LESSON 13 *June 20–26 Tawntung Hun Sungah

LESSON 13

*June 20–26

Tawntung Hun Sungah

SABBATH NITAK

Tu kaal sung sim ding: Late 80, 1 Thess. 4:17, Mang. 21:9-27, Isa. 25:8, Mang. 7:17, Mang. 21:4, John 6:44.

Kamngah: “Kong it lawmte aw, tu-in eite, Pasian tate i hi a, mailamah bang i hi lai ding hiam, hong kitheisak nai lo hi. Ahi hangin amah hong kilat  ciangin amah ahi banga mu ding i hih manin amah i bang ding hi cih i thei hi.” (1 John 3:2).

M

ailam hunah bang lametna na nei hiam? Bang thute hong piang ding hiam? Lauhuai thu maw, lungdam nading thu maw, dipkuat nading thu maw? Hih thute hong tung takpi ding ahihna kimu thei hi. Jesuh in hong hilh kholh bangmahin hong tangtung takpi ding hi (Mang. 3:14). Lauhuai hunte hong tung lai ding hi (Matt. 24:21, 22), ahih hangin Jesuh hong kamciam bangin “Note kong nusia ngei kei ding hi” (Heb. 13:5). A kamciam bangin hong ompih takpi ding hi; Amah in kampel ngei lo hi. A beisa hunin hong ompih mah bangin mailam hunah zong hong ompih ding hi (Heb. 10:23). A bei dongin a citak mi in hotkhiatna a ngah ding hi (Matt. 24:13).

          Leitungah bangtan vei nungta zongin Jesuh mitsuan ding a thupi pen hi. Tatsat loin mitsuan ding kisam hi. Leitung nopsak nadingte lakah Jesuh mitsuanin nuntak khuasak ding a thubaih hi lo hi; i lungsim hong la khia thei thu le la tuamtuam tampi lakah, David bangmahin “Topa aw, Nangmah kong mitsuan theih nadingin ka mit hong honsak in. Siat theihna thaang panin ka khe hong dalsak in” ci-in thu nan gen thei hi (Late 25:15). Tu kaal sung i sin ding thu in vantungah thaman hong kipia ding ahihna thute i kikum ding hi (Matt. 5:12, Mang. 22:12); vantung in bang tawh kibang ding hiam? A tawpna-ah, eite hong Piangsakpa, hong it ahih manin sihna hong thuakpa, tawntung sih nading panin hong Honpa in sawt loin hong pai ding a, Amah tawh a nungta tawntung dingin hong la to ding hi, cih thu in lamdang mahmah hi lo hiam? Hih thu khutletin nei-in, tua hun hong tun mateng upna tawh a kalsuan ding ihi hi.

* June 27, Sabbath ading kiginkholhna in tu kal lesson sim in.

SUNDAY

June 21

Tuni Nungta

          I kim le paam i et ciangin leitung in gimna, natna, hamsatna vive tawh kidim hi lo hiam? hih thute in Jesuh hong gen kholh mahbangin Ama hong pai kik ding nai ta ahihna hong hilhhilh hi lo hiam? Gal, gam le gam khat kilangneihna, kido kikapnate, kial, natna gilo tuamtuamte, zinlinna, thu-um mite kibawlsiatna cihte in leitung bei ding nai ta ahihna hong lak hi (Matt. 24:6-11). Hih gimnate in ni khat khit ni khat hong tam semsem hi. Hi mah hi. Leitung hun sia sungah a nungta ihi hi. Topa sungah i nuntak ding hun mahmah ta hi. “ Na khempeuh a beina nai ta hi. Tua ahi manin thu na nget theih nadingun lungsim siangtho le no le no ki-uk zoin om un’ (1 Pet. 4:7). Tua hi-in, tu-in a hong tung ding vantung vangliatna sung a lut thei dingin a kiging khol dingte ihi hi. Tua bangin a nungta mi in Topa tawh kizopna kip a nei mi hi ding hi. Leitung hun bang tan om lai ding bangmah i thei kei hi. I nuntakna in mitphiat kalin bei thei ahih manin eite aa dingin leitung bei hun nai tawntung den hi. Bangtan, bangtan i nungta zongin ei aa dingin a thupi in “Tuni hiam zingciang hiam in hih khuapi, tua khuapi-ah pai-in tua lai-ah kum khat taamin sum bawlin sum va zong ning,” a ci note aw, tu- in ngai un. Zingciangin bang piang ding cih nangawn na thei kei uh hi. Na nuntakna uh bang ahi hiam? Note, tomcik sung a kilat khit ciangin a mangthang pah tuikhu na hi uh hi” (James 4:13, 14). Hih hilhkholhna in bangzahin thuman hiam? Hih thu a sim nuntakna a nei nang le kei in tuni nitumma-in i nuntakna a bei thei thu hi, cih i thei hi. Nuntakna in bangzahin tom hiam, cih i thei hi. Tua hi-in koi bangin Topa tawh kizopna nei-a, Ama huhna, hehpihna thupha kisam tawntung ihihna phawk ding thupi hiam?

Late 80 in Topa tungah thuumna kimu thei hi. Late 80: 1-3, 14-17, 18, 19 sim inla, nang dingin kibulh in. Hun le mun kibang lo hi mah taleh, Late 80 in na nunna pulaak hi lo hiam?

          I nuntakna-ah khanlawhna i kitangsam hi. Tua hi-in Pasian in i nuntakna-ah a hong sepsak thute mangngilh lo a, phawk tawntung ding kisam hi lo hiam? Thu-um mi khat in gimna thuakin hamsatna lianpi a phutkhak ciangin hih bangin thungen thei hi lo hiam? “Nong hotkhiat nadingin na mai hong tan in” (Late 80:19). Jesuh in nang aa dingin a sep nate na pom ciangin, na mawhna khempeuh hong maisak ahihna thei-in na om ciangin, Ama dikna in puan bangin hong tuam ciangin, uppna tawh tua dikna ngah na theih ciangin Ama sungah khamuanna na mu thei ding hi.

Koi bangin “Topa aw na maipha hong tan in” cih thu na tel hiam?Ama dikna in hong honkhia hi, cih thu na theihna in “Topa maipha ngah” cih thu na theitel hiam?

 

MONDAY

June 22

A Tawpna-ah Maitang Kimu

          Topa tawh kinai-in a nungta dingin hong kipiangsak ihi hi (Pian. 2:7). Mihingte a hong kipiansak a kipan, Pasian in a kitat kizopna hong bawlpha dingin na khempeuh hong pia hi. (John 3:16). Amah in i sungah tawntung thute hong koih khin hi. Ahi zongin mihing in tua thute mu thei lo hi; theihtheihna bangmah nei lo hi (Ths. 3:11). Mihing in “Kido-na Lianpi” sungah a kihelkha ihi hi. I kim le paam khempeuh in zong hih kido-na sungah kihel hi. Hih kido-na sung pan i suahtak theih nadingin, Pasian tawh mihing in kizopkikna a ngahkik theih nadingin a kipia man in man tampi hi; ciangtan thei lo man hi. Hih kido-na sungah lungkia- in mang bangin i omkha thei zel hi. Tua bangin gal sung nawkin i om ciangin vantung gam mi ihihna kimangngilhkha zelin, i Topa hong pai ding phawk loin, lungmang, lungkia-in, mi tampi in upna nusia hi; i Topa Jesuh Khrih in i leitung i lei nunna hong khelin vangliatna tawh kidim pumpi-ah hong khel ding ahihna thu i phawk ding kisam h” (Phil. 3:20, 21).

          Leitungin a bei ding naih semsem ta hi. Nisuahna lam panin meilom kaang hong dawk ding a, leitung tawh hong kinai semsem in, tua meilom tungah “Mihing Tapa tawh kibang khat tu-in i mu ding hi; amah in kham lukhu khu ding hi; a khutah a hiam mahmah phiau kawi khat a tawi hi (Mang. 14:14). Jesuh in sim zawh lohzah phialin a tam vantungmite tawh hong pai ding hi (Matt. 25:31); tua ciangin mit khempeuh in a mu ding hi. (Mang.1:7). Van a kahtoh lai mahbangin “Ama zawhna awging i za ding hi. Peengkul kitum ding a, Khrih sunga a si mi khempeuh hong tho masak ding uh hi (1 Thess. 4:16). Amaute in Jesuh sapna a za ding uh hi (John 5:28).

Tua khit ciangin bang piang ding hiam? 1 Thessalonians 4:17 sim in. A tawpkhakna-ah, Paul in khuavannuai buppi theih ding thu a pulaak kimu thei hi.

          A lamdang mahmah thu hi lo hiam! Ni khat ni ciangin Jesuh i mu ding hi; i mu taktak ding hi. Ama aw i za ding hi. Jesuh in Topa hi, ci-in lei khempeuh in a pulaak hun hong tung ding hi. Ama tungah thu i ngen a, eite hong cing hong kem tawntung Topa maitang kituahin i mu ta ding hi. I ngakngak, i lamet et tawntung Mipa a mu ding ihi ta hi. Topa Pasian in citakin, a kamciam pelh ngei lo hi. Tua hi-in Amah i mu takpi ding hi. Ama hong kamciamte in muanhuai hi (Mang. 22:6).

          Tua hun ciangin peengkul ging ding a mit khempeuh in Jesuh a mu ding hi. Ngak tham mah hi, ci-in lungdamin i kiko ding hi. Lungkia loin thungetna khempeuh, i nuntakna-ah na khempeuhah Amah i masak detnate, Ama thu hangin gentheih hamsat i thuaknate in bangmah simthamin kingaihsun lo ding hi. Ama maitang mu ta ding ihih manin i hamphatlam i phawk semsem ding hi (Mang. 22:4).

TUESDAY

June 23

Mo

          Patmos tuikulhah kipuakin om a, nungzui John tungah mangmuhna khat a kipia hi. Tua mangmuhna in Pasian mite in Amah tawh teengkhawm tawntung ding uh a, amaute nunzia ding zong a kipulaak hi.

Mang. 21:9-11 sim in. Bang thu gentehna kipia hi. Bang hangin tua thugentehna kizang hi ding hiam?

          Mo in hoihna tawh kidim hi. A mopawi bawl ni-in, mi khempeuh in amu nuam ciat uh hi. A mopawi ni in a nunzia kikhel ni hi. A lawmpa tawh nunna thak khat a kipan ding hong suak hi. Topa le a mite zong tua mahbangin tawntungin a teengkhawm ta ding uh hi. Tua mun ding Jesuh in eite aa dingin hong bawlkholhsak hi (John 14:1-3); tua mun in hoihna khempeuh tawh kidim hi; a hoihna kam in a pulaak khia thei kei hi. A taktakin tua hoihna pulaak dingin “Mihing kammal in kicing zo lo hi; midikte ngah ding nopna in kigen thei lo hi. Tua hoihna amu mi bek in a theithei ding hi. Ciangtan nei mihing in tua Paradise hoihna a pulaak khia thei kei hi.”Ellen G. White, The Great Controversy, p. 675.

          Van thak le lei thak omzia i ngaihsut zawh loh hangin, tua mun in bang tawh kibang ding hi, cih a kipulaak theih loh hangin, Pasian in John tungah a na pulaak thute kimu thei hi. Tua “mopawi” in a sawt loin hong tung ding hi. Hi taktak hi; tua mopawi-ah sapna ngah mi na hi hi. “Na lungsimte uh, leitung nate ahi lo tunglam nate tungah na nga un” (Kol. 3:2).

          Topa Pasian in tua dingin hong geelgeelkholhsak khin hi. Tua mopawi a thei khol lo dingin hong deih kei hi (Matt. 22:1-14, Matt. 25:1-13). Khuavannuai khempeuh in amu thei ding uh hi. Tua mopawi-ah eite in a mipi ihi ding hi. Eite in zipipa tawh kipawlin i om ding hi. Tua khuapi siangtho sungah Jesuh in a hong lutpih ding hi. Nihvei-na hong pai ciangin hong la to ding hi. Lungluthuai mahmah thu in, Pasian mite (mi siangthote) in monu ci-in hong kiciamteh hi (Mang.19:7); bang hang hiam cihleh ‘amaute in khuapi siangtho, Jerusalem khuapi in vantung panin lei thakah hong kituah suk ding a, monu (mi siangthote le Jesuh) le mopa a teeng khawm tawntung ding hi (Mang. 21:2)

          Hih khuapi siangtho thu in Pasian le a mite kizopna hong hilh hi. Bang hang hiam cihleh “A nihin “Mo” ci-in kipulaak hi. Lai Siangtho in a kicingin hong hilhna-ah “Khuapi Siangtho” in Jerusalem Thak hi-in, Vantung Gam, “mo” “ Tuuno Zi” ci-in zong kipulaak hi.”Ellen G. White, The Great Controversy, p. 426.

Mang.21:9-27 sim in. Bang hangin hih thu in telhamsa hi ding hiam? Leitung nate tungtawnin a hong kipia kamciamte galmuh thei i hiam?

 

WEDNESDAY

June 24

Tuu-no Zui

          Tawntung in na lunggulh in bang hiam ci-in hong kidong ngei hiam? Naupang khat va dong lecin, kimawl tuamtuam kimawl nuam” hong cikha ngel ding uh hi. Ahih keileh “leitung dang tuamtuamte-ah hawh kawikawi ding, ci-in hong dawng zong omkha ding hi. Khangno khat va dong lecin, “Sangkah nuam nawn lo, laisim nuam nawn lo” hong cikha ding hi. Ahih keileh “ Ka lawm ka gual tawh vakvak ding” hong ci zong om kha ding hi.” Khangham khat peuh va dong lecin, “gimna, dahna, om lohna munah om nuam ing “ hong ci kha ding hi. Ahih keileh “ Hong nusia khin a it, a ngaihte tawh kimuh kik ding lunggulh pen ing,” ci-in hong dawng zong omkha ding hi. Hih lunggulhnate in a deih huai thu vive hi. Van thak le lei thakah hihte sangin a nuam zaw, a deihhuai zaw nunna tawh kinungta ding hi. Tua nopna mihing in pulaak thei ngei lo hi. Tawntung thu in i sungah meikuang bang hi. Hih thu in i nunzia khempeuh hong khel hi. Tu-a i nuntakpih thute tawh tehkak theih hi lo hi.

Tawntung hun ciangin bang thuphate ngah dingin lametna na nei hiam? Isaiah 25:8, Mang. 7:17, le Mang.21:4 sim in.

          Vantungah thupha khempeuh lak pan a lian penpen thupha in Jesuh maitang mu-in, Ama tungah lungdamkohna le mawhna sung pan a hong hotkhiatna hangin lungdamko-in, A mai muhna hi ding hi. A hong tatna hangin lungdam i ko tawntung ding hi. Amah a bia tawntung ding ihi hi. Singlamteh tungah sihna hong thuakna hangin tawntung sih nading panin suahtakna i ngah thei hi.

          “Amaute in, ‘A kigosa Tuuno, vangliatna, hauhna, pilna, hatna, pahtawina, minthanna le phatna ngah dingin kilawm hi,’ ci-in ngaihtakin a sa uh hi.” (Mang.5:12).

          Tuiphum John in Jesuh thu a pulaakna-ah “ Pasian Tuuno” ci-in a pulaak hi. (John 1:35-37). Nungzuite in John nungzui uh hi. Mang. 14:4 pulaak mah bangin “ eite khempeuh zong John mahbangin “Hihte in amau le amau a sianga a kikep manun, amau le amau numei tawh a kibuahsak lote ahi uh hi. Amaute in Tuuno paina peuhpeuh ah a zui uh hi. Amaute, mite lak pana kileisa hi uh a, Pasian le Tuuno tungah gahmasa banga piakte ahi uh hi (Mang.14:4).

          Jesuh, Tuuno, i Tuucingpa zong hi. Amah in i pai nading lampi hong hilh hi. Kuamah dangin hong hilh thei lo hi. Hih thu in lungmuanna, khamuanna hong guan hi. Hamsatna tuamtuam, i tuah khak ciangin thu upna nusia loin Jesuh hong makaihna a zui tinten ding ihi hi. Hih lampi in vantung dong hong lutpih ding lampi hi. Mang. 7:17 pulaak bangin, “Ahang in, kumpi tokhom laizanga Tuuno, amaute cingpa hi ding hi; Ahang in, kumpi tokhom laizanga Tuuno, amaute cingpa hi ding hi; amah in amaute a nungta tuinakte ah paipih ding hi. Amah in amaute a nungta tuinakte ah paipih ding hi.”Ama mite ihih mahbangin, Ama tuute ihih manin Ama hong paipihpihna a zui ding ihi hi. Ama kiang tawntungin i om ding hi. Pasian mite nunzia khat in “Amaute talah Ama min kigelh ding hi” (Mang. 22:4). Cihnopna-ah eite in Amah i ngaihsun tawntung ding hi; i phawk tawntung ding hi.

THURSDAY

June 25

“Hong Pai Un!”

          Hong kisapna aw in tuni-in “Hong pai un” ci-in sapna ngah mi ihi hi.

A nuai-a Lai Siangthote in Topa hong sapna thu bang hong hilh hiam? Matt. 11:28-30, Isa. 55:1- 3, John 6:44.

          Tuni-in Jesuh kiang vanaih dingin Kha Siangtho in hong deih hi. Jesuh in Ama kiang vazuan dingin hong sam hi. Tuni-in Ama sungah a om dingin hong sam hi. Ama hong pai kik ni dong nisimin Ama kiang a zuan den ding ihi hi. Ama sapna za-in Ama kiang a zuan mite in, Ama tungah lungsim khempeuh, nuntakna khempeuh a ki-ap uh hi. Tua ciangin lungnopna mu thei uh hi; bang hang hiam cihleh Amah in a hong domto hi. Kicin lohna, kilawm lohna tawh kidim hi mah ta lehang, Jesuh in hih leitungah hong nungta hi. Ama hong sapna in “ Ka Pa hong piakte khempeuh ka kiangah hong pai dinga, ka kianga hong pai khempeuh ka hawlkhia ngei kei ding hi.” (John 6:37).

          Hotkhiatna sung lut a Jesuh tawh kizopna nei dingin midangte vasam ding Kha Siangtho hong sawlna na phawk hiam? Kha Siangtho hong sapna aw in, “ Hong pai un” ci-in hong sam den hi. Tua Kha le tua mo in, “Hong pai in!” ci uh hi. A za peuh in, “Hong pai in!” ci ta hen. A dangtak peuhmah hong pai ta hen. A ut peuhmah in letsonga kipia nuntakna tui sang ta hen” (Mang. 22:17).

          Man piak kul lo dingin Amah va zuan ding ihi hi. Hehpihna in a hong piakkhong hi. Ama sapna i san ciangin i nuntakna sungah Amah hong teeng ding a, I lungsim khempeuh, i thahatna khempeuh, thahatna khempeuh tawh i it thei ding hi (Thkna. 6:5), tu-a i nunzia le mailam i nunzia khempeuh hong kikhel ding hi.

          Jesuh in Ama kiang vazuan dingin hong sam den hi. Lai Siangtho sunga kigelh bangmahin “ Keimah in a manlangin kong pai ding hi. Amen, Topa Jesuh aw hong paita in”(Mang. 22:20).

          Bangzahin manlang ding hiam? I ngaihsutna siksanin Ama sungah a si mite in hong thawhkik uh ciangin mitphiat kaal sung bek hi lel ding hi. Hun beite ngaihsun lehang manlang mahmah hi lo hiam? Jesuh in a manlangin hong pai ding hi ta hi. I ngaihsut masakna-ah”Topa aw, nong pai ding hun nai mahmah ta hi lo hiam?

          Tu-in i theih thute in a kimu milmial bangin i mu hi. Ahi zongin maitang kimuh ni ciangin kitel kician takin i mu ding hi. Tua hun hong tun ding ngakin i omna-ah lungkia kei in. Hih lametna tawh na nungta ding hi. Pasian hoihna le hong itna na muanglah kei ding hi. Topa Jesuh aw, hong pai ta in.

Tu mahmahin upna sungah na kip zawh nadingin thungen in. Nangma aa dingin a nunna hong pia Topa tungah na nuntakna khempeuh kipia in. Amah in a sawt loin hong paikik ding hi.

 

FRIDAY

June  26

Simbeh ding: “Khrih deihna bangin a zui lo mi na hihkhakleh, Pasian khuapi sung na lut thei kei ding hi. Taksa pumpi aa ding annek tuidawn kisam hi. Leitung nopsakna, ci le sa deihna bangbang a zui mi nahihleh vantung kham kongzinpite na tawnkha kei ding hi; a siangtho nuntakna nuam nasa kei ding hi. Vantung nuamna in nang aa ding vangikpi bang lel ding a, nopna na ngah tuan kei ding hi. Vantungmite phatna lasaknate na za thei kei ding hi. Vantung nopna tawh na lungkim zo tuan kei ding hi. I lungsim in vantung pilna thute a theihtel zawhna a nei kei hi. I khauk in banzo lo hi. Anduh tuiduh bangin Khrih dikna i lunggulh ding kisam hi. Ama hehpihna in hong zuun hong puah ding i kisam hi. Ama hehpihna bek in i nunzia hong khel ding kisam hi. Tua bang kikhel khit ciangin vantungmi siangthote tawh i kipawl thei bek ding hi.

          “Tua ciangin minamte in vantung thukham simloh sim loh thukham dang a nei kei ding uh hi. Tua ciang bekin vantung in a nuam innkuan bang hi ding a, a bei ngei lo nuamna tawh a kidim mun hi ding hi. Pasian min phat tawntung ding le lungdamkohna tawh a kidim den uh hi. Tua thute banah zingsol in phatna lasa-in Pasian tanu tapate tawh nuamna lungdamna la phatna lasa khawm uh hi. Pasian in Khrih tawh a tangko khop thu in “ mawhna, siatna om nawn lo ding hi. Gimna, natna le sihna zong a om nawn kei ding hi.

          “Eite in vantung thute gengen nuam kasa uh hi; a etlawm vantung hoihna gen kicim ngei lo hi. Tawntung tawntungin Pasian hoihna i gengen ding hi. Leitungah i thuak gimnate phawkin kinei nawn lo ding hi. Pasian kiangah a tawntungin i om den ding hi.”Ellen G. White, The Faith I Live By, p. 363.

Kikup Ding Dotnate:

1. Ellen G. White in vantung amuh thu kigelhna Early Writings, pp. 14-20 sunga thute sim in. Audio zong kibawl khin hi; kingai thei hi. Bang thu in na lungsim hong lawngkha pen hiam?

2. Tu quarter sung i thusinna sungah bang thu na phawk pipen hiam? Tua thu in Jesuh tawh maitang kimuh mateng hong tawsawn ding thu hi ding hi.

3. Kua in vantung lametna thu za ding kisamin na ngaihsun hiam? A manlang theithei-in tua bang mi tungah gen ding hi lo na hiam? Nang mahmah in tua lametna tawh anungta hi lo na hiam?

 

Tomgenna: Mungtup mitsuanin i om ciangin “ Note sunga nasep hoih a panpa in Chrih Jesuh ni dongin a bucing dingin semsuak ding cih ka muang hi” (Phil. 1:6). Pasian in mihingte tawh kizopna lampi hong pan hi. Amah mah in lamtawp dong hong tonpih ding hi. Itna le thu upna sungah a khangtoto ding ihi hi. Tua kicin ni hong tun ni dong a khangtoto ding ihi hi. Khrih dikna sungah a khangto ding ihi hi. Upna tawh tua dikna a ngah ihi hi.