LESSON 10 *May 30–June 5 MAWH KISIKNA LE MAWHMAINA

LESSON 10

*May 30–June 5

MAWH KISIKNA LE MAWHMAINA

 

SABBATH NITAK

Tu kaal sung sim ding: Isa. 61:10; Hosea 6; Sawl.3:18, 19; Pai. 34:1-10; Rom. 6:23; Matt. 22:1-14.

Kamngah: “I mawhnate pulaak lehang i mawhnate hong maisakin i diktat lohna khempeuh pan hong sawpsiang dingin amah muanhuai-in diktat hi” (1 John 1:9).

K

hapsa Gam in Israel mite luah dingin gamla mahmah tawh kibang hi. Meiilum, meilom nuai-ah amaute nuamtakin a mainawt thei uh hi. ni tampi sung tua mual tungah ei in a tuamcip hi. Moses in khuamial sahpi sungah kahto hi. Tu-in amaute makaih Moses si khin hi. Amaute in gilkial dangtakin om uh a, mei ing kangtum dektak uh hi. Tua bangi khuaizu le bawngnawi luanna gam a lut ma-un, mihonpi lakah lunggimna lianpi hong tung hi. A sawt nai lo hun khat lai-in amaute in Topa thupiak bangbang ka zui ding uh hi, ci-in kiciamna a nei khin uh hi. Amaute lamet thu ngaihsun in. Amaute in Aaron buk kimah kikaikhawm uh a, milim khat bawl dingin a sawl uh hi. Aaron in mipite lau, kihta ahih manin amaute ngetna bangin bawng lim khat a bawlsak hi. Pai. 32-34 sungah Israelte paikhialhna thu kimu thei hi.

          Hih thupiang in Lai Siangtho sung kigelh thute lakah khat hi. Lai Siangtho in mawh kisikna le mawhmai-na thu hong hilh hi. Tu kaal sung I kikup ding thu in zong mawh kisikna le mawhmai- na thu hi. Kamngah ngaihsun inla, nisimin mawh kisikna le mawhmai-na ngah dngin Topa maipha na zong ding hi. Mimawh ihi hi; ahi zongin Singlamteh le hotkhiatna thu hangin a lungdam ding ihi hi. Mawh kisik mi aa dingin mawhmai-na le hotkhiatna kihong tawntung hi.

 

* June 6, Sabbath ading kiginkholhna in tu kal lesson sim in.

SUNDAY

May 31

Manlah Tawntung (The Rush of Life)

          Nasep kitaklah mahmah nipi kaal ahih manin Sababth ni hong tung ding hi ta, Fri- day ni khat van leikholh ding kisam tampi om lai hi. Nitum ding hi ta, hun ngah nawn loin a om nupi khat a om hi. Innkuanin Friday nitak nuamtakin zang khawm thei uh hi. Anne khawmin biakpiakna zong pia khawm uh hi. Sabbath ni zingsang ciangin khanglo a, kisilna buk sung niin mahmahin, zanni-in kipuah kha lo ahihlam a khua nung phawk hi. Tua niinteng hah siang Samsam khit ciangin a tapa zan zuntehna zan puanteng puan sawpna set sungah koih sukin zingan kiallap ding bawl semsem hi; suun ciangin nek ding bangmah a om loh lam phawkkik a, nawhsa takin moh tawm khat a em bawl hi. Tua khit ciangin a pasal kikhoppih ding puan kitaih nai loin kikoih ahihlam a phawk hi. Nawhsa takin puante taih samsam a, khep khit ciangin puan koihna -ah va koih hi. Tua ni in Sabbath ni ahihlam a phawkkik hi. Nipi kaal nidangte sangin Sabbath a it zaw inn nupi khat hi mah taleh manlahna tuamtuam tawh kigingkhol man loin a om hi. Sababth ni kikhop hun lap zo ngei loin a om hi. Sababth ni in nidangte sangin Topa tawh kinai zawk nading ni ahihlam zong a thei hi. Tua bangin Sabath ni-in sep loh dingteng a sepnate ngaihsun kikkik a, sep ding a kisam vive ahih manin tua bangin Sababth ni-a a gamtatnate khial kisa lo hi. A kisam takpi mah hi ding hiam? Tua nup in Martha gamtatna a phawk hi. Jesuh khephungah thungaih ding sangin inn sung nasep a kin zaw hi (Luke 10:40); ahi zongin Jesuh pulaak thu a bilah a zaza lai hi. “Numei aw, nang in lunghimawhna tampi na nei hi. Ahi zongin na kisap khat bek a om hi. Mary i na hoih sem ding a khensat khin hi. Tua a hoih na khat, ama kiang pan kila khia nawn lo ding hi.” (Luke 10:41, 42). Hih in a hoih, a deihhuai thu hi.

          Jesuh khephungah tutna in Amah itna thukpi hi. Sababth ni bek hi loin nisimin Jesuh khephungah tut ding kisam hi. Tua nupi nu in tua ni-in Jesuh khepungah tut ding a khensat kei hi. Amah in Pasian a it hi. Nisimin Jesuh khephungah tut ding hi mah taleh Sabbath ni-a Jesuh khephungah tutna in Amah tawh kizopna hong kipsak, tha hon guan hi. A anhuan buk sungah nasemin a omlaitak a khituite khia hi.

          Hih thugentehna deihna in Sabbath ni-a sep ding le sep loh ding cih thute hi lo zaw-in, Topa tawh kizopna-ah bang thute in hong kipsak a, bang thute in thaneemsak hiam cih I tel nading deihna hi. I lungsim in mawh i kisak ciangin mawhmai ding lunggulhna lianpi a nei hi. Tua ciangin Jesuh kiang i vanaih thei hi (Late 53:2). Jesuh in a khut dim sisan bang tawh Ama puankang a lawng hi. Jesuh in a kisik khituite a mu hi. Mawhna baang puan hong suahkhiatsak hi. Ama dikna puan hong silhsak hi. Ama nunna siangtho in i mawhnate hong maisakin, kicing takin a hong tuam hi. Ama sisan sungah mawhna puanniinpi i sawpsiang ding hi (Mang. 7:14).

Koi bangin Isaiah 64:6, Zechariah 3:4, le Isaiah 61:10 in hih thuman, Khrih dikna in eite aa dingin a thupi-na pulaak uh hiam?Bang hangin tua kamciam luai tinten tawntung ding kisam hiam?

 

MONDAY

June 1

Kha Siangtho Tawsawnna

          A zi tawh kigamla omlam phawkin, khial kisa mahmah pasal khat om hi. A zi tungah a bawlzia khempeuh dik lo hi, cih thei ahih manin a kisik mahmah hi. Tua bangmahin na gamtatna khat na kinungsik ngei hiam?I lungsimah khial kisa mahmahin, a kam in lah khial ing, ci-in lah pulaak nuam lo cih a om thei thu hi. I khialh ciangin i khialhna pulaak a, mawhnai- na ngen ding thupi hi. Hih in Topa tawh kizopna hong kipsak hi. Kha Siangtho hong lamlahna na nial kei ding hi. I mawhnate Amah in hong phawksakin, mawh kisik dingin hong tawnsawn hi. I lungsim hong lawngin, hong hopihna awging na za thei ding hi. Tua bangin hong hopihna awneem a daltan thei mawhnate kisik a, mawhmai-na ngen ding hi. Kha Siangtho nasepte lakah khat in “Mawhna pulaak hi” (John 16:7, 8). A lamdang hong piakkhong i ngah thei hi (Luke 11:13); Kha Siangtho tonpihna kitangsam mahmah hi lo i hiam?

Hosea 6 sim in. Mawh kisik ding Pasian hong kutna bang thu kipulaak hiam?

________________________________________________________________

________________________________________________________________

          Kha Siangtho nasepte lakah khat in “Leenggui tawh hong kizomsakkik hi (John 15:4). “I mawhkhak ciangin i kisikkik thei hi. Banghang hiam cihleh tua mawhna in gimna hong tun hi; tua kisikna in kisikna man taktak hi lo hi. Kisikna man tak in Kha Siangtho nasepna hangin mawhna i bawl khak manin kisikna hi-in, mawhna thaman kihtakna hang a kisikna hi lo hi. Kha Siangtho in i lungtang hong satneemsakin, mawhna hangin i Honpa lutang sukha ahih manin kisikna hi ding a, singlamteh phung hong tunpih ding hi. Mawhna khat ciat in Jesuh a liamsak, a nasak hi. I Topa tungah gimna va tunzel ihih manin, tua hangin kisikna in kisikna mantak hi zaw hi. Tua bangin kisikna in mawhna nusia nuamsak hi.”Ellen G. White, The Desire of Ages, p. 300.

          Mawhna sungah nuamsa-in i omleh Topa tawh kizopna hoih a nei thei lo ihi hi, cih pen thuman hi. Kicinna i nei zo kei hi. Ahi zongin mawhna i kisik thei hi. Kisik ding zong kisam hi. Kha Siangtho in mawhna hong phawksakin, mawh kisikna hong guan a, Honpa kiang a zuan ding ihi hi (Eph. 4:30).

Mawhna hangin taihilhna, mawh kisik ding sapna a nunung pen na ngah, bang hun hiam? Koi bangin na dawng hiam? Tumahin thungenin mawhmai-na na ngen ding hi. Topa hong hopihna aw na zak nadingin ngai in; na lungsim neemsak in.

 

TUESDAY

June 2

Kisikna Taktak

          Leitung in suahtakna, ci le sa deihna zui-in nuntakna, kiliatsakna cihte tawh kidim hi. Hih bang nunzia bek mah thupi kisa-in tua bang dingin kihanciam ciat hi. Pasian hong sapna in ahihleh tua bang hi lo hi; mite aa dingin a nungta ding le lungneem dingin sapna ngah ihi hi (Matt. 5:5). John pulaaak thu le Jesuh pulaak thute in sa-khat lawngkhat ahihna lamdang hi. John in “ Mawhna kisik un. Banghang hiam cihleh vantung gam in hong nai zo hi” (Matt. 3:1, 2). Jesuh in zong “ A hun hong tung zo hi. Vantung gam hong nai zo hi’ ci-in a tangko hi.” (Mark 1:14, 15; Luke 24:46, 47). Jesuh le John in mawh kisikna thu a tangko uh hi. Banghang hiam cihleh vantung gam hong nai zo hi. Tuhunin zong hih thupuak mah a tangko ding ihi lo i hiam?

Sawl.3:18, 19 sim in. Banghangin mawh kisikna in vantung thu-ah khantoh nadingin thupi hiam? Khanlawhna/thaksuahna hun in bang hun hiam?

          Pasian hoihna le hehpihna in mawh kisikna hong tunpih hi (Rom. 2:4). Kisikna-ah cial nih kimu thei hi. (1) Mawhna hangin gim thuak takpi-na (2) Mawhna nusia ding khensatna takpi cih kimu thei hi. Lai Siangtho sungah mawh kisikna in mawhmai-na tawh kizompah hi. A kisik takpi mi mawhna Pasian in maisak takpi hi (1 John 1:9; Mang. 3:19). “Mi pawl khat I a zaikai-na a theih uh bangina thuciamna-ah Topa a zaikai kei hi. Amah in kuama kisiat ding deih lo a, mi khempeuh a kisik ding uh a deih manin note hong thuak keeikai hi” (2 Pet. 3:9). Nihvei Kumkik hong tung ding mimal kiginkholhna-ah Pasian in Amah tawh kizopna man i neih zawh nadingin hun hoih hong piapia lai hi.

          Jesuh in gimna thuakin a nunna hong pia hi. Sihna pan thokikin, i mawhnate kisikin i om ciangin Ama hehpihna in i nuntakna-ah na lamdang hong bawl hi. Leitungzia in na nunna in bangmah khialhna om kei, hoihna khempeuh, kicinna tawh na kidim hi, ci hi mah taleh, Pasian deihna tawh kilangdo hi. Ama kiang zuan a, upna nei-in mawh kisik ding hong deih hi (Sawl.20:21); Ama khut sungah nunna khempeuh koih dingin hong deih hi. Tua hileh i nuntakna sungah Ama deihna hong kicing ding hi; Amah deihna bangin hong zuun, hong puahpha ding hi. Tua ciangin i nunzia in Ama lim le meel a kilang ding hi (John 15:2, 8). Tua ciangin Ama sungah a khangto hi-in, mawh kisikna tawh kipawl gahpha a gah ihi thei ding hi. (Matt. 3:8). “Kipuahphatna/kikhelna om lo mawh kisikna in kisikna taktak hi lo hi. Mawhmai lo, mawi kisik lo mi in Khrih dikna puan a silh thei kei hi. Mawh kisikin mawhmai-na ngah mi nunzia in kikhel, kipuahpha hamtang hi. Tua in a kimakaih, a ki-uk nunna hi ding hi.”Ellen G. White, The Desire of Ages, pp. 555, 556.

Mawh kisikna in nunna manawh hi (Sawl. 11:18); tua in Topa tawh kizopna-ah a thu bulpi khat hong suak hi. Topa tungah kipia-in, mawh kisik mi in Pasian hopihna aw a za hi. Bang dinmun hamsa sa pen na hiam?

 

WEDNESDAY

June 3

Hehpihna Kicing

          Vangik bangin mawhna van gik lelin na om ciangin singlamteh phungah Kha Siangtho kimakaihsak in. Topa tung pan mawhmai-na na ngen thei hi. Topa in mi khuatuah siamin hehpih siam a, heh baih loin a dimlet itna a nei hi” (Late 103:8). Hih in Topa mahmah in a teel minamte in Topa a dahsak khit uh ciangin, a pulaak ahi hi (Pai. 34:6)

Pai.34:1-10 sim in. Bang thuman guipi kipulaak hiam?

________________________________________________________________

________________________________________________________________

          Topa in hehpihna, lainatna, lungduai-na tawh kidim hi, cih thu in thutak hi. Tua hang mahin Singlamteh tungah sihna hong thuak hi. Tua hangin mawhnei in Topa tawh kizopna a ngahkik thei ihi hi.

          “I mawhnate phawkin kisik a, mawhmai ding i nget ciangin, Topa in mawhnei mi mawhna hong maisak hi.” (Luke 18:13); Jesuh in eite sungah na hong sem khin a, eite tungtawnin Ama zia le tong a kilang ding hi. Amah i sapma-in Kha Siangtho in hong dawng hi. Mawhna vangikpi a hong lakkhiatsak hi. Mawhna vangikte Kalvary ah kisuankhia khin zo hi. Jesuh zuanin i pai ciangin Amah in ei tawh hong kinai hi. I ngetma nangawnin Tuucing Hoihpa in i lungsim kongkhak hongin i sungah hong teeng hi (Mang. 3:20). Singlamteh panin kihemkhia kei in. Jesuh kiang zuanin tai ni. I mawhnate va suankhia ni; Ama dikna vasilh ni (Zech. 3:4).

          Anuai-a Lai Siangthote lungngai kawmin sim in. Nang kam tawh gelh khia in. Pasian hehpihna thu hong hilhna na mu ding hi.

“Mawhna thaman in sihna hi. Ahi zongin Jesuh Khrih sungah Pasian hong hehpihna hangin tawntung nunna piakkhong i ngah hi (Rom. 6:23).

“Thukham palsatna a khan nadingin thukham hong kipiakbeh hi. Ahih hangin mawhna a khanna munah hehpihna a khang semsem zaw hi. Tua pen sihna sangin mawhna in a uk bang tektekin i Topa Jesuh tungtawnin nuntak tawntungna a tun dingin hehpihna thumaan na tungtawna a uk theih nading ahi hi” (Rom. 5:20, 21).

“Ahih hangin Pasian in eite hong it takpi-na hih bangin hong lak hi. Eite mawhnei ihih laitakin eite adingin Khrih a si hi” (Rom. 5:8).

 

THURSDAY

June 4

A Man Pha Penpen Puan

          Leitung mite muhna-ah puan hoih nonote in tam man mahmah hi. MI kim khat in “ Kua ka hiam cih miten hong theih nadingin puan tampipi mante ka silh hi,” ci uh hi. Ahi zongin vantugnah Topa tawh kizopna simloh na khempeuh a beimang ding hi (Matt. 6:19- 21). Jesuh tawh mimal i kizopna in Ama dikna puan sungah kiseel hi.

Matthew 22:1-14 sim in. Hih thugentehna Jesuh mah in a deihna a hong hilh hi. Hih thugentehna-ah bang thu kimu thei hiam?

________________________________________________________________

________________________________________________________________

          Jesuh in tua mipa mo pawi puan lohpa, “lawm aw,” ci-in a sam hi. Hun khatlai kizopna nei ngei hi kha ding uh hi. Tua mipa in zong puansilh lo dingin a khensat mawk hi. Jesuh zia le tong in kicinna tawh a kidim hi; paubaanna nei lo hi. Amah in tua puan silh dingin mi khempeuh tungah hong pia khong hi. “ Ama silh dingin siahadial puan a siang, a paak mahmah kipia hi,” ci-in a awng uh hi (Mang. 19:8), “Tua puan pen niin baang lo, a vun a tonna om lo, a melhemna khat peuh om lo tham loin siangtho le kaakbaang lo hi.” (Eph. 5:27). Linen puankaang in Khrih dikna hi; paubaanna om lo Ama zia le tong hi. Ama Honpa le Tanpa dinign a sang mi khempeuh in upna tawh tua dikna a ngah thei uh hi.”Ellen G. White, Christ’s Object Lessons, p. 310.

          Adam le Eve in mawhna sung a tunma-un puankaang a silh uh hi. Mawhna sung a tun uh ciangin guaktangin a omlam a kiphawk uh hi (Pian. 3:7). Tua ciangin Topa Pasian in theiteh a silhsak hi. Theiteh puan laihin ganhing vun a silh uh hi. Adam le Eve in mawhmai nading biakpiakna a kigo ganhing sihna panin savun puan a silh thei uh hi. Tua bang mahi neite in zong Jesuh sihna i san ciangin Ama dikna puan i ngah thei hi. “Guaktangin om a, maizumna thuakin, amaute in theitehte silh dingin a khuitawm uh hi. Bangmah in paubaanna

nei lo puan akheng zo ding a om kei hi. Theiteh in, leitung puan silhte in maizumna a sel zo kei hi. Tuuno Nitak An nekna pawi-a kisilh puan in Khrih le Ama dikna puan simloh bangmah dangin kilawmna hong guan zo kei hi. Khrih mahmah in tua puan a hong guan hi. Khrih dikna puan bek in maizumna panin hong sel thei bek hi. A mawhna kisikin mawhmai-na ngah mi tung bekah tua puan kipia ding hi.”Ellen G. White, Christ’s Object Lessons, p. 311.

Ngaihsut ding: Nisimin Khrih dikna puan a silh ding hi lo i hiam? Hih in bang khiatna nei hiam? Bang a cihnopna hi ding hiam? Koi bangin tua puan silh thei ding i hiam?

 

FRIDAY

June 5

Simbeh ding: Lai Siangtho in Topa tawh i kizopna i dinmun hong lah nadingin lokhawhna tawh kizomin gentehna, limciinna tuamtuam zangin hong hilh hi. Hosea 10:12 in tua bang thugentehna khat hi; tu kaal sung i kikup thute hong hilhna kimu thei hi.

“Note aa dingin thumaan vawh unla;

a kip tawntung itna at un;

Na leitang sitlaite u kalkaang un,

Ahang in ama hong pai mateng le thumaan guahpi hong zuksak mateng,

Amah Topa zon hun ahi hi.”

          Vawhin at hun hong tung dinga, leitangte leineen sak ding kisam hi. Topa maipha zon ding kisam hi. I lungtang leitang puahkul hi. Tua ciangin guah zu (Kha Siangtho tawh kidim ding) ding a kigingkhol thei ihi ding hi. Topa in i lunggulhna om bangin leitang hong puahpha hi. A tawpna-ah Amah tawh a tonkhawm tawntung ding ihi h (Phil. 2:12, 13). Ama maipha a zong ding ihi hi. Amah zuan ni; Amah kun ni. Tua ciangin Amah in i sungah na hong sem thei ding hi.

          Topa maipha zongin Amah a beel etteh takcing mahmah khat in Thuhilhkikna sungah kimu thei hi: “Baalpeor ah Topa sepsa na mitun na mu zo uh hi. Topa note Pasian in Peor a Baal nung a zui peuhmah susia a, ahih hangin Topa note Pasian a lenkip khempeuh tuni dong na nungta uh hi.” (Thkna. 4:3, 4).

 

Kikup Ding Dotnate:

1. “Zia-etna sungah hong paipih kei in. Gilopa kiang pan hong hukhia in” (Matt. 6:13). Jesuh in hih bangin a nungzuite tungah a hilh hi. Hih thungetna na ngaihsun ngei hiam? Koi bangin zia-etna le mawhna pan suahtak nading thu na ngen hiam?

2. Khristian thu-um lo mi khat ahih keileh thu-um mi thak khat tungah Khrih hong piakkhong Ama dikna na hilh thei ding hiam?

3. Koi bangin Khrih dikna puan le biakbuk thupuak in kizopna nei hiam? Hih thu in mawhmaisakna le a kisik mi siangtho-na hong hilh hiam? Koi bangin hih thupuak hoihna, etlawmna na theitel hiam?

 

Tomgenna: Mawhna pulaakin mawh kisikna nei-in, Kha Siangtho hong hopihna za- in, Ama lamlahna i zuihna in Topa tawh kizopna mah hi. Mawhmai-na ihihna theihtelna le Jesuh dikna puan in hong tuam ciangin a kikhel nunna tawh a nungta ihi ding hi. Mawhna maisakna ngah kiphawk bek tham loin Pasian hong itna in hong tuam a, Amah tawh kinai takin kizopna nei ihi ding hi. Hih in Topa tawh hong tonkhawmsakin, Ama sungah hatna hong musak semsem hi. Amah i it semsem ding hi; i nunna khempeuh tawh a it ihi ding hi.