LESSON 12 | *September 13- 19

 

LESSON 12  *September 13- 19

Hehpihna Tawh Na Vangliatna Hong Lak In

SABBATH NITAAK

Tu Kaalsung Simding: Pai. 33:7–34:35; Thkna. 18:15, 18; John 17:3; Rom. 2:4; John 3:16; 2 Kor. :18.

Kamngah: “Tua bangin Moses maitang nawkin, "TOPA, TOPA, khuatuah siam le hehpih siam Pasian, a hehhak, itna le muanhuaina tawh kidim, a tul tampite a it pa, gitlohna, langdona le mawhna a maisakpa ahi hi. Tua hi napi amah in mawhna a bawlte dan tuaksak loin a om kei hi. Amah in pate mawhna tate tung le amaute tate tung, khang thum khang lina dongin dan a tuaksak hi," ci-in a tangko hi (Pai.34:6, 7).

Topa tawh i kalsuanna-ah khantohna kisam hi. Khantohna i neih keileh a si ihi hi. Sawltak Paul in hih bangin gen hi: “Ahi hangin i Topa le Honpa Jesuh Khris hehpihna le hoihna-ah na khangto un. Ama tungah tu le a tawntungin minthanna om ta hen! Amen (2 Pet. 3:18). Khantoh ding lunggulhna kisam hi. Nisimin Pasian university ah a kah ding ihi hi. Khrih sungah i dinmun ding hong tunpih ding hi.Sangnaupang khat dingin kingaihsun in. Tan Lang sangkah khat in laigelh, laisim kisin tawm hi. Tan Khat a sin sangnaupang khat in nambat 100 ciang a sim, a gelh tawh kipanin tua bangin 100 ciang a sim, a gelh theih ciangin ong kici thei hi. Bang hang hiam cihleh ama kum tawh kituakin tua ciang mah hi phot ding hi. Ahi zongin tua bang theihna tawh khawl henla, bangmah theihbehna a neih keileh Tan 10 a sin ciangin lai ong zo lo ding hi. Tan 10 a tun ciangin Tan 10 tawh kituak, ama piankum bangzah tawh kituakin theihna a khangtoto ding cih pen mihing pianzia hi. Tua bang mahin hehpihna thu-ah zong a khangtoto dingte ihi hi. Tua bangin i khantohna-ah cial khat khit cial khat Khris sungah a picing toto dingte ihi hi.

Tukaal sung i sin ding thu in Pasian theihtelna le Ama hong hilh bangin nungta khuasakna, Amah tawh kalsuan khopna tungtawnin Topa sungah khantohna kingah thei hi, cih thu Moses nunzia in hong hilh thute i kikum ding hi.

*September 20, Sabbath a ding kiginkholhna in tu kaal lesson sim in.

 

SUNDAY      September 14

Puanbuk

 

Sim in, Pai. 33:7–11. Bang hangin Moses in puanbuk lam dingin Pasian in sawl hi ding hiam?

_____________________________________________________________

Puanbuk le biakbuk i theikhial kha ding hi (hih puanbuk in biakbuk pua lamah kilam hi. A nung lam ciangin puanbuk in biakbuk tual laizangah kilam hi. Moses in puanbuk a lamzia ding Topa dong hiam, dong lo hiam cih thu i theih loh hangin, i theih thu khat in: Moses in Topa tawh kimu-in, lawmta bangin kiho uh a, Topa in Moses tawh maitang kimu-in lawmta kiho bangin a kiho-na tungtawnin biakbuk lamzia ding thei hi ding hi” (Pai. 33:11Lawm in i kikholhpih lungsim khempeuh sungkhia-in kihopih lawm khat hi. Tua bang lawm in manpha mahmah hi.

Sim in, Pai. 19–34. sunga kipulaak bangmahin Moses nunzia in Topa in i nunzia koi bangin hong khel cih kimu thei hiam?

______________________________________________________

Koi bangin Pasian in makai lianpi khat tawh kizopna nei hiam? Moses nunzia in Topa theihtelna thu-ah khantohna thu hong hilh hi. Pasian vangliatna bek hong hilh hi lo-in Ama hong itna thu le Ama zia le tong zong hong hilh hi. Hih thu in Pasian tawh kizopna-ah thupi mahmah hi.

Sinai Mual a tunma-un Pasian in vanglian takin Moses a zang hi.A mipihte makaih dingin Pasian in a makaih hi. Midian gamah a om lai tuute kemin a omna-ah Pasian in Job le Piancilna bu gelh dingin humopna a pia hi. Tua hi-in sawlbawk kuang tungtawnin Egypt gama Israel mite a honkhia-in a makaih dingin Pasian sapna a ngahpa hi. Amaitang nitang bangin a om khit ciangin Moses in Israel mite kum 39 val bang a makaihlai hi. Khapsa Gam galmuhkha bek hi. Hih Lai Siangthote in Moses in Topa tungah a citak, a thuman khatin ciamteh hi, ci kimu thei hi (Thkna. 34:5, Josh. 1:1); khuamial sungah khuavak amu thei uh hi. Mi tampite etteh ding makai lianpi khat hong suak hi (Thkna. 18:15, 18). Amah pen kikhelna a piangsakpa hi. A tawntungin a mipihte in ama nungzui lo uh hi; ahi zongin ama kammal bangin a nuntak uh ciangin ama sawl bangbangin a kalsuan uh ciangin daupai-in nuamsa uh hi.Moses tung panin i sin ding thu tampi om hi.

Bang hang hiam cihleh a nunzia in a lamdang mahmah hi-in, ama nunzia in Pasian in hong khel thei ahihna, le eite tungtawnin Pasian sep theihnate zong hong hilh hi. Topa tawh na nuntak khopna-ah na kikhel ding bang om lai hiam? Topa hong khelna na phawkkha hiam?

 

MONDAY                 September 15

Tua hi-in Amah I theih Nading Hi

 

Sim in, Pai. 33:12–17. Topa in bang thu hilh dingin Moses sawl hiam? Bang hangin Moses in Pasian ompihna ngen ahi hiam?

_______________________________________________________

Topa sungah Moses khantohna in damdamin a khangtoto hi. Moses in Topa tawh a kinai zaw semsem hi. Pasian lim le meel suun dingin Topa lam a zuan semsem hi. Ni khat Moses in kikhopna puanbuk sungah Topa tawh kiho-na a nei hi. Tha khatin Moses in Topa a theih nai lohlam a kiphawk hi. Tua hi-in hih bangin ngetna a nei hi:‘Topa aw, na lampi hong lak in. Tua hileh na lampi ka thei ding hi” (Pai. 33:13). Moses in a nuntakna-ah Topa kisam mahmah ahihlam a kiphawk hi; Topa a theihtelna a sang zaw theihna kisam ahihlam zong a phawk hi. Moses in a lunggulh bangin Topa theihtelna a ngah hi.

Moses tuahkhak thute en lehang Topa sungah a nunzia i mu thei hi. Topa tawh kinai takin nungta ahihlam zong i mu thei hi. Amasa-in, Moses in mual tungah kahto hi (Pai. 19:3). Tua bangin mual tungah a kahtohna panin meiilompi khat in tuam a, tua meiilomsahpi sungah Topa hong kumsuk hi (Pai. 20:21). “Moses in meiilompi sungah valut a, Topa tawh kimu hi. Tua munah Topa tawh ni 40 le zan 40 sung a om hi” (Pai. 24:18).

Hih ni 40 sungtengin Topa in Moses tungah a manpha thu nih a pia hi: (1) Pasian mahmah in Suangpek tungah a gelh Thukham Sawmte (Pai. 24:12), le (2) Biakbuk lamzia ding le koi bangin lam ding cih thute a pia hi (Pai. 25–31). Tua hi-in Moses in ni 40 le zan 40 sung Topa tawh aom hi; a mipihte mawhna a thuumsak hi (Pai. 32:30–32, Thkna. 9:18). Hih thuteng khit ciangin Moses in Topa zia le tong a neih ding lunggulhna lianpi a nei hi. Sawt lo khatin Topa in kua hi, cih Moses tungah a kipulaak hi. Topa theihtelna a ngah khit ciangin Moses in a thu-in Topa theihna ngah bek hi lo-in a nuntakna mahmah tawh Topa a thei hi. Kum zalom tampi khit ciangin Jesuh in: “ Hih in tawntung nunna hi.Amah theihtelna , Amah bek mah a nungta Topa Pasian, Jesuh Khrih a hong paisakna thu a pulaak hi” (John 17:3)

Mihing in Topa i theihel nadingin Amah in mihingin a hong nuntakna sangin bang lampi a hoih zaw om ding hiam? Topa na thei hiam? Ama thu a thein a hiam? Ama thu theihna le Amah mah theihna in bang kilamdang hiam?

 

TUESDAY       September 16

Nong Hehpihna Tawh Na Vangliatna Hong Lak In

 

Kham bawnglim a biak khit uh ciangin Moses in Pasian hehpihna a ngen, a thum hi. Moses in a mipihte tungah Pasian hehna a tun loh nadingin a thuum hi. Topa in Khapsa Gam a tun dong amaute a makaih hi. A lungsim khempeuh tawh Topa theihtel ding a lunggulh mahmah hi.

Sim in, Pai 33:18–23. Koi bangin Pasian in Moses ngetna dawngkik hiam?

______________________________________________________

Moses in Topa tungah “Nong hehpihna tawh na vangliatna hong lak in,” ci-in a ngen hi. Ama hehpihna tawh Topa in Ama vangliatna a lak hi. Ahi zongin Moses ngetna a dawnna-ah Topa in “ Ka hoihna kong lak ding hi, ci-in kamciam a pia hi.Tua hi-in Pasian vangliatna in Ama hoihna hi. Ama hoihna in Ama zia le tong hi ( Ellen G. White, The Acts of the Apostles, p. 576; Christ’s Object Lessons, pp. 414, 415; Prophets and Kings, p. 313).

“Ama vangliatna in a tate tungah dikna hoihna a pia hi. Amah in numei pasal zia le tong a sang penpen a tun dongun deihsakna a nei hi.” Ellen G. White, The Acts of the Apostles, p. 530. Ama vangliatna in mawhnei mi mawh kisikkikna a guan hi (Prophets and Kings, p. 668) Bek tham lo-in amaute kitangsapna khempeuh a pia hi. Tua hi-in eite thupi-na, min hoihna in Ama zia le tong i neihna ahi hi. Hih bek tham lo-in khuamial lakah khuavak ihi ding hi. Paul gen bangmahin “Pasian in ko sawltakpite, kidemna muna mihonpite meizoma thah dinga kimawh paihsa mite tawh kibanga hong koih tawh kibang ka sa hi. Kote, khuavannuai buppi-a om vansawltakte le mihingte etnop lelin hong kinei hi”(1 Kor. 4:9).

Romans 2:4 sungah Paul gen bangin “Pasian migitna in kisikna lamah nang hong pi lam phawk loin a kicing ama migitna, a thuakzawhna le a lungduainate simmawh na hi hiam? Singlamteh i et ciangin, kua in eite tangin sihna hong thuak a, bang hangin hong si hiam, cih thu i theithei hi. Bang hang hiam cihleh Amah in eite hong it a, Amah bek mah eite suahtakna lampi hi. Hih in a lian penpan Pasian hoihna le Ama zia le tong a hong kilaakna ahi hi.

Pasian zia le tong i theih nadingin Singlamteh ngaihsut ding hun bang tan vei i kisam hiam?

 

WEDNESDAY    September 17

Topa Mah Ahong Kilakna

 

Sim in, Pai.34:1–28. Koin bangin Topa in Ama vangliatna Moses tungah pulaak hiam?

_______________________________________________________

A masa suangpek in phel nih kisuah khin ahih manin, tu-in Moses in suangpek nih tawh Topa mai-ah kilaak dingin sawlna a ngah hi (Pai. 32:19). Sinai Mualah Topa tawh kimu dingin a kahto hi. HIh akimuhna in a 7vei-na hi ta hi. Tua ma Sinai Mual a kahna a kipulaakna munte in 1) Pai. 19:3, 16 7; (2) Pai. 19:8, 14; (3)Pai. 19:20, 25; (4) Pai. 20:21, Pai. 24:3; (5) Pai.24:9, 12–18; Pai.32:15; (6) Pai. 32:30, 31. Moses in zingsang tungmahin Mual tung a kahto hi.

Tu-in Moses in Pasian zia le tong vanglian a mu dingin a kithawi khol hi. Pasian zia le tong a hong kilaakna in Ama hoihna a kilatkhiatna hipah hi.Tua in Pasian in kua hi-a, Amah in bang sem cihte kimu thei hi. Amah in kham tawh kizeem puan hoihte sangin a deihhuai zaw tham hi (Gam. 14:18, Neh. 9:17, Late 103:8, Joel 2:13, Jonah 4:2). John ii pulaak Jn. 3:16 in Thuciam Lui aa dingin Jn. 3: 16 hi. A thupi mahmah ahih bangmahin Lai Siangtho gelhte in hih thu mah pulaak belin nei uh hi. Hih thu in a nungta Pasian hong kilakna hi.

Bang hang hiam cihleh Pasian zia le tong hong hilh hong theitelsak Lai Siangtho mah hi. Moses in a lamdang a lamet loh Pasian min hong hilh bek tham lo-in Topa mai-ah kunin Amah a bia hi. Bang hang hiam cihleh Amah in eite hong it ahih manin eiten zong Amah a it theikik ihi hi (1 John 4:19).Hih bangin a hong kilaakna-ah Pasian in Moses tungah lamdang takin a kilang hi. Amah in Khapsa Gam a tun dongun a makaih hi. Topa in amaute tawh a Thuciam Thak a ciampha thak hi. Namdangte in Topa vangliatna mu-ina bawl nate hangin amah a bia ding uh hi. ‘En un, Keimah in note tawh thuciam ka bawl hi. Topa in Moses tungah, “Na mipihte mai-ah koi ah ka bawl ngei nail oh na lamdang ka bawl ding hi, Note in Keimah nong zong ding uh a, nong mu ding uh hi. Bang hang hiam cihleh Keimah in nang kong ompih ding hi,” a ci hi. (Pai. 34:10).

Tua hi-in Israel mite in Topa thu piak zui-in Ama deih bangin a nungta ding uh kisam hi. Tua in amaute nopsakna hi ding hi. Tua ciangin Moses in tua thuciam ciamteh dingin Pasian in a sawl hi. A piak masak thuciam suangpek in kiphelkham khin zo hi.

 

THURSDAY     September 18

Moses Mai Taang

 

Sim in, Pai. 34:29–35. Bang in Moses maitang taangsak hiam?

______________________________________________________

Pasian in Ama zia le tong itna Moses tungah a pulaak khit ciangin Moses in Mual tung panin hong kumsuk a Israel mite giahphual hong tunkik hi. Moses in a maitang taang ahihlam a thei kei hi. Topa tawh kinai semsem mi khat in ama kicinlohna, a mawhnate mu semsem ding, Topa siantho-na a tel semsem ding hi. Bang in Moses maitang kikhelsak hi ding hiam? Moses in Topa ompihna ngah ahih manin Topa vangtangin Moses maitang a taan hi. Moses in nidangin zong Topa tawh kiho zelzel uh hi mah taleh tua bangin a maitang taang ngei nai lo hi. Ahi zongin tu-in Topa mai-ah a omna hangin cihmah hunin a om nai ngei lo a maitangin a taang hi. Topa zia le tong hoih in Moses zia le tong zong khel ahih manin a maitangin nitang bang hi. I lungsim ngaihsutna khempeuh i nuntakna Topa tungah kipumpiak ciangin, i nuntakna-ah Topa-in amah nei a, i kumpi dingin Amah i teel ciangin i nunzia hong kikhel ding a, Topa zia le tong a kilangsak thei ihi ding hi.

Sim in, 2 Kor. 3:18. Koi bangin Jesuh in damtakin Ama lim le meel suun dingin hong khel hiam?

Paul in Moses maitang taang le Jesuh Khrih sunga Pasian vangliatna tehkakna a nei hi. ( Pasian thukham le hehpihna a teenana Jesuh Khrih in Moses maitang taang sangin a vanglian zaw hi. Khrih in Ama thukham tawh hong ompih hi. I zia le tong in Ama zia le tong kilangsakin i nuntak nadingin Amah mah i mitsuan ding kisam hi (Heb. 3:1, Heb. 12:2); tua bek tham lo-in Kha Siangtho vangliatna tawh tua zia le tong a nei thei ding ihi hi (2 Kor. 3:12–18).Moses in eite etteh ding kisam hi. I kiphal ciangin Topa in Ama zia le tong i neih zawh nadingin a hong khel ding hi. Ama deihna bangin hong zuun hong bawlpha ding hi.Tua in Ama lim le meel suunin hong bawl ding hi. Hih thu mah Paul in zong “ Nuntakna thak sungah kalsuanna” ci-in hong hilh hi (Rom. 6:4).

Na zia le tong bang in Pasian zia le tong a kilang zaw theilai ding hiam? Na nuntakna khempeuh in Ama zia le tong a kilangsak hiam? Ahi zongin koi bangin Singlamteh tungah Khrih hong sihna mitsuanin Ama hong hotkhiatna sungah khamuang takin na kalsuan ding hiam?

 

FRIDAY   September 19

Simbeh Ding: Ellen G. White, “Idolatry at Sinai,” pp. 327–330, in Patriarchs and Prophets.

A maigum ni khatin papi khat in a tapa tawh biakinn khat ( RC biakinnpi cathedral) vapai uh hi. Tua biakinnpi en kawikawi uh a, a kongkhakte a kipan maan tawh kibawl tawlette muhnopsa mahmah uh hi. Tuate in Lai SIangtho tangthute a pulaak tawh kibang liang hi. Tha khatin nitang hong suak a, kongkhak le tawlette tungah biakinn kim a om mi tuamtuamte kimu thei hi. A tapa in a pa tungah dotna khat nei hi. “Pa aw, hih mite kuate hiam? ci-in a dong hi. A pa in Khristian upna thu tam thei lo ahih manin “ hih mite in Khrih ahih keileh Ama nungzuite hi ding hi,” ci-in a dawngkik pong hi; “ Hih mite in Khristian thu-um mite hi” a ci hi. Hih thu in naupang lungtangah a mial ngei lo dingin kigelhpah hi. Ni khat a sangkahna-ah a siate khat in thu dong hi.”Sangnaupangte, Khristian i cih kuate hiam, ci-in a dot ciangin tua naupang in, hun khat lai-in a pa tawh biakinn khat a hawhna vua, biakinn taw-lette tungah thute phawkkik vat ahih manin, “Khristian i cihte pen nitang bangin a taang mite hi,” ci-in a dawngkik hi. Hih tawh kizomin Jesuh in zong a nungzuite tungah thupiak khat nei hi. “Midangte in vantung om na Pa uh amuh theih nadingin na khuavak uh na tangsak un” ci-in hong sawl hi (Matt. 5:16).

 

KIKUP DING DOTNATE

1.  Pasian mai-ah kiniamkhiatin, khat le khat kihehpihna nei-in a nungta hi lehang, tu-in thu-um mi khat a omna munah za khat a om khin ding hi.” Ellen G. White, Testimonies for the Church, vol. 9, p. 189. Hih thu in bangzahin vanglian hiam? I zia le tong in teci hihna-ah huzaap lianpi nei ahihna hong phawksak hi lo hiam?

2.   Pai. 34:6, 7 in Thuciam Lui aa dingin John 3:16 hi, ci-in kiciamteh hi. Bang hang ai diam?

3.  Koi bangin “Pasian in kua hiam, ci-in hong kidong ding hileh Pasian hong kilaakna sikanin (Pai. 34: 6,7) Ama zia le tong deihhuai-na gencian thei ding na hiam?

4.  Pasian thu-um mite nunzia le tong in huzaap lianpi nei ahihna na lawmte tawh kikum in. Cihnopna-ah hehpihna, lainatna, itna, a kiniam khiat, mawhmaisak cihte in hong huzaap hi lo hiam? Tua bang mahin hehpihna nei lo, mawhmai sak lo Khristian khat in Topa tawh na kizopna hong huzaap hi lo hiam?