LESSON 12 *June 13–19 Ama Thu Gensawn In

 

LESSON 12

*June 13–19

Ama Thu Gensawn In

SABBATH NITAK

Tu kaal sung sim ding: Matt. 28:18-20, 2 Pet. 3:18, 1 Pet. 3:8-15, Hosea 7, Zechariah 10.

Kamngah: “A gimte tha ka piak theih nadingin Topa PASIAN in mi pilte bangin kampau siamna hong pia hi. Amah in zingsang simin hong phong a, Mi pilte bangin ka zak theih nadingin ka bil hong honsak hi” (Isaiah 50:4).

S

abbath ni khat pastor G in manlah mahmah hi. Zingsang lol mahmahin tho a, Sabbath School biakpiak nading le thugen dingin kigingkhol hi. Zingsang kikhop khit ciangin nitak lam ciangin Pasian thugenna khatah a makai ding hi sawnsawnlai hi. A tawh manlang takin la-in, inn sung panin pusuak samsam hi. Khua sung lampite mawtaw tawh kidimin a mawtaw nawh hawl theih om lo hi. A heh suakin biakpiakna hun maanin tung zo lo uh hi. Hih mite in koi lam manawh ciat uh hi ding hiam? A mai-a pai mawtaw khat tha khat thu-in khawlvat ahih manin mawtaw kitaih kha dektak ahih manin a heh suak mahmah hi. A tawpkhakna-ah pastor in a kikhop nading mun hong tungsam hi. Lesson hilh ding hong kipan a, a et kawikawi ciangin amuh ngei, a theih ngei leengla kikhawm khat amu hi. Tua mipa in kuadang hi lo hi; den a mai-a mawtaw hawlpa ahihlam a khua-nung theih hi.

          A den ciangin pawlpi upa khat in pawlpi mite tungah pulaakna nei a, tua mipa in SDA thu zui mi hi nai lo, leengla hong kikhawm khat hi. Pawlpi mite khat ii sanggam tanau khat hi, ci-in kipulaak hi. Tua hun a kipan pastor G. in a theih ngei loh mi khat ahih hangin hehpihna, itna lak ding thupi ahihna a telpha semsem hi. Na gamtatna in huzaap lianpi nei ahihna kimu thei hi. Midang khat ii nunzia khawngkha thei, sukha thei ahihlam phawk tawntung in.

 

* June 20, Sabbath ading kiginkholhna in tu kal lesson sim in.

SUNDAY

June 14

A Dimlet

“Sawlna Lianpi” thu Matthew 28:18-20 sung pan sim in. Jesuh in “khempeuh” a cihna sungah le “tawntung” cih sungah bang thute kihel ding hiam, gelhkhia in (Greek tawh kigelhna-ah kammal khat “pas” bek kizangkhawm hi).

          Jesuh in a kipelh thei lo sawlna hong pia hi. Ama thupuak in leitung mun khempeuhah kipuak ding hi: “Tua ahih ciangin pai unla, nungzui suaksak un.” Seventh-day Adventist Pawlpi nasep in/masuan in thu-um mite nungzui suaksak ding hi; nungzui khat in midangte zong nungzui suaksak ding masuan nei hi. Pawlpi nasep in thu-um mite nungzui suaksak ding hi; nungzuite in midangte zong nungzui a suaksak ding uh hi. Tua hi-in tawntung lungdamna thu pulaak ding le vantungmi thumte thupuak tangko ding hi (Mang. 14:6-12); Jesuh hong pai baih ding midangte kigingkholsak dingte ihi hi. Khrih sungah nunna thak a nei mi in Ama aa ding teci hi dingin Topa in hong deih hi. Ahi zongin midangte in teci pang thei ding, pang thei lo ding cih thu tungah kinga lo hi. Lamdung mun khat peuhah mun la inla, hotkhiatna thu na gen thei hi; ahih keileh van zuakna mun khatah ahih keileh inn khat peuhah na pulaak thei hi. Lai Siangtho simpihna zong na neihpih thei hi. “Kei sep ding hi kei” “Kuamah tawh kiho ngam keng, ka maizum ci kei in.” Bangbang ahi zongin tecipanna mantak tak in Pasian in na nuntakna sungah bang hong sepsak thute na pulaak thei hi. Ama thu sungah na khangto to thei hi. Na tuah thute midangte tungah zong na pulaak thei hi. Pasian in hoih hi; nang aa dingin a hoih pen hong sepsak hi. Midangte zong a zaknop penpen thu, tawntung lungdamna thu ahi hi. Tua hi-in tua thu gen loin daitakin om ding i hiam?Amah in nang hong hon hi; amah in na min hong thei hi; na min tawh hong sam hi. Nang in Ama mi na hi hi.

Hih thu sangin a hoih zaw bang thu om ding hiam? Pawlpi masate/ nungzuite in pilna siamna, thugen siamna bangmah nei lo uh hi mah taleh amaute tung pan i sin ding thu tampi om hi lo hiam? Peter le John thugenna hangin midangte tungah bang huzaap nei hiam?

          Peter le John in hih bangin a pulaak uh hi: “Banghang hiam cihleh kote ka hih uh leh ka muhsa ka zaksa uh thute gen loin ka om thei kei uh hi,” a ci uh hi (Sawl.4:20). “Tu-in amaute in Peter le John hansanna mu uh a, amaute in Jesuh tawh a om khawm uh hi” (Sawl. 4:13); midangte tungah gen loin a om mawkmawk thei kei uh hi. Kha Siangtho in amaute hangsanna lungsim a guan hi. Amaute kammalte in vangliatna nei-in lungsim kimuanna a nei thei uh hi.

Tu mahmahin thungen inla, ki-apna nei in. Pasian makaihna na ngen ding hi. Lungsim hangsanna nan gen ding hi. Ama aa ding teci na hihna-ah langpanna tuamtuam lau lohna, hangsanna bang hunin bang thu gen ding, bang gen ding cih Kha Siangtho makaihna na ngen ding hi.Pilna in gen ding hun le bang gen ding thu cihte theihtelna hong guan ding hi. 1 John 4:7-11 sim inla, itna nei dingin thungen in.

 

MONDAY

June 15

Ci Le Sa Hatna Hi Lo, Pasian Vangliatna

          Jesuh in nisimin tatsat loin nasemin mite thapia-in, lungnopna thu pulaakin, thuhilhna nei-in cinate damsak hi ding hiam, ci-in na ngaihsun ngei hiam? “Jesuh in mi honpite a et ciangin hehpihhuai a sa mahmah hi; bang hang hiam cihleh amaute a cing om lo, a thabei, a kithehthang zelzul tuute tawh kibang uh hi” (Matt. 9:36). Tua in Jesuh itna le hehpihna in nasep tha a guan hi. Tua bang mahin eite in zong itna le hehpihna lungsim tawh nasem ding ihi hi; a mangthang ding mite Honpa kiang a tunpih ding ihi hi (2Kor.5:14).

          Mite mai-ah khualmi bangin na kingaihsun hiam? ahih keileh midangte mai-ah tawntung nunna a zuan mi na hi hiam? Pasian hong itna in na nuntakna-ah bang hong sem hiam? Na theih ngei loh mi khat tungah itna, hehpih theihna lungsim na nei hiam?

          Pasian hong itna in na vangik hong thuakpih hiam? Jeremiah in hih bangin a pulaak hi: “Tua ciangin Keimah in “Amah ka gen kei ding a, Ama min tawh thu ka gen nawn kei ding hi” ka ci hi.” (Jer. 20:9). Tua hi-in midangte tungah Pasian thu i pulaak ciangin, zawhthawh thu tawh Pasian thu um dingin zawhthawh thu tawh kisawl thei lo hi. Mi khat in Lai Siangtho thuman sang ding le Amah mah sang dingin tha tang hatna tawh kisawl thei lo hi. Ama deihtelna zangin, ama khensatna tawh a khensat ding ahi hi. Tua bangin zawhthawh thu tawh sawlna in Pasian zia le tong tawh kituak lo hi. Adam le Eve in sia le pha theihna singkung kiang pan in bantangkaih lo hi (Pian. 2:16, 17). Tuiciin tunlai-in tembaw sungah a lut dingin Pasian in bangtangin kailut lo hi (Pian. 7:1). Israel mite in Amah tawh a thuciamna sungah kip den dingin Ama vangliatna zang lo hi (Thkna. 4:29-31). Tua sangsikin Amah in amaute kitangsapnate a pia hi (Matt. 4:23-25), tua khit ciangin Ama nungzui dingiin a sam hi. Jesuh in Ama nungzui ding le Ama thuman sang dingin kuamah bangtangkaih lo hi; Amah in eite tungah ciampel ngei lo hi (Matt. 23:37).

          Ama aa ding teci hi dingin hong koihna tawh Jesuh zia le tong a kilangsak ding ihi hi. Ellen G. White in hih bangin pulaak hi: “Khrih nasepna-ah ut leng ut ta kei leng, Ama sapna a dawng dingin hong sawl ngei lo hi. Tua bangin zawhthawh thu tawh nasep in Satan sep hi. Mihingte deihtel theihna langpanin, thagum hatna zangin ama nungzui dingin hong sam hi. Tua bangin mi khat ii lungsim ngaihsutna palsatin sepna, langpanna in Satan lungsim hi.       Thu upna kibatpih loh mite tungah ngongtatna, thu zawh tatna in Satan lungsim hi.” The Desire of Ages, p. 487.

          Pasian nasem dingin i nuntakna khempeuh a kipumpiak ding ihi hi. Thuman mudah mite lakah a nungta mite ihi hi. Ahi zongin itna nei lo ding, thuman nuntakpih lo ding ihi kei hi. Mimal teci panna a nei zelzel ding ihi hi. Thuman teci panna-ah a pulaak bek hi loin a nuntakpih takpi ding ihi hi (Mang. 12:11).

2 Peter 3:18 sim in. Hehpihna le thuman theihna-ah khantohna lampi in koi bang hi ding hiam? Koi bangin thu in midangte tawh na kizopna-ah kilang hiam?

 

TUESDAY

June 16

Jesuh Thu Hilhna Hong Huh Thtei Thute

          I kidot ding thu khat in: Kua tungah Jesuh thu na gen hiam? Laihawmte tung, lai-atte, vanzuakte, lokho mite tungah na hawm hiam? Nisim na kimuhpih, na kizoppih mite tungah na pulaak hiam? Mimal khat ciat in Topa nasem dingin sapna ngah ihi hi. Ama kamciamte “A gimte ka piak theih nadingin Topa Pasian in mipilte bangin kampau siamna hong pia hi. Amah in zingsang simin hong phong a, mipilte bangin ka zak theih nadingin ka bil hong honsak hi (Isa. 50:4). Khristian khat ciat i tavuan, i masuan in i upna thu hong kidongleh a dawngkik thei dingin (apologia) kiging tawntungin i om ding kisam hi; lametna thu i neih thute zong a pulaak thei ding ihi hi (1 Pet. 3:15).

1 Peter 3:8-15 sim in. Pasian thu bang hong hillh hiam?

          Midangte tungah Jesuh thu pulaak ding, gen theihzia ding a nuai-a thute in hong huh thei ding hi.

·  Na theih ngei loh mi khat tawh kimeltheihna nei in; kizopna nei dingin hanciam in. Itna, hehpihna, na lungsim takpi tawh kizopna nei in. A ithuai lo mite Topa kiang a zuan ding ihi hi. (Mi kim khat in kilawmtatna tungtawnin Pasian thu genna)

·  Kha Siangtho ompihna ngah nadingin thungetsak in. Kha Siangtho in lungsim lawng/ khel thei hi. Midangte tawh kizopna lampi na neih nadingin thungen in.

·  Na up thu pulaak in. Amaute aa ding thungen in. Mite lungsim a lawngkha dingin thungetna nei in.

·  Mi thak khat peuh tawh kimel theih nading lampi zong in. Tua bangin na upna hong mu thei ding uh hi. Amah zong na upna sung hong lut thei ding hi. Lai Siangtho thusin khopna tuamtuam nei in.

·  Amaute kitangsapnate Topa tungah pulaak in. Topa thupha na ngen ding hi. Lai Siangtho sinkhopna na neih theih nading thungen in. Na nunzia kimakaihna na ngah nading thungen in. Lai SIangtho sunga kamciamte na pulaak ding hi. Thuthuk pipite na tel zawh nadingin thungen in. Dotna tuamtuamte na dawnkik theih nadingin thungen in.

·  Na lawmte lunggulhna na zuih hun zong om ding hi. Lai Siangtho thusinna pan tuiphum nopna lungsim a neih nadingun na makaih ding kisam hi. Tua bang dingin nawhlua kei in. Damdamin na paipih ding hi.

· I gamtatnate in kua ihihna a kilangsak uh hi. Midangte i bawlzia in i zia le tong a kilangsak hi. I zia le tong in Khrih zia le tong a kilangsak ding kisam hi. Ama siantho-na a nei dingte ihi hi. Tua ciangin mite in i thugente ne thei ding uh hi.

WEDNESDAY

June 17

A Gammang Tapa

          Tate hangin lunggim thuak kha lo kua om ding hiam? Biakna tawh kipantah innkuan hi mah taleh tate in lampialkha thei hi lo hiam? Topa tawh kizopna panin lampial ta om tham lua hi.

Ephraim in Pasian teeltuam minam hi. Ahi zongin Topa a zuihna panin lampial hi. Hosea 4:17 le Hosea 7 in Ephraim mawhna bang pulaak hiam?

________________________________________________________________

________________________________________________________________

          Bek tham loin Rachel, Ephraim tu nu in khitui luang hi. Bang hang hiam cihleh Ephraim in Topa tawh kizopna panin lampial hi (Jer. 31:15). Topa in ama thuumna a pia hi. Jeremiah 31:16, 17 sungah hih bangin kipulaak hi: “ ‘Na kahna aw gingsak nawn kei inla na mit panin khitui luangsak nawn kei in. Banghang hiam cihleh na nasepna thaman hong kipia ding a, galte gam panin maute hong ciahkik ding uh hi,’ Topa in ci hi.”

A mangthang tapa aa ding a kah sangin Rachael in lametna tawh kidimin a nungta hi. Jeremiah in bang lametna dnag hong hilh lai hiam? Jeremiah 31:18, 19 sim in.

________________________________________________________________

________________________________________________________________

          Ephraim le Gomer in lametna nei ahih bangmahun, eite in zong lametna nei ihihna thu kimu thei hi. Bang hang hiam cihleh Topa Pasian in eite tungah ciampel ngei lo hi. Pasian in a nungkik mite thu hilh hi mah taleh Pasian hong itna in bei ngei lo hi. Amah in eite lam hong lak tawntung hi (Jer. 31:20).

          Gimna, lungkiatna, thaneemna tuamtuam i phu kha zongin, lampialin i om kha zongin Topa in eite hong nusia ngei lo hi. Topa in a taimang mite hong nungheisan ngei lo hi; hong nusia ngei lo hi. Ahi zongin lungsim takpi tawh Ama kiang zuan dingin hong sam tawntung hi. A taktakin Topa Pasian in mimal khat tungah a lungsim hong om den hi. Ama kiang zuan dingin hong deih hi. Ama hehpihna in lian mahmah hi.

Koi bangin Pasian in Rachel gim thuakna amu hiam? Ephraim nungtolh in na ngaihsut ciangin Topa tawh na kizopna bang hong cimuh ding hiam? Koi bangin hih thu in na upna hong kipsak zaw hiam?

 

THURSDAY

June 18

Amaute Hong Tunpih In

          I thaneem ciangin, Topa tawh kizopna thaneem ciangin, na zuih thuman tungah cihtak lohna nei-in, sa lah sa lo, vot lah vot loin kum sawtpi na om kha ding hi. Topa tawh kizopna neikik dingin bang in hong tunpih hiam?

Zechariah 10 in Pasian mite in Ama kiang zuankikna thu etlawmna a pulaak kimu thei hi. Topa mahmah in a mite Ama kiang hong tunpih ahihna kimu thei hi. A nuai-a Lai Siangthote lungsim ki-apna tawh sim in.

          I nuntakna-ah Topa kiang pan a paikhia i sanggam khat, i it, i ngaih khat in thuman panin lampialin hong om ciangin i lungsim hong sukha hi lo hiam? Tua bang mi in Topa kiang hong tunkik ding hamsa hi lo hiam? I lamet bang loin, upmawh bang loin thu le nate kihei hi lo hiam? Tua bangin thuman lampialte in ngaihsutna dang khat tawh tua bangin Topa nusia uh hi. Amau ngaihsutnate in lametna nei lo hi. Khensatna gina lo panin tua bang khensatna nei uh hong suak hi. Amaute ngaihsutna in hong huzaap thei veve hi. Tua ahih ciangin thuman panin lampial khak loh nadingin Honpa tawh tatsat loin kizopna kisam hi. I ngaihsutna in gamtat luheekna huzaap hi. Honpa tawh kizopna tungtawnin i ngaihsutnate Ama deihna bang hi ding a, Ama deihna bangin hong kalsuansak ding hi.

          Nunzia, na gamtat, kampau-nate in thuman teci panna hisak in. Topa kiang pan a paikhia na lawm itte in Topa kiang lam hong zuan kik dingin Topa tungah thuumna neihsak in. Amaute in kikhelna nei-in Topa a zuankik thei ding uh hi.

Luke 22:31, 32 le John 21:15-17 sim in. Jesuh thungetna in koi bangin Peter khel hiam? Dahna, lungkhamnate Topa kiang tun in. Topa kiang pan lungnop, khamuanna ngah dingin na ngen ding hi. Topa in amaute mawhna maisakin Ama thu sungah nuam a sa thei ding uh hi. Topa zia le tong in hong tuamin, itna nei-a, angsung khual lo nunzia a nei thei dingin Topa ompihna na ngen ding hi. “Angsung zong lo, midangte aa ding deihsakna sangin a lian zaw, Gospel vangliatna, Khristian zia le tong hoihna a kilangsak dang a om kei hi.”Ellen G. White, The Ministry of Healing, p. 470.

          Tatsat loin Khrih tawh kizopna hangin midangte aa dingin limpha a suak thei hi. Khrih tawh kigamla mite in nang nunzia tungtawnin Khrih kiang zuan lamlak na hilh thei hi. Topa bek hong piak theih nopna na ngah thei hi. Bek tham loin midangte in leitung hong piak theih loh nopna a mu thei ding uh hi. Topa sunga lametna in leitung hamsatnate tungah zawhna hong guan hi ding hi. Pasian hong itna in bei ngei lo hi; a tawntungin siatna tungah zawhna hong ngahsak ding hi. Ama kiang pan hong pai itna bek mah in midangte tungah itna hong neisak thei hi. Nisimin tua itna sungah na nungta ding a, midangte tungah zong tua itna na hawnsawn thei hi.

Tua bangin na kalsuan zawh nadingin Eph. 3:17-19 in bang hong guan hiam?

 

FRIDAY

June 19

Simbeh ding: “Bangbang upna, nunzia tawh na nungta zongin, na sanggampa itna na neih keileh Pasian itna na nei thei kei ding hi. Ahi zongin Pasian itna nei lo mi khat in midangte zong a it thei kei ding hi. Tua hi-in bang kisam hiam, i nuntakna-ah Khrih itna i kisam hi. Khrih sungah angsung khualna i phum ciangin itna hong phul khia tawntung ding hi.”Ellen G. White, Christ’s Object Lessons, p. 384.

          “Lawpna tawh Khrih aa ding nasem mi in a mangthang mite Ama kiang a tunpih ding uh hi. Tua bang mite in biakna-ah lawpna nei-in, a nuntakna khempeuh uh a ki-ap mite ahi ding uh hi.”Ellen G. White, Evangelism, p. 356. “Siatna nial zawhna tha in galpa do-na pan kingah hi.”Ellen G. White, The Acts of the Apostles, p. 105. “Ama sungah nuamna ngah nadingin, Ama tatsa mite hotkhiatna nasepna-ah Amah tawh sep khopna in a bei ngei lo nuamna hong ngahsak ding hi.”Ellen G. White, The Desire of Ages, p. 142.

          “Khrih tawh nasem khawm ding hamphatna ngah napi a nial mite in Ama nasepna hangin vangliatna sungah a kihel kha kei ding uh hi.”Ellen G. White, Education, p. 264.

Kikup Ding Dotnate:

1. Bang hangin itna in thuman tecipanna-ah muibun nading a thu bulpi hi thei hiam?

2. Thuman tawh nungta mi na hih ciangin Topa tawh kizopna-ah nuam nasa semsem ding a, a mangthang mi ngahna-ah lawhcinna na mu ding hi.

3. Bang thu siksanin midangte tungah Pasian hong itna hawmsawn ding i hiam?

4. Thu-um lo mite tungah Lai Siangtho thusinpihna nei ding hi lecin, bang thu tawh na pan ding hiam? Bang thu na bulphuh ding hiam? Thu up thute pulaak masa ding maw, ahih keileh Jesuh theih ding pulaak zaw ding maw?

5. “Tatkhiat” cih lamalte ngaihsun in (The Seventh-day Adventist Hymnal, no. 338) Tua thute pulaak in.

 

Tomgenna: Nisim i nuntakna-ah Pasian hong itna, a vanglian Ama Kammal tawh a nungta hi lehang, i hihna khempeuhah itna kilang ding a, i kim, i pam mite in tua itna amu thei ding uh hi. Tua in a vanglian thuman teci panna, Ama Kammal upna, “Ka kam pana pusuaksa ka kammal zong tua bang ahi hi; a hawmin kei kiangah hong kileh lo dinga, ahi hangin ka deih bangin tungsakin ka sawlna ah lawhcing ding hi. Ama kam pan a pusuak thute in, guaktangin hong kilehkik lo ding hi, cih thu a tangtunna hi ding hi.” (Isa. 55:11).