LESSON 2 January 4—10
Thuciam Tawh Kipawl Itna
SABBATH
NITAAK
Tu Kaalsung Simding: 2Pet. 3:9; Thlkna. 7:6–9; Rom. 11:22; 1
John 4:7–20; John 15:12; 1 John 3:16..
Kamngah: Zeisu in dawng kik in, “Mi khatpeuh in kei a hong it le ka thu a zui ding hi. Ka Pa in amah it in ama kiangah ka pai ding uh a, amah tawh ka teengkhawm ding uh hi” (John 14:23, ZSV).
Greek laimal “Agape” cih in
Pasian hong itna pulaak kammal hi. Amah bekin hih itna a nei hi. Tualo a
dangdang “it” cih kammalte in “phileo” hi in agape sangin pengzaw
hi. Pawl khat in “phileo” in “agape” tawh kibang in ngaihsun uh
hi. “Agape” itna in a piakhia itna hi-in ngahkikna bangmah omlo itna hi.
Amasa-in Greek laimal “Agape”
cih in Pasian hong itna bek a huam hilo-in, mihingte khat le khat ki-itna zong
a pulaak kammal ahi hi. Khat veivei ciangin mihing kiangpan hongpai itna ci-in
kipulaak hi (2 Tim. 4:10). Nihna-ah Lai Siangtho buppi in agape kammal
simloh Pasian hong itna a pulaak kammal dang zong kimu thei hi. Gentehna-in
Zeisu in “Pa mahmah in note hong it hi (Phileo). Banghang hiam cihleh
note in kei nong it (Phileo) masa uh hi (John 16:27). Hih mun ah
“Phileo” cih kammal in khat le khat ki-itna bekthamlo-in Pasian hong
itna zong a pulaak kammal in kizang hi.
Lai Siangtho hong hilhna-ah Pasian hong
itna in “lang khat bek itna” hilo hi, a it kik itna zong kihel hi, cih kimu
thei hi. Cihnopna-ah, Pasian in hong it ahih manin Amah i it kik ding hi.
* January 11, Sabbath a ding kiginkholhna in tukaal lesson
sim in.
SUNDAY January 5
A Kip Tawntung Pasian Hong Itna
Lai Siangtho honghilhna kician hi.
Pasian in mi malkim hong it hi. A kitheikim pen Lai Siangtho mun in John 3:16
hi. Hihin “Pasian in a Tapa neihsun a piak dongin leitung hong it a, A Tapa a
ummi peuhmah kisialo in tawntung nuntakna ngah thei ding uhhi” cihi.
Simin, Late 33:5 le Late 145:9. Hihte in koi
bangin Pasian hong itna, lainatna, le hehpihna pulaak uh hiam?
Mi kimkhatte ngaihsutna-ah mihing hong
it ding kuamah omlo hi, Pasian in it nei-in, it loh mi zong om hi, ci uh hi.
Lai Siangtho in mi khempeuh tungah Pasian in a kibangin hong it kim
cihi. Pasian itna a ngahkhalo mihing kuamah omlo hi. Bang hang hiam cihleh
Pasian in mi khempeuh hong it in hong honkhia nuam hi.
Simin, 2Peter 3:9; 1Tim. 2:4, le Ezekiel
33:11. Hihte in mimal khempeuh Pasian in hong itna thu pulaaak hi lo hiam?
John 3:16 in leitung mite a hong itna a
pulaak khit ciangin “Pasian in leitung mawhsak dingin a Tapa hong paisak hilo
hi. Ahi zongin Tapa tungtawn in hotkhiatna i ngah nadingin Tapa hongpai hi” ci
hi (John 3:17). Pasian hong itna bek in hong hotkhiatna ahih manin Ama
itna sangin hotkhiatna i ngah nading ahi hi. Ahi zongin Pasian in thagum hatna
tawh hong kailo hi.
Mi kimkhat in Pasian itna a nial uh
hangin Pasian in amaute a it veve hi. Amaute nialna hangin Pasian in amaute it
nawn lo cih bang hi lo hi. Jeremiah 31:3 sungah Topa in a mite a hong itna thu
hong hilh hi. Keimah in tawntung itna in kong it a, a migi itna in nang hong
kai zo hi.” Lai Siangtho mun dang khatah hih itna thu mah hong hilhna-ah Pasian
hong itna in kip tawntung hi. A bei thei lo itna hi, ci-in i thei hi (Late
136). A kip denden itna hi.Hih itna i thei zo kei hi. Banghang hiam cihleh
midangte tungah itna i nei kei hi.
Ahi zongin Pasian hong itna i theihtel
nadingin midangte tungah itna nei hi lehang, Pasian hong itna zong i theithei
ding a, Amah itna zong i nei thei ding hi.
Pasian in mimalkim hong it ahihleh, a
huathuai gamta mi tampite zong itding hi. Hibang mite zong Pasian in it ahihleh
eite’n zong amaute koici bangin kizoppih thei ding ihi hiam?
MONDAY January 6
Thuciam Tawh Kipawl Itna
Lai Siangtho in Pasian hong itna pen
innkuan sung ki-itna, sanggam unau ki-itnate tawh honghilh hi. Adiak diakin zi
le pasal kikaal ki-itna tawh honghilh hi. Nute’n tate a itna tawh zong genteh
hi. Pasian itna i gen ciangin Pasian le a mite kikal a thuciam, a tuam vilvel a
kizopna a pulaak ihi hi. Hih bangin kizopna tawh kipawl itna in Pasian in a
mite hong itna bek pulaak hi lo-in, amite in zong Amah i itkik ding lametna
zong kihel hi, cih i phawk ding kisam hi.
Simin, Thuhilhkikna 7:6–9. Hih in Pasian
thuciamte le Pasian hong itna kizopna thu bang hong hilh hiam?
Thuhilhkikna 7:9 in thuciam ngah a mite
tawh kizopna-ah amaute cihtakna le cihtaklohna siksanin Pasian in amaute tawh
kizopna nei cih kimu thei hi. Pasian itna in ciangtan neilo hi. A thuciam in
ahihleh tua bang hilo-in Amah tawh kizopna tungah kinga-in kizopna hi.
Thuhilhkikna 7:9 ah “Hehpih itna”
“lainatna” cih kammal in “hesed” hi-in, a khiatna in thuciam tungah
kinga Pasian hong itna sangin a thukzaw itna apulaak kammal hi. “Ḥesed” kammal in Pasian hehpihna, hoihna le
itna lian a pulaak kammalin kizang hi. “Hesed” kammal in “hehpihna”
“lainat itna” a pulaak hi. Khat le khat kizopna-ah a kisam vive hi, cih kimu
thei hi. Midangte tung panin bangmah lametna nei lo-in itna tawh kizopna hi.
Pasian itna in kip tawntung hi. Ama
lainat itna in muanhuai in, ciampel ngeilo hi. Tua bang mahin “hesed” hangin
thupha ngah theih na pen i lungsim kongkhak honding le Khazih i sanna siksanin
hong kipia thuphate ahi hi. Ama deih bangin nuntak nopna lungsim nei-a i
nuntakna khempeuh i kipum ap ciang bekin tua thuphate hong pia thei hipan hi;
Amah tawh a tawntungin kizopna nei ding hong deih hi (2Sam. 22:26, 1Kumpi
8:23, Late 25:10; 32:10, 2Khang. 6:14).
Pasian itna in kizopna khempeuh a
kipatna hi. Tua itna mihing in i nei kei hi. Pasian in kuama ukna nuai-ah om lo
ahih bang mahin hong itna zong kuama sawl hilo hi; tua itna in Khazih sungah
hong kipia hi. “A lawmte aa dingin a kipiakhia itna sangin a lianzaw itna omlo
hi” (John 15:13). Pasian hong itna lian in a nuntakna hongpiak dongin
Topa mahmah hong kiniamsakin mihing in hong nuntakna in tua itna a kilangh sak
ahihna nial theih hilo hi” (Phil. 2:8).
Bang thute in na sungah Pasian itna
hong phawksak hiam? Bang hangin tua itna phawk tawntung ding kisam hiam?
TUESDAY January 7
A Hunzui-a Kizopna
Pasian in mi khatciat tawh kiptakin
kizopna a nei dingin hongsam hi (Matt. 22:1–14). Thakhatin tua sapna a
dawng mi in Pasian thupiak te bangin a nungta hi; tua in Pasian a itna le
midangte tungah zong itna nei cih kilangh hi (Matt. 22:37–39). Pasian
tawh kizopna-ah nuam a sa mi in vantung thupha a ngah mi ahi hi. Tua bangin
Pasian sawlna a nial nuam mi in zong ama khensatna zui-in a nial thei hi.
Simin, Hosea 9:15; Jeremiah 16:5; Rom. 11:22
le Jude 21. Hihte in Pasian hong itna a nial mite ahih keileh a awlmawh lo mite
ngah ding bang kipulaak hiam?
Lai Siangtho sungah itna siksanin
Pasian tawh kizopna a nei mi ngah thuphate kipulaak hi. Tua bangin thupha a
ngah theihna in Pasian tungah itna nei dingin a khensatna gah suak hi. Pasian
itna anei lo mi tungah Pasian in zong a itna nusia hi, cih hi tuanlo hi. I
pulaaksa om bangin Pasian hong itna in a tawntungin a kip itna hi. Hosea 9:15
sungah Pasian in a mite tungah “Note kong it nawn kei ding hi,” ci-in a
kipulaak hangin Hosea bu tawpna lamah Topa in a mite tungah itna kip nei veve
ahihna kimu thei hi (Hos. 14:4). Hosea 9:15 gen thu in Pasian in a mite
tungah itna nei nawnlo hi, cihna hilo hi. Topa tungah cihtakna gah in vantung
thuphate ngahna suak hi.
Aman’ hong it ahih manin Amah i itkik
ding, itna i thuhkik ding le tua bangin itna siksanin kizopna a nei tawntung
dingin hong deih hi “Ka thukham a nuntakpih mi in Kei hong it hi-in, ka Pa in
zong amah a it ding hi. Kei hong it mite tungah ka vangliatna ka pulaak ding
hi” (John 14:21). Zeisu in a nungzuite tungah “Ka pa in note hong it hi.
Banghang hiam cihleh kei hong it in, hong um nahih manun ka Pa kiang pan
hongpai ka hihna thu note in na thei uh hi.” (John 16:27).
Hilo adang Lai Siangtho mun tuamtuamte
in Pasian tawh i kizop na in Ama hong itna siksanin kizopna hi, ci-in i thei
hi. (Hih kizopna sungah itna tawh kizopna hi, cih i thei hi). Pasian itna ngah
lo cih thu in Pasian in hong it nawnlo cihna hilo hi. Nitang deih loh manin ni
kidal theilo a, ahi zongin niliapna mun khatah kimu thei mah bangin Pasian hong
itna kuamah in dal theilo hi. Ahi zongin Pasian tawh kizopna nei nuam lo-in na
khensatleh ama itna ngah kha lo cih thu hi; tawntung nunna hong kamciam tawh a kipelh
cihna suak hi.
Pasian hong itna thukkik lo-in koi
bangin nungta thei i hiam? Mawhna om khit ciangin zong piansak nate in Pasian
hong itna pulaak veve uh hi lo hiam?
WEDNESDAY January 8
Hehpihna Taan
Pasian hong itna in kip tawntung hi.
Mihing in a thalawh theih hilo hi. Ahi zongin tua itna a nial thei hi. Tua itna
i san’ ciangin i ham phatna hi. Pasian itna i ngah nadingin mihing in thalawh
theihlo a, hong piakkhong itna a sangziau ding ihi hi (Jer. 31:3).
Pasian i it ma-in Ama’n hong it khinzo ahih manin Amah a it theikik i hizaw hi.
Simin, 1John 4:7–20. A diakdiakin aneu 7 le
9na in Pasian hong itna masakna thu bang kipulaak hiam?
________________________________________________________
Pasian in hong it masa hi. Ama’n hong
it masalo hileh amah itna i nei thei kei ding hi. Pasian in hong bawl cilin
Amah a itkik thei dingin hongbawl hi. Amah in itna bulpi hi; itna kipatna hi.
Mihing in deihtel theihna i nei hi. Amah i itkik thei a, i nial thei hi. Amah i
it ciangin i nunzia in tua itna kilanghsak hi. Hithu Khazih in mawh mai sak
nuamlo thugentehna a genna-ah zong kimu thei hi (Matt. 18:23–35).
Tua gentehna sungah, nasempa in a topa
tungah a leeiba pen cikmah in lohzo ngeilo ding hi. Matt. 18 cihna bang ahihleh
nasempa in a topa tungah talent 10,000 baa hi. Talent khat
ciangin denarii 6000 ahi hi. Denarii khat mikhat ii nikhat thaman
cihi (Matt. 20:2). Nasem mi khat in ni 6,000 a sep ciangin talent khat
ngahpan hi. Tawlngakni teng dok khin leng, kumkhat in ni 300 nasem le denarii
300 thalawh ding hi. Nasem mikhat in denarii 6,000 apha talent khat
a loh nading in (6,000/300 =20) kum sawmnih sawt ding hi. Tua ahih manin talent
10,000 a loh nadingin kum 200,000 sawt ding hi. Tomgen leng nasempa in
lohzo ngeilo ding hi. Hinapi, a topa in hehpih mahmah ahih manin lungsim takpi
tawh tua leeiba lianpipi maisak hi.
Tua hinapi, hih maisakna a ngah nasempa
in ama’ tungah a leeibaa themcik denarii 100 bek pen maisak zolo in, a
naseppih leeiba neipa thong sungah koih ahih manin, a topa in ama’ maisaksa
teng thu lumlet kik cihi. Tua nasempa in a topa itna tawh maisakna awlmawh
nawnlo hi. Pasian hong lainatna beingeilo citateu zong in, kinial kha thei a,
ki mangngilh thei hi.
Na mawhna hong kimaisak tengleh, tua
mawh maisakna na ngah dingin Zeisu in man bangzah pia cih ngaihsun in. Nang’
tungah mawhte na maisak theih nading bangthu honghilh hiam?
THURSDAY January 9
Manh Ngenlo-in Ngah: Manh Ngenlo-in
Piakhia
Nasempa in a topa tunga a leeiba a loh
zawh loh mahbang in, Pasian tungah loh zo ngeilo ding hihang. Pasian’ itna zong
thalawh zo ngeilo ding hang. “Mawhnei ihih laitak in ei’ adingin Khazih hong
sihna tawh Pasian in eite hong itna honglak khinzo hi” (Rom. 5:8). A
lamdang itna! 1 John 3:1 in, “PaPasian in eite hong itna lian mahmah ahih
manin, eite pen Ama’ tate hong ci hi.”
Eite in, midangte muhna ah ihih theih
zah in Pasian’ itna kilangh sak ding ihi hi. Hizah in a lian lainatna le
maisakna ngah ihih ciang in, midangte tungah lainatna le maisakna bangzah in
piakhuai a hiam? Nasempa in a topa lainatna le maisakna teng a lawm naseppih pa
a piak sawn ding mangngilh cih thu phawk in. Pasian it takpi ihihleh, tua hong
itna midang tungah lengkik sak hamtang ding hihang.
Simin, John 15:12; 1John 3:16 le 1John 4:7–12.
Pasian in hong itna, Amah i itkikna le midangte i itna in koi bangin kizopna
nei hi, ci-in pulaak uh hiam?
John 15:12 khit ciangin Zeisu in
nungzuite kiangah “Ka hong thupiak bangin na gamtat uhleh ka lawmte nahi uhhi” (John
15:14) cihi. Tuakhit ciangin Zeisu in bangthu pialai hiam? Adang khempeuh
lakpan Zeisu in eite Amah’n hong it mahbang in eimah khat leh khat ki itding
cihi. Hiteng leh mun khempeuh ah Topa in Pasian it in khat le khat zong ki-it
ding hong ci hi.
Tomgen leng, gen zawhloh eima leibaa
pen singlamteh bekmah in hong loh sak cih phawk ding hihang. Tua ahih manin
Pasian it in phat ding hang a, midang tungah zong itna hehpihna nei ding
hihang. Luka 7:47 in, tampi maisakna ngahpa in tampi it a, “tawmno bek aki
maisak te in tawmno bekmah it” cihi. Eite lakah bangzah hong ki maisak cih
a theilo a ki omkha hiam?
Pasian i itna in midang hong itsak
ahihleh, Pasian hong itna thu puak kammal le gamtatna tawh thukin tangko ding
hihang. Mite nisim nundan lamhilh ding, Pasian’ itna hong luan sukna tuizawl
hiding, van thak le lei thak kamciam theisak ding, hih leitung mahmah kibawlpha
thak ahihlam, Pasian hong itna nial in, mawhna le sihna in a suksiatsa teng
kibawlpha kik cih thei sak ding hi.
Midang na itna tungtawn in Pasian itna
lamah bang kalsuan thei ding na hiam? Tu’ le mailam ah Pasian hong itna mite
tungah koi bangin lahkhia thei ding a, tawntung nuntakna ah hong makaih ahihlam
koibang zol thei ding nahi hiam?
FRIDAY January 10
Ngaihsutbeh Ding: Ellen G. White, Steps to Christ laimai
pp. 93–104 ah “The Privilege of Prayer” simin.
“Na deihna, na nuamna, na dahnate, na
lunghimawhna, na lau-nate khempeuh Topa mai-ah sungkhia in. Topa na lunggimsak
zo kei ding hi. Na samzang mal khempeuh a simthei Pa in a tate kitang’sap nate
awlmawhlo-in om ding hiam?” Topa in hehpihna le lainatna tawh kidim hi” James
5:11. I dahnate a itna tawh kidim Ama lungtang lawngkha hi. Na lunggim’
sintawlna khempeuh Amah suan in. Amah aa dingin vangik bangmah omlo hi.
Banghang hiam cihleh Amah in leitung khempeuh a hong kempa hi.
Vankhuanuai khempeuh a nei Topa aa
dingin thuneu lua cih omlo hi. Amah phawk thamlo ding bangmah omlo hi. Ama’ aa
dingin khuamial lua cih om ngeilo hi. Honghuh zawh loh ding gimna bangmah omlo
hi. Ama aa dingin a hamsa bangmah omlo hi. A tate tungah gimna, lungbuai-na
hong tunglo ding hi. I Topa Pasian in a zak zawhloh thungetna a om kei hi. I
ngaihsutna khempeuh hong mutel sinsen Pa hi. Laimal sim bangin hong sim Pa hi.
Ama phawk khakloh cimawh genthei kuamah a omkei hi. A tate hong huh nuam lo-in
a om kei hi “Amah in a kitamzan lungtang a damsak hi” Late 147:3. Pasian le
mihingte kizopna in kitel sinsen a, Ama donlah ding lunggimna a om kei hi. A
Tapa hong piakhia Pa in i kitangsapnate lunghimawh lo-in om thei ding hiam?”— Steps
to Christ, p. 100.
Kikupding Dotnate:
A tunga laigual teng ngaihsunpha in: “Pasian le mihingte
kikaal kizopna in kicingin kuamah huh ding a om nawnlo bangin na kisap nate
honghuh hi. Hih thu in bangzahin khamuanna hong guan hiam? Nai’takin hong
ompihna na phawk hiam? Koi bangin a lamdang kamciam hong piakte tawh nungta
ding na hiam? Ni khat khit ni khat na kalsuanna-ah hih thu na um takpi hiam?
Tu kaal thusinna siksanin koi bangin Late 103:17, 18 na
telthei hiam? A kip tawntung Pasian hong itna kip tawntung hong hilh in, koi
bangin Ama hong itna in na khempeuh aa dingin kicing hiam? Tua hi mah taleh
Amah tawh kizopna kip le Ama tungah kingakna kisam semsem zaw hi lo hiam?
Hih thu na theihna hangin Pasian tawh na kizopna-ah bang
kikhelna na nei hiam? Adah akap mi khat koi bangin na hehneem siam thei ding
hiam?
