MONGOLIA | January
11
Elberel
Elberel in Covid -19 pul natna sung koi mah kipai theilo, nasem theilo, sangkah theilo ahih manin aheh suak den hi. Amah pen Tusgal Sang ah sangnaupang khat hi-in, hih sang in Mongolia gam ah Seventh-day Adventist sang khat bek ahi hi. Covid hangin sang ah pai-in lai kisin theilo ahih manin sang in laisin nading online vai hawm uh hi. Online tawh a sang kah ciangin sun thapaai computer mai-ah atuttut nuamsalo hi. Kumpi sangte-ah sangkahte in ahihleh tua bang hilo-in sanginn ah vapai uh a, kimawl cihte nei uh ahih manin pawl sangkah nuamsalo-in kumpi sangkah ding lunggulh hi. A nu le pate tungah a gen ciang in a nu in phal in, a pa in phal lo hi. Bang hang hiam cihleh a pa in Adventist pastor nasem sia khat hi.
A pa
zong Andrews University ah online tawh sang kah khat ahih manin USA ah om a, a
zi tungah “Kei i gam ah omlo ka hih manin i tate sai theilo hing, Nang’ na sai
in, a mailam nuntak khuasak nading i ngaihsut kul hi,” ci-in a zi vaikhak hi.
Kumpi sangah kah hileh lawm le gual hoihlo tawh kituah khaleh hoihlo ding hi,
ci-in kumpi sang kah ding a deihlohna thu gen hi. A pasal thu’gen a zi in
thukimpah in, pawl sang mah ah kah suak sak ding in khensat uh hi.
Ahi
zongin Elberel in pawl sang kah nuamsa theilo hi. A nu le pa tungah kumpi sang
a kah theih nading ngen kikkik hangin a nu le pa thukimlo uh ahih manin bang
mah a pau thei kei hi.
A
kumkik ciangin kumpi sang te zong online mah tawh laisin uh ahih manin Elberel
in kumpi sang a kah nopna lungsim bei hi. Tua bangin sang kikah toto a, sang
khakpi hongtung hi. Sang hon kik ciangin kumpi sang kahding mah lunggulh ve ve
hi. A sangkahna-ah a lawmte tawh kikhawl theilo, nuam salo ahih manin tua
hangin kumpi sangkah ding a lunggulh hi.
Sang
hon’ khit kha nih khit ciangin Elberel in a lawmte tawh kituah nuam a saklohna
thu a pa kiangah a gen hi. A pa tungah a hamsatna teng a gen ciangin a pa in
kumpi sangah kah dingin a phal hi.
Elberel
in a ngimnate a pa tung ah a gen thei zel hi. “Pawl sang kah na panin kumpi
sangkah ding na geel hoihlo hi,” ci-in a pa in dawng kik hi. “Kumpi sangah kah
lecin nang sangin a neu zawte nangawn in hong simmawh ding uh hi,” ci-in a phal
lohna thu a pulaak hi.
Khualkhal
hun hongtun ciang in a pa lungsim hong kikheel a, ahi zongin a tapa Elberel in
kumpi sang mah kah dingin lunggulhna a nei veve lai hi. Tan 2 a kipan pawl sang
kah ahih bangmahin kumpi sangah va kah lehzong phamawhsa nawnlo ahih manun a nu
le pa in pawl sang kahna panin kumpi sang kahding phalta uh hi. Kumpi sang kah
ding a phal uh hangin a pa in “limtak kidawm dingin a hilh pha pha hi. “Lawm le
gual hoihte tawh kikholh loh ding le zongsatna hoih lo peuhmah a pelh nading a
nu le pa in hilh tangtang uh hi.
Elberel
in kumpi sang a vakah cil a kipan kumpi sang kahna-ah amuh thute hangin a
lungmang hi. Pasalno a tamzawte in sangkahlo-in om mai uh hi. Sang kah sunsunte
zong sang tuah ciangin zu dawn, zatep cih bangin a om ngeingai uh hi. Tuabek
thamlo-in suun an nek ciangin Elberel in buai-na tuak kha hi. Pawl sang a
kahlai-in sang nau pangte in sa nelo vive hi. Kumpi sangah tua bangin suun an
neekna hall cihte neilo uh ahih manin suun an nekna mun ding omlo hi. Elberel
in suun an a nek ding ciang in lamgei ansai khat peuhah ne-in a om hi. Tua
bangin kumpi sang a kahna kha hong cing toto a, Elberel in buai-na dang khat
hong tuak leu leu hi. A laisinte a theihsa vive ahih manin sangkah a thadah hi.
Sang kah nopna lungsim bei mai hi. A siate hilh thute a theihsa vive hong suak
hi. Tua bangin sang nopna lungsim nei lopi-in sang va pai veve a, a pa thu
hilhnate a phawk kikkik hi. A pa deihna bangin a gamtat loh manin a khialhna
kiphawk a, ahih hangin a pa tungah mawhmai-na ngen nuam tuanlo hi. Thu a nget
ciangin “Topa aw, bang hih dingin hongdeih na hiam? kumpi sangkah suak ding
hong phal na hiam? Ahih keileh Pawl sangah kah kik ding ka hiam? ci hi.
Thu a
nget khit a zingciangin a nu in Elberel a sang kahna thu dong hi. Kumpi sang
kahna phat tuamna a ngahlohna thu phawkin pawl sangah kahkik ding a lung gulhna
thu a nu tungah a pulaak hi. Elberel lungsim kikheel amuh ciangin a nu le pa
lungdam mah mah uh hi. Pasian in a thunget nate uh dawng hi, ci-in a lungnuam
uh hi. Tun pawl sang va zom lecin zekai khin hi mah taleh kikah thei lai ding
ahihteh ci-in kumpi sang kahna panin pawl sangah kah ding in a deih zaw uh hi.
Tawl khat khit ciangin Elberel in Tusgal Sang ah sangkah dingin va pai hi. A
lawmte tawh a kituah theih lohnate tu-in thuaksiam thei dingin kigingsa-in pawl
sangmah a kah thei suak hi.
Tusgal
Sang in Mongolia gam khuapi Ulaanbaatar khua-a om SDA sang khat hi. Hih sanginn
huh na kipia ngei khin hi. Ahi zongin tu-in sangnaupangte kipantahna
(recreation) khat kibawl nuam ahih manin tu quarter Sabbath 13na sumpi kipuak
ding hi.
