LESSON 7 | May 9-15 Zat Theihpah Ding Thungetna

 

LESSON 7 |    May 9-15

Zat Theihpah Ding Thungetna

 

SABBATH NITAK

Tu kaal sung sim ding: 1Kum.19:1-18; Matt. 6:5; Luke 11:2-4. Matt. 6:5-15; Dan. 9:4-19; Rom. 8:26, 27.

Kamngah: “Mite aw, Amah muang tawntung unla, Ama mai-ah na lungsim uh sungkhia un. Pasian in eite aa dingin i bukna ahi hi”   

      (Late 62:8).

N

a thungetdan in bang tawh kibang hiam? Bangzah vei thu na ngen hiam? Lungsim takpi, deihna takpi tawh thungen na hiam? Topa in na thunget hong dawng dingin lametna tawh thungen na hiam? Nisimin thungen na hiam? Dongtuahna khat hong om ciaingin thungen bek na hiam? Na thunget in na khat peuhpeuh ngah nading bekin a ngen na hiam? Na thungetna sungah Pasian minphatna a nei hiam?

          Zingsang na thawh tungin thungetna, annek thungetna, nasep laitak, kitaklah mahmah laitakin zong thungen mi na hiam? Na lawmte tawh, sun tawntung, zan tawntung thungen khawm mi na hi hiam? Na thungetna hangin na nuntakna sungah kikhelna na mu thei hiam?Thungetna in eite (a hiang) le Jesuh (Leengguipi) kizopna hi lo hiam? A khangto le nosuahna i ngah zawh nadingin, singkung a zung in an le tuite a hup bangin, eite in zong Leengguipi ahi Jesuh tawh tatsat loin kizopna a nei tawntung ding ihi hi. Leenggui tawh a kikhenkhia a hiang in nungta loin a si hi; Khrih tawh kizom lo mi in nuntakna a nei lo mi hi.” Ellen G. White, Early Writings, p. 73. Hih in thungetna hangin thupha hi. Pasian in i thungetna hong za hi. Amah in a tawntungin kitangsam bangmah om loin thungetna, Ama deihna kicing zui-in hong dawng hi. I lamet bangin hong dawng lo hi.

          Tu kaal sung i thusinna-ah Lai Siangtho pulaak mimal thungetnate le amau nunziate i kikum toto ding hi.

 

* May 16, Sabbath ading kiginkholhna in tu kal lesson sim in.

SUNDAY  May 10

Elijah — Gimna Sungah Thungen

 

          A citak Elijah in gimna sungah a nungta kamsangpa hi. Kumpi Ahab khan sungin a nungta kamsang khat hi. Ahab in ama mai-a kumpite sangin siatna tawh kidimin, Topa hehna a piangsak kumpi khat hi. (1 Kum. 16:33). Carmel Mual tungah a nungta Pasian tawh kido-in, (1 Kum.18), a lamdang mahmah thu kimu thei hi. Ahab le a kumpi makaite in Pasian vangliatna amu ciat uh hi. Elijah thungetna hangin tua bang vangliatna hong kilang hi. Hih in Israel nuntakna-ah a mangngilh ngei loh ding uh thupiang hi. Lamdang takin Israel gam ah kikhelna lianpi hong tung hi.

1 Kum.19:1-18 sim in. A diakdiakin Elijah thungetna le Pasian in a dawnkikna thu ciamteh in. Elijah lungkiatna thu bulpi in bang thu hiam? Koi bangin Topa Pasian in Carmel Mual a thupiang tawh kibang loin dawngkik hiam?

          Tua ni sun tawntung thupiang in, Pasian in Elijah thungetna bangin dawng hi mah taleh, kamsangpa lungsim ngaihsutna, a thuakna in a lamdang khatin kikhel mang mawk hi. Tua ni-in amuh gualzawhna tawh kibang nawn lo hi; gimin lungkia-in a om ciangin Pasian sungah muanna nei ding phawk nawnin a nei kei hi. A lamdang mahmah thu tuakkha-in, Elijah in lungkiatna bulphuhin lamet bei bangin a om hi. Tua bang dinmun tawh om hi mah taleh Topa Pasian in Elijah kitangsap annek tuidawn a pia leuleu hi (1 Kum. 19:5, 6), tua bangin lamdang takin Pasian ompihna tawh sun 40 le zan 40 sung nuam takin a om thei hi. (1 Kum.19:8). A tawpna-ah nidang hun tawh kibang loin Topa mahmah a kilang hi.

          Khat veivei ciangin i nuntakna-ah Pasian in i thungetna vanglian, lamdang takin hong dawngpah hun zong om hi. Tua in i upna hong hatsak hi. Topa tawh kinai takin om ihihna hong phawksak hi. Khat veivei ciangin zia-etna i tuah ciangin i upna neu-in thuman lampi zuihna panin lampial dekdekin i om hi; Pasian hong thupiakte in hamsa lua-in Ama deihna bangin nungta zo loin i omkha zel hi. Tua bang hun ciangin i thungetnate Topa in hong dawng lo hi, ci-in khat veivei i ngaihsunzel hi. Tua bang hun ciangin, a taktakin, Topa geelnate a thei lo ihi zaw hi. Ama ngaihsutna in eite ngaihsutna sangin sangzaw thamin mihingte pilna sangin Ama thu theihna, pilna tehkak thei zong hi lo hi (Isa. 55:8, 9). Pasian piansakna thu i theih zawh loh thu tampi om hi. Tua hi-in Ama lampi i tel zawh loh thute lamdangsak ding hi lo hi. Bang hang hiam cihleh ciangtan nei mihing le ciangtan nei lo Pasian in tehpih theih hi vet lo hi.

Topa in, eite hoihna le hehpihna dim i Pa ahih mah bangin Amah in eite kitangsapna khempeuh amu a thei hi. A mitnauta bangin eite hong kem, hong cing tawntung hi. Tua hi-in Amah tawh tatsat loin kizopna in a thupi mahmah hong suak hi.

 

MONDAY      May 11

Na Thungetna Hong Kidawn Loh Ciangin

 

          Topa tung pan ngetna khat nan gawk zawh kum tampi cing khinkha mai thei hi. Pasian in na ngetna hong pia lo bangin na ngaihsut hun om thamkha ding hi. Lai Siangtho in hong hilhna-ah “Ngen un. Na ngah ding uh hi” (Matt. 7:7), “Ama deihna tawh ktuakin na nget uh ciangin hong pia loin a om kei ding hi.” (1 John 5:14). Hih kamciam na theitel hiam?

          Hannah in Topa tungah a ki-ap mahmah nupi khat hi. Suan le khak nei dingin thungen hi (1 Sam. 1:10-17). Amasa-in Pasian in tua ngetna a pia lo tawh kibang hi. Ahi zongin Hannah in lungkia loin thungen tawntung ahih manin, Pasian geel hunin Hannah ngetna pia hi, cih kimu thei hi. Khat veivei ciangin Topa tawh lampai khopna-ah Ama theihtelna thuk semsem ding hi. Late 62:8 in hih bangin pulaak hi: “Mite aw, hunte khempeuh ah amah muang un; eite belhna Pasian ahi manin na lungsimte uh ama tungah sung un.” A tawntungin Topa na muang ding hi. Na lungsim khempeuh Topa tungah na suahkhia ding hi. Topa in i bukna suangpi hi. Amah muang in.

          Topa in eite aa dingin a hoih pen hong sem ding hi, ci na muang hiam? Na thungetna hong kipiakpah loh ciangin Topa na muang veve hiam? Ama hoihsak hunin i thungetnate hong pia ding hi, cih na muang takpi hiam? Khat veivei ciangin thungetnate i ngahpahpah kei hi. Lai Siangtho in hih thu tawh kisai bang hong hilh hiam?

· Pasian deihna zong in. Na deihna ultungsak kei in. (Matt. 6:10; 1 John 5:14, 15).

· Na ngimnate sittelpha in (Pau. 16:2, James 4:3).

· Mawhna khat peuh sungah nuamsa lai na hiam, kisittel in (Late 66:18, 1 Pet. 3:12, Pau. 15:29).

· Topa le Ama thu sungah nungta in (John 15:7).

· Thu nan get ciangin upna na nei ding hi (Heb. 11:6, James 1:6, Mark 11:24, Matt. 21:22).

· Na lungsim kisittel in (kiphatsakna tawh a nungta na hiam? Kiniamkhiatna tawh a nungta na hiam?) (James 4:6, 1 Pet. 5:6).

· Lungduai tawntung (1 Thess. 5:17, 18).

· Mite mawhna maisak (Mark 11:25, 26).

· A tawpkhakna-ah Pasian in a hoih pen mah hong geelsak hi, cih thu a nial uh hi (Rom. 8:28, Eph. 3:20, Jer. 29:11-13). Khat veivei ciangin Topa geelna bangin i thungetna hong dawng hi. Paul tungah zong hih bangin na kipulaak hi: “Ka hehpihna in nang aa dingin kicing hi.” (2 Kor. 12:9).

          I thungetna hong kidawn lohpahpahna a hangin Topa I muhzia tungah tampi kinga hi. Mihingte hong hehpih lo, hong ompih lo Pasian hi, ci-in a ngaihsun mi khat aa dingin Pasian tawh a kizopna thaneem cihna hong lak hi. Tua bang hun ciangin Topa in hong nusia lo, hong ompih tawntung ahihna i pulaak ding tampi om hi. Pasian muanlahna, muhkhialhnate hong lakkhiatsak dingin Topa tungah ngen in.

TUESDAY   May 12

Jesuh In Thungetzia Ding Hong Hilh

 

          Jesuh min tawh thungen cih ciangin limtakin thungen ding, kammal mal tu theithei zang in, kigingkhol ding cihte hi masa lo hi. Hih bangin thungetna, Jesuh in bangmah loin hong simsak lo hi (Matt. 6:5-8). Jesuh in nungzuite tungah amaute nunzia ding a na hilhna kimu thei hi. Zia le tong hoih, a deihhuai nunzia neihna in Jesuh deih nunna hi. Nungzuite in Jeuh thungenin om amu zelzel uh hi. Thunget in Jesuh nuntakna-ah a thupi mahmah khat hi. (Luke 5:16, Luke 6:12, Luke 9:18, Luke 22:41, Luke 24:30, Mark 1:35, Mark 6:46). Tua bangin thungenin om Jesuh amuh uh ciangin, nungzuite in biakna makaite nunzia tawh a tehkak thei uh hi. Nungzuite in a nuntakna vuah thungetna kitangsam mahmah uh ahihlam a phawkpha sansan uh hi. Tua hi-in nungzuite in Jesuh kiangah hong pai uh a,”Topa aw, thungetzia ding hong hilh in” ci-in a ngen uh hi. (Luke 11:1).

          Tua bangin a nungzuite ngetna Jesuh in a dawngkik hi. Nisim kampau kamzat mah tawh thungen dingin hong sawl hi. I lungsim takpi tawh thungen dingin hong deih hi. Luke 11:2-4 le Matthew 6:5-15 sim in. Jesuh hilh thu anuai-a thute ciamteh in.

· Vantung om kote Pa aw: Pa khempeuhte Pa tawh mimal kizopna hong hilh hi.

· Nangma min siangtho ta hen: Pasian siantho-na in zahtakna le a thupitna hong phawksak hi.

· Na Gam hong piangta hen: Topa hong pai mateng, Pasian gam hong tun ding lunggulhna le Kha Siangtho tawh nuntakna kisam hi.

· Vantungah na deihna a kicin mahbangin leitungah zong hong kicingsak ta hen: I nuntakna sungah Pasian deihna hong kicin nading ki-apna, kipiakna kisam hi. I deih thu bek ngen hi loin Amah in eite aa ding a hoih penpen thei ahih manin, tua thu hong pian nading lunggulhna kipiakna kisam hi.

· Tuni-a ka khamkhop ding an hong pia in: Nuntak nading taksa annek tui dawn bek tham loin vantung thu tawh (Jesuh le Ama Kammal tawh) zong nuntak ding ngetna kisam hi.

· Ko tungah hong mawhte ka maisak uh bangmahin kote mawhna zong hong maisak in: Mawh kisikna nei-in, mawhmai ding ngetna in thupi hi. Topan i mawhnate hong maisak ahih manin eite in zong midangte mawhna a maisak ding kisam hi.

· Khemna hong thuaksak kei in. Gilo pa kiang pan hong kem in: Siat theihna pan dalna ngetna in, Ama Kammal sungah bukna ngahna hi (Late 91).

·  Vangliatna, minthanna nei tawntung ta in. Amen: Na khempeuh nuntakna khempeuh ama neihsa ahihlam phawkna nei-in Topa bekmah biaktham cing, phattaakcing ahihna hong hilh hi (1 Khang. 29:11).

Bang hangin thungen loin om ding na hiam? Zingsang na khanlawh sialin nang hong it Pa tungah ki-apna nei in. Thungen ding hong daltan thei bang teng om hiam? Bangmah kidalsak kei in. Tu mahmahin thungetna nei in. Jesuh in hong sawl bangin Pa tawh kizopna nei tawntung in.

 

WEDNESDAY    May 13

Phatna, Mawh Pulaakna, Ngetna Le Lungdamkohna

 

          Thungetzia ding Jesuh hong hilh bangin i ngen ding hi; i hih lah dingin a hamsa hi lo hi. Mimal ki-apna na neih ciangin, gamdaih thungetna na nei ciangin ahih keileh innkuan a biakpiakna na neih ciang ahi zongin, pawlpi mite tawh ahi zongin thungetna in lawmta bangin Topa tawh kiho-na hi, cih na phawk tawntung ding hi. A tam zaw thungetnate in i deih, i kitangsapnate ngetna vive tawh kidim hi. Ahi zongin thungetna i cih in kitangsapte ngetna sangin zai zaw tham hi.

Daniel’ thungetna Daniel 9:4-19 sungah kimu thei hi. Thungetzia tuamtuamte zong kawikawi in.

          Anuai-a thungetna sungah bang thute kihel hiam, cih ngaihsun in.

          Phatna: Pasian min phatna in Pasian in kua hi-a, Amah in bang tawh kibang hi, cih pulaakna hi. Late 100 sim in. Pasian min phatna hi. Pasian min ngaihsun in. Pasian in min tuamtuam nei hi. Tua minte in Ama zia le tong, Ama vangliatna a pulaak minte hi. Na Honpa, hong Hehnempa, hong Damsakpa, Tuucing Hoihpa, Alpha le Omega, Suangpi ahihna hangin a min phat in.

          Mawh kisikna le mawhmai sakna: Topa tawh kiho-na nei-in, Ama sungah na nungta ding hi. Amah tawh na kizopna hong nusia thei na khempeuh hemkhia inla, Topa kiang zuankik in. Topa tawh a kinai semsem mi in, ama gitnatlohna, a mawhna a kimu pha semsem ding hi. Tua bangin i dinmun man muhtel khit ciangin Topa siantho-na i lunggulh semsem ding hi. Ama zia le tong hong guan dingin na ngen nuam semsem ding a, Ama zia le tong in na sung panin hong kimukhia ding hi. Midangten na tungah hong mawhkhak uh ciangin amaute mawhna na maisak ding hi. “Na mawhnate kisik inla, mawhmai-na na ngah nadingin na ngen ding hi; tua hileh damna na mu ding uh hi. Midik thungetna in na lianpi a sem zo hi”(James 5:16).

          Ngetnate: Bang hamsatna, lunghimawhna na nei hiam? Innkuan sung, lawm le gual tawh kizopna-ah ahi zongin, sumzon paai zonna-ah ahi zongin, nasepna, sangkahnate panin lunggimna na tuahkhak a omte Topa tungah suankhia in. Ama makaihna na ngen ding hi.

Na huhna kisam mi a om hiam? Tua bangin huhna kisam mi khat na huh zawh nadingin thungen inla, ki-ap in. Pasian deihna bangin na kalsuan theih nading na ngen ding hi.

          Lungdamkohna: Philippians 4:6 sim in. Na ngah thuphate ngaihsun in. A thupi mahmah thuphate na phawkkha ding hi. Ahi zongin na phawkkhakloh, thupha hi dingin na simlohte zong thupi veve, lungdamkoh huai hi lo hiam? Tatsat loin Pasian hehpihna ngah mite ihi hi. Tua mah taleh lungdamkoh ding peuhmah i ngaihsunkha kei hi. Topa hong sepsak nate hangin lungdam a ko ding hi lo i hiam?

Bang thu hangin Topa min phat loin om ding na hiam? Mawhmai-na na nget ding kisam hi lo hiam? Lungdamkoh ding tampi nei hi lo na hiam? Tumahmahin kipanpah lo ding na hiam?

 

THURSDAY     May 14

Thungetna Tawh Kisai A Dang Dotnate

 

          Pasian in na khempeuh thei khin hi napi, bang hangin thunget kisam veve hi ding hiam? Pasian in na khempeuh thei khin ahih manin bang hangin Ama tungah thungen veve ding i hiam? Ellen G. White ii hilhcianna ah: “Pasian in a theih nadingin thungen ihi kei hi. Thungetna in vantung panin eite kiangah Pasian hong kumsuk hi loin, thunget in Ama kiangah hong tunpihna hi zaw hi.”Steps to Christ, p. 93. Thungetna in i sungah hong lut nading lungsim kongkhak honna hi zaw hi. Topa mai-ah a kilawm bangin thungen thei lo ihih manin Kha Siangtho in i thungetnate a na puaksak hi; eite aa dingin hong thumsak Kha Siangtho hi (Rom. 8:26, 27).

          I lungdam ciangin bang hangin thungen i hiam? ei le ei kicingsaknapen kiphatsakna hi. (Lesson 3na enkik in). A thahat thungetna in nun dan hong daal thei thulianpen hi.Pasian i kisap zia thei tel hi peuhmah leng Ama kiangah naipai mahmah ding hihang. Api cing vanmite in zong biauh ahih leh , ei mawhnei mite lelel kisam sakoh nading bang om? Mate 5:6 le Isa. 44:3 in hih thuman koici gen hiam?

          Thungetna-ah upna in bang dinmun nei hiam? Hebrews 11:6 sim inla, upna le thungetna in ziat le vei bang hi lo hiam?A nihin a tonkhawm tawntung ding hi. Khrih in, “Note in na deih peuhpeuh uh na ngen ding uh a, upna tawh na nget uhleh na ngah khin uh hi” Mark 11:24. Pasian deihna bangin i nget khempeuh hong kipia ahihna hong telgenna kimu thei hi. Ama hong sawl bangin i kalsuan nakleh a thuphate hong pia loin a om kei ding hi. . . Thupha hong piak le piak loh teci bangmah i kisam kei ding hi.”Ellen G. White, Education, pp. 257, 258.

          Kua tawh thungen khawm ding i hiam? A tamzaw mimal thunget kula, (Pasian le nang) thungetna le Lai Siangtho simna pen Pasian tawh kizopna sisan ahi hi. Pasian tawh na kiho kawmin nangma lungsim na sittel na dingin hun latuam in. (Mate 6:6) Innkuan tawh ahi a, pawlneu tawh ahi zongin thungen in. (Sawl. 12:12)  Nih le thum kikaih khopna mun ah Pasian om hi.(Mate. 18:20) Pawlpi kipawlna tawh thungen ding hihang. (James 5:13-16) Hih thungetzia anam thum mah in thupi hi.

          Koi bangin Topa hong hopihna ka ngai diam? Thungetna in Topa tungah pulaakna bek hi lo hi; Ama hong hopihna zakna zong kihel hi;. A kitel pen ding leh kician pen dingin, Lai Siangtho simna le thungetna in tonkhawm ding hi. Na lungsim ngaihsutna kidawm in. Lai Siangtho na simna tungtawnin Topa hopihna na za thei ding hi.

I pulaaksa thute lak pan bang hamsa sa pen na hiam?

 

FRIDAY     May 15

Simbeh Ding: “Jesuh tawh kiho-na tam nei semsem hi lehang, angsung khualna tawm kiam semsem ding hi; tua ciangin Ama ompihna i ngah semsem ding hi.”Ellen G. White, Steps to Christ, p. 102.

          “I muhtel loh thute mitsuanin i om ciangin lau-na, lunghimawhna, patauhnate in hong tuamcip hi. Upna tawh kalsuan loin lunghimawhna tawh a kalsuan mi in lungkham zaw semsem ding hi. Ahi zongin Topa kiang zuanin Amah mitsuan mi in cimawh a kisak hangin, kiniamkhiatna le muanna tawh kalsuan ahih manin ciangtan nei loin na khempeuh a thei Topa sungah khamuanna amu ding hi. Amah in na khempeuh uk a, na khempeuh in Ama deihna le ukna nuai-ah om hi. Amah in i ngetnate thu don loin a om kei hi. Lungzinna khuamial khempeuh veeng ding a, nuamna nitang dng hi.” Steps to Christ, pp. 96, 97.

          “Phatna awgingte in vantung zuanin Topa tawh kinai semsem hi. Phatna late sa-in Topa biak ding kilawm hi; musia le lasakna tawh phatna late sak ding kilawm hi. Vantungmi honpite in vantung Kumpi tokhom kimkotin Pasian phatna a sa uh hi. “Hong pai un, lungdamna tawh ei hong Piangsakpa mai-ah lungdamkohna le nuamsa lasa-in va pai ni.”Isaiah 51:3.” Steps to Christ, p. 104.

 

Kikup Ding Dotnate:

1. A tung a i pulaak thute lak pan bang thangah pen na hiam? Bang thu telhamsa pen na hiam?

2. Lai Siangtho pulaak thungetna lak pan bang thute nuntakpih ding na mu thei hiam? (Ezra 10:1; 2 Kum.13:4; Jon. 4:2, 3; Hab. 3:1; 2 Kum. 19:14-19; Jer. 32:16-25, Neh. 1:4-11, 1 Kum.22-54).

3. Antanna in thungetna-ah bang dinmun nei hiam?

4. Tu kaal sung thusinna lak pan na kikhel ding hong hilhna na mu thei hiam? ahih keile na muh thak thu, na phawk thak thu a om hiam? Kikhel ding a om leh bang hangin kikhelpah lo ding na hiam?

 

Tomgenna: Lai Siangtho sungah lawpna le upna tawh thungen mite nunzia tampi kipulaak kimu thei hi. Lai Siangtho i sim ciangin Topa tawh kizopna tawh kisai-in etteh ding mi tampi kimu thei hi. Topa tawh i kizopna-ah tha hong guan, hong lawpsak kamciamte kimu thei hi. Thu upna-ah khantoh ding mungtup a neih ding kisam hi. Jesuh bek mah mitsuanin a kalsuan ding ihi hi. Amah in na khempeuh kicinna, upna phungpi le hong zawhpihpa hi.