LESSON 3 | July 12–18

 

LESSON 3 * July 12–18

Kipatna Hamsa

 

SABBATH NITAAK

Tu Kaalsung Simding: Pai. 5:1–23, Mang. 11:8, Pai.6:1–13, Late 73:23–26, 2 Kor. 6:16, Pai. 6:28–7:7.

Kamngah: “Tua khit ciangin Pharaoh kiangah Moses le Aaron pai uh a, “Israel Pasian Topa in hih bangin a ci hi: Ka mite in kei aa ding gamlakah pawi khat a khaam theih nadingun ka mite paisak in,” ci-in a ci hi. Tua ciangin Pharaoah in, “Ama thu mangin Israelte ka paikhiatsak nadingin Topa in kua ahi hiam? Topa ka thei kei a, Israelte zong ka paisak kei ding hi,” a ci hi. (Pai. 5:1, 2 ).

Mi khat peuh in Topa nung zui dingin a khensat a kipan a nuntakna in nuamna, lawhcinna a ngah thei hi. Ahi zongin Lai Siangtho hong hilh bangin tua bangin nopna ngah nading a thu baih hi tuan lo hi. Khat veivei ciangin hamsatna, lunggimna i tuak kha thei hi. Lungkiat theihna, lungimnate i pelh theih hi lo hi. I tel zawh loh thute zong i tuakkha zel hi. Ahi zongin na khempeuhah Topa a muang mite in zawhna a ngah ding uh hi. Tua bangin lungduai-na hangin Topa in Ama sep hun hong tun ciangin tua bang gimna pan suahtakna a hong ngahsak hi. Tua bangin Ama maipha i ngahna in Ama min than nading, Ama vangliat nading hi zaw hi.

I lamet bangin hong piang pahpah thei khol lo hi. Manlang taka nuamna i ngah nuam hi. Tua hi-in tu kaal sung i thusinna om bangin Moses tungah Pasian sawlna bangin Egypt gam a saltang Israel mite a makaih dingin Topa sawlna bangin Moses a kalsuan ciangin Israel mite in suahtakna a ngah thei uh hi. Topa mahmah in Moses hopih a, Topa lametna bangin Moses in zong a sep ciangin lawhcinna a ngah thei hi. Moses in Pasian sapna thei-in Ama sawl bangin a nuntak ciangin bangzahin hampha ahihlam a kiphawk thei ding hi lo hiam? Pasian sawlna a nial ciangin lunggimna tampi thuakkha hi lo hiam?

*July 19, Sabbath a ding kiginkholhna in tukaal lesson sim in.

 

SUNDAY        July 13

Topa in Kua hiam?

 

Pasian thupiakna bangin Moses in Egypt gam panin Israelte a paikhiatpih ciangin (Pai. 3:10), Topa ompihna mu thuah toto hi lo hiam? Topa sawlna a ngah ciangin koi bangin Moses in a dawngkik hiam? (Pai. 5:1, 2); tua thu sungah a thupi bang kimu thei hiam?

Topa in kua hiam? cih dotna tawh kisai-in Pharaoh in Topa theihnopna lungsim tawh a dong hi lo hi, cih kimu thei hi. Topa thu mang nuam a dotna hi lo zaw-in vanglian Topa Pasian a nial nopna lungsim tawh tua bangin thu dong hi. “Topa ka thei kei hi” ci-in kiphatsakna lungsim tawh dong hi zaw hi.

Pawlpi tangthu i sim ciangin Pharaoh lungsim bang nei mi tampi kimu hi lo hiam? Jesuh mahmah in “Hih in tawntung nunna thu hi. A nungta Pasian theihtelna a nei mi in tawntung nunna a ngah hi,” ci-in a pulaak ciangin “Nangmah theihtelna a nei mi khempeuh in Tawntung nunna a ngah uh hi, ci-in a pulaak hi (John 17:3). Egypt gamah Pharaoh kumpipa in Pasian vangliatna a nial kumpite limcing hi; tua bang kumpite in Pasian thu neihna, Ama kammal le a mite a nial uh hi. Tua khit ciangin Pharaoh in “Israel mite ka paikhia sak kei ding hi,” ci-in a pulaak khia hi.

Hih thu in a nungta Pasian thuneihna a nialna kilangsak hi. Egypt pasiante bia-in a nungta Pasian nial bek tham lo-in Vantung Topa a nial hi. Kum tul tampi khit ciangin tua bang lungsim puak a nei leitung kumpite hong khang hi. French gam sung buai-na lianpi a tun laitakin (Isa. 30:1–3le Mang. 11:8) a nungta Pasian le Ama Kammal Lai Siangtho a nial kumpite hong khangkhia uh hi. Lai Siangtho pulaak minam tuamtuamte in a nungta Pasian nial uh hi.

A diakdiakin Egypt in tua bangin Pasian a nial bek tham lo-in a thupiakte zong bangmah a thusim kei uh hi. Moses in Pharaoh tungah a va puak ciangin pharaoh in “Jehovah in kua hiam? Ama thu mangin Israel mite a paikhiatpih ding Pasian in kua hiam? ci-in a to mawk hi. Israel mite ka paisak kei ding hi” ci-in a pulaak hi. Pai. 5:2. Hih in Pasian om kei a ci mite ngaihsutna hi. Milim tuamtuam, pasian tuamtuam a bia Eygpt mite in a nungta Pasian a nial uh hi. Amaute in uplohna le langpanna tawh a kidim uh hi.”Ellen G. White, The Great Controversy, p. 269.

Mi khat in “Topa na thei hiam? ci-in hong kidong hi leh “ka thei mah hi,” ci-in a dawng ding hileh “Pasian in kua tawh kibang hiam?

 

MONDAY        July 14

Hamsat Kipatna

 

A kipat a kipanin Moses in Pasian sawlna in a hamsa thu khat ahihlam thei khin hi mah taleh bang thuak ding cih thu a thei khol kei hi.

Sim in,Pai. 5:3–23. Moses le Aaron in Pharaoh tawh a kimuh uh ciangin bang thu tuak uh hiam?

Pharaoh tawh kimu dingin a pai ma-in Moses le Aaron in upa makaite le Israel mihonpite kaikhawm masa uh hi. Topa kammalte amaute tungah a pulaak uh hi. Mihonpite in Pasian bawl nalamdang tuamtuamte amu ciat uh hi.Tua bang thute amuh uh ciangin mipi in saltanna panin suahtakna ngah ding cih lametna lianpi a nei thei uh hi. Tua ahih manin amaute in Topa a bia uh hi (Pai. 4:29–31). Amaute lametna bang mahin a tawpkhakna-ah Topa in amaute saltanna sung pan suahtakna a pia hi.

Tua ciangin Topa sawlna bangin Moses in Egypt kumpipa kiangah vapai-in a mipihte in gimna lianpi thuak amu hi. Amaute thuakna lian semsem a, nisimin amaute nasep a hamsa semsemta hi. Pharaoh kumpite in Israel mite sep ding a nini-in a khanto uh hi. Thadah ci-in na tampipi sem dingin sawl uh hi. Ngongtatna tampi a thuak uh hi. Nidang sangin tu-in nasep hamsa zaw semsem hi. A makaite uh lungdam lo uh hi. Pharaoh le Moses, Aaron tawh a kizopna uh hamsa semsem hi (hih thu tawh kisai i pulaakbeh lai ding om hi) A mipihte in gimna hamsatna lianpi a thuak toto ding dinmun hong tung hi.

Sim in, Pai. 5:21. Moses le Aaron tawh kimaitang tuah Israel mihonpite dingin kingaihsun in. Bang hangin tua bangin kampau-in tua bangin gamta uh hi ding hiam?

Bang thu hangin Israel mihonpite in Moses tungah heh uh hi ding hiam cih thu kitel hi. “ Topa in note tungah thu hong khen hen!, ci-in amaute in a pulaak uh hi. Amaute in Moses in Egypt gam saltanna sung panin honkhia dingin a ngaihsun uh hi. Ahi zongin tu-in amaute nunzia in hamsa semsem hi. Tua hi-in, Egypt mite tawh kizopna-ah Moses le Aaron in a mipihte tungah Topa deih thu limtakin a pulaak ding hi ta hi.

Pawlpi makaite tawh kizopna-ah koi bangin kalsuan lecin hoih zaw ding hiam? A diakdiakin a kipelh thei lo kithutuah lohna hong om ciangin amaute tawh bangci bangin kizopna nei ding kisam hiam?

 

TUESDAY      July 15

Keimah Pasian

 

A hehpihhuai Moses! Moses in Pharaoh hehna le taii a thuak masa hi.Tua khit ciangin a mipihte samsiatna thuak leuleu hi. Tua hi-in Moses in Topa tungah a lungkimlohnate a pulaak hi. Israel mite gim thuakna amuh ciangin Moses in lungkiatna lianpi le lungsim gimna lianpi a thuak hi. Na mite na honkhia kei hi,” ci-in pulaak hi” (Pai. 5:22, 23). Moses in a mipihte gim thuakna amuh ciangin Topa tungah lungdam ko hi. Amaute in Topa ompihna vanglian hi mah taleh, Topa in lamdang takin amaute a honkhia ding hi. “Tu-in en in Pharaoh tungah ka bawl ding thu na mu ding uh hi”

Sim in, Pai. 6:1 le Pai. 5:22–6:8. Pasian in Moes tungah bangci dawnkik hiam?A thupi bang thu thuthuk kipulaak hiam?

Pasian in amaute tungah thu gen nawn lo hi. A mite lamdang takin maipha a pia hi. Moses in midangte ngah loh thute a ngah hi: (1) Keimah in Topa ka hi hi 2) Na pu na pate tungah ka kilaak hi. (3)Amaute tawh thuciam ka bawl hi (4) Amaute luah ding Canaan gam kamciam ka pia hi 5) Israel mite gimna, tau-nate ka za hi (6) Khapsa Gam ka piak ding kamciam ka phawk hi. Pasian kamciamte in bang zahin muanhuai hiam? Keimah in note Topa Pasian ka hi hi, Ka kamciamte a tangtun nadingin keimah in ka sem ding hi. Tu-in Topa in a bawl ding nalianpi 4 te a ban a banin a pulaak hi. 1) “ ‘Egypt mite hakkol panin note kong honkhia ding hi. (2) “ Amaute sal hihna panin kong suakta sak ding hi. (3) “ A vanglian ka khut in note kong kai khia ding hi. (4) “ Ka mite ahi dingin note kong la ding hi. Keimah in note Pasian ka hi ding hi.” (Pai. 6:6, 7).

Pasian nasep thu 4 te in a mite tawh a hong kizopna hong bawlpha ahihlam hong hilh hi. Tua khempeuh a tangtun nadingin a sem a bawl Topa mah ahi hi. Israel mite in tua hehpihna thupha khempeuh a luah thei uh hi. Pasian in itna a pia khong hi. Itna hangin a piak ahi hi.

Lai Siangtho sunga makai tampite in Pasian mai-ah a lungkim lohnate uh a pulaak zelzel uh hi. Tua bangin a pulaak uh ciangin thu hoih vive hangin tua bangin lungkim lohna a pulaak uh hi.

Bang hangin tua thute in thu hoih (OK) ci thei ding hiam? Khat veivei ciangin lungkhamnate uh le a tuah hamsatnate hangin tua bangin Topa mai-ah a kilaak uh hiam? Bang hangin upna le muanna tawh kalsuan dingin thupia hiam?

 

WEDNESDAY               July 16

Vun ki-at lo Mukte (A sianglo kampauna)

 

Topa in Moses tungah a vanglian kamciamte a pia hi; a sawt lo-in a sep ding thute a pulaakna kimu thei hi. Tua bangin vanglian thute mu hi mah taleh a mipihte kiang pan a zak thute hangin Moses in lungkiatna tawh a kidim hi.

Sim in, Pai. 6:9–13. A pulaak thu khit ciangin bang thu piang kimu hiam? Tua thute panin bang thute nuntakpih thei ding i hiam? Lungkiatna le hamsatnate lak pan nuntakpih ding bang thu kimu thei veve hiam?

Amaute gimna, hamsatnate hangin Hebrew mite in lungkia uh hi. Moses pulaak Pasian kammalte ngai lo uh ahih manin nasep hamsa a semkha uh hi. Topa in a kamciam bangin a tangtungsak ding hi. Tua bangin a tangtun nadingin hun sawtpi a ngak ding uh hi. Amaute lamet hun sungin a tangtunna amu kei uh hi. Bang hangin tu-in kilamdang tuannai lo hi ding hiam? Amaute in lametna bei-in lungkia uh hi. Bang hang hiam cihleh a nuntakna vuah hotkhiatna ngah ding lametna lian a nei uh hi. Lungkiatna, nawlkhin thuak ngei lo kua om ding hiam? Pasian tawh kigamla-in a nungta mihingte hi lo i hiam?

Job nunzia na phawk kik ding hi lo hiam? Asaph in zong tua bangin lamet bei-in, lungkiatna thuak hi lo hiam? “ Tua bangin gim thuakna lakah nang kong ompih tawntung ding hi. Na taklam khut in keima nong lenkip hi. Ahi zongin Topa aw Nang in keima tha le ngal, keima minthanna na hi tawntung ding hi” (Late 73:23–26). Amah in a mite tawh a hong omkhawm tawntung hi ( Isa. 41:13, Matt. 28:20). Topa in Ama lungnopna a hong pia hi. Amah in tha hong guan hi.Amah in hamsatna khempeuh tungah zawhna a hong guan Pa hi (John 14:27; John 16:33; Phil. 4:6, 7).Thuciam kipulaakzia in “Note keima mi dingin kong bawl ding hi. Keimah in note Pasian ka hi ding hi. (Pai. 6:7), hih in naitakin kizopna pulaak hi. A mite tawh tua bang kizopna a lamen tawntung hi. “ Ka mi ahi dingin note kong la hi; Keimah in note Pasian ka hi ding hi” cih thu ngaihsun in.” (Pai.6:7).

Tua bangin Topa in a pulaakna-ah mi khat bek tungah a pulaak hi lo hi; Israel mihonpite tungah a pulaak thu ahi hi.Tua hi mahleh ei mimal khat ciat aa dingin koi bangin nuntakpih ding thu hong suak thei hiam? Nisim i nuntakna-ah tua thu in koi bangin kilang ding kisam hiam? (2 Kor. 6:16.)

 

THURSDAY       July 17

Pharoah mai ah Pasian tawh kibang

 

Sim in, Pai. 6:28–7:7. Moses in Topa sawlna a nial ciangin koi bangin Topa in a dawngkik hiam?

Topa mahmah in Moses tungah Yahweh ci-in a kilang hi. A khiatna in Topa in mimal kizopna a deih Pasian, mihingte in Amah tawh kinai takin kizopna a deih Pasian a mite lakah a teeng nuam den Pasian hi; a mite tawh thuciam bawl Pasian hi, cih hong hilh hi. Mihingte lakah a hong om Topa in Pharaoh mai-ah va ding dingin Moses a sawl hi. Moses in amah le amah kimuang zo lo ahih manin Topa sawlna a nial thapai hi. “ Bang hangin Pharaoh in ka thugen hong ngai ding hiam? “Topa in Pharaoah mai-ah kilaak dingin Moses sawlkik a, Moses in amah le amah kimuang lo hi. “Aral sepatayim” cih ciangin “ vun ki-at lo muk”cihna hi. Moses in ama tha tawh thugen ngam lo hi, cih a pulaakna-in a kizang kammal hi (6:12, 30); thugen siamna nei lo, cih a pulaak kammal hi. Pai.4:10: ‘pau zia ol” ci hi.

Topa in Aaron tungah a hehpihna lakin Moses huh dingin a sawl hi. Moses in Aaron hopih ding a, Aaron in Pharaoh tungah va pulaak khia kik ding hi. Tua hi-in Moses in Egypt kumpi Pharaoh mai-ah Pasian bangin thu a gen ding hi. Aaron in ama kamsangpa hi ding hi. Hih in kamsangte nasep hong hilh hi. Kamsang i cih in Pasian aa dingin mite tungah thugenpa hi. Pasian in mihingte aa dingin a thute kamsangte tungtawnin a hong pulaak hi. Pasian sawltakte hong suak uh hi. Pasian kammalte mihingte tungah a hong puak kamsangte ahi uh hi.

Tua bangin Moses in Topa tung pan a ngah thute Aaron tungah pulaakin, Aaron in Pharaoh tungah a pulaak sawn hi.Tua bangin Topa in kamsangte tungtawnin a mite tungah hong hilh hi. Moses in zong Topa gen bangbang Aaron tungah pulaakin Aaron in zong Pharaoh tungah a pulaak khia thei hi.Topa in Pharaoh tungah vauhilh kholhna tampi a pia hi. A nihna-ah Pharaoh in a lungtang khauhsak ding ahihna thu limtakin Moses tungah a kipulaak hi (Pai. 4:21, Pai. 7:3). Tua hangin Topa thu a man loh uh ciangin Egypt mite in gimna lianpi a thuak uh hi. Tua bangin a thuakna panun Topa Pasian in a nungta Pasian ahihlam amu thei uh hi (Pai. 7:5). Cihnopna-ah gimnate lak pan Pasian vangliatna kimu thei hi.

Pasian sawlna a nialna-ah Moses in a paulap ding bangmah om nawn lo hi. Pasian hong sawlna mang lo-in bang paulap na nei zelkha hiam?

 

FRIDAY              July 18

Simbeh Ding: “The Plagues of Egypt,” pp. 257–265 in Patriarchs and Prophets.

Moses in Pharaoh mai-ah a va kilak khit ciangin Israel mite in gimna lianpi a thuakbeh zaw uh hi. “Kumpipa hehna hong so vat a, ama ukna langpang nuam uh hi ding hi, ci-in a ngaihsun hi. Nasep thadah ci-in nidang sangin a zah tampi sem dingin thu a pia hi.Amaute gimna a kibehlap hong suak hi. Amaute in pumpi bek tham lo-in a lungsim ngaihsutna khempeuh uh zong saltang dingin a vaihawm uh hi. Tua ni mahin amaute kinengniam nading, gim thuak nading thu a kipiapah hi. Tua hun laitakin Egypt gamah leisek bawl nading van kisam ngah hamsa semsem hi. Leisek a bawl uh ciangin nitang ah keusak uh a, tua hi-in buhtu halin leisek a keusak uh hi. A buhtu ding uh pia nawn lo-in amau le amau in zong tawm dingin thu kipia hi. Tua bangin buhtu kipia nawn lo-in Egypt mite in amau le amau in a zong tawm kawikawi ding uh hi. Gam sung mun tuamtuamah kithehthangin buhtu a zong uh hi. Amaute a uk Egypt ukna nei mite in Hebrew makaite nasepzia a uk uh hi. A kipiak bangin nasepte a zo zo uh hiam ci-in a encik dingin makaite a koih uh hi. Kumpipa thupiakna in khauhtakin kipia ahih manin mite in mun tuamtuamah kizel mang khin uh hi. Tua bangin buhtu zongin a pai-na vuah nidang sangin tu-in leisek a bawl ding zah uh a ngah zo nawn kei uh hi. Hih thu hangin Hebrew makaite in nakpi-in sat a thuak uh hi.” Ellen G. White, Patriarchs and Prophets, p. 258.

 

KIKUP DING DOTNATE

1.      Na nuntakna-ah Pasian sapna na za thei hiam? Tua bang hunte ngaihsun kik in. Tua bangin Pasian sawlna bangin na kalsuan ciangin hamsatna zong na thuakkha ding hi. Tua bang thute panin bang thu na mu hiam?

2.     Topa huh ding na nget ciangin koi bangin Topa in hong huh hiam? Ahih keileh na lamet loh thute na thuakkha hiam? Koi bangin hamsatna lakah Pasian hoihna na mu thei hiam?Topa a muang mite in tua bangin gimna a thuak uh ciangin Pasian hoihna na mu thei veve hiam?

3.     “Topa ka thei kei hi,” a ci mite tungah bang na gen ding hiam? Ahi zongin siatna bawl lo hi mah taleh a nunzia in Topa tawh kigamla mi hi lo hiam? Koi bangin tua bang mi in Topa a theih nadingin na huh thei ding hiam? Bang hangin tua bang thu in thupi hiam?