Khamtungah SDA ong piancil lai

SDA PAWLPI NASEPNA leh VANTUNGMI THUM TANGKONA (Mang 14:6-12)

Khamtung (Chin Hills) gam bupah vantungmi thum tangkona, (Mang 14:6-12) sung thupuak a lutna tangthu atom in hih bang hi.

SANGMANG VAIKHAKNA LAI

1944 March kha 13 ni in Tonzang khua ah galpi nih na Japan galkapte hong tunga, gal kitai kek hi. Tua lakah tangvalno Ngul Khaw Pau zong galtai pen India gam Calcutta khuapi dong pai suak in tua khua ah motor hawl va sem hi. Amah ABM te hi-a, biakna ahahkat, Tedim a C.E phuat cil 1940 kum October kha, F.O. Nelson leh Sia Khai Khaw Lian makaih lai-in, CE panmun len masate lakah zong kihel pah hi. A lawmpa Vanlalrawna (Lusei tangvalno) khat tawh kithuaha, Laisiangtho thu kikum zel uh hi. Rawna pen Baptist pana SDA ah a na kikhel sa hi-a, Sabbath thu ah a lawmpa Ngul Khaw Pau pen convert hi. 1947 kum ciangin a khua lam uah ciah tuak uh hi. 1952 kum ciangin Ngul Khaw Pau in, pawl ding ngah zo lo den ahih manin, Tedim-Leilum panin, Lusei pau tawh Aizawl-chal- tlang khua ah, SDA sangmang om hi, cih thei ahih manin, Thuhilhsia vaikhakna lai khak hi. W.G. Lowry te nupa in tua lai na ngah uha, a zi min Zohmangaihi ci-a aphuah uh tawh lai thuk kik uh a,  

"Nong laikhak ka na ngah uh hi. Na deih bang in evangelist 2, Zakhuma leh Lalkhuma kong puak uh hi. Ahi zong in Tedim pau siam lo uh ahih ciangin Darkhai ah na pai lecin, na kimu thei ding uh hi. Tham lo-in, na lai pen mangpau in ka na let uh a, Burma Union, SDA Mission zum ah ka na puak sawn sak uh hi. Bang hang hiam cih leh, Tedim pen Burma kumpi gam inhuam a, sum zong Burma sum kizang hi a, vaihawmna khempeuh ah, kumpi gam uk akibang hi leh, nasepna nuam zaw ding ahih manin, Burma Union panin Thuhilhsia hong puak nading un, nangh laikhak pan dinmun la in, kong ngetsak uh hi. Pasian in thupha tampi hong pia ta hen.

Hong it, Pi zohmangaihi.

SDA Mission, Chaltlang-Aizawl

Tua laikhak pen 14 December 1952 ni-in Tedim-Leilum panin Ngul Khaw Pau in na ngah hi. Tua hong tun phet in Zakhuma le Lalkhuma pen Darkhai a na tungta ahi uh hi.

Burma Union SDA Mission ah C. B. Guild President na hi a, Southern Asia Division ah R. H. Pierson President ahih laitak hi. Burma Union committee kumtawp kikhopna panin Elder Pierson in, A.E. Anderson pen Myaungmya High School siapi sem kim lai, Chin Hills pioneer Missionary sem dingin deih ahih manin, na zawna, committee in thukim pih in khensatna nei-a kipsak pah uh hi.

Gam thak taktak hong ding ahih manin amah kia zin sak mawk lo-in, Union ulian pawl khat tawh gam vel in hong zinto uh hi. President C. B. Guild, Secretary Peingyi, Fredi Ba Tin leh Myape te in hong zui to uha, Anderson pen Tahan pan in V. Rualchhina kizuisak in Falam lam Rik buzung ah W. G. Lowry tawh va kimu uh hi. A lawm dang teng pen Tedim hong zinto uh a, Tonzang dong vapha uh hi. Hong kileh kik ciangin Thuklai ah baang uh-a, tua pan ciah suak uh hi. Anderson pen W. G. Lowry tawh akimuh khit ciangin Kalemyo dong mah hong ciah kik in, Go Za Kham tawh kimu a, Tedim hong zinto uh hi. Lowry in a piak Ngul Khaw Pau laikhak pen hong keng to a, a mihing a zon leh, Tedim zato na lum a, hong veh in thu hong nget sak hi. "Hih lai, nangma gelh ahi hiam?" ci-in Lowry piak laikhak pen laka, "Hi mah hi," ci-in lamdang sa lel hi. "Sangmang na vaikhak bangin kei hong pai ding hing, Pasian nasepna nong huh ding hiam?" ci leuleu a, "Topa Pasian in hong cidam kik sak leh, kong huh mah ding hi," ci-in kiciam uh hi. Tua pen April 14, 1953 hi.

ANDERSON, PIONEER MISSIONARY

Anderson Myaungmya vaciahkik phot a, a innkuanpihte leh a van teng tawh, 1953 October kha in Tedim hong tung uh hi. Lawibual ah palikbu Khual Khan Tual inn saap in hong kipan khia uh hi. A zi tawh atate 3, David, Leslie, Daniel nei uh a, avek un 5 pha uh hi.

TEDIM KHUA AH TANGKONA NUNUNG

1954 January pan March kha dong, Leilum hausapa Hang Za Gin inn zangh in, thu gennapi hong bawl hi. Mi 14 in April kha bup sung Go Za Kham (kamphenpa) inn ah nitak sial tuiphuum sinna a neih pih khit ciangin, amah tuiphuum thei nai lo ahih manin, Central and Upper Myanmar Section President P. A. Parker vaikhak in May 8, 1954 ni in Sezang leh Leilum kikal luineu khat cinh beh in, tuibual bawltawm sungah mi (14) te tuiphum hi. Hih tui kiphumte

1 Kam Zam

2. Cing Za Huai

3. Go Za Kham

4. Phung Kai

5. Tel Khan Ning

6. Ngul Khaw Pau

7. Suak Khaw Kai

8. Man Cing

9. Cin Nang

10. Thual Cing

11. Cin Za Suan

12. Cing Khaw Dim

13. Khual Do Thang

14. Vung Khan Man te ahi uh hi.

Hi te pen Khamtung gam bupa SDA upna sunga tuikiphuum masa pen te hong suak hi. Tuiphuum a nihveina pen October kha 16 ni hi-a, Lawibual a bual tui omsa, Mission huang nuai a, lei vokkuang ciangkot sunga tuivung sungah P. A. Parker mah in phum hi. Tua te in

1. David Anderson

2. Leslie Anderson

3. Ciin Ngaih Man

4. Lian Khup

5. Kham Za En

6. Vung Thawng

7. Zam Za Kham

8. Thang Khaw Zam

9. Vung Za Niang

10. Thang Hau

11. Thuam Kai

12. Go Khaw Hau

te ahi uh hi. (Anderson teekta a, "Origin of Chin Hills work" ci-in makai zaw deuh te a laikhakna ah, hih te a masa pen bangin na gelh kha mawk hi.) Tua baanah, Go Za Kham mah kamphen in zanga, Kaptel leh Laitui te ah thu va gen in, mi 4-5 bang tuiphumna nei hi. Bukphir, Darkhai lamah Zakhuma leh Lalkhuma te tawh anasep na uh zong tuiphum pawl khat va nei uh hi. Amah pen thugen siam a, mite in lamniah in, beel mahmah hi.

 ANDERSON KINAWH KHIA

1955 April kha ciangin, Kawl kumpi Foreign office panin sikkhau lai khat hong tunga, "Return to your original post within three weeks" ci ahih manin, ngimna teng kipelh a Rangoon ah ciahsukkik kul hiau mawk hi. (Hih thu pen Dr. Vum Khaw Hau, Foreing Office ah Secretary a sep lai tak hi-a, ka pa nasepna a nawngkai sakpa nawhkhia ning ci-in hong bawl hi. Pa Suang Khaw Thang genna bang)

Lawibual mission huang hong ngah sak man a, mission inn zong amahmah in lamin zo nai lopi hong ciah san hi. Ngul Khaw Pau leh Go Za Kham te in kawm a thuap nihna teng a ciah khit ciangin khen uh hi.

  

KAWLZANG AH THU KIGEN

1955 October kha ciangin UMP sungah Ngul Khaw Thang le Tial Cung, thulawp hi ci-in za uh a, Kalemyo ah a lawmta un, Kerosence Projector keng suk in, na zin uh hi. Kalemyo hausa a sem Kam Nang in, sabbath vai a zak ciangin lawp a, Tuiphum sangmang Johnson, Hau Go, leh a khutnuai siate Kham Khaw Kai leh Thuam Khan Do te Toungyi convention pai ding Kawlpi a taam tadihte sam in, "Ka ci uh dam thei lo hi. Thu hong nget sak un," ci-in a inn uah thunget la hi. Tua lai ah, kitalsik dingin Ngul Khaw Pau le Go Za Kham le Ngul Khaw Thang te zong sama, "sabbath thu lamdangsa ing, hong hilh tel beh le-u-cin ut ing," ci hi. Ngul Khaw Pau te zong nuam mahmah uh-a, Projector kengin nai 6 pan sermon kipan thei dingin vahawh uh hi. Ngul Khaw Pau mah in thugena, Chronology, Adam pan khangsutna, Dispensational of events and Doctrine a kawm tung ah leikang tawh gelh in, pawlpi tampi hong pianziazua theihna khawng teng leh Waldenseste tangthu khawng teng a sut laitakin, S.T. Hau Go te pawl hong tung hi. Sangmang Johnson in tua ni 29-1-1955 nitak dong Sunday pen sabbath mah sa lai hi. Hausapa Kam Nang in, a tel takin a sap tuaktuak na thu hong pulaak hi. Thu upna kibanglo nih pen kisel dinga hong sutuakna hi a, kinialna golpi tak nei uh hi. A tawpna ah Johnson in "We observed the Seventh-day of the week, because God created the heavens and the earth in 6 days, and rested on the seventh day for the memorial of His creation," hong cih mawk teh a lawmpa Hau Go in nopsa lo-a, kitaisan ta uh hi. 1956 March kha-in Tedim ah Khamtung buppi Baptist Convention hong nei uha, Hau Go in Canright ii SDA anialna teng Tedim pau in letkhia a, copy 6000 hawmkhia hi. Ngul Khaw Pau leh Phung Kai in, tua gensiatna laiteng a dawnna in "Koizaw" cih min vawh in laimai 96 apha khat copy 700 hong hawmkhia kik uh hi.

THING-U-NAU KONG KIHONG

Hi Kawlpi hausapa suktuah a, kinialna neih pen, minthang ahih manin Thing-u-nau hausapa Suangh Khaw Kam in, tua SDA sia Ngul Khaw Pau leh Go Za Kham te samin ama innlim ah, nipi kaal 3 sung thugen sak hi. A tawpna ah inn 12 te phiat in, mi 86 tuiphum ding ngah uh hi. Tua te lak ah, Hausapa Suangh Khaw Kam, Bo Vum Tual, Pu Thuam Kam, Pa Kim Ngo cihte a madawh teng kikhel ahih manin, a kikhel lote heh lua uh a, Limkhai pan ahong peem Kham Tuang in tempi khat tawh Go Za Kham leh Ngul Khaw Pau satlum dingin delh hi.

Midangte in na len uha sat manlo sam hi. Tua bangin Thing-u-nau ah pawlpi kiphut to-a, Khamtung buppi a pawlpi kip kiphutte lak ah, Tedim a khatna, Thing-u-nau anihna hi. Local Church Elder pen Tedim ah Phung Kai, Thing-u-nau ah Suangh Khaw Kam te ahi uh hi.

SIHZANG KUAM KONG KIHONG

1956 kum in Pastor Bawdee, Chin Hills Director dingin hong puaktoh ciangin, Ngul Khaw Pau pen Sihzang gamah nasem ding 1957 kumin hong kisuan hi. Khuasak khua ah, inn saapin gam thak hong phu hi. July kha 21 ni in tunga, thugenna nei pah hi. 1957 November 16 ni in tuiphuum masa pen ding teng R. H. Woolsey leh W. L. Murrill te tuiphuum na hong pia a, mi 12 pha hi. Tua te pen

1. Suangh Khaw Thang

2. Ngam Thawng

3. Vum Za Dal

4. Cing Za Vung

5. Khup Niang

6. Cing Khaw Lian

7. Ciang Khaw Man

8. Sing Khaw Ngin

9. Mang Hen Thang

10. Bo Thuam Cin

11. Kap Za Nang

12. Niang Kam

Tua te lakah Suang Khaw Thang pen Thing-u-nau a thu za khin, a kikhelsa ahi hi. Sihzang gam sung Limkhai, Voklak, Thuklai, Buanman, Lophei, Pumva te ah thugenna nei kawikawi in, thu-ummi kinei kawikawi hi. Mipil minthang masa Limkhai-Zongal ah Pu Mang Tual leh Suang Za Ngin te zong kingah hi. Khuasak khua ah kibulphuh masa a, Baptist sungah zong Khamtung buppi a gupkhiatna thu a na sang masa Pu Thuam Hang leh Pu Pau Suan te khua ahi hi. Amaute kituiphumna lui mah ah, SDA thu-um masate zong a kiphum hi napi, thupuakte a na bawl daan maan zo lo lua a, Topa teel tham cing mi beibei mai hi. Ahih hangin Topa in a teelsa Pu Pau Suan tu leh tate tungah, a piaksa thupha a gui kitat lo a, Topa in a zat ngei gui mah zang lai ahih manin Pau Suan-Suan Za Nang, tu in Pa pen ahi lai hi. Topa in thupha hong piak sak zom ta hen!

Tonzang gam ah SDA thu kizel

1962 May 21 ni in Ngul Khaw Pau leh a innkuan pihte vantungmi thum thupuak tangko dingin Tonzang khua ah lut uh hi. A innsaap na innlim uah, thugenna kipan hi. A pai ding lai un, alawmpa Go Za Kham in, "Tonzang ah nasem ding na hih leh, kum 3 sung in tuiphum ding mi khat nong ngah leh ka bawngtalpi in hong aih sak ning," ci-in khaam hi. Innlim beka thugenna pen picing zolo sa in, Kumpi Saangpi hall ah thugenna neih ding a va nget ciangin, lamdang sak huai zahin phalna na pia hi. A sangukpi pen a neu lawm ahi Pa Mang Za Lian ahi hi. Tua hun in Siapi Mang Za Lian pen zu leh sa tawh a kidiah lai milian khat hi. Sangpi hall zat theih nading phalna a ngah khit ciangin Ngul Khaw Pau zong nuam lua in, nitaak sial thugenna bawl pah ngelhngelh a, 1962 Oct-Dec in mi 12 tuiphum ding hong ngah hi. Tonzang pan tuiphuum ding teng jeep tawh pua in, Phaitu pan a ngahte tawh gawm in, (23-12-19062) ni in Phaitu khua ah mi 12 te tui va phuum hi. A tun’ kum khat zong cing nai lo hi na pi, mi 12 tui kiphum a, kum 3 sung mi 1 na ngah leh Bawngtalpi tawh a aih ding pen tu ni dong ki-ai nai lo hi.

TONZANG SANGPI – Khuavak hong taankhiat na

Tonzang pen tanglai phet panin ukpi khua hi a, pupa ngeina a kip pha diakna mun hi napi, Tan Sawm Saangpi zong a om masak na khua na hi leuleu hi. Khua tuamtuam panin in a tate uh pilna sin ding in nu leh pate in Tonzang ah hong koih uhhi. Sangpi hall ah thugenna teng siate leh sangnaupang te in hong za uh-a, sang khak ciangin a thutak zakte uh khua lam ah ciahpih ciat uh ahihmanin, tangkona phual hoih mahmah khat hong suak hi. Tua mun a thugenna ding phalna hong pia Siapi Mang Za Lian zong, a nung ciangin SDA hong suak a, ata te zong gamdangah thupha sangin, milian mihau, mi nuamsa leh Pasian thu sunga muan leh suan hong suak ta hi.

GUNGAL - ANLANGH, LEZANG,TUITHANG TE AH ,

Tonzang sangpi ah thugenna panin, Anlanghte sangnaupang Thang Khan Dal in thupuak pen a khua lamah a tangko dingin Ngul Khaw Pau in hong zawn hi. Gamlai-Anlangh- Lezang leh khua tampite ah abaanbaan in kitangko a, tu in Anlangh khua pen, Khamtung buppi ah pawlpimi tampen na mun suak ta hi. Lezang zong a khua bup dektak in SDA hi ta ding hi. Tui naak haksa lua zong Kenneth Suanzanang in ADRA a sep lai-in, gamlapi panin tuisiang limci a zawl in kaih sak a, a khuazang un, thupha tuisiang dawn ziahziah uh hi. Khamtung gam a la siam te leh pawlpi thahat sak sumpi piak a hat pen te pianna khua te hi.

Topa thumaan tangkona nunung pen a sang baihte ahampha hi a, a nial nilohte a hamsai hi mai hi. Topa in ahon pen a khakzo om lo a, a khak pen a hong zo om lo hi. (Mang 1:3; 3:7) Topa kong hong honsak mi ahampha hi.

GUNGAL-MUALKAWI, CIKHA DONG

Tonzang thugenna panmah in bawda sangnaupang Kham Za Hau leh Gin Lian Pau te in sangkhak ciangin a thu zak uh tangkona nunung, amau khua a tangko dingin Ngul Khaw Pau sam uh a, Mualkawi, Cikha, Tuimui, Mualpi, Senam, cihte ah thugenna nei kawikawi in pawlpi va phut kawikawi uh hi.

HAIMUAL, BUKPHIR, DARKHAI, BAPI

Bawdee, Ngul Khaw Pau, leh Lian Khup te in thugenna nei in pawlpi va phut kawikawi uh hi. Ahi zongin pawlpi mite kawl zang ah hong pemkhia suk zel uh ahih manin, pawlpi gol lua om thei lo hi. Ahi zongin Teci pang ding khop pen om veve hi.

NGENTE AH TUIPHUM

1969 kum Section Lai-atpi leh sumkempi ahi Ba Hla Thein hong zin to-a, Chin Hills Director sem Ngul Khaw Pau tawh Cikha dong kualzin in, a ciah lam un Hualngo tang dung nawk in ciah uh hi. Ngente khua a tun uh ciangin tuiphum ding 6 om a, tui haksa ahih manin luitawng ah tui cing tawm in, Ngul Khaw Pau in tuiphumna a piak laitakin, mual tung pan nakpi hong ki-awng a, "Ka zi Ks. 300 a ka lei hi, tua sum nong sian' ma teng uh ka zi tuiphuum thei lo ding hi uh teh," ci-in suangtum golpipi 3 hong khuk suk hi.

Sia Ba Hla Thein pen thuphumsia ngah nai lo, lai-at leh sumkem asep lai ahih manin, "sia aw, sum Ks. 300 deih ahih leh, pia mai ni," ci-in a sum ip dok khia keei hel hi. "Sia aw, a sum deih hi kei, a zi phum sak kei lel zaw ni," ci-in a zi phum nai lo uh a, tua teh suang tum khuk nawn lo hi. Tua ni in a zi phum nai lo hi napi, a zing sang khuavak pha nai lo a vai ding uh pen zui sim in, khuavak pha nai lopi mah in Ngente khua nawl bual tui sungah phumsak veve uh hi. Tua pan amau mai nawt in, tuiphum ngah nu zong ciah kik hi. Tua zawh kum 3 ciangin tua pa SDA hong suak a, SDA sung mahah si hi. Suangtum 5 bang khuk man leh kum 5 bang ngak ding ahi kha nam? Pasian Khasiangtho nasepna kua mahin dal zo lo hi. Hih tangkona pen, Pasian in leitung bei sak nuam ta a, gupna ngah nuam peuhpeuh in a saan theih nadingin mun khempeuh ah, a kitangko ding hi. Kua mahin dal zo lo ding hi.

KAPTEL, LUNMUAL, ZAMPI

Anderson mahmah in Kaptel leh Laitui khua te ah thugenna nei a mi pawlkhat ngah napi, amah a kihawl khiat ciangin lungkia in tawpkik zel uh hi. A sih donga a kip suak pen Laituite Zam Za Kham bek om hi. Zampi a Tuah Za Lian zong Ngul Khaw Pau in Tonzang a om lai mah a, a tuiphum hi. Amah pen, thu thei nautang pil khat hi-a, gam-uk lamah, circle chairman a sem ngei khat hi. A sih dong mahin SDA hi lai hi. Zampi khua adingin Kham Za Thang te amah te in mi masa ahi uh hi.

MUALBEEM, HEILEI, SUANGZANG

Hih gungal khua lui min neite ah, nasepna pen Everlasting Gospel Team te nasepna tam pen hi. 1983 kum in Ngul Khaw Pau pensen khit kum tampi ahi khin pen, pensen lo bangin a nasep ngei bang na sem toto lel a, Mission in zong muangin Kalemyo ah City Effort bawl dingin sawl hi. Sia Kai Khan Khual in huh sak uh hi. Tua lai ah a kigawm in tuiphum 48 ngah uh hi. Tua te lak ah Nu Cing Za Vung kihel hi. Nu Cing Za Vung a khua Heilei ah ciah to in muan huai tak in om a, a khua kim a khua paam in khuavak a muhna tham cingin SDA upna na len hi.

1968 kum in Mualbem ah Kip Za Nang in thugenna nei a, mi honpi khat ngah napi, tua te khempeuh beimang kik ahih manin numei hoih Cing Za Vung, Kawlpi pan a kituiphum nu in tua khua min nei 3 te ah SDA upna hong kithang sak kika, pisal khat bangin hi nupi hangin tha ngah a, Ngul Khaw Pau in Cassettee sunga effort sermonte a guan pen kawivak in mite zak in hong kawikawi hi. Ama hih theih zah tawh thugenna in zangh hi.

Tua lai takin Nu Cing Za Vung tapa Nang Khan Cin (Nangkuh) in asum a paite iksik lo-in, Pasian nasepna in zanga, Section zum pan a phalna la-in hih Everlasting Gospel Team hong phuan hi. Tumthei tuamtuamte, unifor akim, lasa siamte a pawl dingin sama, khasum pia in a kisam na mun khempeuh ah a sem dingin pai sak kawikawi hi. Mithak zong alom lom in tui hong kiphum hi. Mualbem, Heilei, Suangzang khuate bang deuh ah, hih EGT te nasepna hangin pawlpi kip, biakinn kip a nei uh hong suak hi.

Lay member khat vaihawmna tawh hi bang Pasian nasepna muibun pawl aphuankhia Nangkuh te innkuan Topa in thupha hong piak sak ta hen.

ADANGTAK MI HONG PAI IN DAWN HEN

Kha lam thu bekah, dangtak te tuipia hi lo-in, ci le sa na ngawn ah, ih pawlpi mi khat zong a om lohna mun ah Kenneth H Suanzanang in tuiduh te tui va pia hi. Bual khua, Taingen, Hiangzingte ah nidangin tui a kimuhlohna munah, khual zin mi khempeuh in a suk pai, a topai, kawlmi, zomi, vaimi, motor tung pan hong kum khia in, vantung Topa Pasian sep bangin kua mah deidan lo-in a duh peuhpeuh in tuisiang limci dawn ziahziah uh hi. Tua pen Kenneth Suanzanang in ADRA hong sep ciangin Topa thupha ih saanna hi. Mi khempeuh in thupha pia ta hen.

MATUPI, LUNGNGO, SEMPI, GANGAW

Lungngo khua mi Rawni galkap tum a, ni khat operation a paina uah, embuse tuak uh a, motor tungpan in tuak ciatin, amah pen motor nuai ah lut kha in, join sikzawl ah luai kha a, kipeipih in, amit abil poi hi. Pensen dingin Yangon ah 1958 kum a tham laitak in, E. C Beck in city Effort na bawl hi. A huh dingin E. Paul, Run Ro Thang, leh Ngul Khaw Pau kihel ahih manin, Rawni zong thu hong lawp cih a theih ciangin Ngul Khaw Pau in, biakinn zum khan ah nisialin Laisiangtho sinpih a, hong kikhel pen, tua thugenna pan a ngah midangte tawh tuiphum uh hi. Khua lamah a ciah ciang in tuiphum sa in ciah hi. Lungngo a tun ciangin a khua uha, village councillor Ruakung tawh Laisiangtho sinna nei uha, Ruakung zong hong kikhel hi. Tua panin Mua Tin, Thang Kawl te tawh pawlpi na phut kawikawi uh hi.

Southern Chin Hills ah ih pawlpi phuh masa pen Sempi khua hi a, Ngul Khaw Pau in Tedim ah Chin Hills Director a sep lai 1968 kum in vakual zin a Lungngo ah mi hon khat, sempi ah hon khat tuiphum a, Sempi ah pawlpi kip na phut hi. Elder masa pen Zakai ahi hi. Tua a kualzin tungtang in Matupi ah zong mi 2 tuiphum hi. Tu in hih gamte in zong Pastor tampi leh pawlpi tampi nei ta uh hi. Topa in thupha namkim na buak sak hen.

Hih Golden Jubilee in ih gam ah vantung thupha leitung thupha saanna hong suak sak hen la, hun bei ma-a guah nunung zukna, Topa in hong suak sak ta hen. Pawlpi in hangsan takin mainawt ta hen.

Haksapi a, Topa thupha tangkona nunung a neu a lian in ih tangkona kum 50 hong sawt ta-a, hih anuai a dinmun ah ih ding ta hi:

1. Pawlpi Mi pha zah……………………… 7000

2. Nasem sia vekpi………………………………… 184

3. Tuiphumsia …………………………………… 25

4. Pawlpi kipsa……………69 5. Company din …………………42

6. High School ………………………………….. 6

7. Middle School………………………………….. 12

8. Elementary School……………………………… 28

Source: lunmual blog, 2009.