LESSON 2 *January 3–9 BANG THU HANGIN LUNGDAMKO LE THUNGEN DING

 

LESSON 2 *January 3–9

BANG THU HANGIN LUNGDAMKO LE

THUNGEN DING

 

SABBATH NITAAK

 

Tu Kaal Sung Sim Ding: Phil. 1:1–18, 1 Kor. 13:1 8, Jer. 17:9, Col. 1:1–12, 30:21.

 

Kamngah: “Note sungah nasep hoih hong pankhiapa in Zeisu Khazih ni dongin kicingtakin hong zom suak ding hici in ka lung muang hi.” (Philippians 1:6, ZSV).

 

Paul in a laikhaknate-ah hopihna kammalte a zatna-ah lungdamkohna kammalte kimu tawntung hi. “Colosse a, Christ sunga a siangtho le a muanhuai a sanggamte tungah: Eite Pa Pasian tung pana hehpihna le lemna note tungah om ta hen. Lungdamkohna le Thungetna note ading thu ka nget uh ciangin Pasian, eite Topa Jesu Christ’ Pa tungah lungdam ka ko tawntung uh hi (Col. 1:2, 3). Eite zong Paul bang mahin Topa tungah lungdamkoh ding tampi i nei hi. Pasian hehpihna lamdang takin i mu tawntung hi; vantungmite in zong tua thu lamdangsa uh hi. Nulepate in tate tungah Pasian hong itna a pulaak, a hilh ding i hi hi. Tu-in tua bangin lungdam ding bangmah i theih khak loh hangin hun khat ciangin Topa tungah lungdam nading thu tampi i mu toto ding hi. Ahi zongin mihing i hihna mah siksanin khialhna, mawhna i bawlkha zelzel hi.

 

Tukaal sung i thusinna-ah Colosse le Phillipian pawlpi a laikhakna a thupatna-ah Lungdamkohna le thungetna kimu-a, tua thute a kikum toto ding ihi hi. Tua thute in thu upna-ah tha hong guan thei thute hi.

 

*January 10, Sabbath ading kiginkholhna in tu kaal lesson sim in.

 

SUNDAY January 4

Lungdamna sungah Kimeltheihna

 

Sim in, Phil 1:3–8. Bang hangin Paul lungdam hiam? Bang kha muanna pulaak hiam? Tua in bang thupitna nei hiam?

 

Paul in Philippi pawlpi phut hi. Hih laikhak sungah Khristian kilawmtak na om hi. Tai tampi ah Kolbulh thuak taleh, Pual’ lungtang sungah thu-um mite om hi. Khrih itna tawh amaute it hi. (Phil. 1:8). Amaute hangin Topa tungah lungdamko hi. Paul lungdam kohna in eite ading hong thumsak Zeisu hong musak hi. Siampi lianpa’ awm tung aa suang nam 12-te in Israel minamte ai-awh hi. Thu a ngetsak ciangin a lungtang tungah tuate om hi. (Pai. 28:29). Siampi Lian Zeisu in vantung biakbuk sung, Pa mai ah a mite min va paipih hi.

 

Philippi 1:3 sungah a lunglut huai khat in Philippi pawlpi le Paul kizopzia ahi hi. Paul’ thungetna ah amaute a phawklam kipulak hi. Amaute in zongh Paul phawk uh ahihlam zongh pulak hi. Greek kamin kilawmtakna“koinonia” kizangh hi. Paul’ gimthuak bangin (Phil. 3:10), Philippi pawlpi in zongh thuakpih cihna hi. A gimthuak puakpih “sunkoinōneō (Grk)” uh aa, nasepna ah zongh sumlepai tawh huh uh hi. (Phil. 4:14, 15). Hih kikhuk tuahna in apat pan atawp dong ahi hi. (Phil. 1:5). Tua hangin “nuamna tawh” amaute ading thunget sak, lungdamkoh sa ahi hi. (Phil. 1:4). Paul in a thongkiat pen hamphatna-in mu hi. “Gospel a hut nading leh a kipsakna hunpha-in” ngaihsun hi. (Phil. 1:7). A sawt lo-in gimthuak ding ahihlam leh thongkiate leh a hawhte tungah gospel thu genthei ahihlam pulaak hi. “Hu” cih in “apologia (Grk)” hi aa, a langpangte dona ahi hi. Paul in a nuntakna sangin gospel thupi ngaihsut zaw hi. Nungta-in, a si zongin Pasian a muang mite sungah “nasep hoih” tangtung ding cih muanna nei hi. (Phil. 1:6).

Pasian in “na sungah nahoih” hong zawhpih ding cih kamciam koi bangin na teel hiam? (Phil. 1:6) Bang a cihnopna hiam? Hih in nihvei Kumkikna dong nasem tawntung ding a hiam?

 

MONDAY January 5

Paul ii thuum Ngetna

 

Hunkhat lai-in “kei” cih leh “ka kisap, ka deih,” cih tawh kisai thungetna thu a gen pastor khat om hi. Amah in “angsungkhual thungetna” zialetong nei hi. Bang hang hiam cihleh Pasian in nalianpi nei hi cih lungsim nei hi.

 

Phil 1:9–11sungaa Paul’ thungetna sim in. Bang mungtup belin nei hiam? Bang ngen pipen hiam? Thungetna tawh kisai bang hong gen hiam? Hih in Greek kammal 43 bek tawh thungetna ahi hi. Ahi zongin laikhak dangte khempeuh huamkim hi: Itna, pilna, thukhentel theihna, thudikna, pukna piansak lohna, leh Jesu Khrih neihna tawh dikngahna cihte ahi hi. Hih in pawlpi genbelin nei hi.

 

Mimal ading a thungetna pawlkhat:

Khat le khat na ki-it semsem un: Ki-it semsem ding banah, itna kimakaih sak ding ngetna hi: “pilna leh thukhentel theihna khempeuh,” ci hi. (Phil. 1:9). Hih in khuakpilna bek hilo aa, Pasian tawh kithuahna leh Ama Kammal simna tawh a kingah khalam pilna hi. (Eph. 1:17, Eph. 4:13, 1 Tim. 2:4).

 

Thukhentel theihna: “A hoihpen thute theihtelna,” (lauhuaina hong tunthei thute theihtelna) leh “lungsim siangthona leh kawkbaang lohna,” hi. (Phil. 1:10).

Thudikna: “nitang sungah sittelna” cih khiatna nei hi. “Khristiante nasep khempeuh in nitang sungaa nasep tawh kibang ding hi.” Ellen G. White, Reflecting Christ, p. 71.

 

Pukna piangsak lohna: Mite’ kisuih khakna hilo ding, uplahna a piangsak thei gamtat, kampaute neilo ding cihna hi.

 

Khrih tungtawnin Dikna: Romans le Galati laikhak sung leh Phillippi 3 sungah a kicing zawin kimu thei hi.

 

Bangbang semin, bangzahin itna i nei zongin “itna i nei semsem hiam?” (Phil. 1:9) Bang hangin Khristian nuntakna-ah itna in thupi a hiam?( 1 Kor. 13:1–8.)

 

TUESDAY January 6

Philippi pawlpite in Paul thongkiat a zak uh ciangin lunghimawh uh hi. Khualzin thei nawn lo, thuhilh thei nawnlo hi. Biakinnte ah Jesu thu gen thei nawnlo hi. Pawlpi phut thei nawnlo hi. Philippi pawlpite in sawltakpa’ omzia a en ding, a thapia ding leh a kisapteng a huh dingin Epaphroditus sawl uh hi.

Philippians 1:12–18. Paul in a thongkiat koici muh hiam? A lungsim puakzia leh a tuahkhak thute panin bang etteh ding om hiam?

 

Philippi-te in Paul’ kamvaikhah lamdangsa uh hi. Khalam thukhentel theihna in a thongkiatna a hoihin musak hi. Tua in a nasepna khaktan vetlo aa, “gospel nasep tangzai sak zaw hi.” (Phil. 1:12). Midangte in Kolbulh khaukhihna bek mu uh aa, amah in thongcingte pen Pasian gammi suakthei ding ci-in mu hi. A thongkiatna in gospel nasep kizel sak thei ding ci-in mu hi. Bangbang piang taleh laulo-in hangsan takin Khris thu a gen hi.

 

Hih in ngaihsut hak phial taleh, Paul’ thongkiatna in phattuamna piangsak takpi hi. Ama kikhihcipna in amaute leh gospel nasep a nawngkai sak ding sa uh hi. Pawlpi sung nangawn ah mihing huaihamna in bangzahin lian ahi hiam! Paul a om mapekin Jeremiah in, “lungsim in khemhatpen hi,”na ci hi. (Jer. 17:9).

 

Ahi zongin a citak nasem pawlkhatte in gospel thu a kizelh nading hanciam uh hi. Amaute in Paul it uh aa, Paul thuakna a muh uh ciangin Khris muangzaw sem uh hi. Topa adingin nasem zaw uh hi. A pai ngamlohna uh ah pai ngam zaw uh hi. Thu a gen ngamlohna uh ah gen ngam ta uh hi. Khris kisang zaw semsem aa, gospel kizel zaw hi.

 

Lungkhamna in phattuamna pawlkhat hong pia thei hilo hiam? Phattuamna omlo tawh a kibang zongin Pasian bangci muang ding cih hong hilh hilo hiam?

 

WEDNESDAY January 7

Gospel gah

 

Paul in Colosse pawlpi tawh a kizopzia leh Philippi pawlpi tawh a kizop zia kibang lo hi. “Ka mai hong mu ngei nai lote”ci hi. (Col. 2:1). Paul in Phililppi pawlpite bangmahin Colosse pawlpite hangin lungdamko hi.

 

Sim in, Col 1:3–8. Paul in bang thu thumte hangin Topa tungah lungdam ko hi ding hiam?

 

Upna, lametna, leh itna cihte pulaak hi. (1 Kor. 13:13, 1 Thess. 1:3, 1 Thess. 5:8). Colosse pawlpi in hih thute nei hi cilo hi. Amaute hangin Topa tungah lungdam hi. Banghang hiam cihleh James mahbangin amaute lak ah “hoihna leh kicinna” om hi, ci hi. (James 1:17). Pasian hong itna i muh ciangin Khrih sungah upna i nei thei hi. (Eph. 2:4–8). Vantung lametna i ngah thei hi. Peter in,“a kisia theilo, a mual ngeilo hong kikoih sak hi,” ci hi. (1 Pet. 1:4).

 

Paul in gospel thu in muantakcing hi. Banghang hiam cihleh “Thuman thutak tungah kinga hi,” ci hi. Pasian Kammal a genna ahi hi. (2 Kor. 6:7, 2 Tim. 2:15). A um mite tungah “mihing kammal” bang lo-in, nasep zawhna “lianpi” nei hi.(1 Thess. 2:13). Pasian deihna zongh kicingsak hi.” (Isa. 55:11). Gospel nasepna ah Kha Siangtho in nasem hi. Gospel in amah mahin gah gahkhia hi. Banghang hiam cihleh “nuntakna thu,” ahi hi. (Phil. 2:16).

 

Hih bang hun tomno sungin gospel thu hih zahin a kizelh in a lamdang thu khat hi. “Leitung khempeuh ah” kizel khin ci hi. (Col.1:6). “Bawlsa khempeuh” tungah kipuak khin ci hi. (Col. 1:23). Rome lampi hoihna in Paul’ laikhakte kizelbaih sak hi. Ahizongin khalam suahkikna pen Pasian’ nasepna ahi hi. (James 1:18, 1 Pet. 1:23). Khrih sungah amaute mithak a suak uh hi. (2 Kor. 5:17).

 

Col 1:5. “Vantung ah note ading lametna om hi,” ci hi. Tua lametna bangci tel na hiam?

 

THURSDAY January 8

Thungetna Vanglian

 

Sim in,Col 1:9–12. Paul thungetna sungah bang kimu hiam?

 

“Ama deihna theihna tawh na kidim theih nading,” ci-in ngen hi. Pasian deihna theihna pen “pilna leh khalam thutheihna’ ci hi. (Col. 1:9). Tua pilna in Pasian muanna, Ama deihna sepnopna ahi hi.(John 7:17). Eima theihtawmna tawh hilo hi. (Pau. 3:5). Pasian deihna in bang hiding hiam?

 

 Thungetna tungtawnin Pasian deihna i theih nading nam 4:

 

1. Pilna naakpi in Lai Siangtho: “Na kammal in ka pai-na lampi adingin meivak hi (Late 119:105).

2. Pasian in Kha Humopna hong pia hi. (Mang. 12:17, Mang. 19:10). “Topa Pasian up nading, kikhuangkhoh nading, daupai nadingin a kamsangte um ding,” ci hi. (2 Khang.20:20).

3. Hong panpihna thupiangte tungtawn, Ama makaihna i ngetna tungtawnin kithei thei hi. (Col. 4:3).

4. Kha Siangtho in khatvei hong makaih phot leh, Ama aw kiza thei hi. “Hih in lampi hi, hong cihna aw na za ding hi.” (Isa. 30:21).

 

Colosse pawlpi in “Topa maipha a ngah nading,” thunget sak hi. Col1:10). Kuamah in Pasian maipha mu zo lo hi. Pasian hehpihna bek in maipha hong ngah sak hi. Ama deihna tawh kituakin a nungta dingin hong sam hi. (Eph. 4:1, 1 Thess. 2:12). Hih laikhak bekbek ah “Lampai” “nungta” cih kammal thum veitak kizangh hi. (Col. 2:6,3:7, 4:5). Pasian thukham tawh kituakin nungta, gamta ding cihna ahi hi. (Pai.18:20). Kha Siangtho nasepna bek tawh piangthei hi. (Ezek. 36:27).

Paul in amaute leh eite adingin ‘a lungkimsak nunna” hong ngetsak hi.

 

“Nasep hoih tawh a kidim nunna” (Col. 1:9, 10). “Pasian theihtelna-ah a khangto nunna”(Col. 1:10), le “lungdamko nunna”(Col. 1:12) hong ngetsak hi. “ Pasian hong makaihna bangci theih ding?” cih dotna bangci dawng ding na hiam?

 

FRIDAY January 9

Simbeh Ding: “Mi tampite in geelkholhna kician nei lo uh hi. Amaute nunzia in mungtup neilo hi. Thupiangte khentel theilo uh aa, tua in lungkham sak hi. Pasian’ tate nuntakna in biaknapia nunna hi. Nuntak nading pilna i nei kei hi. Mailam ei geltheih hilo hi. “Abraham in a nung ciangin a ngah ding gam ah upna tawh pai hi. Thumang hi. A pai nading theilo pi-in a dingkhia hi.” Hebrews 11:8.

“Khrih in hih leitungah Ama nunna ading bangmah geel lo hi. Pasian geelna mang hi. Ni khat khit ni khat Pa in a geelna hilh hi. Tua hileh Ama deihna siangtho takin i sem thei ding hi. Ama tungah i ki-apna zui-in lam hong lak ding hi.

“Mi tampi in mailam nopsak nading geel uh aa, tangtung lo hi. Pasian gelsak in. “A misiangthote a makaihpa” muan in. 1 Samuel 2:9. Pasian in ei khensatna lotawh hong makaih ngei lo hi. Amaute in a kipat pan mukhol thei uh hileh, Amah tawh nasem khawm nuam lo-in omlo ding uh hi.” Ellen G. White, The Ministry of Healing, pp. 478, 479.

 

KIKUP DING DOTNATE:

 

1. A beisa kaal sungaa na lungdamna thute gualsuk in. Na upmawh sangin tamzaw ding hi.

 

2. A tunga Ellen G. White laigelh lungngai in. Upna thu ah a muibun kammal khat hi. Tua bang upna koici sin theih ding na hiam?

 

3. Col 1:6, 23 siksanin kikum un. “Uplohna, phunphunna, langpanna tawh Israelte in Canaan lut theih nading kum 40 sung khaktan uh hi. Tua bang mawhnate mah in vantung Canaan lut nading hong dal hi. Pasian kamciam a khialhna hang hilo hi. Uploh man, leitung lungsim neih man, ki-aploh man, Pasian’ mite lak ah kitotna a om man ahi hi.

 

Khris pawlpi in a nasep ding a sem mah hiam? Leitung khempeuh a kivauhilh khit ciangin Topa hong pai ding hi.” Last Day Events, p. 38. Tua bang mawhna sungah koi bangin nungta lai i hiam?