong suak hi.Mawtaw a kisiacip khat mawtaw khat a pian zawh nawn loh bangmahin sihna in zong nuntakna piangsak thei lo hi. Paul in a genna-ah Khrih in “sihna vangliatna susia dingin sihna hong thuak hi, ci-in limtakin hong hilh hi. Cihnopna-ah mawhna in (dawi ) in mihing khempeuh sihna sila hong suaksak hi. Sihna koltangin i om hi (Heb. 2:14, 15).

 

Khrih adingin a nuntakna pia dingin kiging khol hi mah taleh, Paul nuntakna-ah a thupi penpen in a si a, a nungta ahi zongin Khrih pahtawi ding le gospel thu gen ding sim loh thu dang om lo hi. Nuntak hun tom mahmah hi; Pasian hong piak nuntak hun sungin Pasian ukna gam a zai semsem nadingin i nuntak ding kisam pen hi. I hihna khempeuh in “Upna thu-a kipum khatna tha hong pia ding hi,’ cih i phawk ding kisam hi.

Tu kaal thusinna masa lam thute i ngaihsut ciangin “Philippian pawlpi laikhakna a hang/ a thu in a thupi thu mungtup hi, cih i mu thei ding hi.

 

*January 17, Sabbath ading kiginkholhna in tu kaal lesson sim in.

 

SUNDAY January 11

“Khrih Vanglian semsem ding”

 

Sim in, Philippians 1:19, 20. Paul in a kithusitna ah bang lamen hiam? Suahtak ding sangin a thupi zaw bang ngaihsun hiam?

 

Paul in siatna a bawlloh hangin hih thongkiatna in a khat veina hilo ahih manin lamdangsa lo hi. Korinth pawlpi tungah a gim thuaknate gencian hi: “Thong ka kia mun mahmah hi. Sih nading nangawn ka thuakzel hi. 40 ciangin khatvei khiap Jew mite satna ngavei ka thuak hi. Thum vei sik tawh hong kisat hi. Khatvei suang tawh hong kideng hi. Thumvei tembaw siatna ka thuak hi. Tuihual lauhuaina, guta launa, gammipihte launa, Gentile mite launa, khuasung launa, gamlak launa, tuipi tungah launa, sanggam ginalote launa, nasep gimna, ihmut lohna, gilkialna, khuadamna cihte ka thuak hi.” (2 Kor. 11:23–27).

 

Hih bang gimnate i ngaihsut ciangin Paul lungsim ah bang thu a om ding hiam? Paul in a ngaihsutna hih bangin pulaak hi. “Nadang khem peuh sangin pawlpite ka lunghimawh zaw hi.” (2 Kor. 11:28).

 

Sim in, 1 Kor 4:14–16; 1 The 2:10, 11; Gal 4:19; le Phil 10. Paul in a phutsa pawlpite leh a mi ngahsate tawh kizopna koi bang nei hiam?

 

Bangmah siit a neilo Jesu mahbangin Paul in thu-um mite adingin “na khempeuh a thuak ngam hi.” (2 Kor. 12:15). Ahi zongin mi khatpeuh in Jesu zialetong a kilatsak semsem ciangin muhdahna thuak semsem thei hi. “Zeisu Khris sungah a nungta khempeuh in bawlsiatna thuak ding hi.” (2 Tim. 3:12). Ahi zongin a citak Khristiante in Pasian minthang sak sem ding uh aa, gospel thumaan lakkhia sem ding uh hi.( Phil. 1:7 enkak in). “A thongkiat sung tawnin Paul’ lungduaina leh a maitaina in a hangsanna leh a upna hang ahi hi. Tuate in hanthawtna hipai suak den hi.” Ellen G. White, The Acts of the Apostles, p. 464.

 

Na nuntakzia leh mite na bawlzia ki-en in. A diakin nang hong hoihbawllote tungah na bawlzia. Zeisu ading bang teci lak na hiam?

 

MONDAY January 12

Sihna in Meetna

 

Eite in i phawk khakloh hangin, a diakin thu-um mi i hihna tawh kidona lianpi sungah i om hi. Kimlepam kidona leh eima sung mahmah ah kidona lianpi om hi. Eite khempeuh i sih mateng hih leitung buaina tawh i kipelh thei kei hi.

 

Sim in, 2 Kor. 10:3–6. Eite do khalam kidona ah bang siksanin, bang galvan nei ding i hi hiam?

 

A lauhuaipen galvan in mihing ngaihsutna, sia leh pha ahi hi. Satan in a galvan dingin mi gensiatna, lehhekna, buaisakna, launa, encikna cihte zangh hi. Khristiante in tua bang thute i pelh ding ahi hi. Eite in itna, hehpihna, daihna, thunopna, lungduaina, khuangaihna, leh kikepna cihte i neih zawk ding ahi hi. A lianpen galvan in Khasiangtho lamlahna tawh “Pasian Kammal” i zat ding ahi hi. (Eph. 6:17).Banghang hiam cihleh Pasian bek in thumaan hong guan thei hi. Eite in Ama ngimna a tangtun nading Ama vanzatte bek i hi hi.

 

Sim in, Phil. 1:21, 22. Eite in koi bangin Paul thugen i telthei hiam?

 

A diakin kidona lianpi tawh kisaite? Bang hang hiam cihleh eite in khalam kidona sungah i om hi. Khris in singlamteh ah zo khin ahih manin Amah tawh i kizop laiteng hong kithat phial zongin i guallel ngei kei ding hi. Paul in hih leitung ah bangbang a piang zongin, thumaan lo ahi phial zongin a nuntakna piakhia hi. Banghang hiam cihleh a sangzaw mun ah a nuntakna leh a mailam thu ding ap khin hi.

 

Khristian khat i hihna tawh i hamphat nading zongluat ding hilo hi. “Vangliatna in hamphatna hilo aa, hamphatna in vangliatna hizaw hi.” Pasian deihna ah ki-apna in pahtawi huaipen hi. Paul in Philippi 2 sungah a pulaak bangin Zeisu in Pasian tungah ki-apna ah etteh ding ahi hi. Tu laitakin bang kidona lianpi phu na hiam? Khris in eite ading hong zawhsak khin cih theihna tawh koi bangin kinepna leh thahatna la na hiam?

 

TEUSDAY January 13

Lungmuang hithiat in om

 

Sim in, Philippians 1:23, 24.“Paikhia-in Khrih tawh kipawlna” in “hoih zaw pek hi,” acih ciangin bang a cihna hiam?

 

Hih thu pen kum tampi sung kitelkhial hi. Tukaal sung i sinna ah Paul in nuntakna leh sihna a kibat lohzia a genna i sin ding hi. Khristiante in Khrih adingin nungta thei uh aa, zongh si thei uh hi. Hih thu in hamphatna hi. Banghang hiam cihleh eite tecipanna in vangnei zaw hi.(Phil. 1:21). Muanmawhna a neilo mi khat in a upna hangin si ngam ding hi.

 

A site a si takpi mah hiam cih i theih kul hi. Amaute in “bangmah” thei nawnlo uh hi. Thawhkik ni dong han sungah tawlnga uh hi.(Thuhilhsia 9:5; John 5:28, 29). Zeisu in a sisa Lazarus thu a genna ah, “I lawmpa Lazarus ihmu hi,” ci hi. (John 11:11). Mihingte a sih ciangin vantung tungpah hi cih pen Lazarus ngaihsun dih in. Paradise ah Lazarus ni li sung om laitak vangtungmi khat in, “Lazarus aw, dahpeuh mah ingh. Ahizongin Zeisu in leitungah hong samkik hi.” va ci leh, thusia mahmah ding hi. Hih thu i ngaihsut ciangin thumaan hetlo hi. Sihna in mangneilo ihmutna hi hi. Zeisu hong paikik ciangin hong phonghin a nungtalai a misiangthote tawh vantungah hong kilato ding hi. ( 1 Thess. 4:16, 17).

 

Hih nuntakna panin “paikhia-in Khrih tawh om ning” a cih in Amah tawh gimna leh sihna sungah omkhawm ding cihna ahi hi. (2 Tim. 4:6). “Thawhkikna” a ngah theih nading ahi hi.(Phil. 3:11). Si paisuak lo ding ahihlam thei hi. Zeisu in hong paipah ding ahihlam thei hi. Amah a itte ading a bawlsa mun ah a la dingin hong pai ding hi. (John 14:3, 1 Kor. 2:9). Paul in Khris adingin si nuam phial taleh, “taksa tawh omlai leh,” Philippi-te adingin hoihzaw ding ci hi.(Phil. 1:24). Khrih adingin nuntak hoihzaw maw, sih ding hoihzaw cih dotna dawnkik hamsa hi. Paul in “a haksa thunih kikal” ah om hi. (Phil. 1:23).

 

Sih khit ciangin i phawk ding thu in Khrih kumkikna ahihlam na ngaihsun ngei hiam? Tua in Paul’ ngaihsut thu hong telsak thei hiam?

 

WEDNESDAY January 14

Kiptakin Kipumkhatna

 

Zeisu’ thungetna in kipumkhatna hi. Pa leh eite kipumkhat ding mukhol hi. “Pa aw, kei tungah na hong piak mite tawh ka omkhawm nuam hi. Nong piak Minthanna mu thei ding uh hi.” (John 17:24). Pa in a tate a kep nadingin ngen hi. Tua hileh “amaute in kipumkhat thei ding hi.” (John 17:11). Amah in kipumkhat lohna nunggu thei hi. Thu-up lohna piangsak hi. Amah tawh kipumkhatna leh Pa tawh kipumkhatna bul phuh hi. Tua hileh, “leitung in hong um ding aa, Nangmah in na hong sawl lam hong thei ding hi.” (John 17:21, 23).

 

Sim in, Phil 1:27 le John 17:17–19. Jesu le Paul in pawlpi kipum khatna kisam ahihlam bang pulaak uh hiam?

 

Phil 1:27. Greek kamin “ gamtatna pha nei un” cih in “politeuomai” hi. “Gammi bangin nungta” cihna hi. Vantung gammi a pulaak hi. Mual tung Thuhilhna in Pasian’ tate nunzia ding hong hilh hi: Kha sungah zawngkhaal a kisate, a nunneemte, thumaan a lunggulhte, hehpihna neite, lungsim siangthote, daihna bawlte, biang langkhat a dawhte, galte a itte, hong samsiate thupha a piate, hong mudahte tungah hoihna a bawlte cih bang ahi hi. “Thutang inla, hehpih itna nei-in kiniamkhiat takin na Pasian tawh tonkhawm in,” cih ahi hi. (Micah 6:8).

 

Hih bang mite heh hak uh hilo ahi hiam? Khat veivei ciangin a diklua mite tungah lungkimlo thei hi hangh. Amaute’ hoihlohna kizong thei zel hi. Eite hoih kisa zaw thei hi hangh. Bang hangin a it huaina, a thudikna, a hehpihna leh a kiniamkhiatnate mu zaw lo i hiam? Ellen G. White in, “Leitung itin hamphatna a ngah mite sangin Pasian le thumaan a it mite hampha zaw hi.” Testimonies for the Church, vol. 5, p. 277. Kiphatsakna in pawlsung kipumkhat lohna piangsak hi.

“Kiphatsakna le leitung lungsim hangin Khris’ lungsim kinei thei lo hi. Kihazatna, kikhenna, kitotnate in pawlpi thaneemsak hi.”Testimonies for the Church, vol. 5, pp. 240, 241.

 

Zeisu hong piak kiniamkhiatna le nunneemna in thupi hi! Tua bangin a kalsuan hi lehang, pawlpi in bangzahin kilamdang ding hiam?

 

THURSDAY January 15

Kipumkhatna leh Lau lohna

 

Phil 1:27–30. Kipumkhatna le gospel mainawt khopna in laulohna piangsak hiam?

 

Satan khutzat in khenkham ding in, zo ding cih ahi hi. Kipumkhat lohna in siahuai mahmah hi. Jesu in, “ Innkuan kilem keileh, dingkip theilo ding hi.” (Mark 3:25). Satan in hih thukhun i mangngilh ding deih hi. Kipumkhatna in Lai Siangtho genkholh a cianlai pawlpi nasep tangtung sak ding hi.(Mang. 12:17). “Minam khempeuh, paunam khempeuh, mi khempeuh tungah ‘tawntung lungdamna thu’ pulaak ding ahi hi.” (Mang. 14:6). Pasian piak hih nasep a kizawh nadingin kipumkhatna kisam mahmah hi. Jesu in a thungetna ah “Pasian Kammal thumaan” in kipumkhat nadingin thupi ahihna gen hi.(John 17:17, 19). Eite thupuak in i nasep leh kipumkhatna tawh a kikhen thei ahi kei hi. A kikhen khakleh, i gualzo kei ding hi. A thumin a pankhopleh, lau ding omlo hi. (Phil. 1:28). Satan in a guallel sa ahi hi. I upna hangin i si phial zongin “ a hoih thu a zui ihih nakleh” bangmah in hong lauhuaisak zolo ding hi. (1 Pet. 3:13). Siatna in Pasian thuman khaktan zolo hi.

 

Hih Lai Siangtho munte’ mungtup a tomin pulaak in: Matthew 10:38, Sawl. 14:22, Romans 8:17, 2 Timothy 3:12. A puk leitung ah nuntak hamsa hi. A diakin hoih ding hamsa hi. Job in midik khat hi. Lai Siangtho nangawn in,“ paubang lo, thutang, Pasian kihta-in siatna a pelh” ci hi. (Job 1:1). Tua hi napi, zan khat thu-in a innkuanpihte tawh siatna thuak hi. Ei mahmah in i thuak, i phutkhak mateng midangte thuaknate i telzo kei hi. Eite thuak ding gimna tampi om hi. A tawpna ah Khris ading i thuaknate in hoihzaw veve hi.

 

Gentheih haksatna sungah Khristian khat hihna tawh bang lametna, bang kinepna na nei hiam?

 

FRIDAY January 16

Simbeh Ding: “Mi kibawlsiatna, dumthukpi sung, kuahawm sung pan amaute kikona a kiza hi. Bawlsiatna tuamtuam ah lau hetlo takin upna a tangkote’ tecipanna Paul in a za hi. “Ka uppa ka thei hi,” ci uh hi. A nuntakna uh tawh kiko uh aa, a tawpna ah a up Pa un honkhia ding hi ci uh hi.” Ellen G. White, The Acts of the Apostles, p. 512.

Tuhun aa Khristian upna tuamtuam a om in siahuai mahmah hi. Kha silpiak a ngah sawltakte, kamsangte, Pasian thugente, pastor le laihilhtei (Eph. 4:11–13) in pawlpi kipumkhatna kephuai mahmah hi.

 

Tu-in kipumkhatna neih kik hun mahmah hi! Hun nunung pawlpi kipumkhat ding Pasian’ ngimnate genkholhnate ah tampi kimu hi. Eite in galvilpa bangin siatna muhkholhna nei-in a kigingkhol dingin hong deih hi. Topa in Zion ah eite a hong paipih ding hi. Mipilte in hih thu theih ding hi. Kipum khatna a om ciangin upna sungah kipumkhatna hong om ding aa, thuman theihtelzia zong hong kikhatin pawlpi in kicinna hong nei ding hi. Tua ciangin Kha Siangtho silpiakte ngimna le mungtup in a tangtung hi ding hi.” R. F. Cottrell, “Introduction,” in Ellen G. White, Early Writings, p. 140.

 

KIKUP DING DOTNATE

 

1. R.F. Cottrell pulaakna ah, Kha Siangtho in Pasian pawlpi a pumkhat sak nadingin bang kisam ci hiam? Pawlpi kipum khatna in kha silpiak nasepna ah bang thupina nei hiam?

 

2. Paul leh a sikhinsa Khristian dangte in tu-in vantung ah “Khris tawh omkhawm hi” cih upna neite tungah Laisiangtho hong hilhzia bangci telgen theih ding na hiam?

 

3. Koi bangin leitunga gimthuaknate na telthei hiam? Kidona lianpi in tua thute na tel nadingin hong huh hiam? Singlamteh tunga Khrih hong lah Pasian itna ngaihsunin, haksat hun nangawn ah koi bangin Amah muang thei ding i hiam?