Lesson 9 *May 23–29 Mawhna, Lungdamna Thu, le Thukham

LESSON 9 | May 23-29

Mawhna, Lungdamna Thu, le Thukham

 

 

SABBATH NITAK

Tu kaal sung sim ding: Thkna.14; Mark 9:42-48; Rom. 3:20; Matt. 5:17, 18; Rom 3:28; Matt. 7:24-29.

Kamngah: “Na thukhunte ka mangngilh ngei kei ding hi. Banghang hiam cihleh tuate hangin nong nungtasak hi. Nangma a ka hi a, kei hong hon in. Banghang hiam cihleh na thukhunte ka zong hi” (Late 119:93, 94).

M

awhna in Pasian le mihing kizopna a ngawnkaisak pen hi, cih thu kuamah in a nial kei ding hi. Mawhna in Pasian tawh hong khen bek tham loin (Isa. 59:2) hong khem, hong nasak, hong netum, hong susia mangkhin hi. Mawhna tawh i kido-na-ah “Kei” cih lungsim mah i do gal lian bel hong suak hi. Tua bangin i do tawntungna-ah i ngah ding hamphatna in tawntungin a kimang ding hong suak hi. Mi kim khat in mawhna pen mihing nunna ngei-na bangin ngaihsun uh hi. Mihing in mawhna tawh a piangkhia ihih bangmahin mawhna sungah nuamsa tawntung hi. I kim le paam khempeuh in mawhna tawh kidimin, mawhna sungah nopsakna bek mitsuanin nei hi. Mawhna thu kikupna-ah midang khat peuh hehna, thangpaihna peuh a piangsakkha thei hi. Mi khat aa dingin thuman lampi pen i muhna-ah mawhna lampi hi thei a, tua mawhna va pulaakkha mah leng zong, ama hehna a piang sak ding hong suak hi. Mawhna sungah thuk lut semsem mi in Pasian tawh kigamla semsem hi, cihna hi. A cidam kizopna panin lampialna lianpi suak ding hi. Gamtatna, kampau-nate in ei mahmah bek tham loin Topa tungah mawhna lianpi a suak hi.

          A tawpkhakna-ah mawhna in Pasian tawh kizopna susia hi. Ahi zongin Pasian in Amah mah hong kilaak hi; tua kilaakna hangin Ama thukham hong kilang hi. Thukham in i mawhnate hong kilangsak hi.

          Tu kaal sung i kikup ding thu in Pasian in a thukham hong piakna-ah a deihna thute i kum ding hi. Mi khat in Pasian thukham a palsat ciangin mawhna sung a tung mi hi-in, Pasian tawh kizopkik nadingin kua in a puahphakik thei ding hiam?

* May 30, Sabbath ading kiginkholhna in tu kal lesson sim in.

SUNDAY  May 24

Lampialna Le Zia-Etna

 

Samson tuahkhak zia-etnate Thukhente 14 le 16:1, 4, 16, 17 sungah sim in. Pasian in masuan khat a sem dingin sapna ngah hi mah taleh, Samson in zia-etna sungah a tuk hi. Ama thuak gimna in bang hong hilh hiam?

          “Kido-na Lianpi” in a om takpi hi; hih Kido-na sungah i nungta hi; a kihelkha ihi hi. Hih kido-na in vantung pan hong kipan hi-in, khuavannuai khempeuh ahuamkhak loh a om kei hi. Mimal khat ciat nuntakna dongin hong sukha hi. Satan in hih kido-na ah zawhna ngah dingin a kilamen hi. Jesuh hong pai madeuhin Satan in nakpi-in nasem zaw kan ding a, Pasian tawh mihingte kizopna susia nuamin nakpi-in nasem ding hi. Satan hong khemna sung a tungkha na hikha hiam? Satan khemna sung a tungkhin na hihleh na kilehkik zawh nading lamet om lai hi. Nasepna, lawm le gual tawh kituahna, social media tuamtuam pan, zii sung vakna, van lei-nate, kimawlna tuamtuamte le annek tuidawnnate tungtawnin ama kiang hong zol tawntung hi. I nunzia sittel ding hamsa kisa thei hi. A kisam zah sangin annek tuidawnna nikteen puansilh a kipan a khengvalin zatnate in zia-etna sung hong tunpih hi. Tua bangin i nuntak ciangin ei le ei bek kikhualna lianin, midangte kisapna hong mittaw-sak hi. Galpa in i thaneemnate thei-in tua panin hong zawh sawm hi; Topa tawh kizopna kitatin ama khemna sung hong tunpih dingin a hanciam tawntung hi. Tua hi-in nisim masuante sangin Pasian le Ama dikna zong masa dingin hong deih hi (Matt. 6:33); Jesuh in i dinmun hong thei lua hi. Amah i kin loihnate, awlmawhlohnate hong taihilh hi (Mang. 3:14-22).

          Amah in Topa hi mah taleh mihing gim thuaknate a hong thei lo ahi kei hi. Eite mah bangin zia-etna a hong thuak ngei hi (John 4:6). Amah in nuntak hamsatnate a thei hi. Tua bang hamsatnate a tuah ciangin a Pa kiang zuanin gamdaih thungetna tawh zawhna a ngah thei hi (Luke 5:16, Luke 6:12, Mark 1:35, Matt. 14:23). Amah in a Pa tawh hun zatkhopna in a manpha penpen hi, ci-in a thei hi. Tua bangin zia-etna tungah zawhna amu thei hi. EIte aa dingin zong a hoih pen lampi in zia-etna, hamsatna i tuah ciangin Topa kiang zuanin gamdaih thungetna i kisam hi.

          Samson in thatang hatna tawh kidim hi mah taleh siatna sung a tung hi. Banghang hiam cihleh amah in ama hatna tungah a kinga hi. Nisimin eite in zong mawhna zia-etna i thuak hi. Galpa zawh nading lampi in Topa kiang zuanin huhna ngenin i om ding ahi hi. Topa in i thaneemnate thei hi. Amah tawh kizopna-ah zong ama deihna cin zolo ihihna zong thei hi. Mawhna, kicinlohnate zong thei hi. Ahi zongin i phawk ding thu in: i upna in hong domsang ding hi. Upna in Pasian Kammal zakna panin hong pai hi.

Tu laitakin bang zia-etna na thuak hiam? Koi bangin Pasian Kammal in zawhna hong tunpih ding hiam?

 

MONDAY     May 25

Topa Tawh Kizopna-Ah Munkipte

 

          Lai Siangtho sungah Topa tawh kizopna thu mun tampi-ah kigelh hi; Khrih sungah khantoh nading hong daltan theite thu zong tampi kigelh hi. Paul le Jesuh hong hilhnate ngaihsun in.

          “Tua ahih ciangin kip a kisa mi in a puk loh nadingin kikem hen” (1 Kor. 10:12). Samson mah bangin nang le nang a kimuang mi na hiam? Ei le ei kimuanna in pukna hi.

          “ ‘Na hoih na sepna-ah a kineih khem mite bangin kisialkha kei in …, amaute in mite pahtak ngah nadingin nasem uh hi’ ” (Matt. 6:2). Mite tungah nangma hoihna pulaak khawl in. Jesuh mah bangin kiniamkhiat in.

          “ ‘Ken a mantakpi kong gen inah, numei khat mawhnopna lungsim tawh a en mi in a mawh khin zo hi. Na mit in hong puksak leh, khel khia in’ ” (Matt. 5:28, 29). Mawhnopna lungsim hemkhia in. Banghang hiam cihleh tua in Topa tawh na kizopna hong dal hi.

          “ ‘Thukhen kei in. Midangte tungah thu na khen mahbangin nang tungah zong hong kikhen ding hi’ ” (Matt. 7:1, 2). Mite mawhna zongzong kei in. Mawhsakna henkhia in. Topa in thukhenpa hi. Ama thukhenna ngak in” (1 Cor. 4:5).

          “ ‘Ahi zongin ken a mantakpi kong geni ah, na galte na it in. Hong samsia mite thupha na pia zaw un. Hong mudahte tungah thupha na bawl zaw un. Hong bawlsia mite thungetsak un’ ” (Matt. 5:44). Na galte muhdahna khawl in. Honglangbawl mite tungah diktat in. Muhdahna lungsim in Topa tawh kizopna ngawgkai-sak hi. Tua sangin na galte aa ding thungetsak in. Topa tawh na kizopna hong kilamdang na mu pelmawh ding hi. Midangte tawh na kizopzia zong hong kikhel na mu ding hi.

          “ ‘Ken kong cih inah a sanggam khat tungah a heh mipa in thukhenna a thuak ding hi’ ” (Matt. 5:22). Na lawm na gualte tungah na hehnate ahi mah ding hi, ci-in na ngaihsunkha ding hi. Koi bangin na hehna in, mi tawh na kizopna ci nai kei ni, Topa tawh na kizopna sukha hiam? hong suksiatna tawmtawm om kha ding hi. Jesuh in khut tawh sepna, mit tawh mawhna hong vauhilhkholhna kimu thei hi. Tua vauhilhna in bang thu hiam?

Mark 9:42-48 sim in.

________________________________________________________________

________________________________________________________________

          Khut sat khia ding, mittang khel khia ding cih thu in mawhna sung hong tunpih hi, cih thu hi-in, a khengval sawlna tawh kibang hi. Tua dingmahin hong kisawl hi. Ahi zongin Jesuh in mawhna a deih lohzia, mawhna in i nuntakna hong siasak ahihzia hong hilhnopna hi kha ding hi. Bangzahin mawhna in kihhuai hiam?

TUESDAY    May 26

Thukham

 

Khristian hi lo mi khat tungah koi bangin mawhna thu hilh thei ding na hiam? Lai Siangtho in koi bangin mawhna hong hilh hiam? Romans 3:20 le 1 John 3:4 sim in.

________________________________________________________________

________________________________________________________________

________________________________________________________________

          Mawhna in Pasian thukham palsatna hi (1 John 3:4); mawhna in piansak na khempeuh tuamcip hi (Late 51:5, Jer. 17:9). Tua hi-in, thukham in mawhna in bang hi, cih hong lak hi. Thukham in mitlimlang tawh kigenteh thei hi. Nate limtakin muh theihna hong guan hi. Thukham in i zia le tong hong sittel hi. Bek tham loin thukham in Pasian zia le tong le Ama deih thute hong hilh hi.

          Thukham sawmte in (Pai.20:3-17) Pasian khutme in a gelh thukham hi. Jesuh in thukham a thupitna a pulaak hi:”Na Topa Pasian na lungsim khempeuh, na hatna khempeuh, na pilna khempeuh tawh na it ding hi. Hih in amasa thukham hi. A nihna thukham in nang le nang na ki-it bangmahin na vengte zong na it in. Hih thukhamte sangin a lian zaw thukham om lo hi”(Mark 12:30, 31). A genbehna-ah: hih thukhamte in Thukham khempeuh le Kamsangte gelh thu khempeuh kinga hi (Matt. 22:40). Pasian in Sinai Mual a om Israel mite tungah a pulaak thu mahi ho-in, eite tungah zong hong hil thukham hi (Heb. 1:1, 2); hih thukham in mihing le Pasian i kizopna hong hilh hi. Siat theih nading panin hong dal dingin Pasian in thukham hong pia hi. Amah tawh kizopna bek tham loin midang tawh kizopna hoih nadingin thukham hong pia hi. Ahi zongin Satan in Pasian thukham susia dingin a hanciam tawntung hi. Thukham in vangik bangin hong ngaihsunsak hi; tua banah Thukham bangin nuntak khuasakna in itna le suahtakna tawh kituak lo hi, ci-in ngaihsut khialhna hong guan hi. Lai Siangtho hong hilhna-ah Pasian a it takpi ihihleh Ama thupiakte zong zui nuamsak ding hi. Ama thupiakte in vangik bang hi lo hi” (1 John 5:3).

1.  1-5 kikal mat pia ding hi lecin, a nungta Kammal bangi nuntakna in koi munah om ding hiam?

2.  Pasian thukham ka ngaihsut ciangin suahtakna hong pia hiam? ka upna tha hong khauhsak zaw hiam?Koi bangin thukham in ka mawh loh nadingin hong kem hong kem zaw hiam?

3.  Pasian itna nei-in, Ama thukham zong itna nei-in a nungta ka hihleh ka innkuan, ka pawlpi in koi bangin kihkhel ding hiam? Topa le midangte tawh ka kizopna in koi bang dinmunah on ding hiam?

 

 

WEDNESDAY May 27

Thukham le Gospel

          Jesuh mahmah in Thukham tawh kiptakin kizopna nei ahihlam hong hilh hi. A nuntakna khempeuh in tua thukham a tawisang hi.

Matthew 5:17, 18 sungah Jesuh in Thukham thu bang pulaakna nei hiam?

________________________________________________________________

________________________________________________________________

________________________________________________________________

          Nu le pate in tate khalhna nei uh hi. Tua bangmahin Pasian in zong a tate kisiat loh nading khalhna hong pia hi. Pasian in thukham manpha sa mahmah hi. Amah tawh kizopna hoih nadingin thukham hong pia hi. Midang tawh kizop nadingin zong thukham hong pia hi. Tua thukham in i nunzia ding lam hong lak hi. Siat theih nading panin hong cing hong dal hi; Ama sungah i khantoh nadingin thukham hong pia hi zaw hi. A tawpkhakna-ah thukham palsatna hangin kua in gimna thuak hiam? Mawhna thaman kuan pua hiam? Itna in thukham laigil hi, ci-in Jesuh mahmah in hong hilh hi.

          “ ‘Kei nong it uhleh ka thupiakte nazui ding uh hi’ ” ci-in hong sawl hi (John 14:15). Jesuh a it takpi hileh Ama thukhamte i zui nuam ding hi. Ama thukham theitel hi lehang, Amah i it zaw semsem ding hi. Singlamteh mitsuanin, eite aa dingin hong sihna in Amah it ding hong phawksak tawntung hi.

          Hih thu hangin gospel le thukham in a tonkhawm hi. Tua hi-in, thukham kip hi, ci-in a pulaak ihi hi. Thukham nuntakpih ding thupi mahmah hi, ci-in i thei hi. Pasian mai-ah thukham in i mawhnate a pulaak tawntung hi. Thukham in mawhmai-na hong pia thei lo hi. Dikna hong pia thei lo hi. Ahi zongin mawhmai-na kisam ihihlam hong musak hi. Tua thu hangin dikna kitangsam ihi hi. Tua manin mawhmai-na i kisam hi. Thukham theihtelna in gospel i kisapna hong phawksak tawntung hi. Khrih sihna in eite sih tangin sihna hi-in, Ama hong sihna hangin eite in tua sihna tawh a kipelh thei ihi hi. Thukham zuihna tawh dikna kingah hi loin upna tawh dikna kingah hi.

Rom. 3:28, Romans 4:13, Gal. 2:16, Gal. 3:13, Philippians 3:9 sim in. Hih Lai Siangthote in thukham zuihna tawh dikna kingah lohna thu le thukham nuntakpihna tawh kisai bang thu hong hilh uh hiam?

______________________________________________________________

______________________________________________________________

 

THURSDAY    May 28

Theihna le Sepna

 

          Mual tung thuhilhna-ah Jesuh in mihing le Pasian kizopna, mihing le mihingte kizopna thu lim gen mahmah hi. A thuhilhna bulpi hi “Topa, Topa hong ci mi khempeuh in vantung ki- ukna sung lut lo ding hi. Ahi zongin ka Pa deihna bangin a nungta mite bek a lut thei ding uh hi,” ci hi (Matt. 7:21). Tua bangin Topa, Topa a ci mite nunzia a pulaakna-ah, “Ken note kong thei ngei kei hi,” ci-in amaute kiko-na a nial hi. Tua bang mite in a thu bekin theihna tawh a nungta mite hi. Theihna in thupi mah hi. Ahi zongin theihna sangin nuntakpihna in thupi zaw lai hi. Lai Siangtho hong hilh bangmahin “Pasian theihna man nei lo mite in kisiatna a thuak ding uh hi. Bang hang hiam cihleh amaute in Topa a nial uh hi. (Hosea. 4:1, 6, 10). A bei ngei lo Lai Siangtho thuman a pulaak bek tham loin a nuntakpih ding ihi hi. Thuman theihna in hong khel keileh tua theihna in bangmah man lo suak hi.

          “Hih in tawntung nunna hi, a man Pasian hi in Jesuh Khrih hong sawl hi”cih na thei ding uh hi (John 17:3). Vantung lut nadingin a kitangsam thu Jesuh in a pulaakna-ah Pasian deihna bangin nuntakna hi, cih kimu thei hi. A tawpkhakna-ah Topa theihtelna hi; Amah theihna loin Ama deihna in bang hi ding hiam, cih i thei zo kei ding hi; Amah theihtelna i neih ciangin Ama deihna zong i theithei ding hi. Hih in a kitel mahmah thu hi; Ama deihna bangin a n ungta dingin hong lamen hi. Na tate khat in “kong it hi, ci napi-in, na thu hong mang nuam ngei keileh tua itna in itna taktak hi lo ding hi. Amah na it ciangin na nunzia in tua itna a kilangsak ding hi. Tua bang mahin Pasian ka it hi, a ci mi in Ama deihna bangin a nungta ding hi. Pasian deihna bangin nuntakna in Amah i itna a kilangsak hi-in, tuaval i hih theih bangmah om lo hi. Ama hong itna, i it kikna in Ama thupiakte nuntakpihna hi. Hih in kizopna man taktak hi.

Jesuh in mual tung a thuhilhna-ah mihonpite tungah to-na lianpi khat a nusiat hi. Matthew 7:24-29 sim in.

          Jesuh thuhilhna na zak ciangin kikhel cih simloh bangmah dang kimu lo ding hi. Amasa penin i khuazakna kihong ding a, i lungsim in thuman theih nopna tawh a kidim hi. Tua bangin Topa tawh kinai takin kizopna na nei ding hi. Husanna khempeuh in Topa tawh kizopna suak ding hi. I nuntakna in Suangpi, Topa tungah kilam ding hi. Tua in Topa geelna kicing bangin nuntak khuasakna hong neisak thei hi. Tua zawhna in thusim hi lo hi. Mi khempeuh tungah hong kipia hi. Pasian humopna tawh kigelh Ama Kammal, Lai SIangtho in hong hilh hi; Amah in mi khempeuh tungah a hong pia hi. Mimal khat ciat in upna tawh tua hong piak thu a sang thei ihi hi. Upna tawh tua dikna kicing a ngah thei ihi hi. Khrih dikna i ngah khit ciangin i nuntakna in tua dikna a kilangsak hi.

FRIDAY   May 29

Simbeh Ding: Thukham i muhkhialh theih nadingin a man lopi-in kipulaak hi, cih thu lamdangsak ding hi lo hi. Satan in Pasian le Ama thukham a langpan tawntung hi. Jesuh hun a kipan Satan in Thukham hemkhia dingin hanciam mahmah taleh a zozo kei hi. Satan in thuman thutak a hemkhia zo kei ding hi; banghang hiam cihleh thuman thutak in a kip tawntung ding hi. Jesuh in thukham khuavak a tangsak hi; Amah in Pasian deihna le Ama zia le tong hong kilangsak hi (Matt. 5:17, 18); Jesuh nunzia in Pasian in koi bang hi, cih hong hilh hi. Pasian Kammal siangtho zahtakna mi bek in Topa deihna a tangtun zo ding hi. Israel mite in Topa a zahtak laitengun Thukham bangin nungta uh a, matutna amu thei uh hi. Tua hun in David le Solomon uk hun masa sungtengah kimu thei hi. Elijah le Josiah uk sungin upna le a nungta Kammal tungtawnin khanlawhna hong piang hi. Tua thuman in a khel ngei lo thuman hi. Thuman in Israelte gamh lian bel hong suak hi. Tua bangmahin Jeremiah hunin zong tua thuman tawh kipuahphatna kimu thei hi.”Ellen G. White, Prophets and Kings, pp. 465, 466.

 

Kikup Ding Dotnate:

1. Koi bangin tukhang mite in mawhna mu uh hiam? Koi bangin pawlpi in dawngkik ding kilawm hiam?

2. Mawhna in Pasian le mi tawh na kizopna susia ahihna na muh masak in bang hun hiam?

3. Na nuntakna-ah Pasian sawl manna in hamsa hiam, hamsa lo hiam? Bang in sawlmangsak hiam? Mangsak lo hiam?

4. Adventist thu-um mi khat na hihna tawh thukham a tawisangte ihih mah bangin thukham tawh Pasian maipha ngah ding hanciamna koi bangin pelh ding na hiam? Mi dong kawikawi in: Thukhen ni ciangin a siangtho, kicinna tawh kidim Pasian mai-ah na mawhnate hong kilang ding a, thukham in tua maizumna pan hong suakta sak ding hiam? ahih keileh Jesuh dikna bekin hong suakta sak ding hiam?

5. Koi bangin theihna ahih keileh theihlohna in Pasian tawh kizopna sukha hiam? (Pau. 24:3, 13, 14).

 

Tomgenna: I nunna in mawhna sukkhak om lo hi; mawhna in Pasian tawh hong khenkhia hi. Ahi zongin Pasian in i lungsim khempeuh, pilna khempeuh, hatna khempeuh tawh Amah a thei ding le a it dingin hong sam tawntung hi. Tua bangin i nuntak ciangin midangte tungah itna hong neisak semsem ding hi. Pasian i itna le midangte i itna in siatna tuamtuam panin hong dal ding a, Amah tawh kizopna le mi tawh kizopna kipsak ding hi. Pasian thukham in Ama zia le tong hong hilh a, Ama thukham theihtelna a nei hi lehang, Amah tawh kizopna zong hong kip tektek ding hi.