LESSON 1 *December 28–January 3
Pasian Hong Itna In Hong Khahkhia
SABBATH
NITAAK
Tu Kaalsung Simding: Pai. 33:15–22; Hosea 14:1–4; Mang.
4:11; John 17:24; Matt. 22:1–14; John 10:17, 18.
Kamngah: “Amaute tungah heh nawnlo ka hih manin, A nungtolh na uh pan ka samkik ding a, it tawp lo-in ka it ding hi.” (Hosea 14:4, ZSV)
Zeisuh genkholh bangin Peter in Zeisu
thum vei a nial hi; ahi zongin (Matt. 26:34), tua nialna tawh khawl
lo-in Peter kisikin Zeisu a itkik thei veve hi. Sihna panin a thawhkik khit
ciangin Zeisu in “Hihte sangin kei nong it zaw hiam? ci-in Peter a dot ciangin
Peter in “Topa aw, kong it lam na thei hi” ci-in a dawngkik hi. Tua ciangin
Zeisu in “Ka Tuute na vak in” ci hi. Zeisu in Peter “Nong it hiam? ci-in
dongkik leuleu a, Peter in “Topa aw, nang kong itlam na thei hi” ci-in a
dawngkik hi. Tua ciangin Zeisu in “Ka Tuute na cing in” ci-in a sawl hi. Tua
ciangin a thumvei-na Zeisu in “Nong it hiam? ci-in Peter adot leuleu ciangin
Peter dah hi. Peter in dawngkik a, “Topa aw, nang in na khempeuh na thei
hi.Kong it zong na thei hi” a cih tak ciangin Zeisu in Peter tungah “Ka tuute
na vak in” ci-in a sawl hi” (John 21:15–17). Peter in a Topa thum vei a
nial bangmahin Zeisu in zong a thupi mahmah dotna thum vei nei hi.
“Kei nong it hiam?” ci-in Zeisu in
Peter thum vei a dong hi. Tuhun i dinmun le Peter hunlai kibang lo hi mah taleh
Zeisu in Peter a dotna thu zungpi in eite tungah zong dotna mah hi.
Zeisu in Peter a dotna a tawpkhakna-ah
Pasian in tuni dongin eite tungah “Nong it hiam? ci-in hong dongdonglai hi, cih
i phawk ding kisam hi. I dawnkikna in na khempeuh hong huzaap hi.
*January 4, Sabbath a ding kiginkholhna in tukaal lesson
sim in.
SUNDAY December 29
Ei’ Lametna Sangin A Zaizaw
“Kei nong it hiam?” cih dotna in Pasian
in eite bek hong dong hilo hi. Pasian in mimal khat ciat hong it hi. Ama itna
in hong khahkhia hi. A taktakin Zeisu in nang le kei hong itna in ciangtan nei
lo, mihingte ngaihsutna sangin a lian zaw, a thuk zaw itna hi. Tua itna in
khang tawntungin A mite tungah kilang hi.
Simin, Paikhiatna 33:15–22. Hih thute hong
piankhiatna thu’nung thu’ma in bang thu hiam? A neu 19 in Pasian hong itna le
Ama deihna bang pulaak hiam?
Na khempeuh in a mangthang ding tawh
kibang hi.Pasian in Israel mite a saltanna uh Eygpt gam panin a hotkhiat khit a
sawt lo-in Israel mite in a Honpa uh Topa Pasian a langpan uh hi. Topa
langpanin kham tawh bawng lim khat bawlin a bia uh hi. Moses in mual tung panin
a tuahsuk ciangin a mipihte gamtatna khempeuh amu hi. Hehna tawh kidim ahih
manin a khut a a tawi Thukham Suangpek lei-ah denna-in tua suangpek nen mang
hi. Pasian mite in Pasian in a mite tawh a bawl thuciam mangkhinin tua
thuciamna hangin a ngah uh thuphate a mangngilh khin uh hi. Israel mite in
bangzahin siatna tawh kidim uh hi mah taleh Topa Pasian in amaute nusia lo-in a
mite tawh kizopna a nei veve hi.
Paikhiatna 33:19 in, “Ka hehpihnop mite
ka hehpih ding a, lainat na ka piaknop mite lainatna ka pia ding hi” cih thute
a thei khial uh hi. Pasian in a hehpih nop mite tungah hehpihna nei-in midangte
tungah tua bang lainatna, hehpihna a piak nop keileh zong Ama ukna kuamah in
nial theilo; mawhsak theilo hi. Pasian in mi kim’khat mudahin mi kim’khat it
tuam nei hi, cihna hilo hi. Pasian in hotkhiatna a ngah ding mi kim’khat
sehkhol a, mi kim’khat ahihleh a mangthang dingin tuamkoihlo hi. Tua bangin
Pasian in tuamkoih hileh hotkhiat lungdam na thu koi-ah om hiam?
Hiteng ah Pasian in bang a cinuam hiam?
Pasian in na khempeuh Piangsakpa hi a, a kilawm lo pen khat mah zong thupha
piaktheihna thu nei ahihna pulakna ahi hi. Tuamah bangin, bawngno’ lim a biak
khit nangawn in zong kilawm hetlo pimah ahi Israel mite hehpih teitei lai hi.
Hipen eite’ lam-et zah khengval in Ama’ itna Pasian in hong lahna tampi lakah
khat ahi hi.
Koi bangin Pasian hong itna hong
kilangh hiam? Na lametna sangin a lianzaw-in itna ngah hilo na hiam?
MONDAY December 30
Thuhkik Ding Lamenlo Itna
Pasian in mawhnei mite hong itna thu
Hosea nunzia tungtawn in kilang hi. Topa in Hosea tungah “Pai inla numei kizuak
khat zi dingin la in. Amah tawh ta nei in. Banghang hiam cihleh gam sung siatna
in Topa kiang panin hong khenkhia hi” (Hos. 1:2). Hosea le a citaklo a
zi tawh a nunzia in Pasian in a mite hong itna hong hilh hi. Israel mite in
siatna namcin tawh kidim in milim biakna tawh nungta uh hi mah taleh Topa
Pasian in amaute nusialo-in it veve ahihna kimu thei hi. Ama itna ngah dingin
kilawm lo hi mah taleng a hong it veve hi.
A taktakin mihing in Pasian cihtakna le
hong itna i nial tawntung hi. Tua hang mahin Lai Siangtho in Pasian in mawhnei
mite a hong itzia, a citaklo nupa tawh gentehin hong hilh hi. Topa in a mite
mawhna tawh kidim hi mah taleh a hong it veve hi. Nam dangte pasian tuamtuamte
bia uh a, Amah a dahsak uh hi. Mihingte muhna-ah a kibawlpha zo nawn lo ding
dinmun kitung hi.
Simin, Hosea 14:1–4. Hihte in a mite tungah
Pasian itna bang kipulaak hiam?
A mite in a langpan khit uh ciangin,
Pasian in “Note nungtolhna kong damsakkik ding hi. Keimah in amaute suahtakna
tawh ka it ding hi.” “Suakta takin” cihthu in “Amaute ka itna ka pia ding hi”
cihna hi-in, Hebrew lai-in “nedabah” kizangh a, piaknop lungsim tawh
“piak khiatna” cihna hi. Biakbuk ah biakpiakna a paipih uh ciangin piaknop na
lungsim tawh piak ding hi, cih a pulaakna-ah akizang kammal hi.
Hosea’ laibu sunga kihona sungah,
Pasian in a mite tungah a kipiakna le veiina lamdang lak hi. Amaute in
lawmngaih dang neihsan zel in kizopna sutat in puahphat theih ding bang zong
ahih nawnlo in thuciam palsat hitaleh; Pasian in Ama’ deihsak itna mah tawh it
tentan lai hi. Mite in Pasian’ itna tawh kilawm loliang dingin, amau’ gam teng
nusia in nial uhhi. Tua pipi mah in Pasian in ngawh bawl hetlo in itna luan
tawntung hi. Hihteng bek hilo mun tuamtuam ah zong Pasian hong itna pen
manngenlo le lungsim takpi tawh itna hong luan ci hi.
Mi tampite ngaihsutna-ah Pasian pen a
gilo, mawhmai sak nuam lo, hehna tawh a kidim bangin gen uh hi. Koi bangin
Pasian in dahna tawh kidim ahihlam bang limciinna in pulaak hiam? Koi bangin
Pasian tawh na kizopzia kikhel thei ding hiam?
TUESDAY December 31
Man Ngenlo-in Hong Kipia Itna
Pasian in, Amah langpanin nungta himah
taleng, hong itna in i sep na khempeuh ah hong zui den hi. Mi mawh ihih manin a
thuphate hong pialo-in om tuanlo hi. Tatsatlo-in a thuphate hongpia veve hi. I
mawh, i siatna laitak nangawn in a hong it veve hi. Ama maipha ngah nading
hoihna bangmah i nei kei hi. I thalawh theih zong hilo hi. Pasian in eite
hoihna kisam peuhmah lo hi. Lai Siangtho honghilh Pasian in mihingte hoihna
kitangsam hilo hi (Sawl. 17:25). Pasian hong itna in mihing khempeuh aa
dingin hong kipia itna hi.
Simin, Mang. 4:11 le Late 33:6. Piansakna le
phal takin hong kipia Pasian itna bang kipulaak hiam?
Pasian in man ngenlo in leitung bawl
hi. Tua hi-in Amah bek mah biak thamcing, pahtawi taakcing, vangliatna khempeuh
a nei dingin a kilawm hi. A dang leitung khat bawlkik ding kisamlo hi. Hih
leitung a bawlma-in Thumgawm Pasian tawh kizopna siangtho, kipumkhatna le
nuamna tawh kidimin a om uh hi.
Simin, John 17:24. Leitung pianma Pasian hong
itna bang kipulaak hiam?
Pasian in a it ding khat a piansak
hamtang ding kisamlo hi. Ahi zongin Ama in itna ahih manin pian’sak na khempeuh
tawh kizopna nei hi. Sawlna tawh nate a piangsak hilo bek thamlo-in itna mah
tawh tuni ciangin hong kem tawntung Pasian hi.
Leitung ah mawhna hong piang in Amah
langpan’na lakah Pasian in a itna honglak veve hi. Eden huan sungah mihing in
mawhna hang in gimna thuak khit ciangin zong mawhnei mite hong it veve lai hi.
Mawhna sung a tun khit uh ciangin Adam
le Eve in nungta dingin kilawm nawnlo uh himah taleh tatsatlo-in Pasian itna
sang khalai veve uh hi. Ahi zongin Pasian in, “Ama vangliatna tawh na khempeuh
kipsak hi” (Heb. 1:3), a lian mahmah hong itna le hong hehpihna,
lainatnate hangin nuntakna nei-in a nungta thei ihi bek hi. Amah tawh kizopkik
theih nading lampi itna tawh hong bawlsak khin hi. Tua sungah nang le kei zong
a kihel thei ihi hi.
Bangbangin siatnate lakah bang thu
hangin tatsat lo-in Pasian hong itna hong pia-in, Ama itna le a zia le tong
bang kimu thei hiam? Koi bangin hih thuman in Topa hong itsakkik hiam?
WEDNESDAY January 1
A Sapmi Tam, A Teelmi Tawm
Pasian in deihtel theihna hong guan a,
zawhthawh thu tawh Amah it dingin hongsawl lo hi. I lungsim khensatna tawh Amah
a it kik ding hong deih hi. Topa hong itna thu Khazih in mopawi thugentehna
(mundang ah zong om) tawh hong hilh hi.
Simin, Matthai 22:1–14. Hih thu gentehna a
khiatna bang hiam?
Mopawi thugentehna-ah kumpipa in a
nasemte sawlkhia-in pawi siim ding mi samsak hi. Ahizongin sapna ngah mite in
mopawi siim nuamlo uh hi (Matt. 22:2, 3). Kumpipa in mopawi siimding mi
sam dingin a nasemte sawl phapha kik hi. Kumpipa’ sapna thudonlo bek thamlo-in
kumpipa’ nasemte bawlsia in a that uh hi (Matt. 22:4–6).
Kumpipa in a nasemte sawlkhia kik a,
“Mopawi siim ding mi va sam un. Mopawi siim ding a kilawmlo mite zong va sam
un” ci-in thupia hi. Tua ahih ciangin lamlian lamdung mun tuamtuam panin na muh
bangbang mi vasam un” a ci hi (Matt. 22:8, 9). Tua mopawi kibawlna innpi
sungah mopawi silhlo in hong pai mi khat in mopawi puan silhlo ahihmanin
kihawlkhia hi. Mopawi siim mi khempeuh in mopawi bawl innteekpa tung pan mopawi
puan ngen in mopawi sung ah kihel hi. Hih mopawi tawh kisai a thu khupna ah
Zeisu in, “a sapmi tam, a teelmi tawm” ci-in a thugen a khup hi (Matt. 22:14).
Tua thu in bang khiatna nei hiam?
“Teltuam ngah mite” kuate hiam? Mopawi sapna a sang mi khempeuh ‘teltuam” ngah
hipah uh hi. “Sapna ngah” cihthu in Greek tawh “kaleo” cih kammal zangh
in, “sapna ngah” cihna hi. A tawpkhakna-ah sapna a sang mi khempeuh “ teltuam
ngah” “ sapkhiat ngah” (eklektos) cihna hi. A taktakin Pasian in mopawi
siim dingin mi khempeuh hong sam hi.
Ahi zongin tua sapna a nial nuam peuh
in a nial thei hi. Itna thu-ah suahtakna in a thu guipi khat hi. Pasian in
kuamah tungah thagum hatna, zawhthawh thu tawh Amah it dingin hong sawl lo hi.
Pasian sapna nialna in a dahhuai thu khat hong suak hi. Amah tawh kizopna-ah a
kitangsam om cihna hi.
“Teltuam” ngah mite in sapna ngah mite
ahi uh hi. Pasian a it mi in mihingte ngaihsut zawh loh thu a ngah ding uh hi.
Itna le suahtakna in itna thu-ah a thu guipi hi.
Na nunzia in mopawi siim dingin sapna
ngah na hihna le mopawi puan a silh khin na hihna na nuntakna in a lak hiam?
THURSDAY January 2
Eite’ a Dingin Kikhai
Pasian in a itna sungah kikhawl dingin
mi kim hongsam hi. Tua mopawi siim dingin amau khensatna tawh hongpai uh ahi
hi. Mite in tawntung mopawi sung a lut ding hi. Mopawi thu gentehna sungah,
kumpipa sapmi tampi om hinapi “hongpai nuamlo uhhi” (Matt. 22:3).
Khazih in a kikhai madeuh in a kah
kammal sungah “Jerusalem, Jerusalem aw, kamsangte na that a, Pasian’ sawl
kamtaite na denglum hi. Akpi in a kha tawh a note a huai mah bangin na mite ka
huainuam tawntung a, ahi zongin na ut kei hi” (Matt. 23:37) cihi. Khazih
in huainuam mahmah napi, utlo uhhi. Tua “ut” cihzong Greek kammal thelo hi
a, Khazih in a hotkhiat nopna le amau hotkhiat ding a ut loh na uh munnih ah
kizang khawm hi (Matt. 22:3 ah zong kizang lai hi).
Hinapi, Khazih in tua mite a ding mahin
singlamteh ah pai hi. A lamdang itna hi! Mihing’ mawhna in sihna bek thalawh
hinapi, Pasian in Khazih tungtawn in manh hongpiak sak a, vantung le leitung
kikaal a kisiasa kizopna zong puahphat nading lampi hong honsak hi. Tuabang
pipi mah in eite hong it teitei a, ei’ tungah bangmah hong baalo napi Ama’
lungsim sungtawng panin hong piang tawm ahi hi.
Simin, John 10:17, 18. Galati 2:20 tawh enkak
in. Eite ading bang thupuak om hiam?
A tawpna-ah Pasian hong itna hong
kilang hi. Singlamteh in tua itna honglak hi. Khazih in Amah mah phal takin
hong kipia hi. Kua mah in Ama nunna a lakhia thei kei hi. Hih itna in leitung
pian ma pekin mawhnei mite hong kihotkhiat ding geelsa-in kikoih khin hi.
Mawhna hong om ciangin hotkhiat ding kigeel tawm pan hilo hi.
Adam in mawhna sung hong tun ciangin a
kigeel tawm hilo hi. Lamdang takin a kikemcing hi-in, thusimin a kikoih hi (Rome
16:25). Tangtawng pekpanin geelkholhsa-in a kikoih hotkhiatna thu in Pasian
tokhom panin hongpai thubulpi ahi hi. A kipatcil pan in Pasian le Khazih in,
Satan in Pasian ukna langpang ding hi, cih theikhol uh hi; mihingte in mawhna
sung a tun’ding mukhol uh hi; thuman langpan na om ding ahihna thu zong a
mukhol uh a, ahi zongin mawhna om dingin geel lo hi. Mawhna hong pian’khiat
ding mukhol hibek a, mawhna hong om takpi le mawhna beisiang nading lampi a
geelkhol hizaw hi. Mawhna hong pian’khak zenzenleh mawhna sungpan suah tak
nadingin a it a Tapa in hotkhiatna pia dingin thuciam a koih khin hi. “Tapa a
um mi khempeuh in kisialo-in tawn tung nunna a ngah ding uh hi. John 3:16”—Ellen
G. White, The Desire of Ages, p. 22.
FRIDAY January 3
Ngaihsutbeh Ding: Ellen G. White lai Christ’s Object
Lessons laimai 405–421, “To Meet the Bridegroom” simin..
“Pasian muhkhialhna khuamial in leitung
tuamcip hi.Mihingte in Pasian zia le tong theihtelna a nei kei uh hi. Ama zia
le tong a man bangin theihna a nei kei uh hi. Tulai thuman in Pasian theihtelna
hong guan hi; Ama zia le tong man takin hong hilh hi.Hih thu in hotkhiatna hong
tunpih ding hi. Nunzia huzaapna lianpi nei-in nunzia hong kikhelsak thei hi.
Topa zia le tong a kilangsak dingte ihi hi. Mawhna khuamial sungah Pasian zia
le tong a kilangsak ding ihi hi; Ama hong hehpihna, hoihna le a thuman thute a tangko
ding ihi hi.
“Hihthu pen kamsang Isaiah in eite
nasep ding cih a gualhna sungah, ‘Jerusalem aw, mualsang dawn ah kahto in
lungdamna thu kiko in. Zion aw nakpi takin awng inla, lungdamna thu tangko in.
Nakpi takin kiko inla lau kei in. Judah gam khuapite tungah, ‘Na Pasian uh hong
paita hi’ ci in genta un” Isaiah 40:9, 10.
“Mopipa hong pai ding ngakin a om mi
khempeuhte tungah “Na Topa hong pai hi” cih thu in lametna a guan hi. Amaute
tungah hehpihna khuavak a taang hi. A nunung bel leitung miten a zak ding uh
thu in hehpihna thu hi; Pasian zia le tong, a thuman le a itna a tangko ding
ihi hi. Amaute gamtat luheekna khempeuh in amaute aa dingin Pasian sepna
khempeuh a pulaak ding uh hi. Dikna Nitang in gamtat zia le tong hoih
tungtawnin hong kilang khia ding hi; thumman thutak le siantho-na a kilangsak
hi.” —Ellen G. White, Christ’s Object Lessons, pp. 415, 416.
Kikupding Dotnate:
Pasian om lo hi, cih ngaihsutna sangin Pasian in hong mudah
hi, cih thu in siahuai zaw tham hi. Pasian in hong mudah takpi hileh koi bangin
i nunzia kilamdang ding hiam?
Banghangin tu-in Pasian zialetong muhkhialhna tam semsem hi
ding hiam? Koi bangin Pasian zia le tong mu thei ding i hiam?
Tu-in Pasian zialetong bang i pulaak ding hiam? Pasian hong
itna a thei nai lo mi khat tungah koi bangin tua itna pulaak thei ding na hiam?
Topa hong itna le a lamdang Ama zia le tong bang siksanin na pulaak ding hiam?
Pasian hong itna pulaakna le midangte tungah tua itna
pulaakna kibang lo hi. A siangtho zia le tong bang in Pasian hong itna na
kilangsak ding hiam?
