LESSON 3 JAN. 9 – 15 TAANGLAI PU LE PATE LE MITE’ LANGPANNA
SABBATH NITAK: TU KAAL SUNG SIM DING: Pian. 4: 1 – 15; 3: 9, 10; 6: 1- 13; 22:; 28: 12 – 15; Late 51: 1.
KAMNGAH: “Nang mah tawh ka om a, na paipai-na ah hong cingin hih leitangah nang kong puak kik ding hi. Nang kong ciamsate ka hih khit mateng kong nusia kei
ding hi,” ci hi( Piancil 28: 15).
Mawhna a om a kipan Eden pan leimong dongah zuau thu le siatna kizel hi. Kain le Abelte’ unau gamtat zia le tong in biakpiakna siksanin sihna tu dong ciang mah om suak hi. Tuiciin a tun a kipan tuhun ciang dongin nate in Pasian a langpanzia kilang hi. Mawhna in nate melhemsak hi banah susia hi. Abraham tungtawnin Pasian in hotkhiatna lampi a hong honsakna, eite tangin Amahmah a hong kipia khia ahihna thu kilang hi. Jacob, Josephte’ innkuan tung panin Satan in khat le khat kizopna a suksiatzia kidawk hi. Hi mah taleh, Pasian’ citakna in bawlsiatna a thuak mite kemin cing tawntung hi, cih kilang hi.
SUNDAY JAN. 10
CAIN le ABEL
Pian. 4: 1- 5 sim in. Koi bangin mawhna a siatzia pulaak hiam?
____________________________________________________________________
____________________________________________________________________
Honpa kamciam a om mah bangin (Pian. 3: 15) Cain a suahin Honpa hi kha ding hi, ci-in Eve in lamen kha ding hi. “ Topa’ huhna in mi khat ka hingkhia hi” ci-in pulaak hi (Pian. 4: 1). Cain’ naupanna le a khangno hun thute a kiciapteh loh hangin Adam le Eve in nisim in Cain tungah lungdam den ding uh hi. Tapa khat nei kik uh a, a nihun biakna pia ciat uh hi. Ahi zongin tua biakna tungtawnin siatna tunpih hi.
Pian. 3:9, 10; 4: 9 sim in. Adam in Pasian a dawnkikzia le Cain in Pasian a dawnkikzia enkak in. A kibatna le a kilamdannate ciamteh in.
_____________________________________________
_____________________________________________
Kilamdanna: Adam lau hi. A maizum hi. Cihna ding thei lo hi (Pian. 3: 10). Cain heh hi. Langpang hi (Pian. 4:9). Adam’ dawn bangin ngawh khat nei hi leh phadawm vencin, Cain in thuman nial hi. Bang bangin khial uh hi taleh, lamet bei hi lo uh hi. Seth a suahin Eve in Honpa dingin lamen veve hi (Pian. 4: 25). Bang hang hiam cih leh amaute tungah kamciam kipia khin hi (Pian. 3: 15; 4: 25). Seth min khiatna le Pian. 3: 15 sunga kigen thute a deihna kibang hi. Eve in Abel tang dingin Honpa kipia hi, ci-in lamen hi. Siatna, sihnate lakah hotkhiatna om kinken hi. Tua lametna simloh lamet dang bang nei i hiam?
Adam le Eve in a ta sih a theih tak uh ciang bangzahin dah ding uh hiam? Mi dang khat ii khutkhialh khak hi leh a dahna uh phadawm lai vencin, tu’n a tate sup lawh! Mawhna a siatzia koi bangin na phawk thei hiam?
MONDAY JAN. 11
TUICIIN
Pian. 6: 1 – 13 sim in. Koi bangin tuhunin thuman le zuau kilangneihzia kidawk hiam?
___________________________________________________
___________________________________________________
Nate kipiansakcilin tui le leitang, tuisung ngasate cih bangin kikhen hi. Tuiciin a tunin tuate kigawm kik hi. Nate kipiansakma mah bang mah tuiciin tun hunin leitung in lim le meel nei lo-in kisiacip hi (Pian. 1:2). Tua bangin leitang khempeuh kisia taleh nate in Pasian’ hoihna pulaak uh hi. Pasian in a hoih lote lak pan a hoihte tuamkoih hi. Siatna tawh kidim khangmite lak pan a dik Noah tuam koih hi (Pian. 6:8, 9; 11 – 13). Pasian in tembaw lam dingin Noah sawl hi. Ganhingte a kipan Noahte innkuan tuiciin pan a suahtak nadingun, tua tembaw sungah om uh hi. Pasian’ hehpihna hangin tuiciin khit ciang nate thaksuak kik hi. Na khempeuh kibawlpha kik hi. Ahi zongin kicingkhin nai lo hi. Tuiciin tunkhit ciangin mihingte in siatna manawh kik uh hi. Noah in a zahmawh dawk lam phawk lo liangin om mawk hi (Pian. 9: 20 – 27). Topa’ mi siangthote’n zong kicinlohna nei uh hi (Heb. 11:7). A sia le a pha kido ngitnget hi-a, kuama phel theih hi lo hi.
Tuiciin in leitung hahsiang hi (Pian. 7: 4). Tembaw sunga omte losiah, nuntakna nei khempeuh beimangsak hi. Isaih in zong Honpa in siatna khempeuh hahsiang ding hi, ci-in genkhol khin hi (Isa. 25:8; 43: 25; Late 51: 1). I nuntakna maw, ahih kei leh i mawhna maw, koi zaw mangthang zaw ding, ngaihsut huai hi lo hiam?
TUESDAY JAN. 12 ABRAHAM
Abraham in Topa tungah citak hi, cih ding sangin Topa in Abraham tungah a thuman citak hi zaw hi. Topa in Abraham kiangah ‘tapa na nei ding hi, “ ci-in nih vei kamciam pia hi. Tua hunin Abraham in kum 75 bang pha hi (Pian. 12: 2, 4). Tua zawh kum 10 khit teh kamciam kipia kik leuleu hi (Pian. 13: 16). Topa’ kamciamte ngak zo lo-in Abraham in khial kha mah taleh, a hun a cin ciangin kamciam tapa nei takpi hi. Muanglahna tawh kidim Abraham tungah Topa in cihtak hi (Pian. 17: 19, 21; 21: 3 – 5).
Pian. 22: 1 – 19 sim in. Lametna bang hong kipia hiam?
____________________________________________
Abraham in a tapa biakpiak nadingin Pasian in ngeh hi. Hih in Abraham’ muanna sittel hi. Hih thu in Abraham’ lungdam nading hi zaw hi. Biakpiak nadingin a tapa pia khia ding cih a ngaihsut ciangin Abraham lungkham mahmah hi. Abraham in ama thuakna tungtawnin Pasian in mihingte a hong tatkhiatna ding Ama Tapa a hong piakna thu bangzahin lian cih phawk thei hi. Biakpiakna dingin a tapa pia ding cih thu sangin Abraham in lungkhamna lian zaw tuak ngei lo hi. Hingimna le sihna thuak dongin Pasian in a Tapa hong pia hi. Vantung mite in Abraham’ thuak gimna pan honkhia nuam uh hi. Ahi zongin kiphal lo hi. Tua bang mahin Pasian’ Tapa in a thuak gimna panin vantung mite in honkhia nuam uh hi napi kiphal lo hi. Isaac suahtak bangin a suakta sak ding vantung pan awging lo hi. Hih sangin Pasian’ hong itna hong lak ding bang om diam? A Tapa a hong piak dongin na khempeuh a khawnkhongin hong pia hi lo hiam? Rom 8: 32.
Abraham aa ding le a suan le khakte phattuam nadingin Pasian in Isaac ngen lo hi. Mawh nei lo vantung mite le leitung dang tuamtuam a om mawhnei lo khempeuh in zong Pasian’ nasepzia a muh nading uh ahi hi. Satan le Khrih kidona lianpi tungtawnin thuman a theihtel nading uh ahi hi.
Araham in Pasian’ thupha ngah dingin kilawm lo hi, Satan in mawhsak Abraham mawhsak hi. A tapa Isaac a piak dongin Pasian a zuih manin, tua sangin kicing zaw om lo hi, ci-in Pasian in pulaak hi. Ellen G. White, Patriarchs and Prophets, 154, 155.
WEDNESDAY JAN. 13 JACOB LE ESAU
Jacob in Isaac tung pan gamh khempeuh a ngah tak ciangin Esau in Jacob mudah hi. A pa sih khit ciang Jacob thah dingin ngaihsun hi (Pian. 27: 41). Rebekah in Jacob taikhia dingin sawl hi. Tawlkhat khit ciang Esau hehna kaam dingin lamen hi (Pian. 27: 43, 44). Rebekah ngaihsut bang lo-in kum 20 bang hong sawtto hi. Jacob in inn pan a paikhiat a kipan Rebekah in mukha nawn lo hi.
Pian. 28: 12 – 15 sim in. Jacob a ihmut sungin lametna bang kipia hiam?
_____________________________________________
Pasian in Abraham tungah a piak kamciam Jacob tungah pia kik hi. Jacob in Pasian tawh kigamla taleh, Pasian in amah om pih veve hi. A sunghpa’ khemna hangin kum 20 sung nasemin a zi le a neihsa khempeuh thalawh hi (Pian. 29: 20, 23, 25, 27;
31: 7). Jacob in kum 20 sung pen ni tawmno khatin ngaihsun hi (Pian. 29: 20). Jacob in innzuanin a ciahkhiat ciang Laban in nungdelh hi (Pian. 31: 25, 26). Esau in Jacob tawh kimu dingin galkap 400 tawh kuankhia hi. Hih thu nihte in Jacob lunggimsak mahmah hi. Tua bang lunggimna panin Pasian in honkhia hi. Laban’ maang tungtawnin Pasian kilaak hi. Pasian in Jacob tungah khut khial kei in, ci-in Laban tungah gen hi (Pian. 31: 24). Mihing cilesa pua-in Pasian in Jacob tungah kilang kikin Jacob tawh kilaii-in a khelguh sukha ahih manin Jacob baai hi (Pian. 32: 24 – 30). Esau in ciangkhut khunin hong pai Jacob a muh tak ciang, a ngaihsutna kikhelin lauhuai-in ngaihsut nawn lo hi. Maitang kimuhma-in letsongte puak masa-in, a sawltakte a mapaisakzia tungtawnin Esau le Jacob kilangneihna bei hi. Esau le Jacob in a pa si vuikhawm uh hi. Esau in ka pa sih khit ciang ka sanggampa that ning ci-in a ngaihsut ngeite, a pa sih nungah phawkin nei nawn lo hi.
Esau le Jacob tungtawnin deihteel khialhna hangin a thuak uh gimnate ngaihsun in. I gamtatma-in hoih tak ngaihsut ding kisam mahmah hi lo hiam?
THURSDAY JAN. 14
JOSEPH LE A SANGGAMTE
A sanggampa Esau tungah a bawlziate’ hangin Jacob in a thuak dinga kilawm tampi om hi. Joseph le a sanggamte zong tua bang mah hi (Pian. 37: 3, 4). Joseph kipia puantual in puantual mawkmawk hi lo hi. Kumpite’ silh puantual, hoih tak a kibawl, kum khat sung bang kiphan sitset hi. Tua bang puantual a ngah khit banah Joseph in a sanggamte kiangah a mang pulaak khia hi (Pian. 37: 5 – 11). Joseph tungah a sanggamte’ muhdahna lian semsem hi. A sanggamte in Joseph thah nading bekbek vaihawm pah uh hi (Pian. 37: 19, 20). Pasian in tua bangin a geelnate uh amau sihna ding panin suahtakna lampi suak thei hi, cih pen ngaihsun kha vet lo uh hi.
Pian. 45: 4 – 11 sim in. Joseph in a lian mahmah bang muhkholhna nei hiam? Bang mungtup nei hiam?
_____________________________________________
_____________________________________________
Kolbulh thuakin a muh ngei loh gamah a kipaipih manin Joseph’ lungsim ding ngaihsutsak in. Van kizuak bangin mi’ zuakna thuakin, mantam deuhsa-in a dekdek mite a muh ciangin, bangzahin a lungneu ding hiam? Tua bang gentheihna a thuak mi tampi in a upna uh taisan uh hi. Joseph in zong a upna nusia-in Pasian taisan dingin khensat leh a hi thei thu hi. Ahi zongin bangbang gentheih gimna a thuak hangin a upna taisan lo-in Pasian tungah citak mahmah hi. A sawt lo-in Egypt gam sung galkap u lian mahmah khat’ inn lianpi sungah hong om kha hi. Pasian’ ompihna hangin mite’ muanin om hi (Pian. 39: 1 – 4). A sawt lo-in sila pa pen Egypt gam’ makai khat suak hi.
Innkuan sung kilemlohna, ki-elna tawh kidim hi mah taleh, a sawt ciang ki-itna le nopna tawh nungta khawm kik thei uh hi. Joseph’ thuak bangin na thuak kha phial zongin koi bangin upna kip nei tawntung lecin nopna tawh kidim kik thei ding na hiam?
FRIDAY JAN. 15
SIMBEH DING: Siatna tawh kidim leitungah nungta ihih manin gimna tawh i nungta a, ei deih bangbangin nate piang lo hi. Adam le Eve in Cain in a sanggam pa Abel that ding hi, ci-in ngaihsun kha het lo ding uh hi. Zipporah in Moses tawh a kitenin a pasal tawh a thuak ding uh gimnate ngaihsun kha het lo ding hi. Leah in zong a nungak lai-in pasal a neih ciang a tuah ding thute ngaihsun khol thei lo ding hi. Tangval Jeremiah in a mipihte' langpanna thuakin bawlsiatna a thuak ding lam ngaihsun kha ngei lo ding hi.
David in zong Bathsheba tawh a thuak uh gimnate thei khol hi leh, tua bangin a gamta uh diam? Jesuh ee leh! Thei kholpi mah, a nunna pia dingin leitungah mihingin hong piang hi. A mihing hihna tawh Jesuh in a Pa kiangah, "ahih theih leh, ka thuak ding gimna tawh hong kipelhsak in" ci-in thungen hi (Matt. 26: 39). Satna, zahko-na, kum 33 a phak teh singlamteh tungah kithahna thuak ding cih bel lamet lo ding hi. Leitungah siatna namcin kituak kha thei hi. I thuah leh, lamdang i sak ding hi lo hi. Hi mah lo maw? A kisia leitung panin bang lamet nei i hiam? Tawntung gam simloh! Eden huan nopna kitaan khin hi. Ahi zongin tua nopna i ngah kik ding hi. Tua i ngah kik ma le tu hun kikal a sawt hangin, vantung nopna i ngah veve ding hi.
KIKUP DING DOTNATE:
1. Innkuan, sanggam u le nau sungah upna nei le upna nei lo amaute' kilamdanna bang na mu hiam?
2. Pasian in innkuan nunzia ding hong geelkholsak a, tuate sangin ha- zatna, ki-ennate in innkuan sung a uk zawk manin, koi bangin lametna tawh nungta thei ding na hiam? Pasian' deihna bangin a nungta innkuan ahi thei dingin amaute bangci huh ding na hiam?
3. Na pawlpi sungah nuntakna in man nei kei, ci-in a ngaihsun a om leh, koi bangin tua bang a cimawh mi huh thei ding na hiam?
