LESSON 4 OCT. 17 – 23
TAAI-IN THUHILHNA LE THAMAN
SABBATH NITAK: TU KAAL SUNG SIM DING: Jer. 17: 1- 10; 11: 18 – 23; 12: 1 – 6; 14: 1- 16; Jn. 3: 19.
KAMNGAH: Topa aw, kong pahtawipa nang na hi manin, hong damsak in, tua hileh ka dam ding hi; hong honkhia in tua hileh ka suakta ding hi (Jeremiah 17: 14).
Ahisa mah hi kik a, a kisemsa mah a kisem kik ding hi; sunni nuai-ah a thak bangmah om lo hi (Thn. 1:9). Leitungah na khempeuh a ngei-ngei mah hi den mah maw leh? Pasian’ kamsangte le amau’ nasepna tawh kisai-in bang mah a kikhel om lo hi mah hi. Amau nasep in vauhilh, a man lote taai cih veve hi. Pasian’ sawl bangbang pulaak ahih manun, biakna makaite in kamsangte’ thu mang uh hi napi, a nungsangah kamsangte langpang uh hi. Tua thu hang mahin Jesuh Khrih in “no kineihsiam thukham siate le Pharisee-te gimna nak thuak na nu cia! Note in kamsangte han bawlsakin, a dikte aa na zem uh hi. Tua ciangin i pu i pate khan lai-in eite om hi lehang kamsangte a sisan suah amaute lakah kihel buang kei ni,” na ci uh hi (Matt. 23: 29, 30).
Tu kaal sungin Jeremiah’ sep thute i sin ding hi. Jeremiah in thu dang gen lo-in makai-te’ thuman lohnate hilhin tai a, Topa’ thukhen ni ciangin amaute’ ngah ding thamante zong pulaak hi.
SUNDAY OCT. 18
LAMPI NIHTE
Piancil pan Mangmuhna in, Topa Pasian zui ding maw, ahih kei leh zui lo ding, cih thu nih hong hilh hi. Mi tampi in a telkhialh Jesuh’ kammal “ Kei hong koppih lote ka langa pang hi-a kei hong kaihkhoppih lote a thehthang ahi hi: (Lk. 11: 23). Thuman lampi tawh kisai-in Khrih’ kammal in mi khempeuh ii theihtel dingin kician mahmah hi. Jesuh in mite' zak ngei loh thu pulaak lo hi.
Jer. 17: 5 – 10 sim in. Satan in Khrih a do-na tawh kisai-in bang thupaipi na mu hiam?
____________________________________________________________________
____________________________________________________________________
Jeremiah in hih thu a pulaak lai-in Judah kumpite in leitung kumpite suangin gualzo dingin kingaihsun uh hi. Amau' gualzawhna pen Topa Pasian’ panpihna ahihlam a theihtak uh ciangin zekai lua ta ding hi, cih thu Topa in amaute theisak nuam hi. Topa Pasian in eite hong huh dingin mite sawl thei hi mah taleh, Topa bek mah muan ding kisam hi. Topa' hong geelkholhsak thute muan ding kisam hi.
Jeremiah in mihing’ lungsim a siatzia tel mahmah hi (Jer. 17:9). Na khempeuhte' lakah lungsim mah siahuai pen hi. Thuman thutak langpan, Pasian’ thu awlmawh lohna, cilesa’ deihna zui-in ut bangin gamtatna cihte a lauhuai siatna vive ahi hi. Lungsim in siatna tawh kidim khin ahih manin i siatlam takpi zong kiphawk lo hi. Jeremiah in lungsim siatna hangin gimnate mukhol hi.
Nidang sangin Topa bangci muan zawk ding na hiam? Tu mahmahin upna tawh bangci kalsuanin, koi bangin Topa mai-ah a hoihin gamta ding na hiam?
MONDAY OCT. 19
JUDAH ii MAWHNA
Jeremiah in a sep ding vaipuak a baih ding hi lo hi. Mite’ mawhna a pholaak nuam phadiak om hi. A ki pholaak thute tungtawnin i tuahkhak thu in hong lunggimsak hi. Tua bangin mawhna pulaak manin a kisik thei mi a om tei hangin, mi kim kisik lo hi. Kamsang dangte mah bangin Jeremiah in zong Judah mite’ mawhnate pulaakin khauhtakin thuhilh hi.
Jer. 17: 1-4 sim in. Jeremiah in Judah mite' tungah bang thu hangin vauhilh hiam?
___________________________________________________________________
___________________________________________________________________
Lungtang tungah siatna gelh (behcip) cih thu in Judah’ siatna limciinna ahi hi. A langlamah tua sangin a vanglian zaw “ Topa note Pasian’ thu mangin Thukham Laibu sunga kigelh Ama thupiakte le a thukipte na zuih uh a, na lungsim khempeuh uh le na hinna khempeuh uh tawh Topa note Pasian lamah na kihei nak uh leh hong daupaisak ding hi” (Thkna. 30: 10; Late 40:8; Jer. 31: 33 cihte zong simkawm in). Lungsim khempeuh tawh Topa it ding hi napi, tu-in, lungsim khempeuh tawh siatna bawlin, Topa langpan uh hi (1Jn. 3:4).
A kimu thei puatham gamtat hoihna in siatna thukhenna tawh hong kipelhsak thei lo ding hi. Na mawhna a hong kithuhilh ding nial kei in. Topa in Ama sawltak, kamsangte tungtawnin a hong puahphat ding langpan kei in. Mawhna mudah Pasian in siatna khempeuh nusia dingin Ama thupiak a zui mite thu hong pia hi” Ellen G. White, Prophets and Kings, 416.
Mawhna in lungsim tuamcip? Lauhuai mahmah hi lo hiam? Lungsim siansuah ding, siangthosak ding kisam mahmah hi lo hiam? Bang in lungsim siangthosak thei ding hiam?
TUESDAY OCT. 20
JEREMIAH TUNGAH VAUHILHNA
“Thutanna in hih ahi hi. Leitungah Khuavak hong tung zo hi, ahih hangin mihingte in a gamtatnate uh gilo ahih manin khuavak a it tangin khuamial a it uh hi” (Jn. 3: 19). Jeremiah a langpan mahmah kuate hiam cih leh, Pasian in siatna tawh a kipelhsak nop mite hi. Topa in gimna a thuak ding uh deih lo hi. Amau zak ding a kilawm thute za nuam lo uh hi. Bang hang hiam cihleh, tua thute in amau’ mawhnate pholhkhia hi.
Jer. 11: 18 – 23 sim in. Bang thupiang kigelh hiam? Tua limciinnate in bang hong phawksak uh hiam?
_____________________________________________________
_______________________________________________________________________
Israelte hun lai-in Topa’ min suangin thungen kamsangte in nitawp ciangin a thaman uh ngah ding hi. Anathoth khua mite in Jeremiah in a man lopi thugen hi, ci uh hi. A kigen thute za nuam lo-in Jeremiah in thuhilh nawn lo dingin khaam zaw sop uh hi. Jeremiah in thuman a tangko manin mite in thahsawm hi, cih Lai Siangtho sungah a kigelh loh hangin, Lai Siangtho thuthuk kante in bang mu uh hiam cihleh, Jeremiah sih nadingin gu kipia ngei hi, cih ciamteh na mukhia uh hi. Anathoth khua pen Jeremiah’pianna khua hi. Hih khua mite Jeremiah’ thugen za nuam lo-in kamsangpa thah ding zahkhopin langpan uh hi.
“Gawh ding a kipai pih tuuno bangin”cih kammal in Jesuh’ hong kipiakna limcing hi. Jeremiah in Jesuh sih ding pulaak khol hi. Jesuh in a nasep kipatin mite’ langpanna a thuak mah bangin ’ Jeremiah’ thugen a um dinga kilawm mite mahin langpang uh hi.
Thuman hi napi, na zaknop ngei loh hun na nei hiam? Tua bang hun ciang, koi bang lungsim puak na nei hiam? Singlamteh pua-in Khrih’ nung zui ding hi lo i hiam?
WEDNESDAY OCT. 21
DAHIN TAMLAWHNA
Topa in nasem dingin Jeremiah a sap kipat cil a kipan siampite, kumpi, makaite in Jeremiah’ thupuakte langpan ding hi, cih pen kihilhkhol khin hi (Jer. 1:19). Bangbangin kilangpan ta leh, Topa in a ompih ding lam zong hilhkhol hi. Ama mipih tektekte mah in langdo ding hi, cih pen Jeremiah in lamdangsa hi. Mihing’ ngaihsutna in ciangtan nei ahih manin na khempeuh telkhin zo lo ahih manin tua bang langpanna a thuak tak ciangin Jeremiah zong hehin nasa hi.
Jeremiah in ama hunlai-in a thuak ahih hangin kamsang khempeuhte’ tuahkhak thu Jer. 12: 1- 4 sungah bang kigelh hiam? Jeremiah in amah a langpangte' tungah bangci lungsim puak nei hiam? Koi bangin Pasian’ sawltak citakte zong mihing ahihna uh kidawk hiam?
__________________________________________________________________________
__________________________________________________________________________
Jer. 12 sungah thukhun tawh kisai kammal tampi kigelh hi. “Thumanna” “thusung” ‘diktat” cihte thukhunna kammal vive hi. Kamsangpa in a tuah thute hangin a hehna Topa tungah pulaak hi (Thkna. 25: 1). Bang hangin migilote daupai-in, thumanin Pasian a muangte tuahsia hiam? cih pen kamsangpa bek hi lo, mi tampi’ telloh thu ahi hi. Bang hangin hih bangin piang cih pen kamsangte in zong tel zo lo uh hi. Hih in bang hong musak hiam cih leh, kamsangte zong mihing mah hi. Pasian’ misiangtho Job mah bangin Jeremiah zong Pasian’ hehpihna, dikna kisam hi. Bang hangin Jeremiah in a lungkhauh mite thuhilh ding, a mipihte’ bawlsiatna thuak dingin kisawl hi ding hiam? Bang hang cih pen amah mah in zong tel zo lo hi.
I telloh thu tampi i tuah khak hangin, koi bangin Pasian muang veve thei ding i hiam?
THURSDAY OCT. 22
LUNGZINHUAI MAHMAH DINMUN
Jer. 14: 1-10 sim in. Bang thu piang hiam? Mun khempeuhah kial tung hi. A hau, a zawng kibangin cimawh ciat uh hi. Gamsa khempeuh tuiduh gilkialin om nading thei nawn lo uh hi. Kumpi in nasemte kiangah tui zong dingin sawl khia uh a, bang hunin tuitawi-in hong ciah ding uh hiam, ci-in khuapi kongkhakpite gal et-et uh hi. Ahi zongin tuikhuk, ciktui khempeuh kaang khin hi. Ni khat khit ni khat mite’ thuakna lian semsem hi.
Tua bang gimna lianpi a tuah tak uh ciang, mite in Jerusalem biakinn ah pai-in anngawlin, thungen, biakpiakna pia uh hi (Joel 1: 13, 14; 2: 15 – 17). Jeremiah in mite’ lunggulh thei hi. Ahi zongin mite in Topa maipha zong hi lo-in, dawn ding tui bek lunggulh uh hi. Hih thu in Jeremiah lungsim gimsak hi. Jeremiah in ahih leh, Topa in tui a piak nadingin thungen hi lo-in, Topa’ hehpihna le maipha mah ngen zaw hi. Jeremiah in hih bang gimna pen a kipatna hi pan a, hih sangin a lian zaw gimna hong tung lai ding hi, genkhol hi. Kial veng leh, mite in kisik lo-in a ngei mah bang kik ding hi, cih Topa in mukhol hi. Mite in gimna pan a suahtak nadingun hanciam theihzahin hanciam uh hi. Jerusalem ah pai-in antangin thungen, ippuansilh, biakpiakna tuamtuamte pia uh hi. Ahi zongin a phawk khak loh uh khat om a, tua in: kisikna man, kikhelna man ahi hi. A gamtatna uh hangin a thuak uh gimnate hangin kisik uh hi bek a, a gamtatkhialh uh kisik lo uh hi. Thumanlohna, mawhna hangin kisik uh hi lo hi.
Jer. 14: 11 – 16 sim in. Koi bangin na theitel hiam?
____________________________________________________________
__________________________________________________________________
Jeremiah in “ Topa aw, ka mawhnate uh lian mahmah in, nang tungah kong mawh khin uh hi, ci-in Topa tungah kiko khit hi mah taleh, Topa Pasian in Jeremiah tungah “ hih mite aa ding thungen kei in” ci hi. Topa in “ thungen tawntung un” ci-in pia taleh, Judah mite’ lungkhauhna, a siatna uh Pasian in tel mahmah hi. Mihing lungsim a thei Pasian hi. Mihing in mite’ lungsim thei zo lo hi. Na khempeuh a kipat pan a tawp dong a mu khol Pasian in “ na galte uh aa dingin thungen un,” ci-in hong sawl hi.
FRIDAY OCT. 23
SIMBEH DING: Bang hangin Pasian’ mite in siatna thuak hiam cih i telzawh loh mah bangin Jeremiah in zong hih thu Topa tung dong ngei hi. A kul lopi thu khat tawh a buai i hi kha hiam? Hih tawh kisai-in Ellen G. White in hih bangin pulaak hi. “ Na khempeuh hoih, kisap bang om lo kawm kalah, mawhna hong kipan khia cih pen telzawh hi lo hi. Mawhna in i gal hi. Mawhna in na khempeuh susia hi. Kuama nial zawh ding zong hi lo hi. Koi bangin mawhna hong piang khia cih pulaak khia thei hi leng, mawhna pen mawhna hi nawn lo ding hi” Ellen G. White, The Great Controvery, 492, 493. Gitlohna zong tua bang mah hi. Kuama’n tel zo lo hi. Dipkuathuai tuahsiatna khat peuh a tuak kha mite in bangci dan hiam cih telzo lo uh hi. Tua mah bangin Khrih’ hong itna zong i tel zo kei hi. Tua hi mah taleh, Singlamteh in Pa Pasian’ hong itna le ama hoihna kilangsak hi, ci-in i thei hi.
KIKUP DING DOTNATE:
1. Koici bangin mawhna hong piangkhia cih i telzawh loh hi, ci-in mawhna awlmawhloh pen siahuai hi. Bang hangin siatna, mawhna hong om cih siksan hoih nei hi lo i hiam? Mawhna, siatna tawh kidim leitungah i om manin siatna tawh kua kipelh i hiam?
2. Ellen G. White’ nasep ngaihsun in. Jeremiah hun lai-a mite in Jeremiah a mawhsak mah bangin tuhunin zong mi kim khat in Ellen G. White a mawhsak uh hi lo hiam?
