LESSON 11 | September 6- 12

 

LESSON 11    *September 6- 12

Lampialna leh Mawh Thuumna

 

SABBATH NITAAK

Tu Kaalsung Simding: Pai.32:1–6; Late 115:4–8; Isa. 44:9, 10; Rom. 1:22–27; Pai. 32:7–32; Isa. 53:4.

Kamngah: “Tua ciangin TOPA kiangah Moses pai kika, "Hih mite bawl mawhna lian lua mahmah si! Amaute in kham pasiante a bawl khin uh hi. Ahi hangin tu-in amaute mawhna maisak in - na maisak zawh kei leh na gelhsa laibu panin kei hong phiat in," a ci hi.” Pai. 32:31,32.

Moses in Israelte giahphual ah om nawn lo hi. A paikhiat zawh ni 40 bang sawt khin hi. Tua sungin bang thupiang kimu hiam? Pasian mite in a Topa uh kiang panin paikhia uh hi. Khut tawh kibawl milim, kham bawnglim bia uh hi. Nalamdang lianpipi amuh khit uh ciangun tua bangin siatna sung tung veve uh hi lo hiam? Bang hangin tua bangin siatna sung tungkik uh hi, cih thu siksan ding thu tampi om kha thei ding hi taleh amaute in Pasian in kua hi, cih theihtelna nei lo uh hi, cih thu kilang mahmah hi. Ahih keileh amaute cilesa deihna, mihing angsung huaihamnate in Pasian bawl nalamdangte amuh uh hangin a nungta Pasian theihtelna ngah zo lo uh kha ding hi. Pasian piak thuphate hangin lungdam thei lo uh hi kha mai ding hi. A ngah ding mahin kingaihsun uh hikha pelmawh ding hi. Mawhna in amaute theihtelna khaktan hi thei ding hi. Pasian hehpihna a ngah uh tampi om hi phial taleh lungdam thei lo uh hikha thei ding hi. Pasian bawl nalamdangte mangngilh khin uh hi thei ding hi (Late 106:13, 21–23). Ahih keileh Aaron makaih siamlohna ngawh ding i hiam? Topa in Aaron tungah heh mahmah a, susia ding dinmun a tung hi phial hi (Tkhna.. 9:20).

Bang bang thu hangin thuman zuihna pan lampial uh hiam?. Amaute nunzia panin bang thu nuntakpih ding na mu hiam? Mihing mawhna bek tham lo-in Pasian mangngilhna pan hong kipan mawhna hi lo ding hiam? Mihing in mawhna tawh kidim hi mahta leng, Pasian in i tungah hehpihna lianpi hong nei hi lo hiam?

*September 13, Sabbath a ding kiginkholhna in tu kaal lesson sim in.

 

SUNDAY   September 7

Makaih Zolo

 

Pasian in Moses sam a, Moses tawh hun zang khawm hi. Moses in sun 40 le zan 40 sung Topa tawh hun zang hi. Israelte adingin hun saupi khat hong suak veve hi. Amakaipa uh om lo, amuh loh zawh uh ni tampicing khin ahih manin lungkia-in om uh hi; a lung uh duai zo nawn lo hi. Bit kisa nawn lo uh hi; lau-na tawh kidim uh hi.Amaute in a kimu thei pasiante bia-in makai-in a nei uh hi. Tua bang pasiante in Egypt gam sungah mun khempeuh ah om kawikawi khin hi.

Sim in, Pai. 32:1–6. Koi bangin Aaron makaihna in lawhsam hiam?

____________________________________________________

Aaron in bawnglim biakna-ah kihel kha lo hi. Ahi zongin a mipihte a makaihna-ah Topa deihna bangin a makaih ding phawk lo hi. Topa muangin a om ding sangsikin a mipihte mai-ah thawzawmin a om hi. Thuman lam a pom ding sangsikin a mipihte lunggulhna a lehzuih hi. A Mipihte ngetna bangin “ Kote mai-ah a pai ding pasian khat hong bawlsak in, ci-in a ngetna uh a sang mawk hi; hih bang hilhna, mawhna in ngaihsutin zong neih ngam huai het lo hi(Pai. 32:1) a mipihte ngetna a zui hi. Tua ciangin mihonpite in pasian bawl nadingin a khamte uh van manpha nonote piaknopna lungsim tawh Aaron kiangah hong paipih uh hi. Aaron in tua bangin kipiakna a khaam kei hi. A piapia dingin a hanthawn zawsop hi. Tua ciangin kham bawng lim a bawlna-ah amah mah zong a kihel kha suak hi. A nung ciangin mihonpi in hih bangin a pulaak uh hi: “Israel aw, hih kham bawng lim in Egypt gam saltanna panin hong paikhiatpih hi. ( Pai. 32:4). Mihing ngaihsutna in a sia lam zuih nuamsa ahihna lamdang mahmah hi lo hiam? Gamtat siatna sungah kikalsuan kha pahpah hi lo hiam?

Mihing in eima lawhcinnate hangin nuamin pawi a bawlbawl nuam mihing ihi hi. Tua bang thu sungah a tualbual mite in siatna khat khit siatna khat sungah a nungta mite ahi uh hi. “Tua bang hun ciangin thuman thutak kiptakin lenkip ding, khentat siamna le maingal takin a mainawt ding ihi hi. Israel mi honpi in mittaw, thuman muhtelna a nei kei uh hi. Ahi zongin Pasian tungah a ap ding sangsikin tua lau-na panin thuman lampial mi hong suak hi. Topa a kihtak ding sangin mihonpite a kikihtaakna hangin thuman lampialpa hong suak hi.” Ellen G. White, Patriarchs 4 and Prophets, pp. 316, 317.

Koi bangin Aaron in makai khat hi napi, thaneemin lampial hiam? Bangci bangin Aaron in ama thaneemna paulap nei hiam?

 

MONDAY       September 8

Milim Biakna leh Siatna

 

Sim in, Pai. 32:6. Milim biakna in manlang takin amaute bang mun tunpih hiam? (Late. 115:4–8; Late. 135:15–18; Isa. 44:9, 10.)

______________________________________________________

Kham bawnglim in Egypt mite biak bawng pasian sutna nei hi. Tua pasian min in Apis ahih keileh bawng pasian Hathor kici hi. Milim biakna in Thukham khatna le nihna a palsat ahi hi (Pai. 20:3–6). Milim biate tungah gimna tung lo-in a om kei ding hi.Milim biakna in Piangsakpa biak ding sangsikin piansak nate biakna hi. Israelte in Piangsakpa bia lo-in piansak na tuamtuamte bia mawk uh hi. Tua milim/ pasiante in za thei lo, mu thei lo, itna nei lo, hong cing hong kem thei lo uh hi. Piansak nate kipiansak lai-a a omzia khempeuh kilehbulh, kisia mang khin hi. Pasian limlemeel suunin hong kipiangsak hi mah taleh tu-in a biak ding uh pasian bawl tawm uh a, amau le amau a kibia a suak uh hi. Tua hi-in amaute in Topa tungah mawhna lianpi a bawl uh hi (Isa. 31:7; Isa. 42:17).

Sim in, Rom. 1:22- 27 sunga thute in bangci bang lampi tawh kham bawng lim biakna thu pulaak hiam?

________________________________________________

Milim biakna in Pasian in Pasian hi; mihing in mihing hi, cih thu a nial hi.Milim biakna in Pasian le mihing kigamla -sak semsem hi (Ths. 5:2)Pasian tawh kizopna susia hi. Lungsim sungah ngaihsutna tawh ahi zongin gamtatna, zia le tong tawh ahi zongin milim biakna in Topa tawh kizopna kitatsak a, siatna sung hong kiatsukpih semsem hi. A nungta Pasian ka um hi, a ci phial zongin a cih mawkmawk bek mah hi ding a, a cih khit phetin milim biakna sung mah tung veve hi. Ellen G. White genna-ah “milim biakna in Egypt nopsakna tawh nuntakna hi,”ci hi. Patriarchs and Prophets, p. 320.

Mihing in ngaihsut siamna nei hi mah taleh tua siamnate in siatna lam hong tunpih pahpah hi.I biak ding milim khawng hong suak thei hi. Mihing in a biak ding milim a bawlbawl hong suak hi. Hih milimte ading nasemin a nungta tampi om hi. Piangsakpa mun ah hih milimte in mun la hong suak uh hi. Tua panin siatna lam manawh semsem hong suak hi.

Koi bangin tuni tuhunin mihingte in Piangsakpa bia lo-in piansak nate bia hiam?

 

TUESDAY   September 9

Amau le Amau kisusia

 

Sim in, Pai. 32:7. Bang hangin Moses in Israel mite gaih phual ah paikik hi ding hiam?

_______________________________________________________

Milim bia-in nungkik uh a, Israelte in a nungta Pasian, Egypt salsuahna panin a Honkhiapa tawh kigamla semsem uh hi.Topa in amaute a mawhsiat hi; amau le amau in siatna sung a zuan khin uh hi (Pai. 32:7), tua kham bawnglim in Egypt panin hong honkhia hi, ci tazen uh hi. Pasian gen thu tawh kilehbulh zen si! (Pai. 20:2)! Hih in Pasian ompihna a nial suak hi. Pasian vangliatna a phawk nawn lo uh suak hi. Amaute ngaihsutna khempeuh kisia mang khin hi.Kamsang Ezekiel in a pulaakna-ah milim biakna in Pasian mite lakah siatna lianpi khat hong suak hi.

Mawhna dangdangte in milim biakna panin hong mengkhia ahi hi (Ezek. 8:1–18, Ezek. 20:1–44, Ezek. 22:1–12). Bang hangin taanglai Israelte in siatna sung tung mawk uh hi ding hiam, ci-in a ngaihsun kha ngei om kha ding hi. Mihingte bawl milim tuamtuamte biakna tawh kidim uh hi. Milim i cih in Pasian bia lo-in na dang khat peuh i biakleh tua in milim a suak hipah hi; Pasian dinmun a luah na khat peuh in milim hi. Biak ding lohpi khat i biakna in milim hi. Milim in ngaihsutna, hun, lungsim khempeuh hong huup khin hi. Pasian sangin tua bang nate in hong huzaap a omleh tua in milim hi. I lungsim ngaihsutna khempeuh zong hong luah thei hi. I muh bangbang kisuun hi.

Pasian tawh nuntak khopna sangin nuam na sak zawk a omleh milim biakna hi. Khrih om nading munah kiphatsakna, kiliatsakna, angsung khualna, huaihamna, sumlepaai, thuneihna, TV, guihtheih kham theih, zulesa tawh kidiahna, a siangtho lo ngaihsutna, nulepa mawhna lam hong tunpih thei van le nate, cilesa gualnopna, nasepna, kimawlna, innkuan, video game, zii pai van lei-na, politics, music, za le min deihluatna, cihte milim suak thei hi. Hih tawh kizomin i pulaak ding tampi om hi; bei lo ding hi.

Milim biakna in lauhuai mahmah hi. Bang hang hiam cihleh tua in i nuntakna buppi hong kisia hi. Gamtat khuahekna, ngaihsutna, mi tawh kizopna dongin hong khel thei hi.

I hihna khat peuh zong hong khel thei hi. Kizopna khempeuh zong susia thei hi. A khiatna nei lo nunna ah hong tunpih thei h. A tawpkhakna-ah milim in tawntung nuntakna hong pia thei het lo hi.

 

WEDNESDAY    September 10

Pasian Hehna

 

Sim in, Pai. 32:9–29. Pasian in Israel mi buppi susia ding a geel ciangin koi bangin Moses in dawngkik hiam?

Moses in Sinai Mualah a omlai-in Pasian in Amah a langpang Israelte ka susia ding hi ci-in a pulaak hi. Moses suan le khak khempeuh a beimang ding dinmun tung hi. Tua dingin Moses in zong deih lo hi. Tua hi-in Topa Pasian in Ama vangliatna lianpi tawh Israelte a paikhiatpih hi. Tua hi-in Moses in Topa tungah thuumna a neihna-ah a pu, a pate uh tungah Topa kamciamte a pulaak phapha hi. Moses a pu, a pate uh leh Pasian kikaal ah palaai khat hong suak hi.

Tua bangin Topa in Israelte tungah siatna a tunsak ding a khawl khit ciangin, Moses in amaute kiangah hong paikik hi (Pai.32:14). Hih bang thupiang kiciaptehna dang om lo hi. Pai. 34:29 pulaak bang lo-in Topa kiang panin Moses a paikhiat ciangin a maitang a taang hi. Moses a heh suak lua ahih manin a khut a a tawi suangpek lei a deenna hi. Mual bulah tua suangpek kitamin kisia mang hi(Pai. 32:19). Thukham Sawm kigelhna suangpek in kitamkham hi.

Hih thu hangin Pasian in Moses a taihilh hi. A nung ciangin a dang suangpek nih bawl dingin thu a pia hi. “Amasa suangpek nihte susia khin na hih manin tu-in suangpek nih tawh hong pai in’ ci-in Moses a sam hi (Thkna.10:2). Pasian mahmah in a khut tawh a gelh thukham hi. Aaron in a khialhnate midang tungah a suan hi. (1) Midangte a ngawh hi. (2) A lamdang takin meikuang tawh kham bawnglim a bawlsak hi.” (Pai. 32:24). Aaron in Pasian pahtawi-na lianpi ngah khat hi napi, na hoih, na pha sem thei dingin hun hoih tampi ngah ngei khin hi napi, upa makai 70te le Moses tawh Mual tung kah thei ding hun pha ngah hi napi (Pai. 24:1), tua bangin a mipihte biak ding kham bawnglim khat a bawlsak pen a khialna lian mahmah hi.

Na lamdang khat hong piang ding hi, ci-in a pulaak tawh kilehbulh mahmah thu khat hong piang hi mawk lo hiam? Aaron in a sanggampa Moses khem ding a ngaihsun hi. Pasian langdo dingin mipihte a makaih khat hong suak hi. Milim biakna kitheihmawh bawlin zuau khemna tawh melh dingin a ngaihsun hi. A mipihte in bangbang siatna sung tung uh hi mah taleh Aaron in Moses a khem zo suak hi. Moses lungkim lo hi. Tha khatin milim biakna a khaam hi.

Hih thu in midangte ading thungetsakna thu bang hong hilh hiam? Tu-in kua adingin thu na ngen hiam?

 

THURSDAY      September 11

Mawh Thuumna

 

Sim in, Pai. 32:30–32. Moses in a mipihte mawhna hangin a mawh thuumsakna in bang ciangciang huamkha hiam?

_______________________________________________________

Bang hang hiam cihleh Israelte giahphualah Topa langpanna a om ciangin mi tampi in sihlawh uh hi (Pai. 32:28). A zingciangin Moses in a mipihte tungah hih bangin a pulaak hi: “Note in mawhna lianpi na bawl khin uh hi. Tu-in Topa kiangah ka pai ding hi. Note mawhna hangin mawhthuumna ka va nei ding hi” a ci hi (Pai. 32:30).

“Tua ciangin Topa kiangah Moses pai kik a, "Hih mite bawl mawhna lian lua mahmah si! Amaute in kham pasiante a bawl khin uh hi. Ahih hangin tu-in amaute mawhna maisak in - na maisak zawh kei leh na gelhsa laibu panin kei hong phiat in," a ci hi. (Pai. 32:31, 32). Moses in Khris limcing hi, cih thu kuamah in nial lo hi. Mawhneite adingin mawh thuumna nei ahih manin a nuntakna zong hong piak ding a itsik kei hi. Tua hangin eite adingin a nuntakna a hong pia hi. Thukham palsate tungah a hong lainatna in bangzahin lian a hiam? Topa in a nuntakna buppi a hong pia hi. A hong itna lian mahmah ahih manin tua bangin sihna a hong thuak hi. Paikhiatna bu sungah Moses in mual tungah bang tan vei Topa tawh tonkhawm hi, cih pulaakna bangmah om lo hi.

Ahi zongin Thuhilhkikna bu sungah Moses in mual tungah ni 40 sung om hi, ci-in a pulaak hi. (Thkna. 9:18).Pai. 32:32 sungah “mawhmai-na” cih kammal in ‘pua’ “ tawi’ cih kammal panin kizang kammal hi. Tua bang kammal in Isaiah 53:4 sungah kimu thei hi. (Jesuh thu a kipulaakna-ah) “Amah in eite dahnate a puakhia takpi hi.” Hih thu-ah “Mawhmai-na” cih kammal mah tawh kigelh hi. Pai. 32:32, sunga mawhmai cih kammal le Isaiah 53:4 pulaak puakhia cih kammalte in a kibang ahi hi. Pai.32:32 in mawhneite adingin Jesuh hong sihna thu hong hilh hi. Pasian mahmah in a thuaksak hi. Hih thute in mawhmai-na i ngah nadingin kipiakna thute hi. Pasian in Khris sungah i mawhnate hong puakkhiatsak hi. Tua hang bekin mawhmai-na a ngah thei ihi hi.

Moses in a mipihte mawhna pua dingin Pasian tungah a ngen hi. A tawpna-ah Khris in i mawhnate a hong puakkhiatsak hi. Koi bangin hih a lamdang thu in i lungsim hong tuam hiam? Mawhneite adingin Pasian hong itna thu bang hong hilh hiam?

 

FRIDAY    September 12

Simbeh Ding: Ellen G. White, “Idolatry at Sinai,” pp. 315–327, in Patriarchs and Prophets.

Tu kaal sung i kikup thute in thu-um mite nuntakna-ah Pasian nasepzia thute hi. Topa in “I lametna, i ngaihsut loh zah dongin thupha hong pia-in na hong sepsak thei hi” (Eph. 3:20). Ei le ei ki-en pha-in i hoihnate siksanin, angsung huaihamnate tawh i lungkimlaiteng milim bia bia i ihi hi. Tua sangin i mitsuan zawk ding in Topa Pasian le Ama vangliatna hi. Amah in tha hong guanin nunna thak sungah hong kalsuanpih a, zawhna hong tunpih hi (Phil. 4:13; Jude 1:24, 25).

“Thutanna in itna neuseh lo hi. Bang hang hiam cihleh itna le thutanna siksanin thu kikhen ding hi.Topa in a mite a cing, a kem tawntung hi. Amah a langpan mite a nawlkhin ding a, a tuamkoih ding hi; tua hileh amaute in midangte mawhna sung a tunpih kei ding uh hi. Cain nunna a huutna-ah Pasian in vankhuanuai khempeuh muhin mawhna tungah thukhenpah lo hi. Mihing in khansau semsem ciangin mawhna sung ah thuklut zaw semsem uh hi. Tua khit ciangin Israel mite in Sinai ah Topa a langpan zel uh hi. Tua mawhna hangin thukhenna om lo hi zenzenleh thukham palsatna a khang semsem ding hi. Tua bang siatnate mah kibawl kikkik ding hi.”Ellen G. White, Patriarchs and Prophets, p. 325.

 

KIKUP DING DOTNATE

1.Monday ni-a dotna ngaihsunkik in. Piangsakpa bia lo-in koi bangin piansak nate peuh kibia kha zel hiam? Gentehna, piansak nate kemcing ding, piansak nate, kim le paam kepsiam ci-in tua nate bia lo hi mah taleng, piansak nate limtakin kikem kidon thei veve hi lo hiam?

2.Siatna khat peuh, thupiang khat peuh in a hong huzaap hiam? Bang hangin Moses in Pasian a langpan mite le Ama thuhilhna nial mite suksiat mang dingin thupia hi ding hiam?

3.Bang hangin mawhnei mi khat a sih tangin tuuno/Khris sihna in mawhmai-na taktak ngahna hiam? Bang hangin mi khat sih ding tangin mi khat in sihna thuak cih thu, Khrih hong sihna thu nialna in khialhna lianpi hi, ci-in kiciamteh thei hiam?1 Peter 2:24 sim in. Koi bangin Jesuh sihna in eite sih nading tangin sihna hi, ci-in pulaak hiam?